ମାର୍କ 16
16
ଜିସୁଲା ଗୁଇ'ସେକ୍ ମାରି ବୁରଡେନ୍
(ମାତିଉ 28:1–8; ଲୁକ 24:1–12; ଜଅନ୍ 20:1–10)
1ବିସ୍ରାମ୍ଦିନ୍ ଡମ'ସା' ଉନ୍ତ୍ ମୁନ୍ଡିପ୍ ମଗ୍ଦଲିନି ମରିୟମା, ଜାକୁବ୍ନା ୟଂ ମରିୟମା ମାରି ସଲମିଲାସା ଆଜିସୁନା ମଟ୍ ସୁସୁପୁଲେଇ ବାସ୍ନାବାଇ' ସୁ'ଉ ସବ' ରିଂଅଁ' । 2ସବ' ରିଂଅଁ'ସେକ୍ ବେରା ରଇବାର୍ଦିନ୍ ତୁର୍ସିଂବେଲା ମା'ଏ ଇଁ'ଗେନ୍ଡ୍ର ସେଲାନେ ଜିସୁନା ମଟ୍ ଅଡିରିଗ'କୁନୁଂ ଲାଗ୍ଲାଗ୍ବକ୍ ଉଇଗା' । 3ମା'ଏ ଉଇରେମ୍ “ଗୁତୁନ୍ ଲାଗ୍ଲାଗ୍ନା ଡାନ୍ଡର୍ବକ୍ ବୁଂଅଁ'କୁନୁଂ ଗୁତୁନ୍ ବୁଡାଲା ବୁରେ ଜା ଆନେଇ' ରୁଗ'ବେ'ତବେ” ଡ'ସେକ୍ ମା'ଏ ଅଇଁୟ' ଅଇଁୟ' ଉଇଡେଂକୁ ।
4ସା' ମା'ଏ ଆତା ଡେଲ'ସା ଡାନ୍ଡର୍ବକ୍ନା ଗୁତୁନ୍ ବୁଡାଲା ବୁରେ ରୁଗ'ସେକ୍ ଅ'କୁର' ବୁଂଅଁ'କୁନୁଂ ଜୁଲ' । 5ସା' ମା'ଏ ଗୁତୁନ୍ ଲାଗ୍ଲାଗ୍ବକ୍ ଗାଇସେ'ଗା ଜୁଲ'ସା' ସୁସୁମ୍ତିକୁରୁଂ ମୁଇନ୍ଡା ଇଂଗେର୍ସେଲାବାଇ' ଇଂଗେରା ତୁଲୁଇବାଇ' ଇମ୍ପ' କୁକୁଇସେକ୍ ଲେଇ'କୁନୁଂ ଜୁଲ' । ଆମାଇ ଜୁଲ'ସେକ୍ ମା'ଏ ରାକ୍ତି'ଗା' ।
6ସା' ଗୁତୁନ୍ ଇଂଗେରା ଆମା'ଏ ସୁନ' “ପେ ଆବୁତୁଂଗା', ଆତୁନ୍ କୁର୍ସବକ୍ ଅଗୁୟ'କୁନୁଂ ଆନାଜରିତ୍ନା ଜିସୁଲା ପେ ତୁର'ତୁପେ ଇ? ମାଇ ଆକେ ଆଡୁତା! ମାଇ ବୁରଗା'! ଜୁ, ଆମାଇ ଆକେଉ ଅଡିରିଗ'ବୁଂଅଁ' । 7#ମାତିଉ 26:32; ମାର୍କ 14:28ଆ'ନା ପେ ଉଇସେକ୍ ଆସିସ୍ୟଲେ ମାରି ଆପିତର୍ଲାସା ସୁଁ ଜିସୁଲା ପେନ୍ ସିଁସେଇଁ ଗାଲିଲି ଉଂଗମ୍ବକ୍ ଉଇଡେନ୍ତା ଡ'ସେକ୍ । ମାଇ ଗୁଗୁଇ' ସିଁସେଇଁ ଆପେ ସୁନ'କୁନୁଂସୁଗ ଆମାଇ ପେ ଆତା ଜୁତୁପେ” ଡ'ସେକ୍ ସୁନ' ।
8ସା' ଅବୁଦି ରାକ୍ତିକ୍ସେକ୍ କାବା ଡେଂସେକ୍ ମଟ୍ ଅଡିରିଗ'କୁନୁଂ ଗୁତୁନ୍ ଲାଗ୍ଲାଗ୍କୁରୁଂ ମା'ଏ ତୁର୍ସେକ୍ ଉର' । ଅବୁଦି ବୁତୁଂକୁଗା'ସା' ମା'ଏ ଉର'ଉଇରେମ୍ କୁରୁଂବକ୍ ଆଜାଏସା ବାସ୍ ମାସା ଆସୁନ୍ତ ।
ଜିସୁଲା ଆମାଇନା ରେମଲେ ଅ'ତୁନାଡେନ୍
(ମାତିଉ 28:9–10; ଜଅନ୍ 20:11–18)
9ରଇବାର୍ଦିନ୍ ଇନ୍ଜୁର୍ ଜିସୁଲା ବୁରଗା' । ବୁରକ୍ସେ'ଗା ଆମଗ୍ଦଲିନି ମରିୟମା ସିଁସେଇଁ ଅ'ତୁନାଗା' । ଇନ୍ତେକନ୍ଡେକ୍ ଆମାଇଉ ସାତ୍ଟା ବୁତ୍ ସବ'କୁସା' ଜିସୁଲା ବଲ୍ ଡେମ'ବୁଂଅଁ' । 10ଜିସୁଲା ଗୁଇ'ଗା' ଡ'ସେକ୍ ଜିସୁନା ସିସ୍ୟଲେ ଉକ୍ସେ' ୱାଇସେକ୍ସେକ୍ ଡୁକୁନୁଂବେଲା ମାଇ ମା'ଏନ୍ବକ୍ ଉଇସେକ୍ ମାମା ଡେଂକୁନୁଂ ଗୁଲାଇ ଆମା'ଏ ସୁନ' । 11“ଜିସୁଲା ବୁରଗା' ନିଂ ଆମାଇ ଜୁଲ'ନିଂ” ଡ'ସେକ୍ ମାଇ ସୁନ'ସା'ଏସା ମା'ଏ ବିସ୍ବାସ୍ ଆଡେମ୍ତ ।
12ତିର୍ଗି' ଇମ୍ବାୟ ଇଂଗେର୍ପା ଜିରୁସାଲମ୍ ମୁନା'ଉଂଗମ୍କୁରୁଂ ମା'ଏନା ଉଂଗମ୍ବକ୍ ଉଇବେଲା ଜିସୁଲା ଆମାଇପା ପାଲ୍ବାଇ' ଅ'ତୁନାଗା' । 13ସା' ମାଇପା ଉନ୍ତ୍କୁରୁଂ ଜିରୁସାଲମ୍ ମୁନା'ଉଂଗମ୍ବକ୍ ଆନ୍ଡେଇଁସେ'ଗା ଆମା'ଏନ୍ ରେମଲେ ସୁନ'ସା'ଏସା ମା'ଏ ବିସ୍ବାସ୍ ଆଡେମ୍ତ ।
14ତିର୍ଗି' ଜିସୁଲା ମାଇନା ଏଗାରଲକ୍ ସିସ୍ୟଲେ ସୁସୁମ୍ବେଲା ଅ'ତୁନାଗା' । ଅ'ତୁନାକ୍ସେକ୍ ମା'ଏ ଆମାଇ ବଲ୍ ବିସ୍ବାସ୍ ଆଡେମ୍ତସା' ମାରି ମାଇ ବୁରଗା' ଡ'ସେକ୍ ରେମଲେ ସୁନ'ସା'ଏସା ମା'ଏ ବିସ୍ବାସ୍ ଆଡେମ୍ତସା' ମାଇ ଆମା'ଏ ତର୍ଞେ'ଗା' ।
15 #
ପେରିତ 1:8
ଜିସୁଲା ଆମାଇନା ରେମଲେ ସୁନ' “ପେ ଗୁଲାଇ ଦେସ୍ଦୁନିଆବକ୍ ଉୟା । ଉଇସେକ୍ ମାପ୍ରୁନା ବଲ୍କବର୍ ଆଗୁଲାଇର ସୁଁ । 16ପେ ସୁନ'କୁନୁଂ ବଲ୍କବର୍ ଅଂଅଁ'ସେକ୍ ଜା ବିସ୍ବାସ୍ ଡେମ୍ତ ମାରି ବାପ୍ତିସ୍ମା ରିଂତା ଆମାଇ ମାପ୍ରୁ ରକ୍ୟା ଡେମ୍ତ । ପେ ସୁନ'କୁନୁଂ ବଲ୍କବର୍ ଅଂଅଁ'ସେକ୍ ଜା ବିସ୍ବାସ୍ ଆଡେମ୍ତ ଆମାଇ ମାପ୍ରୁ ବିସାର୍ନା ଡେମ'ସେକ୍ ଡନ୍ଡ୍କସ୍ଟ ବେ'ତ । 17ଜାଜା ଆନିଂ ବିସ୍ବାସ୍ ଡେମ୍ତ ମା'ଏ କାବାକାବା ଡିନ୍ଡେମ୍ବାଇ' କାମ୍ ଅବୁଦି ଡିନ୍ଡେମ୍ ଗଂତା । ମାମା ଡ'ନା: ମା'ଏ ନିଂନା ଇମି ସୁନ'ସେ'ଗା ଆବୁତ୍ଲେ ଞୁଁଞ ଗଂତା, ମାରି ମା'ଏ ତିମେ ତିମେ ତୁମ' ଅଇଁତ । 18ମା'ଏ ଅବୁଦି ବିସ୍ବାଇ' ବୁବୁ'ବକ୍ ତିତିବୁରଂ ସବ'ନାସା ବିସ୍ବାଇ' ମା ଇଡ'ନାସା ଆମା'ଏ ମାସା ଆଡେନ୍ତା । ମାପ୍ରୁ ଆନ ବଲ୍ ଡେମେଇ' ଡ'ସେ'ଗା ମା'ଏନା ତିତିବୁରଂ ଆସିରେମ୍ ଆଲାମ'ନା ସିରେମ୍ସା ବଲ୍ ଡେନ୍ତା” ଡ'ସେକ୍ ସୁନ' ।
ଆଜିସୁଲା ସରଗ୍ବକ୍ ଅଡାଇ'ଡେନ୍
(ଲୁକ 24:50–53; ପେରିତ 1:9–11)
19 #
ପେରିତ 1:9–11
ପ୍ରବୁ ଜିସୁଲା କେନ୍ ଗୁଲାଇ ସୁଁସୁ ଅ'ଡମ'ସା' ମାପ୍ରୁ ଆମାଇ ସରଗ୍ବକ୍ ରିଂଅଁ' ଡାଇ'ଗା' । ମାରି ମାଇ ମାପ୍ରୁନା ସୁସୁମ୍ତିକୁରୁଂ ଲେଇ'ଗା' । 20ଜିସୁନା ସିସ୍ୟଲେ ଉନ୍ତ୍କୁରୁଂ ତୁର୍ସେକ୍ ଗୁଲାଇ ଦେସ୍ଦୁନିଆବକ୍ ଉଇସେକ୍ ଆଗୁଲାଇର ମାପ୍ରୁନା ବଲ୍କବର୍ ସୁନ' । ପ୍ରବୁ ଆମା'ଏ ସାନ୍ଡୁଂଅଁ'ସା' ମା'ଏ ସୁଁସୁବେଲା ଅବୁଦି କାବାକାବା ଡିନ୍ଡେମ୍ବାଇ' କାମ୍ସା ଡିନ୍ଡେମ୍ ଗଂଗା' । ଗୁତୁନ୍ ଗୁଲାଇ ଜୁଲ'ସେକ୍ ରେମଲେ ମାପ୍ରୁନା ତୁମ' ବିସ୍ବାସ୍ ଡେମ' ।
Currently Selected:
ମାର୍କ 16: BFW
Highlight
Share
Compare
Copy
Want to have your highlights saved across all your devices? Sign up or sign in
CC BY-NC-ND 4.0