KECHENG 24
24
Isaak Aphan Piso Inut Keripi
1Nonke Abraham sar-olo, lapen alangli keklem aling Hemphu pahirjumelo. 2Alangli ban kesarnei abangphan alangli pulo, labangpo ke Abraham akhi kedo-an kelang abang-lo. Neli kengtham hini along nangliri bat-tha lapen semetangtha. 3Neli nangliphan Hemphu, pirthe lapen sining a-Arnam, amen pen semetangtha, nangli neliso aphan ladak Kanaan arat angbong pen piso ripipelo. 4Nelimahang kethek adim along nangli damthupo lapen neli don atum nelisopo Isaak aphan piso inut ripipo.
5Bonta aban abang arjulo, “Jongsi a-osopi laso adet nelilong nangkedun ji aphan ahem che-o-e pulote kosonlo? Nanglisopo aphan nangli kevang adet toithuphit-non ma?”
6Abraham thak-lo, “Nelisopo hadak ketoitedetji aphanle nangli klemnon! 7Hemphu, sining A-Arnamsi neliphan nelipo ahem pen lapen nedon-nerap adet pen nevan lo, lapen laso adet neliso-nelisu aphan piji pusi Alangli chechak pamelo. Nangliphrang Alangli Alangli pherangke nangtoiji, anke nangli nelisopo aphan piso inut hadak longpithekpo. 8Jongsi arloso-a-oso nangli long nangkedunji aninghanghe pulote, laso akechak pen nangli jokpo. Bonta nangli jongheseta nelisopo aphan hadak ponnangnelo.” 9Lasi aban abang Abraham akengtham#Laso alam ke kelar un-epin aseme aphansi kepudam hini adak ari bat-lo, lapen Abraham karju ateng keklemji aphan seme deng-lo.
10Aban, la Abraham akhi kechepahemphu abang-lo, ahemphu aka-ut jonkep ponlo, lapen Nahor kedo arongsopi Mesopotamia anirep anat damlo. 11Alangli le si, rongsopi angtan alangtuk akung alangli, ka-ut atum aphan padomlo, la anerlochitim damchot anvet-lang, arloso atum langkesok apor-lo. 12Alangli ardomlo, “Hemphu, nehemphu Abraham a-Arnam, nephan nepa-untha pini lapen nehemphu aphan nang kechak paplengtha. 13Rongsopi a-arloso atum lang nangkesokji kevangji alangtuk alongsi ne dolo. 14Latum angbong inut aphan nepupo, ‘Nangli tebuk kanghon pen pangdaitha, neli langjunlang.’ Jongsi bangpi pupo, ‘Jun iknon, lapen nangli ka-ut atum aphan ta neli lang nangvanpipo, ‘bangpile nangli ban Isaak aphan nangli kangvaitang abang paplangnang. La plang-lote, nang nehemphu aphan kechak alam klemlo pu, neli chinipo.”
15Alangli arnam kardom jutje ako, Rebeka atebuk nangchingkep chotsi vang-lo. Bangpi ke Bethuel asopi, la Abraham amu Nahor lapen la apiso Milkah asopolo. 16Bangpi ke inut arje kelangmepik a-okarjang lapen penan dodelang. Bangpi ha langtuk anat hirdamlo, atebuk papleng si, kechevoithulo. 17Ban abang bangpi aphan kechetong dunjisi kat-lo lapen pulo, “Kanghonpen nanglitebuk pen neliphan lang nepajunlongtha.”
18Bangpi pulo, “Jun iknon, akehai,” lapen seraksi bangpi atebuk pangdai si bangpi la otdongsi pajunbomlo. 19La langpajun tangdet aphi, bangpi pulo, “Nangli ka-ut atum aphan ta neli lang nangvanpipo lapen latum untik pajunnang.” 20Bangpi atibuk pi atum aphan dung-etsi lang ke-ongmuchot ke-endamthujisi langtuk anat kat serak-lo la kedo-an aka-ut aphan lang pitang-et-etik. 21Bangpo abang Hemphu laphan rapdunloma kechinijisi dojoi pen bangpi aphan langdunlo.
22Bangpi patangsi, bangpo abang adorkesonei a-arnan-ensi la bangpi anokan along thonlo lapen ser aroi hongni thedung thonlo ari along thonlo. 23Alangli pulo, “Kanghon pen nanglipo komatma nelithantha. Ajo kedoji aphan alanglihem nemonit lapen neliphan kedo adim dojima?”
24Nelipo ke Bethuel, Nahor lapen Milkah asopolo, pusi bangpi thak-lo. 25“Nelitum ahem sokpun lapen Phek-e do-o, lapen nanglitum aphan kedoji adim ta do.”
26Anke bangpo akengphu patongruilo, lapen Hemphu aphan ardom lo. 27Alangli pulo, “Hemphu aphan ronon, nehemphu Abraham a-Arnam Alang nehemphu aphan kechak alam chebi pame. Hemphu-si neliphan nehemphu adon ahem nejaponlo.”
28Osopi apei ahem chekat-lo, lapen kadokave alam than-et-lo. 29Non Rebeka a-ik inut do, amen Laban, lapen alangli Abraham aban kedo alangtuk anat kat-lo. 30Laban ke norik lapen angjirpi ari along aroi-heihei thek-long-lo lapen bangpi aphan bangpo kethan alam an pathan-et-toilo. La Abraham aban along damlo, alangli amethang aka-ut adung langtuk along arjapdinglang, 31lapen pulo, “Nelilong hem nangdun non. Nangli ke Hemphu kepahirjume amonit-lo. Nangli kopi chonghoisi ladak ingtanle karjapther langma? Nelihem nangliphan ingdeng isi kedo adim do, lapen nangli ka-ut atum aphan ta kedo adim do.”
32Lasi bangpo hem arlo lutdunlo, lapen Laban ke ka-ut pen hormu pasunlo, lapen latum aphan sokpun lapen phek-e pilo. Lapen la Abraham aban lapen la amonit atum aphan akeng kepachingroi jisi lang vanpilo. 33An kevan pi ahut bangpo pulo, “Neli keningje nangji alam ningje longletik ke an choche.”
Laban pulo, “Ningje ikbom non.”
34Neli ke Abraham aban lo, la cheng-lo. 35“Nelihemphu aphan Hemphu pahirjumepik-lo, lapen inut keplang-o amonit pamanlo. La alangliphan biresak ahur, lapen bi, chainong, rup, ser, pinso-arlo aban, ka-ut hei-hei, gadha-heihei pilo. 36Sarah, nehemphu apiso, bangpi kesarpi ahut alangliphan sopo inut amahang pathekpilo, lapen la aphan nehemphu kedo-an ason pi-et-lo. 37Alangli hukum kekroiji aphan nehemphu nephan seme padeng-lo. Alangli pulo, ‘Kanaan adet a-osopi pen nesopo aphan piso ingvaipiri. 38La alar, nelipo amonit, nedon nerap anat damnon, lapen piso inut laphan ingvaipinon.’” 39Lapen nehemphu aphan ne arjulo, “Jongsi osopi nelilong nangdundedet-lote kosonlo?” 40Alangli thak-lo, “Neli kaiketa kekroiver a-Hemphu-si, nanglilong pherangke nangtoidunpo, lapen nangliphan pa-unpipo. Nangli nemonit atum angbong penle, nelipo ahemtun penle nelisopo aphan piso inut ne ingvaipinon. 41Nangli seme pen kejokji atovar isinat: Nangli jongsi nedon ahem dampen, latum nangpimolo, pulote nangli kejok-lo.”
42Pini neli langtuk along kevang ahut, nelihemphu a-Arnam, Hemphu aphan neli ardom lo, neli keklem akam nepa-untha pu. 43Ladak langtuk alongsi neli dolo. inutbak animsopi langkesokji aphan nangbar lote, neli lang kejunji aphan atebuk pen lang chohangpo. 44Bangpi jongsi kroi lapen neli ka-ut atum aphan ta lang kepiji aninghang pulote, bangpi helo nehemphu asopo apisopu Nangli kangvaitang abangpi plangji tahai. 45Neli kardomjoi patangte aphrang, Rebeka langtibuk epum nang ingkep-lok si vang-lo, lapen lang kesokjisi langtuk anat sundamlo, Bangpi aphan neli pulo, “Kanghon pen neliphan lang nepajunlongtha.” 46Bangpi atebuk kangkep pen pasunsi pulo, “Jun iknon, lapen neli nangli ka-ut aphan ta langpipo.” Lasi neli junlo, lapen bangpi ka-ut aphan ta langpilo. 47Bangpi aphan neli arjulo, “Nangli po komat-lo?” Lapen bangpi thak-lo, “Nelipo ke Bethuel, Nahor lapen Milkah asopo.” Anke anokan along anorik lapen bangpi ari along aroi neli thonlo. 48Neli kengphu patongruisi Hemphu aphan ardomlo. Neli hemphu a-Arnam, Hemphu, neli hemphu adon nehemphu asopo aphan alangli sopi kelong ahem nekeja ponthor abang, aphan chorolo. 49“Non, nangli jongsi neli hemphu aphan nangli deng kepaplengji nangli ninghang, lapen alangliphan pharpame po pulote, kanghon pen neliphan nelithannon; jongsi kali pu seta nelithannon, anke neli kopima keklem nangji neli klempo.”
50Laban lapen Bethuel thak-lo, “Laso akam ke Hemphu pen si kevang apot, lake nelitum le kephar nangji kali. 51Rebeka daksi dolo, bangpi aphan ponnon, lapen damnon. Hemphu amethang kepu tang asonsi, bangpi nangli hemphu asopo apiso paplang-lonang.” 52Abraham aban la arjulongsi, alangli angphun patongkisi Hemphu aphan ardomlo. 53Anke alangli pe-ri lapen rup, lapen ser akechingthang adorson, vanpilo, lapen lahei Rebeka aphan pilo. Alangli adorkesonei adan bangpi a-ik lapen apei aphan ta pilo.
54Anke Abraham aban lapen la along kedun amonit atum cholo, lapen junlo, lapen hadak ajo dokok-lo. Latum puthot adap amek prang-lo, lapen la pulo, “Neli hemphu along neli pachevoi longtha.”
55Bonta Rebeka a-ik lapen apei pulo, “Nelitum along a-osopi hithi eruibak mate nikep bak padosi nang, anle bangpi nang padun lonang.”
56Bonta alangli pulo, “Nelitum aphan khangrinon, Neli kedam akam Hemphu si pa-unlo; neliphan nelihemphu along pachevoithulong non.” 57Latum thak-lo, “Osopi aphan eli hang-lonang lapen bangpi kopitong kepujilone.” 58Lasi latum Rebeka aphan hang-lo, lapen arjulo, “Nang labangso amonit along dunji nangning-hangma?”
Ninghang, bangpi thak-lo.
59Lasi latum Rebeka lapen hemtun along kedo ajir-kedingnei bangpi aban Abraham aban lapen la amonit along paduntoilo. 60Lapen latum Rebeka aphan lahei alam ahirjume pidunlo:
“Nang, ne ingjir-arlo, suri suri apei paplang lonang!
Nangso-nangsu atum, halatum ahotur atum arongsopi-heihei aputhak pahainang!”
61Anke Rebeka lapen la animsopimar atum chesikkoilo, lapen Abraham aban along kedunjisi ka-ut athak ardonlo, lapen latum kedo-an ta kebar cheng-lo.
62Nephan nekethek-long Abang alangtuk, Pu adim kejejangtang#Ibri penke kevang ajo along Isaak nangletang-lo, lapen Kanaan arlo anitur anat la dodamlo. 63Alangli arnikangsam apor kejuidamjisi hidi damlo lapen ka-ut ahur kevang thek-long-lo. 64Isaak aphan Rebeka thek-longsi, bangpi aka-ut pen suntuk-lo, lapen 65Abraham aban aphan arjulo, “Hidi ajo elitum anat kevangbom a-arlengpo komat-lo?”
Alangli ke nilihemphulo, ban abang thak-lo. Lasi bangpi ape che-ensi amahang chekurkilo.
66Ban abang keklem asontin alam la Isaak aphan than et-lo. 67Anke apei Sarah kedo apehem arlo Rebeka aphan Isaak vanlo, lapen bangpi la apiso plangdet-lo. Rebeka aphan Isaak chinghon-pik, lapen la apei thilot seta la aning ingsamlo.
Karbi Holy Bible © Bible Society of India, 2010.
Used by permission. All rights reserved worldwide.