Joni 14
14
Jisasi'a vgare naneke amage nentaza disaipol naga zamasmi'nea naneke
1 Atrenkeno tmagu'amo'a kna osino, Anumzamofonte tamentinti nehuta, anahu kna huta Nagrite'ene tamentinti hiho. 2Nenfa nompina rama'a hunaraginte nona me'ne, omne'neresina Nagra ko tamasmusine, Nagra, nonkuma tmia ome retro hunaku nevue. 3Nagrama vu'na nonkuma tmi ome retro hutesu'na, ete e'na eme tmaresugeta, Nagrama umnisure, tamagra Nagrane umani'gahaze. 4Hagi Nagra inantega vugahuo, tamagra antahi'naze. 5Tomasi'a anage huno Jisasi asmi'ne, Ramoke tagra ontahi'none, iga Kagra vugahane, tagra inankna huta ana kana kegahune? 6Jisasi'a anage huno asmi'ne, Nagra kana mani'na, tamage ke manina, asimumofo agafa Nagra mani'noe, mago'mo'a aru kantetira Nenfantera ovugahie. A'o, Nagriteti vugahie. 7Nagri'ma nagenka nantahinka kagra hantesina, Nenfanena anahu kna hunka kenka antahinka kagra hantesine, meni agafa hunka Agrira nentahinka negane. 8Filipi'a anage huno Agri asmi'ne, Ramoke Negfana tveri hugeno tagrira knare huranteno. 9Jisasi'a anage huno asmi'ne, Nagra kagranena rama'a kna mani'noanki, kagra nahigenka Nagrira onage'nane? Iza'o Nagri'ma nagemo'a, Nenfana ke'ne! Nahigenka kagra hunka, Negfana naveri huo hunka nehane? 10Nenfampi Nagra manugeno, Nenfa'a Nagripi mani'ne hua kegura, nahigenka kmentintia nosane? Nagra nagesafinti kea kagrira nonkasmue, hianagi Nenfa'a nagu'afi mani'nemo, Agra kaguvaza hu eri'za e'nerie. 11Tamentintima hanazana, Nagra Nenfampi manugeno, Nenfa'a Nagripi mani'ne hiho, hu'neanagi ana'ma osnutma kaguvazama eri forehu eri'zama eri'nogu nentahitma tamentinti hugahaze.
12 Tamage hu'na Nagra neramasmue, iza'o Nagrite amentinti hanimo'a, Nagrama e'nerua eri'zana anahu kna huno kaguvazama eri forehu eri'za e'nerino, Nagatereno ra eri'za erigahie, na'ankure Nagra Nenfantega vugahue. 13Inankna zanku'ma Nagri nagifi nantahigesazana, Nagra amne hugahue. Nefa'a ra agi Nemofompinti erigahie. 14Tamagrama inankna zankuro Nagri nagifima nantahi kesage'na, Nagra anazana amne hugahue.
Jisasi'a Avamumofo eri'zanku rempi huzami'nea naneke
15 Nagri'ma navesinantesuta kasegeni'a amage antegahaze. 16Nenfana antahigesugeno, Agra mago tmaza hu'zana tamisnigeno, Agra tamagra ne manivava hugahie. 17E'i ana tmaza hu'zana tamage Routge Avamure, ama mopafi vahe'mo'za e'origahaze, na'ankure zamagra ke'za antahi'za osu'naze. Hianagi tamagra Agrira (Avamura) antahi'naze, na'ankure Agra tamagra ne mani'neno, tmagu'afi manigahie.
18 Nagra tmatresugetma megusa mofavregna huta omnigahaze, Nagra tmagrite egahue. 19Osi'a knafi mopafi vahe'mo'za Nagrira onagegahaze, hianagi tamagra Nagrira nagegahaze. Na'ankure Nagra mani'noankita, tamagra nena anahu kna huta manigahaze. 20E'i ana knazupa, tamagra antahigahaze Nagra Nenfana agu'afi mnugeta, tamagra Nagri nagu'afi manisagena, Nagra tmagri tmagu'afi manigahue. 21Iza'o Nagri kasegema amage antesimo'a, Nagrira avesinantegahie, iza'o Nagri'ma avesinantenimofona Nenfa'a agrira avesintegahie, hnige'na Nagra avesintena, Nagra'ni'a agrite efore hugahue. 22Ru Judasi amanage huno Ramofona antahige'ne, nankna hunka Kagra tagrite eama nehunka, ama mopafi vahetera eamara osugahane? 23Jisasi'a ana kenona'a anage huno zamasmi'ne, iza'o Nagri'ma avesi nantesimo'a, ke'nia amage antesigeno, Nenfa'a avesintena tagra, agrane emanigahune. 24Iza'o Nagri'ma avesi onantesimo'a, Nagri kea amage ontegahie. Ama kema nentahizana Nagri kea omne'ne, hianagi Nenfa'ma hunantege'na e'nomofo ke nontahize.
25 Ama zantminku Nagra nehuana, tamagra ne mani'nena nehue. 26Hianagi tmaza hu'zana, Ruotge Avamu, Nenfa'a Nagri nagifi huntesigeno eno, Agra maka'zanku eme rempi huramigahie. Nagrama maka'zanku tmasmi'noana hurmagesa hugahie.
27 Tamarimpa fru Nagra tamagripi nentoe, Nagra narimpa frua tamagri neramue, ama mopafi vahe'mo'za nermizankna tamarimpa frua Nagra noramue. Atrenkeno tamaguamo'a kna nosina korora osiho. 28tamagra nentahizage'na Nagra tmagrira tmasmi'na, tmatre'na vute'na, ete tmagrite egahue hu'noe. Tamagrama Nagri navesinantesuta muse hugahaze, na'ankure Nagra Nenfantega vugahue, Nagrira Nenfa'a nagtereno Ra mani'ne. 29Nagra menina fore osu'negena neramasmue, fore'ma hania zupa, tamagra Nagrite tamentinti hugahaze. 30Nagra za'zatera nanekea ontamasmigahue, ama mopa kva nehia ne' Sata'a hago ne-e, agrira hanave'a omne'neankino, Nagrira nagateoregahie. 31Hianagi ama mopafi vahe'mo'a antahino keno hugahie, Nagra Nenfana navesinentoe, Nagra Nenfa'ma huo hunoma humanante'neaza nehuanki, otinketa amafintira vamneno.
ទើបបានជ្រើសរើសហើយ៖
Joni 14: kbq
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, Wycliffe Bible Translators, Inc. All rights reserved.