If you have would like a copy of this version please contact info@davarpartners.org

Text: Ahirani New Testament, CC-BY-SA-4.0, The Love Fellowship. -- Audio: Ahirani New Testament Audio Bible, CC-BY-SA-4.0, Davar Partners International, The Love Fellowship, 2022

Ahirani New Testament

Ahirani Bible (आहिराणी) by The Love Fellowship is licensed under Creative Commons Attribution-ShareAlike 4.0 License.

त्या दिन येशु घरून निघीसन समुद्र ना तठ वर जाई बठना. आणि तेना जोळे एक अशी मोठी गर्दी एकत्र हुईनी कि तो नाव वर चळी ग्या, आणि सगळी गर्दी समुद्र ना तठ वर उभी ऱ्हायनी. आणि तेनी आपला दाखलास्मा कईक गोष्टी सांगणा, देखा एक माणुस आपला वावर मा काही बीज पेरासाठे निघना. पेरतांना काही बीज रस्ता ना तठ वर पळणा आणि पक्षी ईसन तेले खाई ग्यात. काही बीज दगडसवाली जमीन वर पळणा, जठे तेस्ले जास्त माती नई भेटणी, आणि नरम माती नई भेटा मुळे त्या लवकर उगी उनात. पण सूर्य निघा वर त्या बई ग्यात, आणि मुया नई धरा मुळे सुखी ग्यात. काही बीज काटावाला झाळीस्मा पळणा, आणि झाळ वाळीसन तेस्ले दाबी टाकनात. पण काही सुपीक जमीन वर पळणा, आणि वाळीसन तो गैरा पिक लयना, आणि कोणी तीस पट, कोणी साठ पट, आणि कोणी शंभर पट पिक लयना. ज्या कोणी या गोष्ट ले आयकू सकतस जे मी सांगस, त्या तेले आयकीसन समजाना प्रयत्न करा.


शिष्यस्नी तेना जोळे ईसन तेले सांग, तू तेस्ना संगे दाखलास्मा काब बोलस? तेनी उत्तर दिधा, तुमले त परमेश्वर ना राज्यांनी समज खरेपणा मा दियेल शे, पण तेस्ले नई. कारण कि जेले समजा नि ईच्छा शे (जे मी शिकाळी ऱ्हायनु), परमेश्वर तेले आखो जास्त समज दिन. पण जो कोणी हय समजा नि ईच्छा नई ठेवत कि मी काय सिकस, आठ लगून कि जी समज तेनापा शे, परमेश्वर तिले तेना पासून लीलीन. मी तेस्ना संगे दाखलास्मा एनासाठे गोष्टी करस, कारण कि त्या देखीसन नई देखतस, आणि आयकीसन नई आयकतस आणि नई समजतस. “आणि तेस्ना विषय मा यशया भविष्यवक्ता नि हयी भविष्यवाणी पुरी होस, तुमी कानस कण आयकशात, पण समजाव नईत, आणि डोयास कण त देखशात, पण तुमले नई सुजाव. कारण ह्या लोकस्ना मन कठोर हुई जायेल शेत. आणि त्या कानस कण जोरमा आयकतस, आणि तेस्नी आपला डोया झाकी लीयेल शे. कदी अस नई हुई जावो कि त्या डोयास कण देखोत, आणि कानस कण आयकोत, आणि मन कण समजोत आणि पयोत मंग मी तेस्ले बरा करतू.” पण धन्य शे तुमना डोया, कि त्या देखतस, आणि तुमना कान, कि त्या आयकतस. कारण कि मी तुमले खरज सांगस, कि गैरा भविष्यवक्तास्नी आणि धर्मीस्नी विचार कि ज्या गोष्टी तुमी देखतस, देख पण नई देखतस, आणि ज्या गोष्टी तुमी आयकतस, आयकनात, पण नई आयक.


आते तुमी पेरणार ना दाखला ना अर्थ आयका. जो कोणी राज्य ना वचन आयकीसन नई समजत, तेना मन मा जे काही पेरायेल होत, तेले तो द्रुष्ट ईसन हिसकाय लीजास, हवू तोच शे, जो रस्ता ना किनारा वर पेरायेल होत. आणि जो दघळस वाली जमीन वर पेरेल होत, हवू तो शे, जो वचन आयकीसन लगेच खुशी ना संगे मानी लेतस. पण आपला मा मुया नई ऱ्हावाना मुळे तो थोडाच दिन लोंग राहू सकस, आणि जव वचन मुळे क्लेश व संकट होस, त लगेच ठोकर खास. जो काटेरी झाळीस्मा पेरेल शे, हवू तो शे, जो परमेश्वर ना वचन ले आयकस, पण संसारनी चिंता आणि धन ना धोका परमेश्वर ना वचन ले दाबस, आणि ते फय नई लयस. जे चांगली जमीन मा पेरायेल होत, हवू तो शे, जो परमेश्वर ना वचन ले आयकीसन समजस, आणि तेस्ना जीवन मा काही चांगला परिणाम येतस, जसा कि कोणी शंभर पट कोणी साठ पट, आणि कोणी तीसपट.

येशु नि तेस्ले एक आखो दाखला दिधा, स्वर्ग ना राज्य ह्या प्रकारे शे, कि एक शेतकरी आपला वावर मा चांगल बीज पेरा. पण जव लोक जपी ऱ्हायंतात, त तेना शत्रू ईसन जंगली बीज पेरीसन चालना ग्या. जव रोप उगी जास आणि पिकाले लागो, त शेतकरी ना दास नि जंगली दाना ना रोप देख. एनावर घर वाला ना दासस्नि ईसन तेले सांग, हे स्वामी काय तुनी आपला वावर मा चांगल बीज नई पेरेल होत? मंग जंगली दाना ना रोप तेनामा कोठून कस उनात? शेतकरी नि तेस्ले सांग, हय कोणा शत्रू ना काम शे, दासस्नि तेले सांग, काय तुनी ईच्छा शे, कि आमी जायसन जंगली दाना कापी लेवूत? शेतकरी नि सांग, नई, अस नका करा. अस नई हुई जावो कि जंगली दाना ना रोपले कापतांना तुमी तेस्ना संगे गहू बी उपाळी लेवोत. कापणी लोंग दोनीस्ले एकत्र वाडू द्या, आणि कापणी ना टाईम ले कापनारस्ले सांगसू, पयले जंगली दाना ना रोप गोया करीसन चेटाळा साठे तेस्ना गठ्ठा बांधी ल्या, आणि गहू ले मना कोठारामा एकत्र कर.


तेनी तेस्ले एक दाखला सांग, परमेश्वर ना राज्य राई ना दाना सारखा शे, कोणी व्यक्ती नि आपला वावर मा पेरी टाक. पृथ्वी ना सर्वा बिजस मधून सर्वास तून धाकला बीज सारखा शे, पण जव तो वाळस तव असा झाळ होस कि आकाश ना पक्षी तेना फांद्यास्वर ऱ्हातस.


तेनी एक आजून दाखला तेस्ले आयकाळ, थोळासा खमीर जास्त पीठ मा पसरी जास आणि तेले चांगला प्रकारे प्रभाव करस. त्याच प्रकारे, कईक लोकस्ना मधमा परमेश्वर ना शासन ना प्रभाव सगळी दुनिया मा पसरी जास.


या सगळ्या गोष्टी येशु नि दाखलास्मा लोकस्ले सांगी, आणि तो गर्दी ले फक्त दाखला द्वाराच शिक्षा देत होता. कि जे वचन भविष्यवक्तास द्वारे सांगेल शे, पूर्ण होवो कि “मी दाखला सांगाले बोलसु कि मी त्या गोष्टीस्ले जग नि उत्पती पासून दपेल शे प्रगट करसू.”

जव तो गर्दिले सोळीसन घर मा उना आणि तेना शिष्य तेना जोळे ईसन सांगणात शेतना जंगली दाना ना दाखला आमले समजाडी दे. येशु नि तेस्ले दाखला ना अर्थ ह्या प्रकारे सांग, चांगल बीज पेरणार शेतकरी मी, माणुस ना पोऱ्या शे. वावर संसार ना लोक शे, चांगल बीज परमेश्वर ना राज्य ना लोक शे, आणि जंगली बीज सैतान ना राज्य ना लोक शे. जो शत्रूनी तेले पेरेल शे, तो सैतान शे, कापणी जगत ना अंत शे, आणि कापणारा परमेश्वर ना दूत शे. जस जंगली दाना ना रोप गोया करतस, आणि बायामा येतस तसाच जगत ना अंतमा हुईन. मी माणुस ना पोऱ्या आपला परमेश्वर ना दूतस्ले धाळसू, आणि तेना राज्य मा सर्वा ठोकर ना कारण ले आणि वाईट काम करणारस्ले उपाळी देतीन. आणि स्वर्गदूत तेस्ले अग्नी कुंडा मा टाकतीन जडे रळाना आणि दुख कण दातखाने चालीन. त्याच टाईम ले धर्मी आपला बाप ना राज्य मा सूर्य सारखा चमकतीन, ज्या कोणी या गोष्ट ले आयकू सकतस जे मी सांगस, त्या तेले आयकीसन समजाना प्रयत्न करा.

स्वर्ग ना राज्य, एक खजाना सारख शे, जेले एक व्यक्ती नि एक वावर मा दपाळेल होत ते सापळन, आणि खुशिमा तो आपला घर जाईसन आपल सर्व विकी टाक आणि त्या वार ले विकत लीधा.

मंग स्वर्ग ना राज्य एक व्यापारी सारखा शे जो चांगला मोतीस्ना शोधा मा होता. जव तेले एक जास्त किंमत मोतीस्ना भेटीन त तो जाईसन आपल सर्व काही विकी टाक आणि त्याले विकत लीनात.

स्वर्ग ना राज्य ह्या प्रमाणे शे, कि जव जाईस्ले समुद्र मा फेकामा एस, आणि सर्वा प्रकरणा मासा ले धरामा एस, आणि बठीसन चांगल्या-चांगल्या मासा चांगली-चांगली भांडमा टाकनात आणि वाईट फेकी दिधा. आणि जव जाय भरी गई त मासोया लोक तिले तठ वर वळी लयनात आणि तेस्नी चांगल्यास्ले टोमास्मा एकत्र कर पण खराब मासास्ले फेकी टाकनात. जग ना अंतमा आसज हुईन परमेश्वर ना दूत येतीन दुष्ट लोकस्ले धर्मी लोकस पासून आल्लग करतीन. आणि दुष्ट लोकस्ले अग्नीकुंड मा टाकतीन, आणि तठे रळन आणि दुख कण दात खाना हुईन.

येशु नि तेस्ले सांग, “काय तुमी ह्या सर्वा गोष्टी समजी ग्यात?” शिष्यस्नी तेले उत्तर दिधा, “हा प्रभु.” येशु नि तेस्ले सांग, प्रत्येक मोशे ना नियमले शिकाळनारा शिक्षक जो स्वर्ग ना राज्य ले बी समजस, त्या माणुस ना सारखा शे, जेना घर मा कोठरी शे. तो तठून जुनी आणि नवीन दोनी प्रकार नि किमती वस्तू बाहेर काळस.


जव येशु ह्या सर्वा दाखला सांगी दियेल होता त तो कफर्णहूम शहर मधून चालना ग्या. आणि आपला नासरेथ नगर मा ईसन, तेस्ना प्रार्थना घर मा तेस्ले असा शिक्षण देऊ लागणा कि त्या चकित हुईसन सांगू लागनात, कि येले हवू ज्ञान आणि सामर्थ्य कोठून भेटनात? काय हवू सुतार ना पोऱ्या नई शे? आणि तेनी मायन नाव मरिया नई आणि तेना भावूस्ना नाव याकोब योहान शिमोन आणि यहूदा नई. आणि काय तेना पाच बहिणी बी आठेच आमना मधमा नई राहतस मंग तेले हय कथाईन भेटन.
ह्या प्रकारे तेस्नी तेना कारण ठोकर खायतस पण येशु नि तेले सांग कि भविष्यवक्ता ले आपला देश मा आदर नई भेटस. आणि तेनी तठे तेस्ना अविश्वास मुळे गैरा सामर्थ्य ना काम नई करात.

ស្ដាប់នូវ मत्तय 13