Amangʼana agha Abhatomwa 25
25
Pauro bhöröngë ubhwa ömötöngi Fesito
1Hano Fesito yaamarrë sinsikö isatö kerenga yaahikirë Kaisaaria hayö, akarwa-ho, akatiira ukughya Yërusarëëmu. 2Abhanene abha abhasëngëri, hamwë na abhatangati abha Abhayahudi, bhakamoreetera ikikuuro ikyabho ko-mangʼana agha Pauro. Bhakasaasaama Fesito, 3bhakamötëëbhya igha, abhatöörri ko okobhaherra Pauro Yërusarëëmu hayö. Nabho okanyoora bhasëëmëri inikö iya okoghonyera Pauro ko-nshera, okore bhamwite. 4Fesito akabhahonshora igha, “Pauro nkorendwa arë Kaisaaria, na öni umwene wonswe m-böngö hano ndaakyore-yo. 5Ku bhuyö abhatangati abhëënyu, bhangʼaaraare hamwë na öni, ukughya Kaisaaria. Nyoore eeho engʼana eno yaasarya, bhamushongere.”
6Mbe, Fesito yaaikaayë nabho kya sinsikö monaane handë ikömi igho, akangʼaaraara ukukyora Kaisaaria. Nyinkyo yaako, Fesito akaikara ku-kitumbë ikyaye ikya okobhotorra ibhiina, akahamera igha Pauro areetwe. 7Hano Pauro yaahikirë hayö, akanyoora Abhayahudi bhano bhaangʼaaraarrë ukurwa Yërusarëëmu, hayö bharë. Bhakeemerra bhamötöörrë ghatë. Abhayahudi bhayö bhakamushongera amangʼana amaaru amarito, ghano bhaatatörrë ukwörökya obhoheene ubhwako.
8Ho Pauro yaaiköörërrëëyë igha, “Tenaasarri engʼana yoyonswe eera iya amaraghërryö agha Abhayahudi, handë ku-risengerro irya Waryobha, handë igha ko-Kaisaari.”
9Fesito yaatunanga aihanshani ko-Bhayahudi, ku bhuyö akabhöörya Pauro igha, “Kasi nkutuna örë ukughya Yërusarëëmu, nkobhotorre-yo ikiina keno?”
10Pauro akamohonshora igha, “Mo-bharasa iya Kaisaari hano nimërëëyë, ho ikiina ikyane keraakorrwe. Uwe umwene nomanyirë bhuuya igha, tenasarrya Abhayahudi engʼana yoyonswe eera hë. 11Nyoore naasarya engʼana yoyonswe eno eraaghere niitwe, tinkwanga hë. Kasi nyoore amangʼana ghayö ghonswe igho bhakoghamba ghataana obhoheene, taaho ömöntö ono araatore ukunhira ko-bhantö bhayö. Keno nkosabha ni-igha, ikiina ikyane kihirwe ko-Kaisaari!”
12Mbe, Fesito akashumaasha na ribharasa, hano akomara, akatëëbhya Pauro igha, “Ko bhono osabhirë igha ikiina ikyaho kekorwe na Kaisaari, ku bhuyö ni-iyö oraaghi!”
Ömötöngi Fesito aratëëbhya omokama Aghiripa amangʼana agha Pauro
13Sinsikö ne-nke igho syaahëtirë, omokama Aghiripa#25:13 Aghiripa. Maaha mo-faharaasa engʼana, Herode Aghiripa. uwa kabhërë bhaana Bherinike, bhakaasha Kaisaaria hayö, ökökëërya Fesito. 14Ko bhoora sinsikö ni-nsharu bhaaikaayë hayö, Fesito akanyoora umweya, ughwa ökötëëbhya omokama uyö amangʼana agha Pauro. Akamötëëbhya igha, “Ömöntö uwöndë aahano, ono Fëriki yaatighirë mo-kebhohe. 15Hano naaghëëyë Yërusarëëmu, abhanene abha abhasëngëri, hamwë na abhaghaaka abha Ikiyahudi, bhakantëëbhya bhono bhakumushongera. Bhakansabha igha mmobhotorre ikiina.
16“Öni nkabhahonshora igha, bhëëtö Abharuumi, tetoona eteemo iya okobhotora ikiina ikya ömöntö, ataraaikoorerra harabhurabhu igho ko-bhashöngëri abhaaye. 17Ku bhuyö hano bhaaikomaini, öni wonswe tenatëghëtirë hë. Kasi nyinkyo iyaako, naaikaayë ku-kitumbë ikyane ikya okobhotorra ibhiina, nkahamera igha Pauro areetwe. 18Hano bhaamörëëtirë, abhashöngëri abhaaye, bhakaimerra ukumushongera. Kasi amangʼana ghano bhaamushöngëëyë, te-maghogho ghaarë kya bhono naakanyanga hë. 19Kasi keno bhaarë nakyo, n-nsenkaani isya amangʼana agha idiini iyaabho, na agha ömöntö ono yaakwa, arabherekerwa igha Yëësu, kasi Pauro akakangʼasërrya igha, Yëësu uyö m-möhöru. 20Amangʼana ghayö, ghakantaamya okomanyërrya obhoheene ubhwako. Ku bhuyö nkabhöörya Pauro nyoore aratuna ukughya Yërusarëëmu, okokorra-yo ikiina ikyaye kiyö. 21Kasi Pauro akasabha igha arendwe okohekera hano ikiina ikyaye kerebhotorwa na Kaisaari. Ku bhuyö nkaraghërrya igha, arendwe okohekera hano ndimuhira ko-Kaisaari.”
22Ho Aghiripa yaatëëbhëri Fesito igha, “Nkutuna ndë igha, hano öni umwene wonswe nkamwitegherra.”
Fesito akamohonshora igha, “Ni-isho urimwitegherra.”
Pauro mbere iya omokama Aghiripa
23Mbe, nyinkyo yaako, Aghiripa hamwë na Bherinike, bhakatora bhaibhöhëëyë, abhantö bhakakirirrya. Bhakasoha mo-bharasa na abhanene abha abhasirikare hamwë na abhanene abhandë abha umughi ghuyö. Fesito akahamera igha Pauro areetwe. 24Hano Pauro yaarëëtirwë, Fesito akaghamba igha, “Ore omokama Aghiripa, na bhëënyu bhonswe igho bhano tosangerraini hano, moramaaha ömöntö ono! Ehamatë yonswe igho iya Abhayahudi abha Yërusarëëmu na abha hano, bhaansabhirë igha mbatöörri, bhakakora ikituri bharaghamba igha, ëkëntö keno kimwingʼarëëyë, nu-ruku.
25“Öni umwene, tenaarööshë engʼana eno ekaaghërrë aitwe hë. Kasi ko bhono yaasabhirë igha aghi ko-mokama uwëëtö omonene uwa Abharuumi, nkaikërrya igha, tigha muhire-yo. 26Kasi ko-robhaara urwane, tendanyoora engʼana iya ikiina keno iya obhoheene, iya ukwandekera omokama uwëëtö omonene. Kiyö nkyo ikibhuno ikya okomoreeta kö-bhëënyu bhonswe igho hano, ekenene nku-uwe omokama Aghiripa, okore hano toraamöbhöörërri bhuuya, nnyoore engʼana iya ukwandekera omokama uwëëtö omonene. 27Ko bhoora nkomaaha ndë igha, te-ngʼana nshiiya ukuhira omobhohe ko-mokama uwëëtö omonene, otaandëkirë bhuuya amangʼana agha obhosarya ubhwaye.”
Currently Selected:
Amangʼana agha Abhatomwa 25: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.