Sawmus 5
5
Uya huwithan akak pihiyekemni waditye
1Kiyavwiye Uhokri, uya ataybiswa numkanit. Timapnaba namnihswan.
2Nukivara, nuwohkiga, timapnaba namnihswan pit. Mmanawa pitnenwa nah amnihswene.
3Kiyavwiye, mpuse hawka nah piriyepkaw pit. Pisme timapnite nukuvimna. Ayteke nah wahap adahan pis iki nutuh nayapni. Nah hiyakni ku pis ikinek ku pariye nayapni pit.
4Kiyavwiye Uhokri, pis ku pariye kane batek akak hiyeg gikehnikis mbayka; hiyeg mabayavye gihiyekemnikis pis ka muwaka ignes misakwa pivetun.
5Pis ka batek gikakkis hiyeg kawantiyavye. Hawata pis amiyha hiyeg mbayavye gihiyekemnikis.
6Pis pisenwanek gikakkis hiyeg wasaymavye. Hawata pis asene hiyeg umehekevutnevwi gikakkis hiyeg kinisekevutnevwi.
7Nahme, awaku pis ka pamnihrasima nukakuh, nah ik adahan nah parak ta pivinekut. Nah ik adahan nah paberetusaw adahan nah kabayhap akak madikte kiyatka.
8Kiyavwiye, uya huwithan akak pihiyekemni waditye. Nah kadahan ka aynsima nuvetunyavu ku pariye muwaka nayguhpitni piw. Nah ka hiyak ku samah nuwewni. Uya akka nutuh ku samah pimawkan adahan nah wew.
9Igkis nuvetunyavu yuma pahatnama giwnkis inyewatma. Avanenekwa abet gihiyekemnikis mbaykanenwa. Igkis kinista hiyeg akak barewye iwit bawa ini adahan gikinseptenkis ba adahan giwmeptenkis.
10Kiyavwiye, katiwnisa gitkis avatra ini gihiyekemnikis. Ini gahegbetawnikis ku pariye igkis ahegbete, keh in wageswa gidahankisnewa akiw. Ivukepnigkis pivetunatak, mmanawa igkis kehnenekwa ka aynsima patahwaki, igkis hawata avanenekwa suguhnap.
11Heneme, Kiyavwiye, iki batekka gitkis madikte neras ku pariye kamaxwenevwi pivitit. Avanenekwa igkis pak avat akak madikte batekka awaku pisnewa gimaptentenkis. Iki pibetki gitkis neras ku pariye batekyevwi pikak avitakwa giyaknikis.
12Mmanawa pisnewa, Kiyavwiye, sarayh kabayka givititkis neras ku pariye ihpenevwi piwn; pabay mpithigkis kewa pahak arabbe gidahankis.
ទើបបានជ្រើសរើសហើយ៖
Sawmus 5: pluPB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.