Abharuumi 7
7
Amaraghërryö agha Mosateghakobhandërrya abhakumya abha Yëësu hë
1Abhakumya bharikyëtö, m-bëënyu nkushumaasha na bhëënyu, bhano momanyirë amaraghërryö agha Mosa. Mmomanyirë bhuuya igha, ömöntö nkoghoota arë amaraghërryö hano waanyoora akërëngë möhöru, ataraakwa. 2Tigha mbaraghërri bhuuya engʼana eno. N-kya bhono amaraghërryö agha abhantö bhano bhaatetana gharë. Omokari takwikërërribhwa ukutigha mushaasha uwaaye akërëngë möhöru ataraakwa. Kasi hano mushaasha uwaaye akuurë, hayö nkobha arë na öbhötöönööni ubhwaye. 3Kasi hano araatetwe na mushaasha uwöndë mushaasha uwaaye akeeho, hayö no-bhosooraare ukunyoora akörrë. Kasi hano mushaasha uwaaye akuurë, engʼana kya iyö teeho hë. Aratora okotetwa na umushaasha uwöndë, kora taaho ömöntö ono araaghambe igha omokari uyö, m-mosooraare.
4Abhakumya bharikyëtö, amangʼana ni-igho gharë na kö-bhëënyu bhonswe. Kya bhoora ërëngë igha, hano ömöntö yaakwa, takobhandërribhwa ghwiki na amaraghërryö hë, na bhëënyu bhonswe ni-igho ërë igha, temokotangatwa na amaraghërryö agha Mosa hë, mwahanekwa ko-mosarabha hamwë na Yëësu Kiristo. Bhoono bhëënyu na-bhantö abha Yëësu Kiristo mörë. Yëësu Kiristo uyö, yaaryökiibhwi ukurwa mo-bhaku, okore atohaane obhotoro ubhwa okokorra Waryobha emeremo. 5Enkaagha eno esemoko iyëëtö iya öbhököri ubhwa ëbhëbhë yaatotonganga, amaraghërryö agha Mosa ngaaghërrë oronamba urwa ömöbhërë robhe na singuru bhököngʼu kö-bhëëtö. Kiyö nkyo kyaagheranga turatuna tokore ëbhëbhë bhököngʼu. Engʼana iyö, yo yaarëëtirë uruku. 6Twaarenga töghöötërrëëywë na maraghërryö. Kasi bhoono twaakwa hamwë na Yëësu Kiristo, ensonga iyaamo ni-igha, totashööywë ukurwa ko-maraghërryö. Bhoono tetokokorra Waryobha emeremo ko okohetera amaraghërryö agha kare ghaara, kasi nkomokorra törë emeremo ko-nshera eehya iya okotangwatwa na Umwika Ömöhörëëru.
Amaraghërryö ngo ghakoghera ëbhëbhë bhemanyekana
7Bhoono iyakë tokaaghamba? Toghambe igha amaraghërryö, n-këbhë? A a, ti-igho hë. Singa amaraghërryö agha Mosa ghataare-ho, tenkamanyirë igha ëkëbhë n-këntö kë. Singa amaraghërryö ghataare-ho ghano ghakoghamba igha, “Otakaighomba ëkëntö ikya uwöndë,”#7:7 Maaha mo-ketabho ikya Ukurishoka 20:17; Eheetoko iya Etoraati 5:21. tenkamanyirë igha, ukwighomba ëkëntö ikya uwöndë, nkunyoora örë nkörrë ëkëbhë. 8Kasi bhoono ëbhëbhë bhyaturaanëri oronamba urwa seteemo sinsharu, okohetera ko-maraghërryö ghayö. Omanye igha, hano oraaruusi-ho amaraghërryö ghayö, ëbhëbhë tebhekobha na obhotoro hë. 9Hano waanyöörrë ntaraamanya amaraghërryö ghayö, naakoranga bhono naatunanga. Kasi bhoono hano naamanyirë kya bhono amaraghërryö ghaatunanga igha nkore, hayö ho naamanyirë igha, ëbhëbhë mbeena obhotoro kora bhyareeta uruku. 10Hayö ho naamanyirë igha, amaraghërryö ghano ghakaangʼaayë öbhöhöru, kasi ghakandeetera uruku. 11Mbe, ëbhëbhë bhekanngʼaina okohetera ko-maraghërryö ghayö, kora bhekankorerra uruku. 12Mbe, m-boheene igha, amaraghërryö m-mahörëëru, na imighiro ghyonswe m-mëhörëëru, n-gya heene kora m-miiya.
13M-maheene igha, engʼana inshiiya kya iyö, tekaankörërrëëyë uruku hë. Kasi keno kyaankorerra uruku, në-bhëbhë, ko okohetera ko-maraghërryö amaiya ghayö. Keno Waryobha yaatunanga, nu-kutwörökya igha, ëkëbhë ne-ngʼana engogho bhököngʼu.
Keno nkokora n-keera ntakutuna igha nkore
14Ntomanyirë igha, amaraghërryö nku-Waryobha ghaarwa, kasi öni neena esemoko iya öbhököri ubhwa ëbhëbhë, ku bhuyö nko okoghamba igha, öni m-moghorwa uwa ëbhëbhë ndë. 15Öni temanyirë keno nkokora hë. Ko bhoora keera nkutuna igha nkore, tenkokekora hë, kasi keno nkokora, n-keera ntakutuna igha nkore. 16Hano okomaaha igha ghaara ntakutuna igha nkore ngo nkokora, bhuyö no-bhoheene bhono bhukwörökya igha, amaraghërryö agha Mosa, m-maiya. 17Hayö nkunyoora örë tö-öni nkokora ëbhëbhë hë, kasi ne-semoko iya öbhököri ubhwa ëbhëbhë eno nenayo, yo ekokora amangʼana ghayö. 18Nemanyirë igha, teneena ëkëntö ikiiya kyokyonswe ko-semoko iyaane hë. Ko bhoora igha, hano natuna igha nkore amangʼana amaiya, nkobhorwa ndë obhotoro ubhwa okoghakora. 19Ensonga iyaamo ni-igha, tenkokora amangʼana amaiya ghaara nkutuna igha nkore. Kasi ghano nkokora, na-mangʼana amaghogho, ghano ntakutuna igha nkore. 20Bhoono nyoore nkokora ndë ghaara ntakutuna igha nkore, hayö ho bhoono nkomanya igha, tö-öni nkokora ëbhëbhë bhiyö hë, kasi ne-semoko eera iya öbhököri ubhwa ëbhëbhë eno nenayo, yo ekokora ghayö.
21Mbe, mmarrë okomanya igha, nkwighomba ndë igha nkore amangʼana amaiya, kasi ndutwa okokora amangʼana amaghogho. 22Obhoheene ni-igha amaraghërryö agha Waryobha nengahanshirë bhököngʼu. 23Kasi nkomaaha ndë igha, imyaho ighya kö-möbhërë ughwane, ghyaabhaahwa na singuru isya esemoko iya öbhököri ubhwa ëbhëbhë eno ikwitana riihë na amaitegherro aghaane. Kiyö nkyo kekoghera ndabha omoghorwa uwa okokorra emeremo ëbhëbhë okohetera kö-möbhërë ughwane.
24Haahö, bhamurë bhëëtö, kana n-nawë araantööri ndwe mo-bhoghorwa ubhwa öbhököri ubhwa ëbhëbhë bhono bhokondeetera uruku? 25Nkukumya ndë Waryobha, ko bhoora aköntöörya ko okohetera ko-Monene uwëëtö Yëësu Kiristo.
Ku bhuyö mbe ni-igha, öni umwene ko sehakëri isyane nkomaaha ndë igha, nkoghoota ndë amaraghërryö agha Waryobha, kasi esemoko iyaane iya öbhököri ubhwa ëbhëbhë, yo nkoghoota ërë amaraghërryö agha ëbhëbhë.
Currently Selected:
Abharuumi 7: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.