Luka 15
15
Kanicau arǝ nzur mana ɓwàr ka
(Matiu 12:1-14)
1Aɓe fara ka amǝcemi andǝ amǝ'cauɓikea na aban rambǝa kat à nǝ̀ kwaki kiria arǝ Yesu.#15:1 Ɓalli gbal aɓa: Luk 5:29-30. 2Sǝ amǝ Farisi andǝ amalǝm Nggurcau mala Musa ka à kǝ nggwani ama, “Mǝnia yì ɓwa ka kǝ do ata amǝ'cauɓikea, kǝ lili andǝia.”
3Pǝlǝa Yesu nea wia mǝnia yì kanicau ka:
4 Ɓǝa twali ama ɓe kǝɓwa aɓalǝ wun ndanǝ anzur gbǝman. Ɓǝ̀ mwashat atea ɓwàr ka, ɓwe pà nǝ̀ ɗeki amǝnia lumi-tongno-nong-ine nǝ mǝsǝi tongno-nong-ine ka aban likiali nǝ̀ ká alta mǝno mwashat ɓwàr ka, she ɓǝ̀ kumǝni ka re? 5Sǝ ɓǝ̀ kumǝni ka, nǝ banɓoarnado sǝ nǝ̀ twali a kwari, 6aban o a la. Nǝ̀ tunǝ agyajam male andǝ amǝkunɓala, sǝ nǝ̀ nea wia ama, “Wu bwalam pak banɓoarnado, ǝn kumǝna nzur mem mǝnana ɓwàr ka!” 7Ən nggǝ na wun ama, anggo gbal a kuli ka bumpwasǝa na kam kǝrkǝr ace mǝ'cauɓikea mwashat mǝnana nying acauɓikea male nyare aban Ɓakuli ka. Mǝno yì bumpwasǝa ka kuti mana ndakam amur amǝ'cauɓoarna mǝnana lumi-tongno-nong-ine nǝ mǝsǝi tongno-nong-ine mana à ɓwarki tanjar raka.
Kanicau arǝ mǝsǝboalo mana ɓwàr ka
8 Ko ɓǝa twali ama ɓe mɓwama na nǝ amǝsǝ-boalo lum, sǝ ɓǝ̀ mǝnia mwashat ɓwar a rǝì ka, pà nǝ̀ tsǝk bǝsa a pitǝla nǝ̀ esǝki ɓala, sǝ nǝ̀ alban pepe she ɓǝ̀ kumǝni ka re? 9Sǝ ɓǝ̀ kumǝni ka, nǝ̀ tunǝ agyansari male andǝ amǝkunɓala nǝ̀ nea wia ama, “Wu bwalam pak banɓoarnado! Ən kumǝna boalo mem mǝnana ɓwàr ka.” 10Ən nggǝ na wun ama anggo gbal, bumpwasǝa nakam aban amǝturonjar mala Ɓakuli ace mǝ'cauɓikea mwashat mǝnana ginǝki acauɓikea male, nyare aban Ɓakuli ka.
Kanicau arǝ muna-ɓwabura mana ɓwàr ka
11Pǝlǝa Yesu lidǝmbǝa aban na ama:
Ɓe ɓwabura nakam nǝ amuna-burana ɓari. 12Mǝkyauwe mala ɓi ne tarrí ama, “Dâ, pam kāmbe mem mala kume mo.” Pǝlǝa tarrí gapia wia kume male aɓalǝu.
13 Anzǝm anonggeo shen ngga, ɓwa mǝkyauwe kùr twalo male kat, kara twal bǝri o a ɓe la a bansauwa. Akano ka kya kasǝ kume male aɓa do mǝɓane. 14Anzǝm mǝnana kiɗikina kume male kat ka, nggea nzala yi kpa a mǝno yì nzali ka, kara kutio aɓa tǝ̀r mǝcande. 15Pǝlǝa o kya alta turo aban ɓeɓwa a la mǝno ka. Sǝ ɓwa mǝno ka tasǝi a domwan mala agirkusǝu male ɓǝ̀ kǝ pea atǝmbǝrǝm-ɓala girlina. 16Rǝi ɓǝl pǝrpǝr arǝ nggunì girlina mǝnana atǝmbǝrǝm-ɓala kǝ li ka ama nǝ̀ li, sǝ kǝɓwa pe wi ɗang.
17 Yi nyare a ɗenyicau male ka na ama, “Amǝturo mǝnana à kǝ li a ɓabu tárram ka girlina gandǝia ɓà, sǝ mǝ ndya nzala kǝ wal-luem ngga! 18Mǝ nǝ nyare, mǝ nǝ o aban tárram, mǝ nǝ ne wi ama, ‘Dâ, ǝn pangŋǝni Ɓakuli cauɓikea sǝ ǝn pangŋǝno cauɓikea. 19Ən kārǝa ɓǝa tunǝam ama mǝ nda munio ɗǝm ɗang, nyesǝam kǝla ɓe mǝturo-ɓala mo.’ ”
20 Pǝlǝa lo nyare aban o aban tarrí.
Nda kuko malaká bik ban tarrí ɗang, mǝsǝ tarrí kpa a rǝì, kara mǝsǝswatǝr male bwali. Lo nǝ mire aban ká aban muni, kya kurrì zǝp.
21 Muni ne wi ama, “Dâ, ǝn pangŋǝni Ɓakuli cauɓikea, sǝ ǝn pangŋǝno. Ən kārǝa ɓǝa tunǝam ama munio ɗǝm ɗang.” # 15:21 Ən kārǝa ɓǝa tunǝam ama munio ɗǝm ɗang : Aɓea malǝmce mǝnana à gilǝia nǝ bu ka à bang mǝnia ama: Nyesǝam mǝ duk mwashat ata aguro mo.
22 Sǝ tarrí ka ne amǝ'turo-ɓala male ama, “Wu yinǝi wi nǝ daura mǝɓoarjami mǝnana kuti a ɓi ka, wu turi wi a rǝì. Wu oasǝi wi girmunabu, wu oasǝi wi ankura a kusǝì. 23Wu bwal muna-jamnda mǝ'nyane, wu wali. Sǝm nǝ̀ lili, sǝm nǝ̀ pangŋǝni banɓoarnado. 24Acemǝnana mǝnia yì muna-ɓwabura mem ngga wú, sǝ lo; ɓwaro, sǝ à kumi.” Pǝlǝa à tita pakiɗire.
25 Anggo ka, muni mǝgule na a ɓabondo. Nyarna nǝ̀ yia gbashi rǝ ɓala ka, ok walki anggwam andǝ nggyal andǝ tāki'anggwam. 26Pǝlǝa tunǝ ɓe mǝturo-ɓala ɗi, mana à pakkiyia. 27Mǝturo-ɓala eari wi ama, “Mǝ'kyauweo na yiu ka, nda tárro wal jamnda mǝ'nyane, acemǝnana nyarǝna yina bǎng, yi kumǝni.”
28 Sǝ muna mǝgule ka bumi lullo, ginǝ kutia ɓala. Tarrí puro yi kumi, camarǝ ɓuakia rǝì. 29Sǝ ne tarrí ama, “Sǝn apǝlǝa mǝnia pas mǝ nda ban pakko turo kǝla guro, ko ǝn mgbikio kiru arǝ cau mo àkǝ̀ pwari ɗang. Kat andǝ amani anggo ka, ko kǝ muna-mbul mǝnana a nǝ pam ama ɓǝ̀ ǝn twani ɓǝ̀ sǝm pakiɗire sǝnǝ agyajam mem ngga, pà kàm ɗang! 30Lang munio mǝnana kiɗiki gǝna mo arǝ amǝgyatarǝu nyarǝna ka, a yi wali wi muna jamnda mǝ'nyane!”
31 Pǝlǝa tarrí ne wi ama, “Munem, sǝm nda a tarǝ sǝm sǝnǝ we, sǝ gir mǝnana kat mem na ka, mo na. 32Ɓoaro ɓǝ̀ sǝm pak banɓoarnado andǝ bumpwasǝa, acemǝnana mǝnia yì mǝ'kyauweo ka wú, sǝ adyan ngga longŋǝna nǝ amǝsǝì; ɓwaro, sǝ à kumǝni.”
ទើបបានជ្រើសរើសហើយ៖
Luka 15: mbu
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2016