मत्ती 15
15
1ओउः जीक्ओलम्कायः स्याक्ताक्आकान् ओहाङःसैको यरुसालेम्सै फरीसीलम्मा धर्मा स्यान्ओमयःमा येसुकःताङ् वाङ्ती 2“लौ नाङ्कुस् वाह्ओमयःइ दोह् हायःतीलेः ङीकोः आय्कानः तोकानःइ बयःओ छ्यात् जवमाःत क्रुत् आःताः छय्ङ्ताक्ती जेस्आक्माःत जेःनानी” त दाय्ह्ती व्हत्थातो 3“नीङ्खेपाय् परमेस्वर्कोः हुकुम् ल्हेत्ती वाय्ती दोह् हायःतीलेः लयः झाक्ओ छ्यात् जवतेःनानी। 4परमेस्वर्इपाय् ‘लौ नीङ्कोः आमा आपाइ तोओ कुरा पेतो वाय्क्तोलेः जाङ्ह्नु’ त दाय्ह्तीमा ‘सुसुइ आमा आपाकायः प्रनःती नोःनै ओउःलेः न्युम्ह्ती सीपै’ त दाय्ह्तीमा परमेस्वर्कोः हुकुम् मुनाः 5नीङ्खेइ अरु थे कुरा स्यान्ती तोतेःनानी सुसुइ ‘लौ आमा आपाय इ ङाइ नीङ्जीखेकायः बयःसा खेःओ थोक्लम्पाय् नीङ्जीकायः द्याह् बयःसा दोःङल दोह् हायःती दाय्ह्सा इ थोक्लम्पाय् ङ्हालेः परमेस्वर्कायः “ल्हानेःनाङ्” त तोती गम्ङोतो’ त दाय्ह्ती तोतेःनै। ओउःकायःलेः ‘लौ उया ओउः थोक्लम् आमा आपाकायः बयःलाम्’ त दाय्ह्ती 6नीङ्इ इतलेः परमेस्वर्कोः हुकुम् ल्हेत्ती वाय्ती लःलयः झाक्ओ छ्यात् जवतेःनानी। 7नीङ्लो लेखा माःती तोओलम्कायः तय्ह्ती एसाया त तोओइ उय्ह्ले परमेस्वर्कोः कुरा चीःती लेखआकान् बा। 8‘लौ इ मान्तालम्इपाय् नोःओकोः नोःओइ ङाकायः लुङ्ती तोनीतो दोङ् ल्हुङ्हाङःखे सायःसा जुगाङ् ग्याइली। 9ओउः मान्तालम्इ ङाकायः आह्रेलेः म्रोताक्सा बोङःनानी। ओउःमयःइ “लौ इपाय् परमेस्वर् झाक्ओ कुरालेः” त दाय्ह्ती तोनीतो ङाकोः कुरा खेःबाय्ल लयःमयःकोः ल्हुङ्सै जाङ्ह्ओ छ्यात्लम् ह ओउःत स्यान्नानी बा’ त दाय्ह्ती एसायाइ लेखआकान्” त दाय्ह्ती येसुइ फरीसीलम्कायःमा धर्मा स्यान्ओमयःकायःमा तोआथास।
10ओउःमयःकायः एत तोआथास अरु अरु हुम्ओ मान्तालम्कायः गोत्ती वानःती “लौ इ कुरा जुदालेः चीःतीतेः सायःतेःतेःनाङ्स दा। 11दोह्खेलो थोक्लम् मान्ताइ जेःआक्तीको ओउःकोः तुक्हाङः पोक्नाः ओउः थोक्इपाय् मान्ताकायः रेव्ताक्सा जुगाङ् खाय्उलु। मान्ताकोः ल्हुङ्तुक्सै वाङ्ओ कुराखेपाय् ओउःइलेः मान्ताकायः रेव्ताक्सा खाय्लेःनौ बा” त दाय्ह्ती येसुइ तोआथास। 12ओउःत तोआक्तीको येसुकुस् वाह्ओमयः ओउःकःताङ् वाङ्ती “लौ नाङ्इ मेस् तोओ कुरा झाक्माःत सायःती झ्यान्ते ओउः फरीसीलम् ल्हुङ् मल्ह्तो स्याव्आकाय् इत चीःतेःआकान्या” त दाय्ह्ती व्हत्थातो 13“लौ दोह् दोह्लो ङाकोः परमेस्वर् आपाइ लयः गम्उलु ओउःलेः लोनेः वाय्तो स्याव्नाः। 14ओउः फरीसीलम्इ तोओपाय् दोङ् कुरा खेःल बा। ओउःमयः मीक् लोक्ओ मान्तालो लेखा मुनै। यात्चाक् मीक् लोक्ओ मान्ताइ अरु मीक् लोक्ओ मान्ताकायः ज्योती लात्ती ल्याम् छ्यानःसालेः बोङःचौ त खेःया ओउः नीस्चाक्लेः ल्याम् मीह्ती ब्रक्त तोन्नाःच। ओउःतलेः ओउः परमेस्वर्कोः कुरा चीःमालो फरीसीलम्इ अरुकायः स्यान्सा बोङःनानी त खेःया सुइमा चीःसा खाय्नीली” त दाय्ह्ती येसु दाय्ह्आ। 15ओउःत दाय्ह्आक्तीको “लौ नाङ्इ मेस् तोओ तुक्कोः कुराकोः माने दोह्लो त तोताङी दै” त दाय्ह्ती पत्रुस्इ तोथातो 16“नीङ्इमा चीःतेःनीली यादो। 17दोह् दोह् जेःगालम् मान्ताइ जेःनीतो ओउःलेः मान्ताकोः दोङ् ल्हुङ्खेहाङः पोक्माःत तुक्पुन्खेहाङः पोक्लेःनाः पोक्आक्तीको ग्ल्युङ्ह्ती ओत्ती वाय्ओआः बा। 18ओउःत खेःया जेःगालम्खेइ मान्ताकायः रेव्ताक्सा खाय्उलु। दोह् दोह् रेव्ओ कुराखे मान्ताकोः ल्हुङ्सै वाङ्नाः ओउःइलेः रेव्ताक्सा खाय्नौ। 19मान्ताकोः ल्हुङ्सै सबै रेव्तो कुरा वाङ्नाः। मान्ताकोः भीत्रहाङः दोह् मुनाः दाय्ह्सा कुःओ ल्हुङ् अरुकायः सात्सा ल्हुङ् अरुकोः बुधी आलःसा ल्हुङ् ल्हास्या जाङ्ह्सा झाक्ओ ल्हुङ् मुनाः अरुकायः माःती रेव्तो तोओ ल्हुङ् इ सबैलेः मान्ताकःहाङः मुती झ्यान्ते ओउःकायः रेव्ताक्नाःथै। 20ओउः खाल्कोः ल्हुङ्खेइपाय् मान्ताकायः रेव्ताक्थातो क्रुत् आःताः जेस्माःतो जेःओखेइ मान्ताकायः गलमा रेव्ताक्थाल” त दाय्ह्ती येसुइ लयःकुस् वाह्ओमयःकायः स्यान्ती तोआथास।
21ओउःतलेः तोआथास ओहाङःसैको येसु ओउः देस्सै फेती तायर् सीदोन्त तोओ नीस् सहर्कोः फोनीस्या देस्ताङ् दाह्ती वाङ्आकाय्। 22ओहाङः दाह्आक्तीको यात्चाक् कनानी जात्कोः मोमःचोः ओउः देस्सै वाङ्ती “अ प्रभुय नाङ् दावुद् राजाकोः प्लोमःदाने लेःतेःआः। ङाकायः योनःती योउ दै। ङाकोः चोःद्याङ्कायः लान्इ आन जोक्तो ङायःआबत्ताङः” त दाय्ह्ती गोःती येसुकायः काःहाल्लाङ् गुल्ह्उतो येसुखे दोह् तमा दाय्ह्ल। 23ओउःत झ्यान्ते येसुकुस् वाह्ओमयः वाङ्ती “लौ इइपाय् ङीकायः आन गोःती गुल्ह्आतय्ही ओउःकायः ल्होक्उ दै” त दाय्ह्ती येसुकः तेइतो 24“ङापाय् इस्राएल्कोः मान्तालम्कायः झुङ्आले दल्ताक्साकायः ल्होक्ओआः ङ” त दाय्ह्ती येसु त्याङ्आ। 25ओउःत त्याङ्आक्तीको ओउः मोमःचोः येसुकायः ताङ्ह्ताक्ती बाःती वाङ्ती “अ प्रभुय ङाकायः काःहाल्ओ सायःची दै” त दाय्ह्ती येसुकः आन तेआ 26“लौ कीम्कोः हौलम्कायः आःताः ल्हामाःत ओउःकोः जेःगालम् कुयःकायः ताती बयःसा स्याव्ल” त दाय्ह्ती त्याङ्ती येसुइ ओउः मोमःचोःकोः ल्हुङ्तुक् योती तोआकान् 27“माः प्रभुय स्याव्सापाय् स्याव्मालो लेःआः कुयःइपाय् हौलम्इ रेस्ओ य्हुन्ह्लेः जेःसा खाय्नौ” त दाय्ह्ती ओउः मोमःचोः त्याङ्आ। 28“लौ उया ङाकायः आन पेतोतेः ङ्हाम्तेःआची। नाङ्कोः ङ्हाम्झ्याङ्कायः नाङ् ङ्हा तेओ कुरा ङाइ द्याह् बयःनेःनाङ्” त दाय्ह्ती येसुइ तोआथै। तोआक्तीको ओउःइ तोओकुस् ब्रक्तलेः ओउः मोमःचोःकोः चोःद्याङ् सेलः स्याव्आ। 29एत हायःआक्तीको येसु ओउः देस्सै आल्ती गालील त तोओ ताङ्ह्ओ दुम्हान्ताङ् पाय्ह्ती वाङ्आकाय्। 30गालील दुम्हान्ताङ् वाङ्आक्तीको नाःतो जीक्ओ मान्तालम्कायः येसुकःताङ् वानःआकानी। वाह्सा खाय्मालो मान्तालम्मा च्यवःसा खाय्मालोमा नोःसा खाय्मालो मान्तालम्मा सबैकायः वानःती येसुकोः दोम्हाङः न्यास्आकानी ओउः न्यास्ती गम्ओ जीक्ओलम्कायः येसुइ स्याक्ताक्आथास। 31ओउः ङ्हा जीक्ती मुओलम्कायः स्याक्ताक्ओ च्यवःती ओउः हुम्ओलम् आन ग्याङ्ह्ती “लौ इइपाय् नोःसा खाय्मालोकायः नोःमाताक्नौ। वाह्सा खाय्मालोकायः वाह्माताक्नौ। च्यवःसा खाय्मालोकायः च्यवःमाताक्नौ” त दाय्ह्ती इस्राएल्कोः परमेस्वर्कायः लुङ्ती ताङ्ह्ताक्आकानी।
32ओहाङःसैको येसुइ लयःकुस् वाह्ओमयःकायः गोत्ती “लौ इ मान्तालम्पाय् ङाकुस् सुम् दीन्च्युक् मुआक्ती द्याह्पाय् ओउःमयःकोः जेःगा नाःल। ओउःमयःकोः योङ्क्राय्ओ योती ङाकायः आन योनःताक्आताङः। लःलयःमयःकोः कीम्ताङ् जेःगा बयःमाःत ल्होक्नाङःसु त खेःया ल्याम्हाङः योङ्क्राय्इ तोय्ङ्ती तोन्चै” त दाय्ह्ती येसुइ तोथासतो 33“इलो खेःओ मान्ता याक्मालो राङ्हाङः गत हायःती इच्युक् नाःतोलम्कायः जेःसा सोर्चाःथास” त दाय्ह्ती येसुकुस् वाह्ओमयःइ व्हत्आथै। 34“नीङ्कःगन गुच्युक्केरः लाङ् मुनाः ती” त दाय्ह्ती येसुइ व्हत्थासतो “सात्केरः लाङ्मा यात्नीस् र्युम्ह्ङाःमा मुलेःनाः” त ओउःमयः दाय्ह्ती त्याङ्आकाय्। 35-36ओहाङःसैको येसुइ ओउः हुम्ती मुओलम्कायः लाङ्गनःहाङः च्युङःताक्ती ओउः सात्केरः लाङ्मा र्युम्ह्ङाःमा त्याक्ती परमेस्वर्कायः “च्युता” त तोआकान्। इतलेः “च्युता” त तोआक्तीको येसुइ लाङ्मा ङाःमा फन्ह्ती लयःकुस् वाह्ओमयःकायः ल्हाती सबैकायः दोल्कावःताक्आकान्। 37ओहाङःसैको ओउः दोल्कावःओ जेःगा जेःती सबै तुक् कोस्तीलेः जेःआकानी। जेःआक्तीको वेओ य्हुन्ह्लम् रोत्ती सात्गोता धाकर्हाङः ब्लीङ्तो काआकानी। 38सात्गोता धाकर्लम् ब्लीङ्तो कानीतो ओउः हुम्ती मुओलम्पाय् चार् हजार् गोय्चोः खेःइतो अरु मोमःचोःलम्मा हौलम्मा खेःइतो। 39ओहाङःसैको य्हुन्ह्लम् धाकर्हाङः काआक्तीको ओउः हुम्ओ मान्तालम्कायः पाय्ह्सा ल्होक्आक्तीको येसु दोङ्गाहाङः लन्ह्ती मग्दान् त तोओ देस्ताङ् वाङ्आकाय्।
© 1993 Wycliffe Bible Translators Inc., All Rights Reserved.