The Colloquial Galilean Bible (CGB) is an easy Bible to understand, particularly for children and youth. It is free in audio, video, and text. For free access or to support our ministry, contact us at www.aibible.org.
الكتاب المقدس (العهد الجديد) باللهجة العامية الجليلية هو كتاب سهل الفهم خاصة للأطفال والشباب. ونصوصه متوفرة مجانا في صيغ صوتية ومرئية ونصية. للحصول على هذه النصوص أو لدعم خدمتنا، الرجاء زيارة موقعنا على العنوان التالي:
www.aibible.org

ترجمة الكتاب المقدس باللهجة العامية الجليلية

وأجا وفد من القدس لعند يسوع، هني من جماعة الفريسيين والكتبة. وقالولو: ليش تلاميذك بمشوش حسب تقليد شيوخنا؟ ومش عم بغسلو إيديهن وقت الأكل. رد عليهن يسوع وقالهن: ليش أنتو بتمشوش حسب وصية الله وبتتحججوا بالتقليد؟ طيب مش الله قال: إكرم ابوك وامك وقال كمان اللي بيلعن ابوه أو إمو بستاهل يموت. بس إنتو بتقولو: إذا واحد بقول لأبو أو إمو "المساعدة اللي كنت بدي اعطيكو إياها قدمتها للهيكل" بطّل ملتزم يكرم أبوه أو إمو. وهيك كسرتو بتقليدكو كلمة الله يا موجهنين، صدق النبي إشعيا لما قال عنكو: هذا الشعب بكرمني بس بالحكي، مش من القلب وبيعبدوني بطريقة غلط وبينشروا تعاليم ووصايا من اختراع الناس.
وجمّع يسوع الناس وقالهن: اسمعوني وافهموا شو بيطلع من تُم الإنسان هو اللي بينجسو مش شو بفوت عتمو. وقتها اجو لعندو التلاميذ وقالولو: بتعرف إنو الفريسيين زعلو كثير من كلامك؟ جاوبهن يسوع وقالهن: كل نبته مزرعهاش أبوي السماوي راح تنقام من شروشها اتركوهن لإنو "قادة العُميان" عميان، وإذا اللي بقود أعمى هو أعمى راح يوقعو ال 2 في الحفرة. فقالو بطرس، اشرحلنا هذا المثل. فقالهن يسوع: بعدكو مش فاهمين؟ مش فاهمين أنو كل اللي بفوت عالتُم بروح ع البطن وبعدين بيطلع من الجسم؟ بس اللي بيطلع من التم هو طالع من القلب. هذا هو اللي بنجس الإنسان. لأنو قلب الإنسان هو اللي بخليه يفكر بالشر ويقتل ويزني ويتسافل ويسرق ويكذب بالمحاكم ويتهجم ع الناس. هاي هي الأشياء اللي بتنجس الإنسان مش انو الواحد بغسلش إيديه وقت الأكل.
وترك يسوع منطقة جنيسارت وراح باتجاه صور وصيدا وشاف مره كنعانية من سكان المنطقة طلعت وصيحت وقالتلو: ارحمني، يا رب يا ابن داود، بنتي عم بعذبها روح شرير. ما جاوبهاش يسوع بِوَلا كلمة. فقربوا عليه التلاميذ وقعدو يطلبو منو أنو يبعدها عنهن لأنها بتصيح وراهن. فجاوب وقال: أنا مبعوث لشعب إسرائيل اللي مثل الخرفان الضايعه. واجت المره وركعت قدامو وقالتلو: يا رب، ساعدني. فقالها يسوع: مش مناسب نوخذ خبز الأولاد ونرميه للكلاب الصغيـرة جاوبتو وقالتلو: صحيح يا رب، بس الكلاب الصغيرة كمان بتوكِل من الفتافيت اللي بتوقع من طاولة صحابها. وقتها جاوبها يسوع وقالها: يا مره، إيمانك عظيم. راح يصير اللي بدك إياه وشفيت بنتها بنفس اللحظة.
وترك يسوع المحل ورجع لمنطقة بحيرة طبرية وطلع على جبل وقعد هناك. فأجا لعندو ناس كثير ومعهن ناس عُرج وعُميان ومشلولين وخرسان ومرضى من كل الأشكال. وحطوهن قدام يسوع فشفاهن وتعجبت الناس لأنها شافت الخُرسان بحكو والمشلولين بعافيتهن والعُرج بمشو والعميان بشوفو. وعظموا الإله اللي بعبدوه شعب إسرائيل.
ونادى يسوع تلاميذو وقالهن: أنا شفقان ع الناس، صارلهن معنا 3 أيام وإسه معهنش إشي يوكلوه وبديش اروّحهن جوعانين بلاش ينهارو بالطريق وقلولو التلاميذ: من وين نجيب في الخلا خبز يكفي وبشبع كل هدول الناس؟ فقالهن يسوع: أديش معكو خبز؟ قالولو: 7 خبزات وأكمّ مِن سمكة صغيرة. فطلب من الناس إنهن يقعدو ع الأرض وأخذ ال 7 خبزات والسمك وشكر وقسّم الخبز وأعطى التلاميذ وهني وزعوا ع الناس. والكل أكلوا وشبعوا. وزاد سبع سلات مَلانة شقف خبز وأكلو 4000 زلمة وزيد عليهن الستات والولاد. وبعد ما روّح يسوع الناس طلع ع القارب وراح لمنطقة مجدان.

ស្ដាប់នូវ متى 15