Madiu 8
8
Yesu tovedawodawowo gisiveyawana.
Maki 1:40-45; Luke 5:12-16
1Tu Yesu oyeya gihobu'ela ada yo'o keke kabi'ona hivebwa'uliyena. 2Au tovedawodawowo sa'eyana Bana againe gi'ela, tugana give'etodonena ada gigahena gigayo, “Kauveya, ka'i O nuwanuwa amine o afaiweya yaku aulolo unakolana.”
3Gigahe-yo Yesu nimana gitunena be gikibwa'ena ada gigahena gigayo, “Ika, Iya nuwanuwaku. Unayamumu.” Ada auhe'ama ana dawodawowo gihavaina. 4#1Veh 14:1-4; Mk 7:36Ada Yesu gigahena gigayo, “Unogali. Keke tamo hakwadi unavenuwa'atani, au abaveyao ana tofaisewa againe unamaduna ada wowo unavehawalena. Gina'ita-yo manuga luhei kadu sifi higa abaveyao Mosese boi tuwai-mo'ena givehimeyena amine ma unanauwedi be moya'aidi o uyamumu velemo'ena ma hinahalamanena.”
Yesu Loma togiyomatana ana agetoga gisiveyawana.
Luke 7:1-10
5-6Gina tu Yesu Kafeneumi againe giluku ada Loma togiyomatana sa'eyana Bana againe gi'ela, gihawayafeyafena gigayo, “Kauveya, aku agetoga manuweya gidadauda, gi'aulolo lakahina walogina gisi'uwana ada givedivediwe.”
7Bana Yesu gigayo, “Gana'ela be ganasiveyawana.”
8Bana togiyomatana gigahena gigayo, “Keke Kauveya, iya keke kaliva yamumuku yo yaku manuweya afaiweya unaluku. Au hidedei unamiya tu unavehimeya be O bonaniga aku agetoga ginasiveyawana. 9Hidede amine afaiweya unavehimeya ma a gahalamanena, fa'ina iya kadu abavehimeya gahalamanena. Yaku tonagona yana vehimeya dibune gamimiyami, kadu yaku tolugaviyamomo yaku vehimeya dibune himimiyami. Yaku tolugaviya sa'eyana gavehimeyena gagayo, Una, ada au gitowamidi be gina. Kadu velugana gagahena gagayo, U'ela we'ai, ada au gi'ela. Kadu aku agetoga againe gagahe gagayo, Hidedemi unafaisewa, ada au yaku vehimeya amine gifaisewa.”
10 #
Md 15:28
Ada Yesu togiyomatana yana gahe ginogalini-yo giyaulowoga, ada kaliva hivebwa'uliyena-ma gigahedi gigayo, “Biyao! Wona velemona keke-mo'a tamo kwanaIsileli yana wavetumagana gadanuhagani hidevama kwanaLoma yana vetumagana amine. 11#Lu 13:28-29E, gagahemi tova mulina kaliva moya'aidi fafali tulina tulina walaube'uya kadu wa'oyeya hina'ela, Yaubada yana abageya hinaluku be yana tolameya hinavetoga. Ide miIsileli bwanenedeyao Abelahamo Aisake Yakobu badi buye hinavetoga Yaubada yana avemwamwala hina'ana lobameya. 12#Md 25:30Tu ide omi miIsileli vaita Yaubada yana yo'o kalivadi tu keke wadavetumagana velemo'ena fa'ina kabu'avane hinahegemi be umalovaneya wanamiyami, ada medede againe wanatagitagi lakahina kumimi wanahobe'uwana nuwami ginavekubokubo.”
13Ada Yesu hidedemi gilukahihi gihavaina togiyomatana gigahena gigayo, “Unana ya manuweya ada gavadi fa'ina uvetumaganeku amine, au hidedemi ginalakayemu.” Ada au medema kauwanai-nadi togiyomatana ana agetoga giyamumu.
Yesu kaliva vevine moya'aidi gisiveyawadi.
Maki 1:29-34; Luke 4:38-41
14Bana togiyomatana gina tu Yesu Fita yana manuweya giluku, ada Fita lawana gi'itadi adi iviya hidadauda wowodi vaita ai. 15Au nimadi gi'abina ada wowodi auhe'ama gituluna, au himidi be hivebutu Yesu anaga hikidewedewena. 16Ada mala gilavina kaliva moya'aidi yafune hiluvaiyedi-ma tobohiyadiyao Yesu againe hi'aliyedi, ada yana vehimeya againe yafune giwavidi. Kadu to'aulolo moya'aidi gisiveyawa-'owodi. 17#Ais 53:4Ada hidedemi gifaisewa be Yaubada bonana ana to'awatalatalaina ana egana Aiseya giyakahina-ma ginalakayemu velemo'ena fa'ina. Boi tuwai-mo'ena bana Aiseya gigaheye-vagahina gigayo,
Bana Tauna yada aulolo moya'aina givaihegena, kadu ada vita gihawatana be ginahavaina.
Hidedemi Aiseya gigahe.
Kaliva adi'iselu Yesu ana muliya fa'ina higa-wayoga.
Luke 9:57-62
18Tu Yesu yo'o lakahidi himidififina-ma gi'itadi againe, ana tomuliya givehimeyedi be badi Bana buye tobu yuwa fafaline hinana. 19Tu Mosese yana vehimeya ana tovehawala sa'eyana Bana againe gi'ela gigahena gigayo, “Tovehawala, gahawahegeku be ha'amine ha'amine unana, iya kadu O buye kanana.”
20 #
2Ko 8:9
Bana Yesu gigayo, “Galu'eta-walawala'a adi wagou kadu manuga adi wa'uba tu Iya Tohobu'ela yaku abamiya keke, kadu yaku abaveyawai keke. Au aku muliya vitana.”
21Kadu kaliva velugana, higa ana tomuliya sa'eyana, gigahena gigayo, “Kauveya, udahawahegeku be gadamiyami tu bana kamaku gadatauni-yo gada'ela gadamuliye.”
22Bana Yesu gigahena gigayo, “Badi yawaidi ivaguna keke amanadi yadi to'alika hinatauna. O'eni ma auhe'ama unamuliyeku.”
Yesu mala lakahina gihawatana be gi'alovena.
Maki 4:35-41; Luke 8:22-25
23Yesu gilukahihi gihavaina, wakeya giyage ana tomuliya buye'i. 24Ada auhe'ama mala koyona tobu againe gilakayemu, bolimanakouko gimadu ada lefo lakahina waka tabone gi'ayavalina. Tu bana Yesu ma gi'enonuwaulu. 25Badi tomuliya hina hiluvaguna higahena higayo, “Kauveya, unalugolegoleda, kabi'ona kana'alika.”
26 #
Md 14:31; Sam 89:9 Bana Yesu gigahedi gigayo, “Gavadi-yo wamatautave'ine? Yami vetumagana au kabi'ona.” Au gimidi bolimana lefo gihawatadi, ada au gi'alove-'owona.
27Ada tomuliya hiyaulowoga au hive'agahegahe higayo, “Biyao! Bana hima gava kaliva? Taumadi, bolimana kadu lefo Bana bonana gi'abina!”
Yesu kaliva adi'iselu wayafunediyao gikiveyamumudi.
Maki 5:1-20; Luke 8:26-39
28Tu Yesu miGadala yadi fafali yuwa tobu fafaline gilakayemu, ada kaliva adi'iselu wayafunediyao edeya himaduhagana. Badi yadi abamiyami tomohuyehuyeya, ada yafune hiluvaiyedi fa'ina badi manimaninidiyao, au kaliva vevine moya'aidi himatausedi fa'ina keke medema edai-nadi againe hidanauna. 29#Lu 4:34,41; Kl 2:15Yesu hi'ita-yo hikova'awafatafata higayo, “O'eni Yaubada Natuna. Gavadi ime agaimeya unagani-yo u'ela? Ime yafune ama vematahiwadi ana tova au aimo tova mulina tu ka'i O u'ela be unamadu-kivetavetagigima?” Hidedemi higahe.
30Tu yuwa oya fafaline bawe adi yo'o lakahina adiga hilelele. 31Au yafune Yesu againe hive'o'oladona higayo, “Ka'i unawavima digo, udavehimeyema be yuwa bawe moya'aidi adaluvaiyedi.”
32Yesu gigahedi gigayo, “Au wana.” Ada au kaliva hinuyabuyabudi-yo bawe hiluvaiyedi, au bawe matatabudi awaloloya hi'otahobu, tobu againe hitowa'alika. 33Tu bawe adi tolufolofologahi hi'ota be hina melaleya, bawe valeyadi kaliva agaidiya hi'awatalatalainena, kadu kaliva wayafunediyao agaidiya gavadi gilakayemu-ma hilukahihiyena. 34Ada au kaliva moya'aidi hinu-'owoga be Yesu hina'itana. Ada hiyemu hi'itana againe, higaheya'aya'alina be yadi fafali ginanuyabuyabuna.
ទើបបានជ្រើសរើសហើយ៖
Madiu 8: viv
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2003, Wycliffe Bible Translators, Inc. All rights reserved.