संत.मत्ती 12
12
सथाअ हिला रिनी परभु
(संत.मरकुस 2:23–28; संत.लुकास 6:1–5)
1 #
कन 23:25
हिमीन बेरा सथाअ हिला ईसु खिती ओत ताला-ताला रे सेनोः केनाय, आउर हुनी आलकु चेला तायतिकु के रांगेःग आदा लिकुआ, हिमीन रे हुंकू गोहोम गेले के होःड केते जोम यअते सेनोः केनाकु। 2फरीसीकु नोःआँ के नेल केते ईसु के बेता लियाकु, “नेलेमे, जे कामी सथाअ हिला उचित कनोआँ, आम आलकु चेला ताम हिना कामीअ दाकु!”
3 #
1 समु 21:1–6
ईसु कंहड़ी रूवाड़ोः लिकुआय, “आपे नोःआँ कापे पढ़ाव ताना एतान, दाऊद जे बेरा आएंग आउर गाती ताय रांगेःग ताहिनाकु, दो दाऊद एतान ताही लःअय? 4#लेवी 24:9हुनी एता लकान परमेसर आला ओड़ाअ रे बोलो केते, परमेसर लःअय रकाःब लअः लाःड के इदी केते जोम लःअय, आउर गाती ताय के होः एमा लिकुआय, जेके पुरोहित के बाई केते, ओके के होः जोजोम उचित का ताही नेना। 5#गन 28:9,10चाहे आपे मुसा आला कनहुन रे कापे पढ़ाव ताना एतान, ची पुरोहित बड़े बिनती ओड़ाअ रे सथाअ हिला रेनअः कनहुन के तोड़ायाकु रे होः दोसी काकु योआ। 6ईङ आपे के बेताः दिपीईंग, नोआँड़े हुनी एदानिया जे बड़े बिनती ओड़ाअ तरअः होः बड़ेआय। 7#सं.मत्ती 9:13; होसे 6:6जदि आपे नोःआँ रअः माने समझाव ताकोआपे, ‘ईङ दया तरअः खुस एदानिङा बलिदान रकाःब तरअः कोवान।’ दो बेकासुरी के, दोसी एरपे ठहराव ताकिया। 8एता लःअय ची मनवा होपोन सथाअ हिला रिनी होः परभु हेके।”
रोहोड़ तीः उनी होड़ के बेस लियाय
(संत.मरकुस 3:1–6; संत.लुकास 6:6–11)
9ईसु होनाःड़े तरअः मड़ांग सेन केते, हुंकू आला बिनती ओड़ाअ रे सेन नेनाय। 10होनाःड़े मिहोंड़ होड़ ताहिनाय, हुनी आला तीः रोहोड़ थिना। हुंकू होड़कु ईसु रे दोस लगाव लःअय, हुनी के कुली लियाकु, “सथाअ हिला बेबेस उचित एदनाअ एतान?”
11 #
सं.लुका 14:5
ईसु हुंकू के बेता लिकुआय, “जदि आपे आली मियांड भेंड़ा एदानिया आउर हुनी सथाअ हिला गड़हा रे उयुअ जुनोआय, दो आपे मेसे ओके नोकानाय? जे हुनी के सःब केते बाहरी एरे उड़ूंगिया? 12भेंड़ा तरअः बगरा मंहगा होड़ एदानिया, हिना लःअय सथाअ हिला भा-भलाई रेनअः उचित एदनाअ।” 13तब हुनी, हुनी होड़ के बेता लियाय, “आम आला तीः ताम के दरसानेमे।”
हुनी आएंग आला तीः तायके जिलींग लःअय आउर हुनी आला तीः ताय एटाअ तीः लकान बेस आमीन ना। 14नोःआँ रे फरीसीकु होनाःड़े तरअः बाहरी उडुंग केते, ईसु रअः बिरोध रे नोःआँ गुटिना लअकु, ची आबु हुनी के एता लकान गुजियाबु मेन केते सोंचाव दाकु।
परमेसर आली चुनाव लिनी धाँगड़
15ईसु नोःआँ पाड़ी केते, होनाःड़े तरअः सेनोः नाय, आउर ढेर होड़ हुनी के ओतोंग लियाकु। आउर हुनी जामाकु के बेस लिकुआय, 16आउर हुनी चेताव लिकुआय ची ईङ बारे रे एतान होः आलपे उदूः के। 17नोःआँ लकान इसायस आगमजानी आला कंहड़ी लअः पुराव नेना,
18 #
जसा 42:1–4
“नुई के ईङ निबाड़ तदियीङ, नुई ईङ आली धाँगड़ हेके,
ईङ नुई रे मुरुक खुस एदानिङा, ईङ आली दुलार हेके।
नुई के ईङ अपन आतमा एमायींग,
आउर नुई एटाअ-एटाअ जाईतकु तलारे नेयाय रअः धरम परचार केआय।
19नुई ना दो झगड़ा किकुआय आउर ना गुल-गबाड़ केआय,
आउर ना बजार रे, जाहें नुई आला कंहड़ी के आयुम केआकु।
20नुई ना दो सेरेःड लअः ढुढ़ी के टोटअ केआय,
आउर ना इड़िगोः वाला सेड़ता कि गी इड़िःग केआय।
जब तक हुनी नेयाय के अलुई जीताअ,
21हुनी आला नुमू रे एटाअ जाईतकु भरसा दोहो केआकु।”
ईसु आउर सैतान
(संत.मरकुस 3:20–30; संत.लुकास 11:14–23)
22होड़कु मियांड अंधरा गुंगा के जेकर रे मुवाँ आतमा थिनाय, हुनी दुबाःड़े आगु लियाकु आउर ईसु, हुनी के बेस लियाय। आउर हुनी कंहड़ीः दाय आउर नेल दाय। 23नोःआँ रे जामा होड़कु छकित केते कंहड़ीः दाकु, “नुई दाऊद आली होपोन हेके एतान?”
24 #
सं.मत्ती 9:34; 10:25 नोःआँ आयुम केते फरीसीकु कंहड़ी लअकु, “नुई मुवाँ आतमाकु आली सरदार बलजबुल आला सहाड़ा रे मुवाँ आतमाकु के उडुंग कुआय।”
25ईसु हुंकू आला विचार के पाड़ी केते कंहड़ी लःअय, “जे राईज रे छिट-फुट हुयाआ होना नास जुनोआ। आउर जे सहर चाहे ओड़ाअ रे छिट-फुट हुयाआ होना एरे टिकाव दड़ीयोआ। 26आउर जदि सैतान, सैतान के गी उड़ूंगियाय, दो हुनी अपन गी विरोधी हुयाव कोआय, तब हुनी आला राईज एता लकान बनाव ताहिकोआ? 27आउर जदि ईङ बलजबुल रअः मदाईत रे मुवाँ आतमाकु के उडुंग कुईंग, दो आपे आलकु चेलाकु ओके रअः मदाईत रे, हुंकू के उडुंग कुआकु? हिना लःअय हुंकू गी आपे आला नेयाय केआकु। 28बकिर जदि ईङ परमेसर आला आतमा रअः मदाईत रे, मुवाँ आतमाकु के उडुंग कुईंग, दो परमेसर आला राईज आपे दुबाःड़े हीःग सोदोर ताना।
29“फिन जाहें सवांगिया आला ओड़ाअ रे बोलो केते, एता लकान हुनी आला जिनीस के रेःग दाड़ी केआय, हुनी के पहिल रे तोल केते गी, हुनी आला ओड़ाअ के रेःग दाड़ी केआय।
30 #
सं.मर 9:40
“जे ईङ लोः कनियाँ, हुनी ईङ आली बिरोधी हेके, आउर जे ईङ लोः काय जवारेआ हुनी छितयायाय। 31हिना लःअय ईङ आपे के कंहड़ीओ दिपीईंग, ची होड़कु आला जामा लकान पाप आउर परमेसर आला निन्दा छमायोआ, बकिर पबितर आतमा रअः निन्दा एरे छमायोआ। 32#सं.लुका 12:10जे मनवा होपोन रअः बिरोध रे जहान कंहड़ीआय हुनी के छमा भेटाव कोआ, बकिर जे पबितर आतमा रअः बिरोध रे कंहड़ीआय, हुनी के छमा एरे भेटाआ, ना नोःआँ जुग रे आउर ना हिजोअ वाला जुग रे।
सिङ आउर होना रअः जोअ
(संत.लुकास 6:43–45)
33 #
सं.मत्ती 7:20; सं.लुका 6:44 “आपे पाड़ी आपे ची बेस जोअ ना-नाम लःअय आपे के बेस सिङ गी ललगाव पड़ाव कोआ। आउर का-बेस सिङ तरअः का-बेस जोअ गी भेटाआ। एता लःअय ची सिङ अपन जोअ तरअः गी चिनहा योआ। 34#सं.मत्ती 3:7; 23:33; सं.लुका 3:7; सं.मत्ती 15:18; सं.लुका 6:45बिंङ आलकु होपोन, आपे का बेस हुयाव केते, बेस बात एता लकान कंहड़ी दाड़ी केआपे? जे मन रे पेरेःग ताना, हिना आहा तरअः बाहरी उडुंगोआ। 35बेस होड़ आनेःग आला बेस कोठा तरअः बेस जिनीस उडुंगेआय, आउर का बेस होड़ आनेःग आला का-बेस कोठा तरअः का-बेस जिनीस उडुंगेआय।
36“ईङ आपे के बेताः दिपीईंग, ची नेयाय हिला जामा होड़कु के अपन जामा बेकार कंहड़ी रेनअः हिसाब एमोअ पड़ाव कोआ। 37एता लःअय ची आपे अपन बात तरअः गी बेकासुर चाहे दोसी ठहराव कोआपे।”
सिरमा चिनहा रअः को-कोय
(संत.मरकुस 8:11,12; संत.लुकास 11:29–32)
38 #
सं.मत्ती 16:1; सं.मर 8:11; सं.लुका 11:16 हिमीन बेरा थोड़ेक धरम पुथी सि-सिखावकु आउर फरीसीकु ईसु के बेता लियाकु। “ए गुरू, आले आम तरअः मियांड चिनहा नेनेल नाम तनाले।”
39 #
सं.मत्ती 16:4; सं.मर 8:12 “हुनी हुंकू के उतारा एमा लिकुआय” “नोःआँ जुग रेनअः का बेसकु आउर ब्यबिचार कामीकु चिनहा कोयाकु। बकिर जोना आगमजानी आला चिनहा बाई केते, आउर जहान एटाअ चिनहा हुंकू के एमोअ कनोआँ। 40#जोना 1:17जे लकान जोना पे रोज, पे निदा हाकु आला लाहीःग रे ताहिनाय, हिना लकान मनवा होपोन होः ओत भीतीर रे, पे रोज आउर पे निदा ताहिकोआय। 41#जोना 3:5निनवे रिनकु होड़ नेयाय हिला नोःआँ परिया रिनकु होड़कु लोः तिंगु केते, हुंकू के दोसी ठहराव किकुआकु, एता लःअय ची हुंकू जोना आला परचार आयुम केते, मन रूवाड़ थिलआकु, आउर नेलेपे, जे जोना तरअः होः बड़े एदानिया हुनी नोआँड़े एदानिया। 42#1 राजा 10:1–10; 2 इति 9:1–12दखिन रिनी रानी नोःआँ परिया रिनकु होड़ लोः नेयाय हिला तिंगु कोआय, आउर हुंकू के दोसी ठहराव किकुआय, हुनी सुलेमान आला बुधी आ-आयुम लःअय, धरती रेनअः छोर तरअः हीःग थिनाय, आउर नेलीपे सुलेमान तरअः बड़े नोआँड़िया।
दरपुरा सुधराअ रे बिपाईत एदनाअ
(संत.लुकास 11:24–26)
43“असुध आतमा होड़ तरअः उडुंग केते रिड़िगया ठाँव रे सथाअ लःअय ठाँव नाम बड़ायाय, बकिर हुनी सथाअ ठाँव काय नाम दड़ीआ, 44तब हुनी कंहड़ीआय, ‘ईङ जे एड़े तरअः उडुंग तानिङ, अपन हिना ओड़ाअ रे रूवाड़ो ईङ। आउर जब हुनी रूवाड़ोआय आउर होना के ओचोअ अमिन लआ’ आउर जोअ अमिन लआ, आउर सिंगराव लआ नामेआय। 45तब हुनी सेन केते आएंग तरअः जादे खपतान सातगोड़ गादुस आतमा के आगु कुआय, आउर हुंकू होना ओड़ाअ रे बोलो केते बसाव जुनोआकु। नोःआँ लकान हुनी होड़ आला नोःआँ आखरी रेनअः दसा पहिल तरअः जादे बगड़ाव जुनोआ। निआँ दसा नोःआँ का-बेस परिया रअः होः हुयाव कोआ।”
ईसु आली एंगा आउर बोको ताय-तिकु
(संत.मरकुस 3:31–35; संत.लुकास 8:19–21)
46ईसु तुन्दरा होड़कु के उपदेस एमाकु केनाय ची, हुनी आली आयाते आउर बोको ताय-तिकु हीःग नेनाकु। हुंकू बाहरी रे तिंगु थिनाकु, आउर हुनी लोः भेंटोः नाम केनाकु। 47तुन्दरा होड़कु मेसे जाहें ईसु के बेता लियाय, “नेल कुमे, आम आली आया आउर बोको ताम तिकु बाहरी रे एदान कुआ, हुंकू आम लोः भेंटोः नाम तानाकु।”
48ईसु हुंकू के बेता लिकुआय, “ईङ आली आया ओके हेके आउर बोको तिंग तिकु ओके हेके?” 49आउर आनेःग आलकु चेलाकु के तीः रे अड़िःग केते बेता लिकुआय, “नेलेपे नुकू हेके, ईङ आलकु आया आउर बोको तिंग। 50एता लःअय ची जे ईङ आली सिरमा रिनी बाबा आला मरजी पुरायाय, हिंकु ईङ आलकु आया आउर बोको-बोयहा हेके।”
Currently Selected:
संत.मत्ती 12: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0