Teē Ngán Israel gə̄ 2
2
Kojə Moijə
1De kógə̄ḿ kə́ gír kojə yā Lebi tə́ taā dəyá̰ kə́ gír kojə yān tə́. 2Dəyá̰ ní ndān̄ ngōn̄ ba ojə ngōn̄ kə́ dəngam, a̰a̰ kadə̄ ngōn̄ ní majə ngá̰ý anī mundə̄ dɔn nāā i mətá. 3Dan ń a̰a̰ loo mundə̄ dɔ ngōn̄ ní to̰ aĺ anī, un jáng papirus#2.3 Papirus: I mu kə́ kadə man̄ tə́ kə́ a əjōn̄ jáńg tə́ ō, a ɔrə̄n̄ kemən a rāān̄ makətūbə̄ tə́ ō., tə́ya̰ gudəro̰#2.3 Gudəro̰: I yá̰á̰ kə́ ɔr durdur tītə̄ gómbə beé, a ndērə̄n̄ i gíŕ nángāá. ō, nō kāgə̄ ō, gidə tə́, ba ənī ngōn̄ ní kemeé, aw̄ əndān dan tə̄ɓā gə̄ tə́ ta bā Nil tə́. 4Ngōkó̰o̰ ngōn̄ ní kə́ dəyá̰ aw̄ ra sa̰y yā ka̰a̰ń yá̰á̰ ń a rāā yā rāā ngōn̄ ní.
5Anī ngōn̄ *Parao̰ kə́ dəyá̰ aw̄ bāá ndogə̄ maná ba ngámandə kə́ ngé njə̄rā gōn tə́ gə̄ a njə̄rān̄ kə gō kadə bāá. Dan ń a̰a̰ jáng dan tə̄ɓā gə̄ tə́ anī əla nge kəla yān kə́ dəyá̰ kunuú. 6Ni-tḛḛ̄ ta anī a̰a̰ i ngōn̄ kə́ dəngam n to kemeé a nōō ní. Kumən o̰o̰n tām̄ yā ngōn̄ ní tə́ ō, əda na ngōn̄ ní na i ngōn̄ Hebəro ō. 7Ngōkó̰o̰ ngōn̄ ní dəjen na ké gḛy kadə̄ n-aw̄ n-ɓāŕ dəyá̰ Hebəro kógə̄ḿ kə́ nge kətō ngōn̄ kadə̄ reē adə̄ ngōn̄ ní mba wa. 8Anī ngōn̄ *Parao̰ ədan na kə aw̄ kə reē seneé. Ngōn̄ kə́ dəyá̰ ní aw̄ ɓāŕ kó̰o̰ ngōn̄ ní reē seneé. 9Ngōn̄ *Parao̰ əda dəyá̰ Hebəro ní na kə un ngōn̄ ní kə aw̄ kə mba, na nəkɔ́ n-a n-əgān. Adə̄ dəyá̰ ní un ngōn̄ ní aw̄ adə̄n mba. 10Dan ń ngōn̄ ní tɔgə anī, un aw̄ seneé adə̄n kə ngōn̄ Parao̰ó̰ adə̄ taān rāān ngōnən tə́, əndā rīn na i Moijə#2.10 Moijə, kə ta Hebəro kumən na i kə́ kun kum tə́. tɔdɔ̄ əda na n-unən na i kum man̄ tə́.
Moijə a̰ȳ aw̄ dɔ nang kə́ Madian tə́
11Dan ń Moijə tɔgə dəngam anī, aw̄ go̰ō̰ ngákó̰o̰n gə̄ tə́ ndɔ̄ kə́rēý tə́. Ni-a̰a̰ kəla gə̄ ń əndān̄ dɔdə́ tə́ gúu kadə̄ rāān̄ ní. Anī a̰a̰ de kə́rēý kə́ Ejiptə ra a tə̄ndā ngōkó̰o̰n Hebəro kógə̄ḿ. 12Moijə mbel loo kə̄ yóō kə̄ laā. Dan ń a̰a̰ deē aĺ anī, tə̄ndā de kə́ Ejiptə ní tə̄ndā tɔ̄lən, ba əlan dan nán̄g ngárə̄ḿnjēý tə́. 13Teē kə ndɔ̄ kə́ rangaá reē gogə́ ɓáý anī, ənge Hebəro gə̄ jōó ra a rɔ̄ɔ̄n̄ naā. Ni-dəje nge ń najə̄ əhɔn ní na ké ənda madə̄n ké i tām̄ rí tə́ wa. 14Anī deē ní tél ədan na ké i náā n əndān ngār dɔdə́ nin̄ tə́ yā gān̄g sarya yādə́ ní wa, ké gír̄ i tɔ̄lən tītə̄ ń tɔ̄ləń de kə́ Ejiptə ní wa. Dan ń Moijə a̰a̰ kadə̄ gír najə̄ ní teē dɔɔ́ kɔ̄ɔ́ anī ɓōĺ rāān. 15*Parao̰ oō najə̄ ní, adə̄ a sāā tɔ̄l̄ Moijə. Banī Moijə a̰ȳ aw̄ dɔ nang kə́ Madian tə́, aw̄ ndi ta bəlo man̄ kógə̄ḿ tə́.
16Nge tun̄ yá̰á̰ kə́ Madian ń rīn na i Jetəro ní ngánən kə́ dəyá̰ gə̄ i sīrí. Ngáń kə́ dəyá̰ gə̄ ní reēn̄ kuȳ maná kadə̄ rosə kem yá̰a̰ ka̰ȳ man̄ yā dā̰ gə̄ kadə̄ yá̰a̰ kul̄ yā bɔbə̄də́ gə̄ reē a̰ȳn̄. 17Ɓáa ngé kul̄ yá̰á̰ kə́ dəngam gə̄ reē tə̄ɓān̄də́ kɔ̄ɔ́. Anī Moijə ḭḭ rɔ̄ɔ̄ dɔ ngáń kə́ dəyá̰ gə̄ ní tə́, ba adə̄ yá̰a̰ kul̄ yādə́ gə̄ man̄ adə̄ a̰ȳn̄. 18Ngáń kə́ dəyá̰ gə̄ ní tél aw̄n̄ rɔ̄ bɔbə̄də́ tə́ gogə́, anī bɔbə̄də́ dəjedə́ na ké i ba̰ý áké tél reēn̄ ɓēé ɓōólaā ɓatə beé wa. 19Anī nin̄-ədanən̄ na de kə́rēý kə́ Ejiptə na rɔ̄ɔ̄ ngé kul̄ yá̰á̰ kə́ dəngam gə̄ dɔdə́ tə́ ō, na ɔdə man̄ adə̄ yá̰a̰ kul̄ yādə́ gə̄ adə̄ a̰ȳn̄ ō. 20Bɔbə̄də́ tél dəjedə́ na ké deē ní ké i rá wa, ké reēn̄ seneé aĺ ké i tām̄ rí tə́ wa. Kə tél kə aw̄ kə sāān̄ njan kadə̄ reē əsa yá̰a̰. 21Moijə ndigə ndi ɓē deē ní, adə̄ deē ni-adə̄n ngōnən kə́ dəyá̰ ń rīn na i Sepora ní adə̄ taā. 22Sepora ojə ngōn̄ kə́ dəngam, anī Moijə əndā rīn na i Gersom, kumən na i nge nam̄, tɔdɔ̄ əda na ni na i nge nam̄ dɔ nang yā tə̄rā gə̄ tə́.
Nə́ɓā gə̄rā Moijə kadə̄ ɔr̄ ngán Israel gə̄ ɓəloó
23Dan i ngá̰ý gō tə́ anī, mban̄g kə́ Ejiptə oy. Ngán *Israel gə̄ ń a rāān̄ kəla ɓəlo ní nōōn̄ rɔ̄də́ ō, əgan̄ kɔ̄ŕ ō, adə̄ nōō yādə́ aw̄ ugə̄ rɔ̄ Nə́ɓā tə́. 24Nə́ɓā oō nōō yādə́, anī əga kemən dɔ *madə̄ naā ń ni-əhɔ kə Abəraham ō, Isaak ō, Jakob ō ní tə́. 25Ni-a̰a̰ ngán *Israel gə̄ ō, ger̄ yá̰á̰ ń rāādə́ ní ō.
Currently Selected:
Teē Ngán Israel gə̄ 2: BS
Highlight
Share
Compare
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad