Medhetethi 3
3
Asa Kiitetetha Ixo
1Shooshi Godaa Xoossay medhida do7a ubbaafe aadhida genancho. Issi gallas shooshi maccasiw, “Xoossay tuma hintena, ‘Gannatiyan de7iya mitha ayfe ubbaafe moopite’ gidee?” yaagidi oychis.
2Maccasiya shooshako, “Akay, Xoossay hessada gibeenna; nuuni gannate giddon de7iya mithata ayfe maanaw danda7oos. 3Shin Xoossay nuna, ‘Gannate giddon de7iya mitha ayfe moopite, bochofite; ixiko hinte hayqana’ gis” yaagasu.
4Shooshay maccasiw, “Hinte aykoka hayqeketa. 5Xoossay hessa giday, he mitha ayfiya hinte miiko akeeka demmidi lo77onne iitaa Xoossada hinte eranaysa I, eriya gishosa” yaagis.
6Maccasiya mitha ayfey maanaw mal7eysa, be7anaw lo77eysanne, cincatethi demmanaw amoyaba gideysa be7asu. He mitha ayfiyape ekada masu. Qassi ba azinaska immin ika mis.
7Enti mi simmidi, nam7ayka akeeka demmidosona. Enti xire kallo de7eysa eridosona. Hessa gisho, balase mitha haythi sikidi dancidosona.
8Sa7i omarsida wode gannate giddon Godaa Xoossay hemetishin iya girsa Addaameynne iya machiya si7idosona. Enti gannate mitha giddon Godaa Xoossafe qosetidosona. 9Shin Godaa Xoossay Addaame xeegidi, “Addaame, awun de7ay?” yaagis.
10Addaamey, “Gannate giddon ne girsa si7ada taani kallo de7iya gisho yayyada qosetas” yaagis.
11Godaa Xoossay, “Neeni kallo de7eysa new odiday oonee? Taani nena moopa gida mitha ayfepe madiyee?” yaagidi oychis.
12Addaamey, “Taara daana mela neeni immida maccasiya he mitha ayfiyape taw immin mas” yaagis.
13Godaa Xoossay, maccasiw, “Neeni hessa ayis oothadii?” yaagidi oychis.
Maccasiya, “Tana shooshay cimmin mas” yaagasu.
14Godaa Xoossay shooshaa, “Neeni haysa oothida gisho, mehepenne do7a ubbaafe aadhada baadetidaba gida. Neeni ne ulon biittara gooshetana; ne de7o laytha ubban baana laaccana. 15Taani, ne giddoninne maccase giddon, ne sheesha giddoninne I sheesha giddon morketethi wothana. I ne huuphiya qoxana, neka iya gindiya dukana” yaagis.
16Maccasiw Godaa Xoossay, “Ne qanthatida ageenan daro un7etana. Neeni wolqaama waayen na7a yelana. Gidoshin, neeni ne azinaara daanaw amottana; I nena haarana” yaagis.
17Godaa Xoossay Addaameko, “Neeni ne mache oda si7ida gishonne taani nena moopa gida mitha ayfiyape neeni mida gisho, biittay ne gaason baadetidaysa gido. Neeni ne de7o laytha ubban gita daabursan biitta oothada maana. 18Biittay new agunthinne harme dolisana; neeni biittafe dolidi kaxiyaba maana. 19Neeni ne medhetida biitta simmana gakanaw daaburan cawatada oothida ne kathi maana. Neeni biittafe medhetida gisho biitta simmana” yaagis.
20Addaamey ba machiw de7oy de7iya asa ubbaas aayo gidiya gisho Hewaanno#3:20 Hewaanno: Ha sunthaa birshethay “De7iyaro” guussu. gidi sunthis.
21Godaa Xoossay Addaamenne iya machiw ite giigisidi mayzis.
22Godaa Xoossay, “Hiza asi lo77onne iita eron nuupe issuwada gidis. Enti banta kushiya yeddidi, de7o immiya mitha ayfiyape ekidi moonna melanne merinaw de7on doona mela teqetanaw koshshees” yaagis. 23Hessa gisho, enti banta medhetida biitta oothana mela Godaa Xoossay Edene Gannatepe enta kessis. 24Yaatidi, de7o immiya mithaako efiya ogiya naagana mela Kirubeela geetetiya de7o medhetethatanne shireti shireti wodhiya tama laco mashshe Edene Gannatepe doloha baggara wothis.
The Word for the World International and The Word for the World Ethiopia