If you would like a copy of this version please contact info@davaraudiobibles.org

Birjia Bible New Testament, CC BY-NC-ND 4.0, New Life Literature (NLL), 2023. (Text)
Birjia New Testament Audio Bible, CC BY-NC-ND 4.0, Davar Partners International, 2025. (Audio)

Birjia New Testament (NLL)

होना बेरा बतिसमा एमी जोहन जहुदिया रआ टोंगरी रे वेज्‌नय हेनते नोंका परचार यते दोहोनय, पाप एतेन “मन रुवाड़ेपे, चितानतआचि सिरमा रआ राइज ठँव रे वेज्‌कना!” नुई हेनेनी हके नुई रआ बारे परमेसर पड़ा एतेन दुखमाय अवला जसायाह पड़ा एतेन कथा तड्अय,
“टोंगरी रे मियड् ह-हकावी रआ घोल अयुमोना,
‘परभु तआ होरा तेयारेपे जोटोः,
हुँनि तआ संडक सोजेपे!’”
जोहन ऊँट उब् रआ गेन्दराः होड़हड् घती कोते मयाँङ रे छेवड़ा रआ कसनार तोल बराग यते दोहोनय, हुँनि सरहा फफा हेनते होरोमसु रास जोम यते दोहोनय। होना बेरा जेरुसलेम जोटोः समुचा जहुदिया सहर रेनकु जरदन नाय अस पस रेनकु गोटे हुँनि ठँवरे सेन लेनाकु, हेनते हुँकू अपन-अपन पाप मनाव कोते जरदन नाय रे हुँनि एतेन बतिसमा अँगाव लआकु।
जब हुँनि अगम फरीसी जोटोः सदुकीकु अपन पड़ा बतिसमा एम अवला वेजोः ञेल केते हुँनि कथा लआ, “ओय बिञ रेनकु होपोन! परमेसर एतेन वेजोः अवला कयरावोः एतेन बंचावोः तआ आपे ओके चेताव तड्पेआ? आपे रआ काम ते नोंका ठुवायोना चि आपे पापे तआ मन रुवाड़ केदा जोटोः अपन-अपन मन रे अलोपे सोचावे चि अले रेनि बबा अबराहम हके, इञः आपेञ कथावायना चि परमेसर नोआँ दीरी एतेन अबराहम तआ होपोन सीरजव सकावेए! अब टंगीज् काट रेहेड् ठँवरे मंडाव तड्आ ताकि, जे काट बढ़ियाँ का जोओ योओ होना मगेआ जोटोः होना सेंगेल रे रोंगोया। इञः दो आपे मन रुवाड़े तआ दाअ् ते बतिसमा ओवा यतपेअइञ; बकिन जे इञः तयोम वेजोः अवलाअय मनेकी हुँनि इञः एतेन हों सवाँगियाअय; इञः दो हुँनि रआ खड़पा अलगावे जुकुर हों कुनीञा। हुँनि आपे पबितर आतमा जोटोः सेंगेल ते बतिसमा ओवापेअय। हुँनि रआ अती रे हटाः इदानआँ, हेनेना ते हुँनि अपन खरियान रे ओसाव केते फरियावेए जोटोः गोहोम अनेज् रआ गरना रे जवारेए, बकिन लीपिज् ते होना सेंगेल रे जोड़ावेए जे कहियो का इड़ीजोओ, नोंका अनेज् रआ खरियान सफेअय।”


होना बेरा ईसु गलील देस रआ नासरत एतेन वेज् कोते जरदन नाय रे जोहन एतेन बतिसमा अँगाव तआ वेज्‌लेनय। बकिन जोहन कथालअय, “इञः दो अमः रआ अती एतेन बतिसमा अँगाव जरुरीआ,” “जोटोः अमः इञः एडे वेजोगोनम!” मेनकेते रोकावि तअय अरावना।
ईसु हुँनि कथा रुवाड़ लअय, “अब ने-नेन लेका इकाएर होयाववामी, चितानतआचि अलङ तआ निआँ लेका गोटा धरमिकता पु-पुराव उचित इदानआँ।” तब जोहन ईसु रआ दुखमा मनाव यानय।
जोटोः ईसु बतिसमा अँगाव केते दाअ् एतेन झटहेले उडुङनय, हेनेना बेरा सिरमा जीज्‌यना जोटोः हुँनि परमेसर रआ आतमा पेरवाँ लेका अनेज् तेङरे अड़गुयोः ञेल लअय जोटोः सिरमा एतेन नोंका सबद अयुमलेना, “नुई इञः रेनि दुलार होपोन हके, नुई तुली इञः अगम खुस तनाइञ।”

ស្ដាប់នូវ मती 3