ACTS 16
16
Timothi Gi: Polu Yo' Sila Thang: Cang Lo" Khyoo:
1Polu gi Debe yo' Lustra voogung khyoo: yhe: lo- Lustra voogung moo Timothi ga: da" Khristain phung byu dayug nyid nyid. Nya: myhi' gi Yuda Byumyu" Khristain nghoid wigi Grid" byumyu" nghoid. 2Tomothi gi Lustra voo bang: yo' Ikoni voogung moo nyid da" loem" jeing" mo, dangain" bang- coem, coung" byid: nyid su: nghoid. 3Polu gi Timothi ri nyang: yo' dage" shu" yen" noug yoomo nyang: ri shooyid thang: yham" da" thung" koid byid: khasu" wim gari nya: phoo gi Grid" byumyu" nghoid ziri hau: gyoo: mo mo, si' byid: boem yoomo Polu gi hougsu" koid byid: khyo" nghoid. 4Nyang: nu" gi voogung joem cang lid: jang: lo" boem wigi Yerusalem voomoo" moo nyid da" lagyoo: yi yo' phung ludaid' yi wigi yoem: byid: to" da" loem" jeing" bang- phau" cang loo" wa da" tarha" nyangnu" ri byid: wigi hau: tarha" joem ri phau" cang loo" ca" da" khyoo: ri jhoug" byid: ago". 5Houg: yoomo phung byu yi gi-hau: loem" jeung" khyoo: moo je" geung: teung lo wigi nyid" khang" moo" phung byu je" myo: loung: lo nyid ago".
Troa Voogung Moo Polu Myang Da" Yoeb, Myang.
6Houg: lang" gyeungshang: da" Venyi gi nyangnu" ri Asha mung" gyoo: moo mungdang: ri kho" kyoo" wa akhang" abyid: yoomo nyangnu" gi phrugi mung" yo' Galile mung" gyoo: khyo" so" lid lo. 7Nyang: nu" gi Musi mung" moug: kyoo" moo ju" yhe: loo" lang" gi Nyang: nu" gi Bithuni mung" khyoo: yhi: wa ga: soin' ago". Nghoid loug we' Yesu da" Venyi gi nyangnu" ri akhang" abyid: nghoid da. 8Houg: yoomo nyangnu" gi Musi mung" ri lid: yhe: lo" lho: Troa voogung moo ju" yhe: lo" boem bye. 9Polu gi myen" ri yoeb, myang myang jang" moo Makedoni byu dayug gi yab, jo, lho: Makedoni mung" khyoo: gu: re" lho: nyangnu" ri re" khyoid yu we' ga: mho' nyid ziri myang. 10Polu gi he: da" yoeb, myang ri bain myang lang" - nyangnu" gi Makedoni mung" khyoo: yhe: loo" wa shid re" soin' nyheung boem bye. khasu" wim gari Makedoni mung" moo nyid, mo, ri ludang: seig kho" kyoo" byid: wa shid re" Mangsoo gi ngoonu" ri khe: yu zi nghoid bye" ein: ngoonu" myed jhoo: yoomo nghoid.
Philipi Voogung Mo Ludi Loem" jeung" Lo Da" Khyoo:
11Hougsu" wigi ngoonu" gi lhid' khyo" wigi Troa mo zi Samothrake gugyoo: kang: khyo" dain: za: gu: phyed' yhe: lo" wigi thang: nyid rigi Neapoli voogung moo ju" yhe: lo" boem bye.
12Ngoonu" gi hau: voogung wigi Roma koluni we' nghoid da- Makedoni mung" moo myoo" sho' nyid" yhe: theung: nyid boem. 13Dougno: Bidnyid ri ngoonu" gi Yuda byumyu" yi zeung: foem: lho: akyu" mho' da" joyoo jo, wa ein: jhoo: yoomo voogung nghe: shoid, gyid yam, khyoo: thu' yhe: lo" wigi yhe: zhoung: jo, ri houg: moo zeung: foem: re" da" myiyi: yi ri kho" kyoo" byid: boem bye. 14Houg: bang: da" phung: mo Thuathra voogung mo pain" mi, phaga: koid da" Ludi ga: da" myiyi: we' dayug bo. Nyang: gi Mangsoo ri coung" pid' noku da" myiyi: dayug nghoid wigi Polu kho" kyo" nyid da" mungdang: ri nheigloem: zhug zhug za: tam" gyo: yu wa shid re" aseing: gi nya: nheigloem: khoem" duang: ri phang byed. 15Nyang: yo' nya: yhoem: byu yi gi Babtisma bain kham: yu thang: ri Ludi tid zigi Ngoo gi Aseing: ri gi" gi, nyang: loem" jeung" zi nghoid bye" - ein: nanu" myed loem, bye: nghoid rigi nga" yhoem: moo re" beung" nyid yu" ge'. ga: ngoonu" ri lhoung: da- houg: su" wigi nyang: gi ngoonu" ri ngoug oung: yu da.
Polu Yo' Sila Ri: Philipi Voogung Mo Thung: Moo Myheug Lhung Shau
16Bidnyid danyed" moo ngoonu" gi hau: akyu" mho' joyoo khyoo: yhe: lo" nyid boem da" uri akhyeung" yu vang ci: da" - goem, phain" se' phain" da" join' myhi, dayug yo' ngoonu" shau" go. Nyang: gi goem, phan" phain" lho: wigi join' seing: ri ngei myoo" sho' kung: byid: nyid su: nghoid. 17Nyang: gi Polu yo' ngoonu" da" thang: moo cang lho: hid: bang: gi myhang: thang da" Mangso dei zoo: yi nghoid ago" - nyangnu" gi ngoonu" khyoid yu da" khyoo: khasu" shau" wa da" khyoo: ri tidfu" yen" mo, nghoid da- ga: wigi nyho: tid nyid. 18Hau: myiyi: nu" gi hougsu" myoo" sho' nyid" nyho: nyid yoomo Polu gi nheig gye" yoo: nau, lo wigi lheung: lo lho: Yesu khristu da" myeing ri lang: wigi ngoo nang ri amyeing" byid: ba- nya: khoug: mo phang: thu' loo" we' ga: hau: akhyeung" da" yu ri tid kaid'. Houg: lang" jang: hau: akhyeung" da": yu gi myiyi: nu" akhoug: mo, phang: thu' lo" byug bye. 19Hau: myiyi: nu" da" join, seing: gi nyang: ngei yo" nyid da" khyoo: jed" byug. ziri si' lang" nyangnu" gi Polu yo' Sila eig yug ri myheug yu lho: kid" vang" moo zeung: foem: nyid da" amyeing" yoo" mo, jhang khyoo: she: khyoid' yhe: lo" boem ago". 20Nyang: nu" gi nya: eig yug ri Roma zoug: yi da" shid' moo shu" vang yhe: lo" lho: He: eig yug gi Yuda byumyu" zheung: nghoid lho: wigi nya: eig yug gi ngoonu" da" byumyu" yi ri ayoug: akhi" bui" nhang: nyid ago". 21Ngoonu" da" tarha" yo' adu go" da- thung" khin' ri nya: eig yug gi jhoug" byid: nyid ago". Ngoonu" gi Roma byumyu" yi nghoid wigi he: da" thung" khin' rigi ayo" lhoem: yu- ayo" phau" cang ga: tid ago". 22Houg: lang" mung" byu yi we' - houg: bang: thang: bo dab, lho: Polu yo' Sila eig yug ri gyi bo koid lho: sarhi' koid ago". Houg: yoomo zoug: yi gi Polu yo' Sila eig yug ri byimi, lang" ceug pyam' byid: lho: gyoem, thoung" wigi baid' wa da" amyeing" byid: kaid' ago". 23Hougsu" nya: eig yug ri dam xoo" sho' - bain, baid' yu thang: ri thung: khoug: moo yhe: lhoung to" boem bye. Nya: eig yug ri teung" teing myheug lhoung too" wa shid re" nyangnu" da" thung: agyi, phoo ri amyeing" khyo, to" ago". 24Thung: agyi phoo gi hau: da" amyeing" ri yo" yu ci: lang" nya: eig yug ri thung: yhoem: akhau: yab, khyoo: kaid' lho: khyid: moo we' kyoem" xang lho: lhoung to". 25Gam, gung myen: koo: moo gi Polu yo' Sila eig yug gi Akyu" mho' lho: Mangsoo ri coung" nghei ji: khoin" ri khoin" nyid ago". Thung: byu gooji yi gi hau: ziri tam" gyo: lho: nyid boem. 26Hau: uri nyeigdain tung" - myid leig gyi" sho' leug lo wigi thung: yhoem: apoem: we' dei, ga: nain" lo. Houg: lang" jang: khoem" duang: joem gi dangain" bang" loo" khare" wigi thung: byu yi dangain" bang: da" jangcoo" doem, joem gi gyoid, gyo" lo" byug boem bye. 27Thung: agyi phoo gi yhoeb, jo, jang" mo so" re" lho: thung: yhoem: mo, khoem" duang: joem dangain" bang" jo, ziri to' myang lang" nyang: gi thung: byu yi dangain" phang: thu' loo" wam: bye"- ga: myed wigi nya: sham: coin" ri she: yu lho: nyang: ri thau" said' wa ga: soin' loo" bye. 28Nghoid loug we' Polu gi nya: thui: ri myhang: thang mo nyho: yoid, kaid' lho: Nanya: gung ri ci" we' akoid'- ngoonu" dangain" mo, hid: moo danyed nyid boem. 29Thung: agyi phoo gi myedoem' mho' yu lho: gei, vang re" wigi Polu yo' Sila eig youg da" khyid: yang: moo ko, ko, nain" zi re" goeb, pid' to. 30Hau: thang: ri nyang: gi nya: eig yug ri tung gung khyoo: shu" thu' lo" lho: nheig bo eig yug we" - ngoo khyoid yu zi shau" sho' khasu" koid wa lha". - ga: myed: yu". 31Nya: eig yug gi Aseing Yesu ri loem" jeing" we' - houg: lang" nang yo' re" da" yheom: khau: byu yi khyoid yu zi shau" wa nghoid- ga: phoug tu. 32Hau: thang: ri nya: eig yug gi nyang: yo' nya: yhoem: byu dangain" mo, ri Aseing: da" mungdang: kho" kyoo" byid: ago". 33Hau: myen, nyang: thung: agyi phoo gi nya: eig yug ri shu" yu lho: nya: eig youg da" dam noo joem ri ced" san byed. Nyang: yo' nya: da" yhoem: byu yi dangain" mo, gi houg: lang" jang: Babtisma ri zheung: kham: yu boem bye. 34Hau: thang: ri nyang: gi Polu yo' Sila eig yug ri nya: yhoem: khyoo: shu" lo" wigi zoo: noem we' doo" zhoo" bye. Thung: agyi phoo yo' nya: yhoem: byu yi gi Mangsoo ri shau" loem" jeung" lo boem bye: yoomo gye" nyang: ngeibu: gau yi nyid boem bye. 35Thang: nyid nab, kyoo ri Roma amyeing" ci: mo, gi pya: da: zoug: ri hau: eig yug ri lhoid, kaid' ge' ga: da" amyeing" yo' dage" nhang: kaid' bye. 36Hougsu" wi hau: thung: agyi, phoo gi Polu yo' Sila eig yug ri Zoug: yi gi nang yo' Sila ri nhang: kaid' wa da" amyeing" khyo' kaid abye: go" - Houg: yoomo re" eig yug ngei pyoo: tung" za: loo" loo: ge" ga: tid kaid' da. 37Nghoid loug we' Polu gi hau: da" pya: da: zoug: yi ri nga" eig yug gi Roma mung" byu nghoid- nyangnu" gi nga" eig" yug ri ce" yooboo we' amyang zi mung" byu yi da" shid' khoin" moo gyoem, thoung" wigi baid' lho: thung: moo lhoung kaid' boem, hau: lho: akhid" nghoid lang" yen, gi nga" eig yug ri sam" zoo: nhang: kaid' noug goonhung: lha". khasu" se' gi wa Roma zoug: yi nyang: hid: khyoo: re" wigi nga" eig yug ri re" khe: thu' yu goo" baja" - ga: tid da. 38Pya: da: zoug: yi gi hau: dang: ri Roma zoug: yi ri lo" tid kyo" ago". Nyang: nu" gi Polu yo' Sila eig yug gi Roma mung" byu zheung: nghoid ziri shaug" gyoo: lang" gi gyo: gyoug nyid boem ago". 39Houg: lang" nyangnu" gi yhe: lho: Polu yo' Sila eig yug ri zheung: toung" pain: ago". Hau: thang: ri nyangnu" gi nya: eig yug ri thung: khoug: mo yhe: shu" thu' yu lho: hau: voogung mo thu' loo" wa shid re" nya: eig yug ri mho' ago". 40Polu yo' Sila eig yug gi thung: yhoem: mo thu' lo" lho: ludi da" yhoem: khyoo: zheung: yhe: lo" ago". Houg: moo loem" jeing" bang: yo' zheung: shau" go" wigi nyangnu" ri yoem: byid: dang: ri bain tid lang" nya: eig yug gi hau: voogung mo doem thu' lo" ago".
Lacid Bible © Bible Society of Myanmar, 2009.