GÉNESIS 3
3
Kuimbae iñeereenduä
1Ërei ngatu mboi#Ap 12.9; 20.2. oasa ipoki oporombotavɨ vaerä opaete ïru mbaemɨmba reta ñana rupigua yandeYa Tumpa oyapogüe güi. Jare kuae mboi jei kuña pe:
—¿Tumpa jei pa jayave peve agüɨye vaerä peu opaete ɨvɨra reta kó pegua iagüe?
2Jayave kuña jei mboi pe:
—Opaete ɨvɨra reta kó pegua iagüe orepuere rou; 3ërei jókuae ɨvɨra kó mbɨte pegua iagüe re oreokuai Tumpa, jei oreve: “Agüɨye peu, agüɨye peyavɨkɨ, agüɨye vaerä pemano.”
4Jayave mboi jei kuña pe:
—Ngaraa ko pemano. 5Echa Tumpa oikuaa katu ko jókuae ara peu ko yave, oyepeata peresa, jare peikota Tumpa rami, peikuaata ikavi vae jare ikavimbae vae.
6Jare kuña oecha jókuae ɨvɨra iagüe ikavi yae oyeu vaerä, ipöra yae oyekuaa jesa pe, ikavi yae oupitɨ vaerä arakuaa katu; jare oipɨɨ jókuae ɨvɨra iagüe jare jou. Omee vi ime pe, jare jae jou vi#Ro 5.12. jembireko rami. 7Jayave jesa reta oyepea, jare oikuaa reta inandi yepe yogüɨreko vae; jayave ombovɨvɨ reta ɨva joogüe oñeova reta pɨpe vaerä.
8Oendu reta yandeYa Tumpa kó rupi oguata oiko kaaru yave, jare kuimbae oñemi jembireko ndive yandeYa Tumpa güi, ɨvɨra pɨte pe kó pe. 9Ërei yandeYa Tumpa oenɨi kuimbae, jei chupe:
—¿Ketɨ pa aipo reï?
10Kuimbae jei Tumpa pe:
—Aendu neñee kó rupi, jare akɨɨye, echa chenandi aï, jáeramo añemi.
11Tumpa jei chupe:
—¿Kia pa ndemboe nenandi ko reï vae? ¿Reu pa jókuae ɨvɨra iagüe royókuai agüɨyeta tëi reu vae?
12Kuimbae jei:
—Kuña remee cheïrurä vae omee cheve ɨvɨra iagüe, jare jau.
13Jayave yandeYa Tumpa jei kuña pe:
—¿Maera pa ko kuae reyapo?
Kuña jei Tumpa pe:
—Mboi ko chembotavɨ,#2 Co 11.3; 1 Ti 2.14. jare jau.
14Jayave yandeYa Tumpa jei mboi pe:
—Kuae reyapo vae jeko pegua, repɨtata cheyepopeyu igüɨ pe opaete ïru mɨmba reta ipɨte güi. Ndepɨtía re reguatata, jare ɨvɨkúi reuta nderekove iyapɨ regua. 15Añonota ñemotareɨ peyokotɨ, peñomotareɨ vaerä kuña ndive, neñemuña ndive jare kuña iñemuña ndive;#Ap 12.17. jae ndembopereta neäka pe, jare nde rembopereta ipɨta pe.
16Kuña pe jei:
—Ndepurúa yave ambojetata ndeve mbae jasɨ; membɨrasɨ reiporarata reiko; ndepɨa jemimbota neme jeia re oikota, jare jae ipo igüɨ pe reikota.
17Kuimbae pe jei:
—Nderembireko iñee re reyeapɨsaka vae jeko pegua, jare reu jókuae ɨvɨra iagüe royókuai tëi agüɨye vaerä reu; jáeramo ndereko pegua ɨvɨ oiporarata cheyepopeyu; reiporara reve rekaruta opaete ara reikove reiko ramboeve. 18Ñurati reta jare ñana pɨ̈chɨi#Ro 8.20; Heb 6.8. vae reta ɨvɨ omoñemuñata ndeve, jare temitɨ ñana rupigua rerekota nderembiurä. 19Nderɨaipoagüe rekaruta, jökorai reo ye regua reyea ɨvɨ ndive, echa ɨvɨ güi ko reyeapo; ɨvɨkúi ko nde, jare ɨvɨkuirä ko reo yeta.
20Jare Adán ombojee jembireko Eva pe, echa jae ko opaete vae reta ichɨrä. 21YandeYa Tumpa oyapo kuimbae jare jembireko jemimonderä mɨmbapiregüe, jare omondeuka chupe reta. 22YandeYa Tumpa jei iyeupe: “Añave, kuimbae oiko ma yande rami, oikuaa ma ikavi vae jare ikavimbae vae re; ërei añave agüɨye tipóyai toekɨ tou ɨvɨra tekove pegua iagüe,#Ap 22.14. echa jou yave oikopukuta.”
23Jayave yandeYa omoë kó Edén pegua güi, omaetɨ vaerä ɨvɨ pe, jókuae chugüi oyeapo vae pe. 24Jayave omombo joko güi kuimbae, jare oñono araɨgua reta Edén güi kuaraɨ oëa kotɨ jare metei kɨsepuku jendɨ vae jare oyembovava opaete rupi oguata vae, oyopia vaerä ɨvɨra tekove pegua jape.
Biblia DC Guaraní Bolivia © Bolivian Bible Society, 2001.