Abharuumi 9
9
Pauro araighwera öbhörrö Abhaisiraëri
1No-bhoheene nkobhatëëbhya, öni umukumya uwa Kiristo, tenkorongoha hë. Kora amaitegherro aghaane ghano ghakotangatwa na Umwika Ömöhörëëru, ghonswe ni-igho ghakunyörökya. 2Nkwighwa ndë öbhörrö bhököngʼu, na ukunyahaareka kono kotakohwa röndë mo-nkoro iyaane, 3ko okoghera iya abhantö abha ikyaro ikyëtö. Ekaabhaayë-ho enshera, öni nenkaaikërëëyi nihiimwe, ntighane na Kiristo, okore abhantö abha ikyaro ikyëtö, bhakumi Yëësu Kiristo. 4Bhayö nkushumaashera na-Bhaisiraëri, abhantö bhano Waryobha yaakörrë bhabhe abhantö abhaaye, abha ubhuhika ubhwaye, abha imuuma#9:4 Imuuma. Maaha mo-faharaasa. iyaaye. Yaabharaghërrëëyi amaraghërryö aghaaye, na enshera inshiiya iya okomosaasaama, kora yaabhahaayë na amaraghanio aghaaye. 5Abhaisiraëri bhayö, mbo bhaasëmökirë ukurwa ko-bhakörö abhaabho, bhaabho Ibhurahimu, Isaaka na Yaakobho. Kinyabhantö, Kiristo m-Mwisiraëri yaarë. Kiristo ono arëngë igha we Waryobha Omonene uwa bhyonswe igho, akumibhwi amakora ghonswe igho!#9:5 Kiristo ono arëngë igha we Waryobha Omonene uwa bhyonswe igho, akumibhwi amakora ghonswe igho! Ensonga iyaamo iyëndë ni-igha, Waryobha, Omonene uwa bhonswe igho, akumibhwi amakora ghonswe igho. Amina.
6Tenkoghamba igha, Waryobha tiyaahekeraini riraghano iryaye ko-Bhaisiraëri, ti-igho hë, ko bhoora ta-Bhaisiraëri bhonswe igho bharëngë abhaahorwa abha Waryobha. 7Ti-igha urwebhoro urwa Ibhurahimu rwonswe igho m-baana abha heene abha Ibhurahimu. Ti-igho hë. Kasi Waryobha yaaraghaini Ibhurahimu igha, “Urwebhoro urwaho nku-Isaaka roresemoka ukurwa.”#9:7 Maaha mo-ketabho ikya Okosemoka 21:12. 8Ensonga iya amangʼana ghayö ni-igha, ta-bhaana abha kinyamöbhërë abha Ibhurahimu, igha mbo abhaana abha Waryobha. Kasi m-baara bheebhorwa ko okorengʼaana na riraghano irya Waryobha, bhayö mbo abhaana abha heene abha Waryobha. 9Ko bhoora riraghano, ni-igha ryaarë, “Hano ndikyora mooka ko-nkaagha kya eno, nurinyoora Saara aana omoona uwa ikishaasha.”#9:9 Maaha mo-ketabho ikya Okosemoka 18:10, 14.
10Ghwiki te-ghayö agheene igho hë, kasi Rebheka mokaa ömökörö uwëëtö Isaaka, yaaibhööyë ebhesare. 11-12Hano waanyöörrë ebhesare bhiyö bhetareebhorwa, kora bhataraakora engʼana engogho handë inshiiya, Waryobha akatëëbhya Rebheka igha, “Ömöntö mökörö naretighinkanera omoke uwaaye.”#9:11-12 Maaha mo-ketabho ikya Okosemoka 25:23. Engʼana iyö nkwörökya ërë igha, Waryobha nkwahora arë ömöntö ko okorengʼaana na bhono Waryobha umwene akutuna. Takokora ko okorengʼaana na amangʼana ghano ömöntö yaakora. 13Amangʼana ghayö n-ganga kya bhono Amaandeko Amahörëëru ghakoghamba igha, “Naikërëëyi Yaakobho, kasi Esaau tenamwikërëëyi hë.”#9:13 Maaha mo-ketabho ikya Maraaki 1:2-3.
Waryobha nkokora arë bhono akutuna
14Bhoono toghambe iyakë? Toghambe igha Waryobha te-wa heene hë? A a, ti-igho hë! 15Ko bhoora yaatëëbhëri Mosa igha, “Nkomaahera ndë amaabhë ömöntö ono nkutuna okomaahera amaabhë, na ukwabhera ono nkutuna ukwabhera.”#9:15 Maaha mo-ketabho ikya Ukurishoka 33:19. 16Ku bhuyö Waryobha umwene we akomaaha ömöntö uwa okomaahera amaabhë, te-bhono ömöntö umwene akutuna handë bhono akokora hë! 17Momaahe kya bhono Waryobha akoghamba mo-Maandeko Amahörëëru ko amangʼana agha Farao igha, “Naakohaayë obhokama okore nööröki abhantö obhotoro ubhwane okohetera ku-uwe, kora iriina iryane reraarekwenga ko-kebhara kyonswe igho.”#9:17 Maaha mo-ketabho ikya Ukurishoka 9:16. 18Ku bhuyö ni-igha, Waryobha nkomaahera arë ömöntö wowonswe igho amaabhë, na nkokora arë ömöntö wowonswe igho abha na omotwe ömököngʼu.
19Handë ömöntö aratora ökömböörya igha, “Nyoore ni-igho ërë, n-kwakë bhoono Waryobha akotema abhantö amasoro? M-möntö kë ono akotora okorebherra keno Waryobha akutuna akore?” 20M-botoro kë ömöntö aanabho, ubhwa ököbhöörya igho Waryobha? Inyöngö, eratora ököbhöörya ömöbhömbi uwaayo igha, “N-kwakë waambomba igho?”#9:20 Maaha mo-ketabho ikya Isaaya 29:16, 45:9. 21Ömöntö ono akobhomba ekebhegha, naana ubhwera ubhwa okobhomba ebhebhegha kya bhono akutuna. Aratora okobhomba ebhebhegha bhibhërë ko-matoto ghaaraghaara, kasi ikyëndë akekora ikya abhaghëni, na ikyëndë ikya okokorra emeremo sinkö syonswe igho.
22Ku-Waryobha ni-igho ërë. Waryobha yaatunanga ööröki abhantö okorerra ukwaye na obhotoro ubhwaye, kasi yaaghömërrëëyi bhököngʼu bhaara bhaaingʼarëëyi ukusikibhwa. 23Yaakörrë igho ko okoghera iya abhantö bhano yaasëëmëri igha, nakaabhaabhëëyë. Yaasëëmëri ghayö ukurwa kare igha, arebhahaana ubhuhika ubhwaye. 24Mo-bhantö bhano Waryobha yaabhërëkëëyë, kora na bhëëtö bhonswe mmötörë. Te-Bhayahudi abheene igho igha mbo yaabhërëkëëyë hë, kasi kora Abhakyaro bhonswe. 25Ghayö ngo Waryobha akoghamba mo-ketabho ikya Hosea igha,
“Abhantö bhano bhatarëngë abhaane,
mbo ndebherekera igha, ‘M-bantö abhaane.’
Abhantö bhano ntahanshirë,
mbo ndebherekera igha, ‘Abhaghonshe abhaane.’”#9:25 Maaha mo-ketabho ikya Hosea 2:23.
26Ghwiki ni-igha,
“Haara bhaatëëbhiibhwi igha, ‘Bhëënyu te-bhantö abhaane mörë hë,’
hayöhayö ho bharëtëbhibhwa igha, ‘Bhëënyu na-bhaana abha Waryobha ömöhöru.’”#9:26 Maaha mo-ketabho ikya Hosea 1:10.
27Ömörööti Isaaya ko amangʼana agha Abhaisiraëri araghamba igha,
“Nokaanyoora Abhaisiraëri m-baaru kya omosense ughwa ku-nyansha,
kasi bhano bharaatööribhwi, m-bake.
28Omonene Waryobha taateghete ukushibhya abhantö ekebhara ikighima,
ubhushibhu bhono bhobharengʼaini,
kya bhono yaarenga aghambirë.”#9:27-28 Maaha mo-ketabho ikya Isaaya 10:22-23.
29N-kya bhoora ömörööti Isaaya yaaghambirë kare igha,
“Singa etarëngë igha Omonene Waryobha uwa obhotoro bhwonswe igho,
atasaaghya-ho urwebhoro roke igho urwa Abhaisiraëri,
singa twasika kya abhantö abha Sodoma na Ghomora.”#9:29 Maaha mo-ketabho ikya Okosemoka 19:24-25; Isaaya 1:9.
Abhaisiraëri tebhaabharwa igha m-ba heene hë
30Ensonga iya amangʼana ghayö ghonswe igho në-ëëhë? Ensonga iyaamo ni-igha, Abhakyaro tebhaarenga na omotono ughwa ukutuna okobharwa igha m-ba heene, kasi Waryobha akabhabhara igha m-ba heene, ko bhoora bhakumiri Yëësu Kiristo. 31Abhaisiraëri bhaarenga na omotono ughwa okoghoota amaraghërryö, okore bhabharwe igha m-ba heene, kasi tebhaatörrë hë. 32N-kwakë bhataabharrwë igha m-ba heene? Tebhakobharwa igha m-ba heene ko bhoora bhaaiseghanga amangʼana aghaabho ghano bhaakoranga, bhakaanga ukukumya Yëësu Kiristo. Yëësu Kiristo we reghena reno bhaaituurrëtuurrë-ko. 33Amangʼana ghano ngatuubhaini kya bhono Waryobha yaaghambirë mo-Maandeko Amahörëëru igha,
“Tamaaha, ntöörrë reghena ku-nguku iya Sayuuni.
Reghena riyö, ndyo abhantö bharaituuretuurenga-ko,
riyö ndyo reghena reno reraaghwësinga abhantö.
Kasi ömöntö wowonswe ono araakumi uyö akobherekerwa igha we reghena,
tarësökërribhwa hë.”#9:33 Maaha mo-ketabho ikya Isaaya 8:14, 28:16.
Currently Selected:
Abharuumi 9: ssc
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.