Luka 1
1
1Wa limemia Teyofile bato djunda basi bakomi, mambi mabo, makeluvaka o bomoyi va Yesu makelaka Kombo o mboka babati, se ebeyi eyalakakayo. 2Bakomaka mambi maeneke bato meyi mokeluva mpe balebolaka biyo mpo yama, bato bana babaka wana nkomo eyabaka nokeluva mambi manso mana mbala yabo, bamipaka mpo yolaka liloba dja Kombo. 3Ngayi mpendja naki-naki o ndoko ya mambi manso malekaka tata oetateli, Yemeyi ena naboiki meko nabokomela ebeyi ya mambi malekiki mpo yau. 4Naokoma mambi mabo mpo obata te mambi mabo makeki Yesu mabolakiki ba mao veyi.
Bobotuvi mpe bolenge va Yesu
Andjelu aeboli bobotuvi va Yowane Mobatisi
5Yabaka na nganga mpoko ya Kombo nkombo yande Djakaliya, abaka onkomo eyabaka noangela Elode etuka ya Yuda. Abaka o ebolo ya banganga ba Kombo ba Abiya. Nkombo ya nwali wande Elisabeti abaka ndempe yo modjengeni wa Alona. 6Djakaliya ni Elisabete babaka bato ba semba obo va Kombo, bakobaka na libunga weyi, edjingi nokolo te babaka notosa mibeko ni malako ma Kombo. 7Kasi, Elisabeti akobaka na makoki mobota nwana weyi; yeyena babanso babale bakobaka na bana weyi, mpe yo ni Djakaliya bakomaka bikoto. 8Mokolo moko Djakaliya abaka nokela yela yande ndempe nganga ya kombo obo va kombo, mpo ebolo yande yabaka nokela o tempelo. 9Yabaka mumeseno mpo ya banganga bakombo ba vaka mbese mpo babo meko ndjayi okaingela o tempelo wa nkolo mpo ake noka tumba malasi ni mbeka. Yabaka mosala nwa banganga ba kombo mpe nkombo ya Djakaliya ya oluvaka. 10Be mumeseno, djunda banso baanganaka mpo yo mungbangemela, babaka nobondele olibanda dja tempelo nkomo eyabaka Djakaliya notumba mpaka na malasi ontanteyi ya tempelo. 11Andjelu moko atomuvaka na Kombo abimelaka Djakaliya mpe atemi o eboko yande ya bolomi oyoma yotumba mpaka. 12Nkomo eyaeneke Djakaliya Andjelu wa Kombo alotaka na bokuli. 13Kasi Andjelu akoloko nande: Olotako weyi Djakaliya, mpo mabondeli mau makomi obo va kombo, we na Nwali wau Elisabeti bokadjua nwana wa mumpele boengeli bo mota nkombo Yowane. 14Nwana wau aka botombela esengo mpe bosepeli mpe bato baiyo djunda bakasepela na bobotuvi vande. 15Nkolo kombo aka mobo moto munene wa mobunu be, akononyua vinyo weyi mpe ekeyi ya bolanga weyi mpe molimo mosantu mukaba o likolo djande obo bobotuva. 16O Nsuka, akakondja djunda dja bato ba Yisalayele baelonolela nkolo kombo waba. 17Akaba moto okaba na molimo mpe nguya ya mosakoli Eliya, yo akaya obo va nkolo, bokomieyi mioyi mia bato mpo ya boyeyi vande, akaelusa bokani va baango ni va bana baba, mpe aka djoinya milimo mia bato bakotosa weyi bobati vanya va kombo. 18Djakaliya akoli na Andjelu: Nakaeba djambi meyi ebeyi ndjayi? Mpo ngayi nakomi kali nwali wangayi mpe akomi kali mpo yobota bana. 19Andjelu akoli nande: Nkombo ya ngayi Gabiliyele, nakateme obo va Kombo natomuviki mpo navebola ekano ndamu mpo ya nwana wau wa mumpele. 20Keka, okaba emimi mpe okonokolo butu weyi tee nwana wau wa mumpele akabotuva, mabo makakeluva, mpo we obatiko weyi mambi maboeboli ngayi makakeluva onkomo yama. 21Nkomo eyabaka Djakaliya ni andjelu babaka nosolola ontanteyi ya tempele, bato olibanda babaka nodjila Djakaliya abima olibanda, babaka nomituna mpoyeyi alemi nkomo ndayi ontanteyi ya tempelo. 22Nkomo eyabimaka Djakaliya o tempelo. Amekaka bosololi na bato kasi akokokaka weyi mpe abaka nosolola na bilembeteli ebeyi eyaeneke bato baebakate lelu Djakaliya aeneke yeneneli ontanteyi ya tempelo. 23Nkomo eyailaka mikolo miande mia mosala, ealuaka o mboka yande (o yuda). 24Omokiya nwa nkomo ntii, nwali wande Elisabeti adjuaka djemi, amibombaka basale batano. 25Akoloko: Keka enkeleli nkolo mpo ya ngayi omikolo mibo ankeleli na boboto na bomoli booni ontanteyi ya bato banso na biva bibo binso na bompeyi likoki djo bota nwana sikawabo.
ANDJELU AEBOLI BOBOTUVI VA YESU
26Nkomo eyakokaka djemi dja Elisabete basale motoba, Kombo atomaka andjelu Gabiliyele o mboka mpoko ebekuvi Nazalete o etuka ya Galileya. 27Atomuvaka o mboka nwalimoto moseka moko nkombo yande Maliya owa oluvaka na mumpele moko nkombo yande Djodjefu abaka modjengeni wa mokondji Davidi. 28Andjelu ayaka o mboka yande mpe akoli: Mbote yau Maliya, Kombo abopamboli! Yompendja abopamboli boleki balibato banso! 29Kasi nkomo eyaokaka maliya mambi ma mokoloko Andjelu, bimanyo biande bia tungisamaka abaka nomituna o moyi nwande naetondo ya mbote meyi. 30Na yemeyi Andjelu akoli nande: Olotako weyi, Maliya, mpo Kombo abokeleli ngolu. 31Oka djambi libo: Okadjua djemi mpe okabota nwana wa mumpele, okamota nkombo Yesu. 32Yo akaba moto munene mpe bato bakamobeka nwana wa mumpele owabi o likolo dja bikeyi binso, Kombo nkolo akamokumisa mokondji o likolo dja bato bande, akaangela ebeyi eya angelaka nkoko wande mokondji Davidi. 33Akaba mokondji wa badjengeni ba Yakobo bobele na bobele mpe bokondji vande bukonoba na nsuka weyi. 34Maliya akoli na Andjelu: Ebeyi ndjayi ekoki ngayi nodjua nwana? Mpo nongondo? 35Andjelu Gabiliyele amobekoli: Molimo mosantu mukaya o mboka yau mpe nguya ya Kombo yabi na manso eka bodjiba ndempe elilingi mpe nwana wau akaba moto wa mobunu be mpo ya Kombo akaba nebe mpendja mpe akabekuva nwana wa Kombo. 36Keka navebola ekeyi mpoko: Nwa nyongo wau wa nwalimoto Elisabeti, akabota nwana wa mumpele, nsoni akomi kali na bokuli bato babaka nokolo te yo akobota bana weyi, kasi akomi na djemi la basale motoba. 37Mambi manso mana makakeluva mpo Kombo akoki nokela mambi manso. 38Maliya abekoli: Leme manso makokisama o mboka ngayi ebeyi yongayi mosali o mboka Nkolo, mpe Andjelu amoleeke.
Maliya akeyi nokakeka Elisabeti
39Omokiya Maliya amikomiaka noki ontanteyi ya ngomba ya Yuda o mboka eyabaka nodjala Djakaliya. 40Nkomo ekomi Maliya aingelaka o ndako ya Djakaliya mpe akoseyi Elisabeti. 41Ebeyi eyaokaka Elisabeti mbote ya Maliya, nwana anikani o libumu na esengo mpe atondi na molimo mosantu. 42Elisabeti abomi na mongongo mokuli: Opambolami na bokuli boleki balibato banso mpe Kombo apamboli nwana okadjua we. 43Nakomiko na lokumu lonene lubo weyi mpo nyango wa nkolo wangayi ayeyi nokankeka! 44Ekeyi mpoko ya bokanweyi enkomeli ngayi nkomo yoki ngayi onkoseyi, nwana ontanteyi ya ngayi anikani mbala mpoko na esengo. 45Nkolo abopamboli mpo obatiki te nkolo akakela malakakayo mpo yau! 46Maliya akoli Bo: Nkolo wangayi ao munene. 47Naka sepela na nkolo Kombo mobikieyi wanga. 48Mpo amanyeli mpo ya ngayi mosali wande wanse tata sikawabo bato banso bakambeka esengo. 49Naetondo ya mambi manene Kombo wa nguya akeli mpo ya ngayi. Nkombo yande yo Mosantu. 50Kombo aka tenya mawa mande bobele na bobele mpo yabaka mongbangemela mpe baka mokelela. 51Yo akeli mambi manene na nguya yande; auyeyi bato ba lofundu mpe baka mimanya te bao bato banene. 52Abotoli nguya ya bakondji mpe apeyi yoma ya likolo na bato bo oyoma yanse. 53Kombo atondjeyi, adjeyisi bato ba nsala na bieka bilamu kasi abenginyaka bato babodjui akobapaka ekeyi weyi aba elusaka maboko boto. 54-55Yo asungi yisalayele, basali bande na bomanyeyi bilaka bia botenyi mawa bolamu va Abalayama mpe badjengeni bande banso mpo ya bobele, Ondjela ena, akokisaka bilaka biapakayo o mboka bankoko babiyo. 56Omokiya Maliya adjalaka na Elisabeti lope na basale bato mpe aeluaka ondaku yande o nazalete.
Bobotuvi wa Yowane Mobatisi
57Nkomo ya Elisabeti yobota yakokaka mpe abotaka nwana wa mumpele. 58Nkomo yoki Badjalani bande mpe biboto biande bia djooko djande baokaka ebeyi eya teinyaka nkolo mawa o mboka yande amopa nwana wa mumpele babanso basepelaka na bobotuvi va nwana wande. 59Onkomo eyakokaka nwana mikolo nwambi, bato banganaka ekambi mpo yo motena ngenga bakaka nobeka nwana Djakaliya. Yabaka nkombo eyabaka ya ango wande 60kasi nyango wa nwana akoli naba: weyi! Toka mobeka Yowane. 61Bakoli nande: Ontanteyi ya djooko djande moto moko akona nkombo ena weyi! 62Bampe bamokelaka bilembeteli o maboko maba mpo batuna Djakaliya ango wa nwana ebeyi ndja yakaka yo nobeka nwana; 63Djakaliya aongaka etanda ya libaya mpe akomi maloba mabo o likolo: Nkombo yande Yowane bato banganaka wana bakanwaka na mambi makomaka yo. 64Mbala mpoko Djakaliya akokaka butu bokoli; mpe atataka notondo Kombo. 65Bato banso badjalaka lope-lope naba bakanwaka be mpe balotaka, moto onso o mboka ya ngomba ya Yuda babaka nokolele manso makeluvaka. 66Moto onso owa okaka mambi malekaka akanwaka mpendja, bakoloko yo veyi nwana akakola akaba moto wa mobunu, bakoli bo mpo yo puu te nguya ya Kombo ekabana nde. 67Molimo mosantu nwa tondjaka ango wa Yowane, Djakaliya, akoloko ekano ya Kombo. 68Lokumu lola nkolo, Kombo okatondo biyo bato ba Yisalayele, mpo akaya veyi mpe akabikia bato bande. 69Alotomeli mobikeyi wa nguya auti omolongo nwa bokondji va mosali wande Davidi. 70Kombo aokela mpendja makoloko yote akakela kala nkomo eyakoloko yona bato bande ondjela ya basakoli bande basantu. 71Aolotomela moto ona nguya yolobikia o mboka baini babiyo; edjingi nokolo, na nguya ya moto onso okaloina. 72Akeli bona mpo yolaka bolingo vande na bankoko babiyo mpo yomanya bokani vande bosantu va kelaka Yonaba. 73Ebo yo bokani vapaka yo nkoko wabiyo Abalayama, akoloko: Nakabobikia o mboka baini babino naetondo te bokoka bongbangemeli na boboli boloti, alodjingiki toba bayengebeni (o mboka yande) Mpe totosa mibeko miande nkomo yobiyo na bomoyi. 74Atenaka seleka omokiya mo lotungola o mboka baini ba biyo aka lopa ndjela yo mosambela. 75Na bodjati obovande na bosantu mpe na bosembo mikolo minso mia bomoyi vabiyo. 76Mpe we nwana wangayi moti, bato bakaeba te o mosakoli wa nwana wa kombo wa nguya o likolo dja manso, Okakomia bato mpo ya boyeyi va Kombo naetondo te bamikomia nkomo ekaya nkolo. 77Oka bakomia mpo ya nkolo, na bobatombi baeba bolimbisi va masumu maba mpo babika o etumbu. 78Kombo wabiyo aka lolimbisa mpo aona mawabe, akatoma moto moko uta oyoma yabi o lola nkomo ekaya moto meyi ekaba ndempe bobimi va moyi mpo yabiyo. 79Aka pambola bakabika ontanteyi ya mpitemela mpe omawa mpe na baolota onkomo yo manyaba mpo ya lowa naetondo te bakoka bobiki na biuu wa Kombo. 80Nwana wa Djakaliya akolaka Kombo amokelaka mokuli na bimanyo biande akendeke o mokoto mpe adjalaka owo biva djunda. Omokiya Kombo amotomaka o mboka bato ba Yisalayele mpo aka balaka.
Baloi Bible by Beyond Translation is licensed under Creative Commons Attribution-ShareAlike 4.0 License.