ACTS 19
19
Ephesu Voogung Moo Polu Ju" Yhe: Khyoo:
1Apolo gi Korinthu voogung moo nyid da" uri Polu gi hau: mung" agung khyo" so" lid: lo" wigi Ephesu voogung moo ju" lo". Hau: voo moo nyang: gi loem" jeing" mo, dayham" ri yhe: myang wigi 2Nyang: nu" ri nanu" gi loem" jeing" bang: bue" loo lang" gyeungshang: da" Venyi ri yo' Kham: yu bye: goo" la"» ga: myed.
" Nyang: nu" gi gyeungshang: Venyi nyid ga: ziri ngoonu" ashug" gyo: yu" shi" - ga: phoug tu" ago".
3" Houg: Lang" Polu gi houg: ri nanu" ce: noem Babtisma kham: yu go" la"» ga: myed:." Nyang: nu" gi Yohan da" Babtisma ri kham: yu - ga: tid boem. 4Polu doem tid zigi Yohan da" Batisma gi nyangnu" da" yooboo mo nheigloem: thed' loo wa shid re" nghoid- Yohan gi nya: thang: moo ju" ri wa da" Yesu ga: su: ri loem" jeung" boem wa shid re" Israela mung" byu yi ri tid zi nghoid- ga: tid kyo. 5He: da" dang: khoin" ri nyangnu" shaug" gyoo: lang" gi nyangnu" Aseing Yesu da" myeing mo Babtisma ri zheung: kham: yu boem ago". 6Polu da" lo, nyangnu" tho' moo ki" byid: lang" gyeungshang: da" Venyi gi nyangnu" da" atho' moo gyoo" lo wigi nyangnu" gi gooja: myeing" kaid' lo boem lho: Mangso mungdang: ri we' lapi: pe: lho: tid lo boem ago". 7Nyang: nu" gi daxe: eig yug koo: nghoid boem ago". 8Polu gi lham" moo" soem" khyab, koo: - Yuda tarha" jung moo main: main: yhe: lho: wigi mung" byu yi yo' agyug avoem, loo: zheung: tid ngeig go" nyid boem lho: Mangso mungdain: ri se' kham: yu boem, goo" wa shid re" nyangnu" ri kho" kyoo" byid: nyid. 9Nghoid loug we' nyangnu" mo dayham" bang: gi nheigloem: thain: nyid boem yoomo aloem" jeung" boem nghoid ago". Houg: yoomo nyangnu" gi mung" byu dangain" bang: da" shid' khoin" moo Aseing: da" khyoo: ri age khyo" tid phue: pyam' byid: boem ago". Houg: yoomo polu gi loem" jeing" bang: shu" lho: nyangnu" mo zheung: thu' lo" wigi Turanu ga: su: da" phajhi" jung moo nyid" khang" moo" mungdang: ri tid go" koin, da" zoeb, phung ri koid nyid boem ago". 10Hidsu" eig zain' loem: loem: koid lho: wigi Asia mung" moo zheung: nyid da- Yuda byumyu" yi yo' Tungbau byumyu": yi dangain" mo, gi Aseing: da" mungdang: ri zheung: shau" gyo: boem ago".
Skeva Da" Nya: Zoo: Yi Nyhed' Yug.
11Mangsoo gi Polu khyo" wigi mau" pho" alhoo: again ri zei: shug byid: nyid. 12Polu ci: da" phajed' yo' pain" phyid" cu" joem rilang"- noo phyoo" shau" mo, yo' yu vang jo, mo, jhang khyoo: ci: yhe: lo" ri noo phyoo" shau" bang: gi ge, sain, lo wigi yu joem we' nyangnu" vang nyid mo, jang" mo phang: thu' lo" boem ago". 13Yu joem ri cang khaid thu yen" da - Yuda byu yi dayham" we' Yu joem ri khaid thu pyam' boem wa shid re" Aseing Yesu da" myeing. ri lang: lho: koid yu" boem ago". Nyang: nu" gi Polu kho" kyo" da" Yesu myeing ri lang: lho: nang ri ngoo amyeing" khyo, ga: akhyeung" da" yu joem ri tid ago". 14Yuda khainjung zeing Skeva da" nya: zoo: yi nyhed youg bang: we' - houg: su" yhe: koid yu" ago". 15Nghoid loug we' akhyeung" da" yu gi nyangnu" ri Yesu ri ngoo se' - Polu ri we' ngoo se' nanu" loem: hang" nghoid go" ga: myed: 16Hau: da" yu vang ci: su: gi nyangnu" ri aphoug" akhyoid' koid lho: nyangnu" dangain" bang: ri oung: pyam' da- nyangnu" gi dam zheung: dab, lo" boem ziyo' hau: yhoem: mo shoocen: doem: phang: thu' lo" boem ago". 17Ephesu voogung moo nyid da" Yuda byumyu" yi yo' Tungbau byumyu" yi dangain" bang: gi hau: ludang: ri zheung: shaug" gyoo: lang" gyoug lo lho: Aseing Yesu myeing ri je" wigi coung" nghei nyid boem. 18Loem" jeing" bang: myoo" sho' ju" re" boem wigi nyangnu" zei: shoid lo da" yooboo joem ri mung" byu yi da" shid khoin" moo bang bang za: yhen: yu boem ago". 19Fa" zoo: lung zo: nyid mo, myoo" sho' bang: gi nyangnu" da" mougsoug" pug joem ri zheung: ci: re" lho: mung" byu yi da" shid' moo zheung: nghe, pyam' boem ago". Hau: mougsoug" pug joem da" gu jhoo: ri soin: yu" boem, ri ngei din" ga" wim: moin kyab, koo: moin: zi nghoid. 20Hid: yhang: ti" yoem: moo" bo khyo" Aseing: da" mungdang: gi byo sain lo" wigi yoem: so' yo' gyi: sheung: lo nyid.
Ephesu Voogung Mo Byu Yi Lu: Fu: To Lo Da" Khyoo:
21He: da" moo" bain bue" lid lo" da" thang: ri Polu gi Makedoni Mung" yo' Akhaia mung" khyo" so" lid lo" wigi Yerusalem voomoo" khyoo: yhe: loo" wa shid' re- myed phyed' too" - Nyang: gi ngoo hau: voogung moo bain ju" yhe: thang: ri Roma voomoo" khyoo: we' ngoo ju" lo" yu" ca" ga: tid. 22Houg: yoomo Polu gi nyang: ri bo pang" da" Timothi yo' Erastu ri makedoni mung" khyoo: nhang: kaid' lho: nyang: gi Asia mung" moo dayo, daboin: theung: nyid jo, da. 23Hau: ayo, moo Aseing: yesu gang mo Ephesu voogung moo yau: khe" khyoo: azeing bue" thu' loo bye. 24Demetri ga: da" ngei sheing: shau, da" lo, moo" zei: su: dayug gi Atemi phara" myhi, da" ngei yhoem: soolhoo: nu" joem shoin" lho: nya: moozoo" yoomo lo, moo" zei: bang: ri ngei gye" yo" shoo: nhang: nyid. 25Houg: yoomo nyang: gi nya: moozoo" moo lo, moo" zei: mo, dangain" bang: ri we' - nyangnu" yo' dakhyoo" lo, moo" zei: zoo: bang: gootu: dangain" bang: ri we' khe: zheung" yu lho: wigi byen, cang" yi we"- ngoonu gi he: da" lo, moo" zei: lho: nyid gi yab, ge, nyid ziri nanu" nyang: si' gu nghoid abye: go. 26Akhid" gi hau: da" Polu ga: su: gi ce: noem koid nyid da" khyoo: ri nanu" nyang: shaug" gyoo: bye: ziyo' - hau: zigi myang nyid gu nghoid ago". Nyang: tid zigi-byu lo, wigi koid da" phara" soolhoo: joem gi Mangsoo anghoid ga: tid wigi He: Ephesu Voogung bang: yo' Asia mung" goin" moo nyid mo, alug dangain" ziri yo" loem" jeing" sho' tid oung: too" bye. 27Houg: yoomo hid: ngoonu" da" moozoo" ri myeing ze" shoin' pyam wa zi gyoug ca". Houg: za: we' anghoid shi" - gyi: sheung: da" phara" yhoem: gi ci" we' anghoid khari" loo: wa. Houg: lang" Asia mung" bang: dangain" yo' mougmyid goin" mo, coem goeb, pid' nyid da" phara" myhi, da" phung" yoeb, ri phue: lo" byug nhang: wa zi nghoid- ga: tid. 28Hau: da" dang: joem ri zheung: shaug" gyoo: lang" hau: lo, moo" koid zo: nyid mo, gi nheig zheung: gyo: yo: lo wigi Ephesu voobyu yi da" - Atemi gi gyi: sheung: jo, zi nghoid- ga: nyho: lo ago". 29Hau: da" mo, thei" mo, yug lu: fu" go" lo da" khyoo: gi davoo gung goin" moo byeung" lo wigi byu yi gi Polu yo' gyung: soo" byen, cang" nghoid da- Makedoni mung" byu- Ge-u yo' Aristaku eig yug ri myheug yu lho: Pui" mo goo" jang: khyoo: myab, myab, shu" vang yhe: lo" ago". 30Polu nyang: gi-Meing: byu yi da" shid khoin" khyoo: yhi: nau, nghoid loug we' -Loem" jeing" bang: gi nyang: ri ayhi: nhang: nghoid ago". 31Polu nya: bidnoem yi zheung: nghoid da- mungdain moo amyeing" yoo" mo, dayham" we' pui" mo, goo" jang: moo ayhe: nyid shug wa shid re byu nhang: kaid' wigi Polu ri mho' tid boem. 32Hau: ayo, moo byu yi gi houg: su" mo, thei" mo, yug phoug: go" nyid boem yoomo mung" byu yi gi dayham" daja: ga: nyhoo: go" nyid boem. Nyang: nu" mo myoo" sho' bang: gi nyangnu" ce: noem koid phoug: go" nyid da" Khyoo: ri lang" asi shi" nghoid ago".
33Yuda byu yi gi Alexandru mung" byu yi da" shid' vhu" khyoo: yhi: nhang: kaid' yoomo mung" byu yi dayham" gi Alexandru we'-mo, thei" mo, yug lu: fu: go" lo da" khyoo: yo' sen: wigi nghoid wa"- ga: jho: ago". Houg: lang" Alexandru gi mung" byu yi ri sam" zoo: nyid boem wa shid re-lo, tu, tu, lho: nyang: ashoid da" khyoo: ri tid yed: yu wa shid mo, yoem: kaid' nyid. 34Nghoid loug we' nyang: gi Yuda byu nghoid da" khyoo: ri mung" byu yi zheung: se' yu" boem lang" gi Ephesu voogoung da" Atemi gi gyi: sheung: jo, ga:-eig na: yi: koo: nyangnu" dangain" mo, dage" za: zheung: deug yoid nyid boem ago". 35Lo" thang jang" moo gi voo goung jare" phoo gi mung" byu yi ri sam" zoo: tam" too" nhang: lho: Ephesu voobyu yi we' - Ephesu voogung gi gyi: sheung: da- Atemi phara" yhoem: yo' moug: khung: mo gyoo" re" da" lug zeing ri zoem: ci: da" voogung nghoid ziri yug khang" moo" se' ago". 36Hang" we' he: da" khyoo: rigi ayo" ngeug pyam' nghoid ago- houg: yoomo nanu" gi sam" zoo: nyid ri gi bye- daja: ja: ri anau, yu" loo: koid wa zigi a eung: nghoid da. 37Nanu" gi he: eig yug ri phara" yhoem: ri lhoid zo: zi we' anghoid- Nanu" da" phara" myhi, ri tid japhue: pyam' byid: zi we' anghoid zi he: joyoo khyoo: dashu" re" ago". 38Demetri yo' nya: lo, moo" zei: mo, gi dayug yug ri yooboo foin: nau, nghoid rigi tarha" yung" phang to" ziyo' - amyeing" ci: bang: we' nyid nyid ago- tarha" yung" moo yooboo ri ge, tid da. 39Nghoid loug we' nanu" gi hau: tho' je" je" wigi - daja: ja: ri da tid noug shigo" nghoid rigi mung" byu yi da" tarha" vang zoeb, phung moo" moo tid phyed' yu boem ca" wa nghoid. 40Khasu" wim gari - akhid" nyid" bue" lo da" mo, thei" mo, yug lu: fu: go" da" moozoo" gang: mo ngoonu" ri yooboo foin: loo wa ziri gyoug ca". Hid: yhang: ti" mo, thei" mo, yug lu: fu: go" da" khyoo: gi Ce: noem yoomo bue" lo da" khyoo: ri toin" shid' wa ziyo' akhyoo" zhug zhug za: zei: wa khyoo: ngoonu" ayoo"-ga: tid. 41He: da" dang: bain tid thang: ri nyang: gi mung" byu yi ri phang: loo" nhang: kaid.
Lacid Bible © Bible Society of Myanmar, 2009.