Amangʼana agha Abhatomwa 1
1
1Eketabho ikyane ikya mbere keera#1:1 Eketabho ikya mbere keno Ruuka yaandëkëëyë Teofiro n-keera kekobherekerwa igha Amangʼana Amaiya agha Yëësu kya igho ghandëkirwë na Ruuka. Teofiro uwëëtö, naakwandëkëëyë-mo Amangʼana ghonswe igho, ghano Yëësu yaakörrë, na agha ukwëghya ukwaye, ukurwa hano yaasimiiyi emeremo ighyaye, 2okohekera urusikö rono yaaghëghirwë ukughya mu-ryobha. Hano waanyöörrë ataraagheghwa, yaaraghërrëëyi abhatomwa abhaaye bhano yaashaaghööyë, okohetera Umwika Ömöhörëëru kya bhono bharaakore emeremo gheno yaabhatëghëëyë. 3Ku-sinsikö merongo ene ukurwa rono yaaryökirë, yaabhooshokeranga abhatomwa abhaaye, kö ebhemanyërryö ibhyaru, akabhöörökya heene igha m-möhöru. Akabha arabhëëghya amangʼana agha Obhokama ubhwa Waryobha.
4Urusikö urwöndë Yëësu yaaryanga na abhatomwa abhaaye, akabhatëëbhya igha, “Motakaarwa Yërusarëëmu#1:4 Yërusarëëmu. Maaha mo-faharaasa. hano. Kasi moghanyere-ho okohekera hano morehaanwa Umwika Ömöhörëëru ono Taata yaaraghaini, kya bhoora naabhatëëbhëri. 5Yohana#1:5 Maaha mo-ketabho ikya Mataayo 3:1; Maariko 1:4-5. na-manshë yaabhatiisiiyi abhantö, kasi bhëënyu, m-böngö hano moraabhatiisibhwi ku-Mwika Ömöhörëëru.”
Yëësu aragheghwa ukughya mu-ryobha
6Hano ghwiki abhatomwa abha Yëësu bhaaikomaini hamwë na Yëësu, bhakamöbhöörya igha, “Bhoono Omonene uwëëtö, enkaagha eno, yo oraatukyörri obhokama ubhwëtö Abhaisiraëri?” 7Akabhahonshora igha, “Taata umwene we aana ubhwera, ubhwa enkaagha iya amangʼana ghayö. Okomanya enkaagha iya amangʼana ghayö, ghuyö te-moremo ghwënyu hë. 8Kasi murinyoora singuru hano Umwika Ömöhörëëru ariisha kö-bhëënyu. Ho morebha abhaimërërri abha amangʼana aghaane Yërusarëëmu, Yudea yonswe igho, Samaaria na kora ko-kebhara kyonswe igho.”
9Hano Yëësu yaamarrë okoghamba ghayö, akagheghwa, ukughya mu-ryobha, bharamomaaherra. Risaarö rekamukundikirya, tebhamara ghwiki bhamomaahe hë. 10Enkaagha eno waanyöörrë bhakegharamërëëyë kighörö, bharamaaha Yëësu araghya mu-ryobha, bhakatookera bharamaaha abhantö abhabhërë, bhaimërëëyë haangʼë nabho, bhatöörrë singibho sendabhu shaa. 11Abhantö bhayö, bhakabhöörya abhatomwa bhayö igha, “Bhëënyu bhare Bhaghariraaya, ndarra mwimërëëyë hano moragharamera mu-ryobha? Yëësu uyö aruurë kö-bhëënyu hano ukughya mu-ryobha, kasi rooho urusikö rono arikyora kya ighoigho mömörööshë araghya mu-ryobha.”
Matiya arashaaghorwa abhe omotomwa uwa Yëësu
12Mbe, abhatomwa bhayö, bhakarwa mu-nguku eno yaabherekerwanga igha, inguku iya Ëmëzëituuni.#1:12a Ëmëzëituuni. Inguku iyö yaabhërëkëëywë igho ko bhoora yaarë na ëmëtë imyaru gheno ghyaabherekerwanga igha Ëmëzëituuni. Bhakakyora Yërusarëëmu, umughi ghuyö, ghwaarë ahasë aha oroghendo urwa kya ikiromiita ëmwë#1:12b Ikiromiita ëmwë. Iyö n-kya amataamboka ëkëkwë ëkëmwë. ukurwa mu-nguku hayö. 13Hano bhaahikirë Yërusarëëmu, bhakasoha mu-kinyumba ikyabho ikya ko-ghorofa, keno bhaaikaranga-mo. Abhatomwa bhayö, m-baabho Peetero, Yohana, Yaakobho, Anderea, Firipö, Toomasi, Bhatoromaayo, Mataayo, Yaakobho mura wa Arufaayo, Simööni Omozerote,#1:13 Simööni Omozerote. Yaarenga na amariina abhërë, rimwë irya Ikiyahudi, Simööni Omozerote, iryëndë irya Ikiaraamu, Simööni Omokananaayo. Ghonswe igho ensonga yaamo në-ëmwë igha, ömöntö ono yaaitananga riihë irya okokora abhantö bhabhe na öbhötöönööni ukurwa kö-bhötöngi ubhwa Ikiruumi. Maaha mo-ketabho ikya Mataayo 10:4; Maariko 3:18; Ruuka 6:15. na Yuuda mura wa Yaakobho. 14Bhayö bhonswe igho, mbaikomanianga hamwë hayö, okosaasaama Waryobha, kö-bhömwë ubhwabho, hamwë na bhaabho Maryamu, nyakuwaabho Yëësu, na abhakari abhandë, na bhamura abhaabho Yëësu.
15Mbe, abhakumya abha Yëësu bhaaikomanianga hamwë. Urusikö urwöndë, bhaare-ho abhantö kya righana imwë na emerongo ëbhërë. Peetero akaimerra ghatëghatë iyaabho, 16akabhatëëbhya igha, “Abhakumya bharikyane, amangʼana ghano ghandëkirwë mo-Maandeko Amahörëëru ko engʼana iya Yuuda, yaarë igha ghaikore. Umwika Ömöhörëëru we yaaghambirë ghayö, okohetera ko-mokama Daudi,#1:16 Daudi. Maaha mo-faharaasa. akarootera Yuuda uyö, ono yaatangatirë abhantö bhaara bhaaghöötirë Yëësu.#1:16 Maaha mo-ketabho ikya Ruuka 22:3-6, 22:47. 17Yuuda m-murikyëtö yaarë, kora tokatoorrania nawe omoremo ghono twaahaaywë na Waryobha.
18“Yuuda uyö, yaaghörrë ömöghöndö ko seehera seno yaanyöörrë ko bhoghogho ubhwaye bhono yaakörrë. Mö-möghöndö muyömuyö, mo yaaghööyë bhubhuumaayë, enda iyaaye ekabhaaroka, ibhya mo-nda bhekaghwa kebhara.#1:18 Maaha mo-ketabho ikya Mataayo 27:3-8. 19Engʼana iyö, ekamanywa na abhantö bhonswe igho, bhano bhamënyirë Yërusarëëmu hano. Ku bhuyö bhakabherekera ahasë aha ömöghöndö ghuyö mo-keghambo ikyabho igha, Hakëri Dama, ensonga yaamo ni-igha, Ömöghöndö ughwa Amaanyinga.”
20Peetero akaghëndërrya okoghamba igha, “Ghayö ngaandëkirwë mo-ketabho ikya Zabhuri igha,
‘Ikihiita ikyaye, nkeraabhe na ekesoma,
kebhorwe ömöntö uwa okomenya-mo.’#1:20 Maaha mo-ketabho ikya Zabhuri 69:25.
“Ghwiki ahandë haandëkirë igha,
‘Emeremo ighyaye ighya obhotangati, nu-wöndë araahaanwe.’#1:20 Maaha mo-ketabho ikya Zabhuri 109:8.
21-22“Ku bhuyö, ni-igha tushaaghore ömöntö mo-bhano bhaarenga hamwë na bhëëtö, enkaagha yonswe eno twaarë na Omonene Yëësu, ukusimirya haara Yohana yaabhatiisiri Yëësu, okohekera hano Yëësu yaainyökiibhwi ukughya mu-ryobha. Ono toraashaaghore, aghootane öbhömwë na bhëëtö, abhe umwimërërri uwa ukuryoka ukwa Yëësu.”
23Mbe, bhakatoora-ho amariina agha abhantö abhabhërë, Yusufu ono yaabherekerwanga igha Bharisabha, iriina iryaye iryëndë yaabherekerwanga igha Yusito. Uwa kabhërë, yaabherekerwanga igha Matiya. 24Ku bhuyö bhakasaasaama igha, “Omonene nu-uwe omanyirë senkoro isya abhantö bhonswe igho. Ku bhuyö, torakosaasaama utwöröki ono ushaaghööyë ko-bhantö abhabhërë bhano. 25Ömöntö uyö oraashaaghore, omokore abhe hamwë na bhëëtö, ko-meremo ighya obhotomwa bhono Yuuda yaatigha akakwa, akaghya ahasë hano hamwingʼarëëyë.” 26Abhantö bhayö, bhakakora ekekoobhwe. Ekekoobhwe, kekaghoota Matiya, ekaghera Matiya abhe hamwë na abhatomwa ikömi na ömwë bhayö.
Currently Selected:
Amangʼana agha Abhatomwa 1: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.