Luka 18
18
Kanicau arǝ hiwi
1Yesu ne alaggana male ɓe kǝ kanicau mǝnana nǝ̀ lǝmndǝ ama yia ka ɓǝa kǝ pak hiwi cala rǝia wuki ɗang. 2Na ama:
Aɓe kǝ la, ɓe murǝm-ɓashi nakam mǝnana kǝ ɓanggi Ɓakuli ɗang, sǝ kǝgir oasǝi arǝ kǝɓwa raka. 3Sǝ ɓe man-lú nakam àkǝ̀ le, mǝnana camarǝ nyarke aban mǝɓashi nǝ ɓua ama, “Kutio anre sǝm sǝnǝ mǝɓinǝ muram.”
4Ata dǝmbe ka gine. Nǝ nzǝmo ka ne ɓamuri ama, “Ko kat andǝ amani ama ǝn nggǝ ɓanggi Ɓakuli ɗang, sǝ kǝgir oasǝkiam arǝ kǝɓwa raka, 5mǝ nǝ pak ɓashi mǝ'mǝsǝcau nì ace mǝnia yì man-lú mǝnana kùrram mwacang ngga. Acemǝnana ɓǝn pak raka, nǝ̀ yauwam nǝ nyarke male tutu abanam!”
6Pǝlǝa Yesu Mǝtalabangŋo na ama:
Wu ok cau mǝnana murǝm-ɓashi mǝ'ɗwanyi mǝsǝcau man na ka! 7Wu kǝ sǝni kǝla Ɓakuli ka pà nǝ̀ pak ɓashi mǝ'mǝsǝcau nì ace aɓwana male mǝnana tària, mǝnana à kǝ ɓua a ɓadǝmbǝi, du andǝ pwari ka re? Nǝ̀ dǝndi arǝ bwalia wia kam le? 8Ən nggǝ na wun ama, nǝ̀ pea wia gir mǝnana malea na ka a kaurǝa. Sǝa ma ɓǝ̀ Muna Mala Ɓwa yiu ka, nǝ̀ yia kum paɓamuru a ɓanza le?
Kanicau arǝ ɓwa Farisi andǝ mǝcemi
9Yesu na mǝnia yì kanicau ka arǝ aɓwana mǝnana à twali ɓamuria ama yia ka à ndaka amǝ'cauɓoarna, sǝ à ɓǝsǝki acili aɓwana à nyesǝia amǝ'cauɓikea na ka, ama:
10Aɓwana ɓari à wario a Ndàmǝgule mala Ɓakuli ace pak hiwi. Mwashat ka ɓwa Farisi na, sǝ ɓe ka mǝcemi na. 11Pǝlǝa ɓwa Farisi lo came pak hiwi amur ɓamuri. Na ama, “Ɓakuli, ǝn pakko yàwá, acemǝnana mǝ nda mǝ'cauɓikea kǝla acili aɓwana ɗang. Ən pa kǝla amǝ'ɓǝmbǝriban, amǝ ɗwanyi do amur mǝsǝcau, amǝ'nongginǝban a nza mala doɓala, ko kǝla mǝnia yì mǝcemi ka ɗang. 12Ən nggǝ gilmur kusǝ ɓari a nre-limo mwashat, sǝ ǝn nggǝ pe Ɓakuli kāmbe mwashat aɓa lum mala koya girkuma mem.”
13Sǝ mala mǝcemi ka cam kuko. Eare ama nǝ̀ loasǝ muri a kuli ɗang, wal kikili na ama, “Ɓakuli, sǝn mǝsǝswatǝr mem, mim ngga mǝ nda mǝ'cauɓikea!”
14Ən nggǝ na wun ama, mǝnia yì ɓwa ka, nyare aban o ɓala male ka, mǝ'cauɓoarna na a ɓadǝm Ɓakuli, pa kǝla mala ɓwa Farisi ɗang. Acemǝnana koyana sǝ kǝ twalɓamuri ka, à nǝ̀ kyauwiki, sǝ ɓwa mǝnana kǝ nongsǝ ɓamuri ka, à nǝ̀ gusǝlǝi.#18:14 Ɓalli gbal aɓa: Mat 23:12; Luk 14:11.
Yesu tsǝkbu amur amuna
(Matiu 19:13-15; Markus 10:13-16)
15Ɓwapǝndǝa na arǝ yiu nǝ amuna aban Yesu ama ɓǝ̀ yi tsǝkia wia bu. Alaggana male sǝni anggo ka, à lo à sà a rǝia. 16Sǝ Yesu ka tunǝ amuna abani oaso na ama, “Wu ɗeki amuna ɓǝa yiu abanam, wu kǝa pǝrkia ɗang, acemǝnana Domurǝm mala Ɓakuli ka nda ace a ulang amǝnia ka. 17Ən nggǝ na wun mǝsǝcau ama koyana sǝ pà nǝ̀ ak Domurǝm mala Ɓakuli kǝla muna mǝkyauwe raka, pà nǝ̀ gandǝ kuti kam ɗang.”
Ɓe ɓwamǝgule mala amǝ Yahudi mǝkume
(Matiu 19:16-30; Markus 10:17-31)
18Ɓe ɓwamǝgule mala amǝ Yahudi mǝkume ɗi ama, “Malǝm mǝɓoarne, mana gir ni na mǝ nǝ pa sǝ mǝ nǝ kum yilǝmu mǝnana málá male pà kàm raka?”
19Yesu eari wi ama, “A bangŋa ama mǝ nda ɓwa mǝɓoarne? Kǝ ɓwapǝndǝa pà kàm mǝɓoarne na ɗang, she Ɓakuli nǝmurǝì. 20We ka, à surǝna rǝ anzongcau mala Ɓakuli mǝnana ama: ‘Kǝa kuti aɓa cauɓikea nongnǝban a nza nǝ doɓala ɗang, kǝa wal-lú ɗang, kǝa iun'i ɗang, kǝa ɓun-nyir amur ɓwa ɗang, pe tárro andǝ nggo gulo.’ ”#18:20 Ɓalli gbal aɓa: Pur 20:12-16; Nggur 5:16-20.
21Pǝlǝa ɓwe na ama, “Amǝnia ka, yale mǝ nda muntulo sǝ ǝn bwalia.”
22Lang Yesu ok mǝnia ka, ne wi ama, “Ɓe gir mwashat na a ɗwanyi ka. Maki agir mǝnana kat a ndanǝia ka, gaki amǝtǝr, a wu nǝ kum gǝna a kuli, sǝ wu yiu, wu yi kpatam.”
23Lang nǝ̀ o ana ka bumi kiɗiki, acemǝnana yì ka, mǝkume na kǝrkǝr. 24Yesu sǝni kyap-kyap, sǝ na ama, “Nǝ̀ kwano sǝ mǝgǝna nǝ̀ kutio a Domurǝm mala Ɓakuli! 25Ɓafo ka, kutio mala mǝgǝna a Domurǝm mala Ɓakuli ka kwano kuti kutio mala kalakadambi a tǝta nlerǝman.”
26Aɓwana mǝnana à ok mǝnia ka à ɗiban ama, “Sǝ yana ado nǝ̀ auwa?”
27Yesu eare ama, “Gir mǝnana pà nǝ̀ gandǝ pa aban ɓwapǝndǝa raka, nǝ̀ gandǝ pa aban Ɓakuli.”
28Pǝlǝa Bitǝrus ne wi ama, “Sǝni, sǝm nyingŋǝna agirkuma ma'sǝm kat sǝm yiu a kpato!”
29Yesu nea wia ama, “Ən nggǝ na wun mǝsǝcau, kǝɓwa pà kàm mǝnana ɗeki ɓala, ko mɓwama, ko amǝ'eambu, ko tarrû andǝ nggeau, ko amuna ace Domurǝm mala Ɓakuli, 30sǝ nǝ̀ ɗwanyi kum agir kǝrkǝr a nza mǝnia ka. Sǝ ɗǝm ngga a nza mǝno kǝ yiu ka, nǝ̀ kum yilǝmu mǝnana málá male pà kàm raka.”
Yesu nyare na cau amur lú male
(Matiu 20:17-19; Markus 10:32-34)
31Yesu tunǝ alaggana male, aman lum-nong-ɓari ka a giriban, sǝ nea wia ama:
Wu sǝni sǝm ndo sǝm nǝ̀ ká a Urǝshalima, sǝ agir mǝnana kat amǝ'ɓangna mala Ɓakuli gilǝì amur Muna Mala Ɓwa ka à nǝ̀ lumsǝo. 32À nǝ̀ nyesǝi à nǝ̀ pea aɓwana mǝnana amǝ Yahudi na raka, à nǝ̀ oali, oalban zalǝkiban, à nǝ̀ sanggì, à nǝ̀ tapi wi ntara, à nǝ̀ kwe, sǝ à nǝ̀ wali nǝ̀ wu, 33sǝ a tāruia nongŋo ka, nǝ̀ loapi ɓembe.
34Sǝ ko alaggana male bwalta kǝgir aɓa mǝnia yì acau ka ɗang. À sǝmbǝrǝia wia ɓālǝi, ko à surǝ gir mǝnana kǝ na cau amuri ka ɗang.
Yesu mǝn mǝsǝ nte mǝzǝmnggi agir nì
(Matiu 20:29-34; Markus 10:46-52)
35Yesu gbashina Jeriko ka, ɓe nte nakam aban do a girǝi njargula aban zǝmnggi agir. 36Lang nǝ̀ ok gǝshi ɓwabunda mǝnana kǝ kuti ka, ɗiban ama, mana kumban le?
37À pǝlǝa à ne wi ama, “Yesu ɓwa Nazarat na kǝ kuti ka.”
38Pǝlǝa tunǝban bang-bang ama, “Yesu! Muna mala Dauda#18:38 Muna mala Dauda: Amǝ Yahudi ka à tsǝkɓalǝia ama Mezaya ko Kǝrǝsti ka nǝ̀ pur a tau mala Murǝm Dauda sǝ ace mani ka à kǝ tunǝi ama “Muna mala Dauda,” ko “Ko Mǝkà Dauda.”! Sǝn mǝsǝswatǝr mem!”
39Aɓwana mǝnana à ak dǝmbǝa ka à sà a rǝì ɓwam, ama ɓǝ̀ duk kuni ɗǝong. Sǝ yì ka, kara loasǝ gi kpǝm ama, “Muna Mala Dauda, sǝn mǝsǝswatǝr mem!”
40Yesu go kusǝì came, sǝ na ama, ɓǝa yinǝi abani. Lang yina abani tu ka, Yesu ɗi ama, 41“Mana a earce mǝ pakko?” Pǝlǝa nte man eare ama, “Mǝtalabangŋo, ǝn nggǝ earce sǝnban.”
42Yesu ne wi ama, “Kum sǝnban! Paɓamuru mo amsǝno.”
43Àkǝ̀ banì gbal kara kum sǝnban, sǝ kpa ata Yesu aban o, kǝ ɓwangsǝki Ɓakuli. Lang ɓwapǝndǝa mǝnana kat sǝni ka, yia gbal ka à ɓwangsǝ Ɓakuli.
ទើបបានជ្រើសរើសហើយ៖
Luka 18: mbu
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2016