KECHENG 20
20
Abraham Lapen Abimelekh
1Abraham Mamre pen ha Kanaan arlo anitur anat cheterek-lo, lapen Kadesh lapen Shur angbongsi dolo. Aphi, alangli Gerar along kedo ahut, 2alangli pulo, alangli apiso Sarah ke alangli ingjir lo. Lasi Gerar arecho Abimelekh, alanglilong Sarah aphan pavandet-lo.#Kech 12.13; 26.7 3Ningve isi alangliphan Arnam amang cheklang-lo lapen pulo! “Nang thinangji, pima nang laso a-arloso aphan pondet; bangpi ke penan kedotang-lo.”
4Bonta Abimelekh ke bangpi adung vangvelang, lapen alangli pulo, “Hemphu, neli ke nedai ave! Neliphan lapen neli rat aso aphan nangli pavirdetpoma? 5Abraham amethangsi kepulo, bangpi ke alang ingjirlopu, lapen bangpi ta la isinatsi pulo. Lake neli mathapamesi keklemlo, lapen neli la thangnat akechokchele keklem kali.”
6Mang along Arnam thak-lo, “Kalang, nang mathapamesi keklemlo pu Ne chini, lasi nang Nephan pap keklemkledet jisi Ne nangphan pahelolo, lapen bangpi aphan pa-ot longle det-lo. 7Bonta non, apenan aphan bangpi hodainon. Alangli ke inut amontrilo, lapen alangli nangphan nang ardompipo, anke nang thithelo. Bonta nang jongsi bangpi aphan hodaithuthe pulote, nangphan Ne pacherelo, nang thi nangpo, nang lapen nangrat kedo-an ta.”
8Adapprang a-saihemphu atum an aphan Abimelekh hangpet-lo, lapen halatum aphan kopi plangtang-loma than-et-lo, lapen latum pherephrat-lo. 9Anke Abraham aphan Abimelekh hang-lo, lapen arjulo, “Nangli nelitum aphan kopisi keklemloma? Ne lapen ne det aphuthak laso akevir kepavangji pu nangliphan neli kopi akechokchesi keklem loma? Nangli keklem ason ke baduta paklemkledet nang. 10Nangli la kopisi keklemloma?”
11Abraham thak-lo, “Arnam aphan kephere abang ladak baduta ave pusi neli kematha lapen nepiso ke-enjisi neliphan pathilot tahailo. 12Chenamsi bangpi ke neli ingjirlo. Bangpi ke nelipo asopi lo, bonta nelipai asopi kali, lapen bangpi pen neli chepangrilo. 13Lasi Arnam neliphan nelipo ahem pen ha bang-adet neketoi ahut, bangpi aphan neli pulo, ‘Bang aphan ne ik-lo pu nephan kechekam ajok nang nephan ko-an chinghonloma la nang chepaklang-lo.’ ”
14Anke Abimelekh Abraham aphan puthot Sarah pithudet-lo, lapen halaso ahut amat alangliphan alangli biresak, chainong, lapen aban atum ta pidunlo. 15Abraham aphan alangli pulo, “Ladak nelongle kangthim dolo; nangning kehang aling donon.” 16Sarah aphan alangli pulo, “Nangli ik aphan ne dum suri isi arup pilo, lake nanglilong kedo-an atum angno nanglidai ave pu isi apormanlo; abangphutin ta nangli kechokche klemkle pu chinipo.”
17Abraham apiso, Sarah aphan kopi plangtang-loma, la so apotsi Abimelekh arechohem kedo a-arloso atum an aphan Hemphu osomar pavedet-lo. 18Lasi Abimelekh aphan Abraham arnam ardom pilo, lapen alangliphan Arnam pamelo. Alangli la apiso aphan lapen abanpi aphan ta osomar kepadojisi pamelo.
Karbi Holy Bible © Bible Society of India, 2010.
Used by permission. All rights reserved worldwide.