Mateus 3
3
ONTOPORUA 3.
Ehuvico netshatsho rja Johannes
1Momasiku ngeja Johannes omutshatshi okue ja tu uvica mombuga ha Judea.
2Nde ta ti: Idirurureni, oshoka otshirongo tsheguru otshe ja popepi.#3:2 Mateus ta ti: Otshirongo tsheguru, ndere Markus na Lukas: otshirongo tsha Karunga: nokutja Eklesia.
3Ohe ngu a shunganekerue komuprofeti Isaias, ta ti: Eui rjomuhigidi mombuga, pareni ondjira ha Muene, ukiririceni omapora ge.
4Ndere Johannes muene okua zarere onguuo ha tungua nomafufu geengamero nepaja rjiipa motshija; eendia de oda ri eembashu nomagadi geenjutshi.
5Jo mu Jerusalem oje ja ku he no jo mu Judea no jiihende ja Jordan.
6Je epurura eendjo dauo, jo ja tshatshua ku he.#3:6 Etshatsho rja Johannes: edidiriko ike rjehidirururo, rjo inari dima po eendjo, oshoka Jesus ina futa natango eendjo.
7Ndere sho a mono, aafariseji ojendji naasaduseji oje ja ku he ja ka tshatshue, okua ti ku jo: Jana jomafu ne, ore e mu ronga okuijageka ondjashi ndji tahi ke ja?#3:7 Aafariseji ojo aatshiui jomambo, mba ja diginina unene eendanda dompango, ha eendunge daho. Oja gama kaajamba naakengeri, jo ja dina aashupi. Aasaduseji ojo aajuda, mba ja ara epangero rjomukuaniirua go ko Roma, otsho ja tonderua kaafariseji, mba aajudarera. Ndere mokutonda Jesus na mba ja Jesus oja ninga ookume. Aanongo jomambo ojo aafariseji, mba ja faturura omambo gaajuda montempeli. Otsho Herodes okue ja pura (Mateus 2:4).
8Eteni ano iihimati jo oparera ehigaruro.
9Kamu noruporo mu ipopire: Otu na Abraham otate? Ngaje andi mu rombuere: Karunga ota vuru okupendurira Abraham ojana meenkuuege dika.
10Ekuua orja turua nare kiitako jeemuti. Keshe tuu omuti, ngu itagu imi iihimati iitoue, otagu keua po, nde tagu umbirua momuriro.
11Tshiri, ngaje otandi mu tshatsh’ike nomeja kehigaruro, ndere ngu te ja konima handje, oku neenkondo e vure ndje, ngaje inandi opara ndi zare eengaku de, ngu ote ke mu tshatsha nOmbepo Ondjapuki nomuriro.
12Oku noruuouoro meke rje, he ta jereke otshipare tshe; iirja je te ji pungura momashisha, ndere ota ka fika etutu momuriro kagu dima.
13Esiku ndija Jesus a zi ku Galilea, e ja ku Jordan ku Johannes a ka tshatshue ku he.
14Ndere Johannes okua tinda, he ta ti: Ongaje ndi nokutshatshua ku nguee, ndere ongueje itshee to ja ku ngaje ngiini?
15Jesus ta jamukura: Iteera tshi ningue ngaa, oshoka otshe tu oparera tu guanice atshishe shi tshu uka. Opo nduno e mu iteera.
16Ano Jesus sho a tshatshua, h’okua zi mo momeja, nde tara, eguru rjo orje mu ihegururira nokuri, nde ta mono Ombepo ha Karunga tahi mu tenene, ho tahi nambere ha f’onguti.
17Nde tara, eui rja zi keguru, tari ti: Nguka omumuandje omuorike, ngu ndi nohokue mu he.
Omission Heklesia Ekatolika, 1951. Namibian Catholic Bishops Conference.