Chorote, Iyojwa’ja: Nuevo Testamento Chorote Iyojwa'ja 1997

Texto Nuevo Testamento: Chorote, Iyojwa’ja © Sociedad Bíblicas Unidas 1997 www.sba.org.ar/web/ Grabación de Chorote, Iyojwa’ja ℗ 2021 Hosanna

Sinia' Jlamtis 1997

Nuevo Testamento en Chorote © Sociedades Biblicas Unidas, 1997.

Itimeje ja Jesús siukia iyo, yama'aja ti iwiets'ila ji'wechaja siujlieja tewuk iliyi Galilea, tiwonaja'ni 'neje 'ate Tiberias. Je pini' japo i'nio' yamk'i, lapakawo ti i'winis siukia iyo ti i'winki'n ti ijwiejete'n japo je isis. Sekyi'i ti ijioye ape'e jlaja tikijnaki jla'yis japo t'eyasajnas, yiyeyisk'iji'n seka'a. Jlampa je tojwa'a siojokia jloma jiliakijnieye napo Judíojos jle' iyo'ate Pascua.
Jesús i'yejne'n japo i'nio' ti je pini', sekyi'i iyone'ne 'ate ja Felipe:
—¿Tepa t'e jatiajlaja'a paka iwinaja'm 'napo i'nio' kantojw?
Ti jla'm iyone ja Felipe, siupi ka jitienkiujnieye inwone, ijiatjliyi je t'ayiji'n siukia janwo ti jankiujlie. Felipe iyo'ne 'ate ti isiujlie:
—'Wanjlit'itieje ka doscientos denáriojos ka tenaja puwa ka woyejesa', 'wanjliyi ka jwamjla'ajamk'i'ni 'yina ja ke ijnojli.
Ijwienjli'ne siojo t'eyasanik jla'am ja Jesús, jle' iyo'ate Andrés, Simón Pedro jikilia, iyo'ne 'ate:
—Poyeta siu'nie kia'le itiun'ni 'niwa woyejes ijwienjli sikio' itij'we ti tajle pa jlesiki mak, times 'neje niwa si'yus. ¿Jot'e ka ijnojli napo i'nio' ti je jlase'?
Jesús iyo'ne 'ate ti isiujlieyi japo t'eyasajnas:
—Jloyeyi napo i'nio' ka inek'iji'n.
Jop yi'i jak ajnat yiyits'i, jak yiyisk'ijin'ni'ne. Cinco mil japo i'nio' ja nojwaja'm ti 'najli japo ayijnies ti tetitinak'i. Sekyi'i ja Jesús isimi'ne jawa woyejes, iyoye t'ajlayeja' ape'e ti t'ajle pi Sinia', itime ti ijliuyeyi ka tiwenak'i japo siojopo yik'iji'n. Kiak iyonjliyi kiwa si'yus, itime ti iwinak'iji japo pi k'ie'e pi iyo kantowis. Ti yip'isieje'n japo i'nio', Jesús iyone'ne 'ate japo t'eyasajnas:
—Mayek'i'ni niwa jijwa'al, 'esiji ka lajak'ina'a puwa ka akajyinana'a.
Yamayisk'i'ni ti ijiutis wita'm, itijwa'm sikioye times tom'niji kiwa tipoyijk'i siojowa tenajats'i jijwa'al kiwa woyejes ti taj'le pa jlesiki mak.
Iyone'ne 'ate japo i'nio' ti i'winayis siukia iyo ki i'winki'n:
—Ijiatp'aneje ti 'naka 'ni tijwela'nijpe, siupa injwejlanik jiwo ti ja'nes ajnat'e.
'Yina Jesús 'yijene ta'a pi iyone siojopo i'nio' ti iyotaja ka inkimits'i ka inwonisi jika anechiyasa'. Yama'aja siojo ijiojwi ti iyo ka injwanjli paka ne'yi, ape'e jlaja tikijnaki ti toj pijia'm.

Ti k'iejli ajnalis wujwak'i'ni, siojopo t'eyasajnas ja Jesús yama'ni ti ijioyis tewuk iliyiji tomayis i'niat ji'wechaja 'niji yi'i jlaja Capernaum. Jlampa ajnaj wujwa, ti je 'nesjli'ijyi ja Jesús. Yejwuti'ni siukia jlajwu ti wujwi, jak je iyoyiji'ni siojo i'niat ti iyo ji'wukijlilisjimpeja'. Pa nojt'ijiampe puwa kilómetrojos ni'ne ka injwanjli sikio' intej'we, ni'ne ka injwanjli japa tom'niji, ti i'winayits'i ilia'm ja Jesús ti ya'm ilia'm jlaja kasejkana, ti t'iskiujni'n ape'e ki i'niat. Je jlase' ki iyo ti je ijwiyisie. Jesús iyo'ne 'ate:
—¡Ya'am, ke ijnots'inak'i'm!
Iyoyeyis 'ate:
—¡'Yaka'niona, kets'ijyi'n, sojmajia'm jla'a kasejkana!
'Yaka injwejlikie t'ipi, jakayi ta'a t'ipi ti yi' kisie'e jlaja kasejkana.

Siukia ti jlomaye'eje, siojopo i'nio' ti sek je tajlits'i jikiujts'i ja tewuk iliyi, iyoyeyis 'ate ti ti'yasanisi'ni:
—¿Tepa t'e yi'i ja Jesús? Ti yama'ni japo t'eyasajnas je yamk'i, jlajakata 'neje siujlieja kasejkana yiyisi. Sekyi'i ti 'nesa'ni siojowa kasejkanayis ijia 'wena tajli, tajle jlaja isi' jle' iyo'ate Tiberias, ti ijioyisi siojo je tojwape'n ja Jesús yine'e kiwa woyejes ti iyo t'ajlayeja' ape'e. Siuti je i'winis ja Jesús siu'neje japo t'eyasajnas, sekyi'i ti yama'ni ti yiyis kasejkanaja, yi'i jlaja Capernaum ti iyoyisijyin'ni.

Ti yiyeyis i'niat ji'wechaja, ti i'winayis ja Jesús, iyoyeyis 'ate ti i'yasisi'n:
—Inka'neyasajnawo, ¿tejnapa inetinki yiyi japa kiliekie' ti 'nak ji'nijts'e?
Jesús isiujlie ti iyo'ate:
—Ijiate, ijiatk'i siunie jayo ti jayo'ate, ti nakata jla'am ti i'neliajayi siukia ti ji'yekiuniejyi'n ti nep'isiejyi'n, jlam'ne ka nakaye siunie ka 'najanayi paka awonayi ni iyo ti a'wenki'nase'm. Ke injwesiejayiji'n ka akimajyi'n ape'e siunie asak ti je t'o'n, jlam ijiate jla'am siunie je netia'n ka paja, siu'neje ti iwi'nase'm jana a'wasankiye ti laj jlaja. Nak siunie inak ti I'nio' Jlas janwe'nase'm, lapakawo ti Sinia' jlam ti ijniejiet'e.
Siojopo i'nio' iyo'ne 'ate ti i'yasisi'n:
—¿Tepa t'e ka iniwonataja, kayoki siuniwa Sinia' iyotaja ka iyoki?
Jesús iyo'ate ti isiujlie:
—Siunie iyotaja ka awoyeyi, ka je akakiuye siunie jla'am ti ijliu'.
Iyo'ne 'ate japo i'nio':
—¿Ten siupa ja'wenkints'e'm pa ja k'iejliyeyi ja 'nakayeyijna'a ti ja ke ikakiuk, siuti ja'wina? ¡'Wenkints'e'm siupi jiniwoni'ni! Siupapo sitise'l t'ipi itiujwisjimpe siupuwa maná yi'i pi ajnat laj i'nioye'e. Siunie iyo niwa inamtis t'ipi ti iyo'ate, “Sinia' iwijna'm japa woye ti tal poliyi.”
Jesús isiujlie ti iyo'ate:
—Ijiate, ijiatk'i siunie jayo ti jayo'ate, Moisés je jla'am 'ninta ka jlama ka inwe'nase'm siojona woye ti tal poliyi, 'wenajliyi jla'am ni Inia' ti iwi'nase'm janak woye ti ijiatk'i ti tal poliyi. Siojona woye ti Sinia' je yi'n janaka siunie I'nio' ti tal poliyi, ti iwijnamk'i jana in'wasankiye napo i'nio' yi'i ape'e 'ni ajnat.
Iyoyeyis 'ate japo i'nio' ipi'yayeyis ti kia'iyo:
—'Yaka'niona, 'esijyi ka wents'empe japak woye.
Jesús iyo'ne 'ate:
—Yam woyek'i'm ti iyo in'wasankiyeja'. I'nio' ni jajnok'i, nak ja ke pajana'a ka inel'lia, jla'yi ni i'nio' ni ja ke sakakiu, kiak iyojliyi ja ke pajana'a ka inki'im. Siunie iyo ti ajwelta'ase'm, ti sakakiuye 'wanjliyi ka si'wena'. Wikie'eyi siunapo Inia' yikialk'i, napok ijiok'i. Napoka ti ijiok'i ja ke 'yakawona, kajeyepa ti siuti anama ti atal poliyi, je ana'am ka iyoyi siupi ka intalk'i, 'wenajliyi jla'am siunie iyo ni i'nio' ti sijliu'. Siunie iyo ni i'nio' ti sijliu', je iyotaja ka netiana'a paka ne'yi siunapo yikialk'i, 'najata ta jla'am ka iniujwank'i kisie'e ka intajli niwa a'no'ol siojona jloma yi' jlaja. Siunie iyo ni Inia', i'niope na jan'yejne'n ni Sinia' Jlas, nak in'wenape jana ji'wasankiye ti laj jlaja, siunapo je 'yakakiu. Sek jane'yi ka yamape pet ka iniujwank'i kisie'e ti jantajli niwa a'no'ol siojona jloma yi' jlaja.
Sekyi'i'ne japo Judíojos ti ipi'yayis ti iyo'ate, “Yam woyek'i'm siojona ti tal poliyi”, tamtiyek'ijin'ni, ti iyoyists'i 'ate:
—¿Mi je 'nak Jesús, José jlas? Kasye'etant'ieje japo jiniewot. ¿Nit'i iyo ti ijwi'il ti tal poliyi?
Jesús iyone'ne 'ate japoka:
—Leyeyi ti jisiemsiemiyek'i wita'm. Lajk'ipa i'nioye ka 'najane paka inwone ka ijnok'i, siuti ja ke jlama ni Inia' ka inamijk'i ka ne'yi pa. Sekjane'yi ka yamana'a pet ka iniujwank'i kisie'e siojona jloma yi' jlaja, ti jantajli niwa a'no'ol. Jilisajnat'ipi papo injwejlanawos ti iyo'ate, “Ja wikie'eyeyi napo i'nio' ti Sinia' ja'neyasajne'n.” 'Yina siunie its'iuye ni Inia', jla'yi ti ini'neyasane niwa jlamtis, nak ijiok'i pit.
“Ka net'i'yi pa kan'we'en pi Inia'. Ijwienjli jla'am siunie ti tajle pi Sinia', najata jla'am ti i'wi'in. Jlam je awo ti awo'ate, siunie i'nio' ti jitienkiujnieye po', nak itiej jana ji'wasankiye ti laj jlaja. Yam woyek'i'm siojona ti iyo i'wasankiyeja'. Siupapo aska kijilas mases itiujwisjimpe siupuwa maná yi'i pi ajnat laj i'nioye'e. Ijiate, itiujwisieta lapakawo ti je puwaka ka i'maniti'n ka iwo ji'wasankiyeja'. Siojona ajwel'ni janaka woye ti tal poliyi, i'nio' ni jantojw janaka woye, ja ke i'na'al. Ya'am janaka siojona woye ti iyo i'wasankiyeja' ti tal poliyi. I'nio' ni jantojw janak woye, nak ja ke paja ka inetia'n, jajnok'i'ni puwa jlomas. Siojona woye ti jawijna'm ni i'nio', je 'wena pa ka ijwi'il, naka 'yajwes, ja'nakayeyijna'a ti ja ji'wasankiye japoye napo i'nio' yi' ape'e 'ni ajnat.”
Siojopo Judíojos, ti ipi'yayis ti kia'iyo, yapiliek'i wita'm ti iniewit. Iyoyis'ne 'ate:
—¿Tepa t'e janiwone ti ijwi'il, janwents'e'm ni t'ajwes ka tiuwa?
Jesús iyone'ne 'ate papoka:
—Ijiate, ijiatk'i siunie jayo, siuti ja ke atowa ni t'ajwes jla'yi ti ja ke a'yayejyi ni ji'woyis ni I'nio' Jlas, ja laja ji'wasankiyeja' siojona laj jlaja. I'nio' ni itiujw ni 'yajwes, jla'yi ni i'yaje ni i'yoyis, nak jla'm ijiate ti jantaj jana ji'wasankiye ti laj jlaja. Sekjane'yi ka iniujwatana'a kisie'e ti jatiajlaja'm niwa a'no'ol, ts'ijiye siojona jloma ti yi' jlaja. Siunie 'yajwes nak jlam ijiate jla'am ti inak ti ijiatk'i. Siunie i'yoyis kia'iyojliyi nak inat ti ijiatk'i. I'nio' siunie itiujw ni 'yajwes, jla'yi ti i'yaje ni i'yoyis, nak je paj kantalk'i'm, kiak awo já atajla. Siunie Inia' ti sijliu' ji'wasankiye po', it'imina pet ti i'wiesankiye po'. Tempi it'imina siunie i'nio' ti sitiujw, nak ji'wasankiye poye'eje. Siojona woye ti tal poliyi, janak ajwe'el, je iyo'ate siojopa maná itiujw t'ipi papo aska kijilas mases. Ijiate itiuwisieta lapakawo ti je puwaka ka i'maniti'n ka iwo ji'wasankiyeja'. I'nio' ni jantojw janak woye ti tal poliyi, nak ja ke paja ka netia'n.
'Yina kiak iyo 'niwak Jesús jlamtis ti 'yiyasajne'n japo i'nio' yi'i jlaja Judíojos t'ajla'wet, yi'i jlaja Capernaum.

'Loj japo i'nio' siojopo yamk'i ja Jesús, ti ipi'yayeyis siukia iyo ti taka'neyasa'n. Iyoyis'ne 'ate:
—Atejnistieje ka insta' niwaka. ¿Tempa jank'iuye?
'Yina Jesús 'yijene ki iyone ti iniewit, jlam ininekialjliyisi, sekyi'i ja Jesús iyo'ne 'ate:
—¿Jiliatayiji siukia awo ti amti? ¿Tepat'e jota awoyeyi ka a'wenats'i ni I'nio' Jlas ka napi 'niji siunie tajli jla'am poliyi? 'Yejne'n, siojona Sinia' jikimet ti 'es, janak iyo 'wasankiyeja' napo i'nio', je'ne ka nakaye t'isie'n ka 'esieyi. Siuniwa yamtis ti ajwe'lase'm, niwak itio'nase jana Sinia' jikimet ti iyoye as'wasankiyeja'. 'Yina ya'am awo'ate, 'lojjli'ijyi ti asama ti jikakiunieyi.
Jesús iyo ti itiant'ieje ta'a ti 'nelanjie'e isijme'n siojopo je its'iuyeje, siu'neje ja janekial. Jla'am iyojli 'ate:
—Tempi it'imina ti awo'ate ti ajwe'lase'm, lajk'ipa ka 'najane paka iniwone ka ijnok'i, ijwienjli jla'am siunie Inia' ti iyo 'niayija' pa.
Sekyi'i ti lajak'i papo ka nekk'i, siojopo yamtak'i ja Jesús ilik'i. Jesús i'yasam'ne siojopo itijwa'm sikioye times tom'niji t'eyasajnas ti iyo'ate:
—¿Tepi jiwoyeyi pet ti asa'am? ¿Ma jaleye ijyik'i?
Simón Pedro iyo'ate ti isiujlie:
—'Yaka'niona, ¿ten jiat'eje siupa janajk'iji'ni? Jlajmiliet siuniwa amtis niwaka inamtis ti iyo 'wasankiyeja' pa, ti laj jlaja. Pajk'i ti ak'iukie, it'imina ti kastant'ie'a ti a'm ti Sinia' inlesa'n.
Jesús iyo'ne 'ate:
—Yam ti aki'mase'm siunie inojwajia'm, ti itijwa'm sik'ioye times to'm'niji. 'Yina ijwienjli'ne siunie imosik.
Jesús iyo ti ja Judas, siojo Simón Iscariote jlas, jakayeta ti tajla'm siojopo itijwa'm sik'ioye times to'm'niji t'eyasajnas, jla'am siojo janekial.

ស្ដាប់នូវ Juan 6