Abharuumi 8
8
Okotangatwa na Umwika Ömöhörëëru
1Mbe, bhoono ni-igha, Waryobha taashibhi abhantö bhano bhaana öbhömwë na Kiristo Yëësu. 2Ko okoghootana na Kiristo Yëësu, nnyöörrë obhotoro ubhwa Umwika Ömöhörëëru ono akotohaana öbhöhöru ubhwa amakora ghonswe igho. Öbhöhöru bhuyö, bhongʼaayë öbhötöönööni, okore ntakabhaahwa na obhotoro ubhwa ëbhëbhë na uruku. 3Amaraghërryö agha Mosa teghaarenga na obhotoro ubhwa okotohaana öbhötöönööni, ko okoghera iya esemoko iyëëtö iya öbhököri ubhwa ëbhëbhë. Kasi keno amaraghërryö ghaakërrwë okokora, Waryobha yaakëkörrë. Yaatömirë Omoona uwaaye umumwëmwë, akaasha ko-kebhara kono kinyabhantö, kya bhëëtö abhaköri abha ëbhëbhë, okore abhe ikimwenso ko okoghera iya ëbhëbhë ibhyëtö. Ko okokora igho, Waryobha yaasikiri esemoko iya öbhököri ubhwa ëbhëbhë kö-bhëëtö. 4Waryobha yaakörrë igho, okore amangʼana agha heene agha amaraghërryö ghahekeranibhwi bhuuya kö-bhëëtö bhano totakwighwera esemoko iya öbhököri ubhwa ëbhëbhë, kasi nu-Mwika Ömöhörëëru we tukwighwera. 5Ömöntö ono akotangatwa na esemoko iya öbhököri ubhwa ëbhëbhë, sehakëri isyaye nsëhanshirë okokora amangʼana agha ëbhëbhë. Kasi ono akotangatwa na Umwika Ömöhörëëru, uyö sehakëri isyaye nsëhanshirë okokora amangʼana ghano ghakushomera Umwika Ömöhörëëru. 6Ömöntö ono sehakëri isyaye sekotangatwa na esemoko iya öbhököri ubhwa ëbhëbhë, uyö nu-ruku urwa amakora ghonswe igho akwireetera. Kasi ömöntö ono akotangatwa na Umwika Ömöhörëëru, uyö naana öbhöhöru ubhwa amakora ghonswe igho, kora naana omorembe. 7Ömöntö ono akotangatwa na esemoko iya öbhököri ubhwa ëbhëbhë, uyö m-mubhisa uwa Waryobha. Takwikërrya ukwighwera amaraghërryö agha Waryobha. Kora takotora okoghaighwera hë. 8Ku bhuyö ömöntö ono akotangatwa na esemoko iya öbhököri ubhwa ëbhëbhë, taatore ökötëghërya Waryobha hë.
9Kasi bhoono bhëënyu, temokotongwa na esemoko iya öbhököri ubhwa ëbhëbhë hë, nu-Mwika uwa Waryobha ono amënyirë mo-senkoro isyënyu, we akobhatangata. Momanye igha, ömöntö wowonswe ono ataana Umwika uwa Yëësu Kiristo#8:9 Umwika uwa Yëësu Kiristo. Uyö we Umwika uwa Waryobha, handë Umwika Ömöhörëëru. mo-nkoro iyaaye, uyö te-mosoorani uwa heene uwa Yëësu Kiristo hë. 10Ko bhoora igha Kiristo mmo-senkoro isyënyu amënyirë. Ku bhuyö nokaanyoora igha nkukwa mörë kinyamöbhërë, ko okoghera iya ëbhëbhë ibhyënyu, kasi Umwika Ömöhörëëru, nkobhahaana arë öbhöhöru, ko bhoora Waryobha abhabharrë igha, m-ba heene mörë. 11Umwika Ömöhörëëru ono amënyirë mo-senkoro isyënyu, uyö we Umwika uwa Waryobha ono yaaryökëri Kiristo Yëësu. Ku bhuyö Waryobha nariryökya ëmëbhërë ighyënyu gheno ghikukwa ko okohetera obhotoro ubhwa Umwika Ömöhörëëru uyöuyö.
12Ku bhuyö abhakumya bharikyëtö, totakaabha abhantö bhano bhakotangatwa na esemoko iya öbhököri ubhwa ëbhëbhë. 13Momanye igha, hano moraabhe abhantö bhano mokotangatwa na esemoko iya öbhököri ubhwa ëbhëbhë, hayö nu-ruku urwa amakora ghonswe igho mukwireetera. Kasi hano obhotoro ubhwa Umwika Ömöhörëëru, bhoraabhatöörri mwange okokora amangʼana ghano esemoko iya öbhököri ubhwa ëbhëbhë ikutuna igha mokore, moraabhe na öbhöhöru ubhwa amakora ghonswe igho.#8:13 Maaha mo-ketabho ikya Abhagharatia 6:8.
14Abhantö bhonswe igho bhano bhakotangatwa na Umwika uwa Waryobha, bhayö mbo abhaana abha Waryobha. 15Waryobha tiyaabhahaayë Umwika Ömöhörëëru, okore mobhe abhaghorwa abhoobha. Kasi yaabhahaayë Umwika Ömöhörëëru, okore mobhe abhaana abhaaye. Umwika Ömöhörëëru uyö, we akötötöörrya, okore tobherekere Waryobha igha, “Taata.” 16Umwika Ömöhörëëru uyö, we akokangʼasërrya mo-senkoro isyëtö igha, bhëëtö m-baana abha Waryobha törë. 17Mbe, nyoore bhëëtö m-baana abha Waryobha törë, m-bëëtö abhari abha umwandö ughwa Waryobha, hamwë na Yëësu Kiristo. Kasi bhoono keno kikutunwa, nö-köghömërrya inyaanyi kya bhono Kiristo yaaghömërrëëyi. Hayö bhoono ho törëtöönibhwa hamwë nawe.
Waryobha narehaana abhaana abhaaye ubhuhika
18Ku bhuyö inyaanyi iyëëtö iya bhoono igho, të-këntö hë, hano nagherengʼaania na ubhuhika bhono Waryobha aretohaana. 19Ëbhëntö bhyonswe igho bheno bhyaabhombwa, nkoghanya bhërë bhököngʼu, enkaagha eno Waryobha arehonyora harabhu igho abhaana abhaaye. 20Ëbhëntö bhyonswe igho bheno Waryobha yaabhomba ko-kebhara kono, bhyabha na amaragha. Ti-bhyene bhyaahanshirë ebhe igho hë, kasi n-kya bhono Waryobha umwene yaahanshirë.#8:20 Maaha mo-ketabho ikya Okosemoka 3:17. Hamwë na ghayö, nkoghanyerra bhërë enkaagha iyö. 21Ko bhoora enkaagha iyö yo bhërëtööribhwa bhetakaasoha mo-bhoghogho ubhwa uruku. Nkutuna bhërë igha, bhebhe na öbhötöönööni ubhwa ubhuhika bhono Waryobha arehaana abhaana abhaaye.
22Tomanye igha, okohekera bhoono igho, ëbhëntö bheno bhyaabhombwa bhyonswe igho, nkukuura bhërë bhököngʼu kya omokari ono akoromwa ebhesa. 23Ti-igha në-bhëntö bhiyö ibhyene igho mbyo bhikukuura hë. Kasi kora na bhëëtö bhonswe, bhano twaahaanwa Umwika Ömöhörëëru, okore tuwonshi ubhuuya bhono torehaanwa, nkukuura törë mo-senkoro isyëtö. Waryobha we tokoghanya, atohaane ubhwera bhwonswe igho ubhwa okobha abhaana abhaaye. Keno nkoghamba ni-igha, atutunguri, ëmëbhërë ighyëtö ghebhe emehya. 24Ukwitengʼera kuyö, ntoonako ukurwa haara Waryobha yaatötöörri. Kasi hano toraaitengʼere ëkëntö keno tokomaaha, kuyö tukwetengʼera hë. Bhoono nawë akwitengʼera okohaanwa ëkëntö keno aanakyo? 25Kasi hano toraaitengʼere okohaanwa ëkëntö keno totakomaaha, hayö ho tokoghanya kö ököghömërrya, totakukwa emetwe.
26Hamwë na ghayö ghonswe igho, Umwika Ömöhörëëru we akötötöörrya ku ubhwera obhoke bhono toonabho. Ko bhoora igha tetomanyirë okosabha ëkëntö keno kingʼarëëyë bhëëtö okosabha Waryobha uwëëtö. Ku bhuyö Umwika Ömöhörëëru we akotosabhera ku-Waryobha kö öbhörrö bhono bhotakoghambwa. 27Waryobha ono akwitaaha ghonswe igho ghano gharëngë mo-senkoro isya abhantö, we amanyirë amaitegherro agha Umwika Ömöhörëëru uwaaye. Umwika Ömöhörëëru uyö, nkosabhera arë abhantö abha Waryobha bhono Waryobha akutuna.
28Ntomanyirë bhuuya igha, Waryobha nkokora arë amangʼana amaiya hamwë na abhantö bhano bhamohanshirë,#8:28 Waryobha nkokora arë amangʼana amaiya hamwë na abhantö bhano bhamohanshirë. Ensonga iyaamo iyëndë ni-igha, Amangʼana ghonswe igho ngaraareete ëkëntö ikiiya ko-bhantö bhano bhahanshirë Waryobha, handë igha, ko-mangʼana ghonswe igho, Waryobha nkokora arë emeremo hamwë na abhantö bhonswe igho bhano bhamohanshirë okore abhakorre amangʼana amaiya. bhano yaabherekera ko okohansha ukwaye umwene. 29Waryobha yaamanyirë abhantö abhaaye kora ataraabhomba ekebhara. Bhayö mbo yaashaaghööyë bhabhe kya bhono Omoona uwaaye Yëësu Kiristo arë. Yaakörrë igho, okore Omoona uwaaye Yëësu Kiristo uyö, abhe omotangi ko-bhakumya abhaaru abha Waryobha. 30Ku bhuyö abhantö bhano yaashaaghööyë, mbo yaabhërëkëëyë, akabhabhara igha m-ba heene, kora akabharaghania igha, narebhahaana ubhuhika.
Teeho engʼana iya okotokaandora ukurwa ku righonshe irya Waryobha
31Bhoono iyakë tokaaghamba ko-mangʼana ghayö? Hano oraanyoore nku-kiina ikya Waryobha törë, m-maheene ömöntö uwa okotobhaaha, taaho hë. 32Waryobha tiyaabhaayë na ikyabhera ko-Moona uwaaye hë, kasi akamokora abhe ikimwenso ko okoghera iya bhëëtö bhonswe igho. Ko bhoora igha, yaakora Omoona uwaaye abhe ikimwenso ikyëtö, ku bhuyö naretongʼoora obhongʼoore ubhwa amangʼana amaiya ghonswe igho, okohetera ku-uyö. 33Taaho ömöntö uwa ukushongera abhaahorwa abha Waryobha, ko bhoora Waryobha umwene we akobhabhara igha m-ba heene. 34Kora taaho ömöntö uwa ukutushibhya hë. Kiristo Yëësu we yaakwa, akamara akaryoka. M-boryo ubhwa Waryobha arë, aratosabhera. Ku bhuyö taritushibhya hë.
35N-këntö kë keraatore okorebherra Kiristo atakaatohansha. Kiristo naraaghëndërri okotohansha, ntokaabha mu-nyaanyi indito, handë mu-nyanko, handë mo-mateeso, handë mu-nshara, okobhorwa singibho, okohona ukukwa, handë ukukwa. 36Amangʼana ghayö ngambirë hayö, n-kya ghano Amaandeko Amahörëëru ghakoghamba igha,
“Nkughwemwa törë sinsikö syonswe igho, ko bhoora nu-uwe tokokorra emeremo.
Abhantö bharatokora kya hano ömöntö yahira ringʼöndi ukushinsha.”#8:36 Maaha mo-ketabho ikya Zabhuri 44:22.
37Ntokaanyoora inyanko yoyonswe igho, kasi bhëëtö ntoraaghëndërri okobhaaha, ko bhoora Kiristo ono atohanshirë we akötötöörrya. 38-39Nemanyirë bhuuya igha, teeho engʼana eno eraakaani Waryobha atakaatohansha. Ntokaabha bhahöru, handë ntokaakwa, kasi Waryobha naraaghëndërri okotohansha. Kora taaho maraika, handë abha ubhwera, handë ëbhëntö bhyonswe igho ibhya obhotoro, tebheetore ukutwahora ukurwa ku-righonshe irya Waryobha. Nekaabha igha na amangʼana ghano ghakwikora bhoono igho, handë ghano ghariisha, handë ibhya mu-ryobha, handë ibhya mu-kyaro ikya abhaku, handë ëbhëntö ibhyëndë bhyobhyonswe bheera, tebheetore okorebherra Waryobha atakaatohansha. Righonshe riyö yaarehonyora kö-bhëëtö, ko okohetera ko-Monene uwëëtö Kiristo Yëësu.
Currently Selected:
Abharuumi 8: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.