ទំនុកដំកើង 63

ទំនុករបស់ស្តេចដាវីឌ ដែលទ្រង់លើកក្នុងកាលដែលទ្រង់នៅទីរហោ‌ស្ថានស្រុកយូដា។

1ឱព្រះ‌អង្គអើយ ទ្រង់ជាព្រះនៃទូលបង្គំ

ទូលបង្គំនឹងស្វែងរកទ្រង់អស់ពីចិត្ត

ព្រលឹងទូលបង្គំស្រេករកទ្រង់

រូបសាច់ទូលបង្គំរឭកចង់បានទ្រង់

នៅក្នុងស្រុករីងស្ងួត ហើយហួត‌ហែង

ដែលគ្មានទឹកសោះ

2ដើម្បីឲ្យបានឃើញឥទ្ធិ‌ឫទ្ធិ នឹងសិរី‌ល្អរបស់ទ្រង់

ដូចជាទូលបង្គំបានឃើញនៅក្នុងទីបរិសុទ្ធដែរ

3ដ្បិតសេចក្ដីសប្បុរសនៃទ្រង់ នោះវិសេសជាងជីវិត

បបូរមាត់ទូលបង្គំនឹងសរសើរដល់ទ្រង់

4គឺយ៉ាងនោះ ដែលទូលបង្គំនឹងលើកដំកើងទ្រង់

ក្នុងកាលដែលនៅរស់នៅឡើយ

ទូលបង្គំនឹងប្រទូលដៃឡើង ដោយនូវព្រះ‌នាមទ្រង់

5នោះព្រលឹងទូលបង្គំនឹងបានឆ្អែត

ដូចជាបានបរិភោគខួរឆ្អឹង ហើយនឹងខ្លាញ់ផង

មាត់ទូលបង្គំក៏នឹងសរសើរទ្រង់ ដោយបបូរមាត់រីក‌រាយ

6ដោយទូលបង្គំនឹកដល់ទ្រង់ នៅលើដំណេក

ហើយរំពឹងគិតពីទ្រង់ នៅអស់ទាំងយាមយប់

7ដ្បិតទ្រង់បានធ្វើជាជំនួយដល់ទូលបង្គំ

ទូលបង្គំនឹងមានចិត្តរីក‌រាយនៅក្រោមម្លប់ស្លាបទ្រង់

8ព្រលឹងទូលបង្គំតាមទ្រង់ប្រកិត

ព្រះ‌ហស្តស្តាំនៃទ្រង់ក៏ទប់‌ទល់ទូលបង្គំ

9តែអស់អ្នកដែលរកបំផ្លាញព្រលឹងនៃទូលបង្គំ

នោះនឹងចុះទៅក្នុងជំរៅនៃផែនដី

10គេនឹងត្រូវប្រគល់ទៅក្នុងអំណាចដាវ

គេនឹងបានជាអាហារដល់ឆ្កែព្រៃ

11តែទូលបង្គំ ជាក្សត្រ នឹងរីក‌រាយក្នុងព្រះវិញ

អស់អ្នកណាដែលស្បថដោយនូវទ្រង់

នោះនឹងបានសរសើរដោយអរសាទរ

ពីព្រោះមាត់នៃពួកមនុស្សកំភូតនឹងត្រូវបិទ។

ទើបបានជ្រើសរើសហើយ៖

ទំនុកដំកើង 63: ពគប

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី ព្រះគម្ពីរបរិសុទ្ធ ១៩៥៤