yohane 19
19
1micu mashʉyʉ 'o pilato ho e'usna yaita'e 'o iesu, cu ti'usna. 2mo boemi to cʉmʉ 'o heetai ho teyaineni tafange, tofeʉ'seni to fnguusi, ihen'a poa sʉ'eʉsʉ tomo tatposa ci yʉsʉ. 3ihe ohcum'a mi'usni ho yainca: <yokeoasu 'e honte ta couyutaya!> cu boemi to emucu ho t'oplikvi.
4mo ivaho yuyafo 'o pilato ho mi'usnu to botngonʉ ho yainca: <micu! ho os'o hafa yuyafo, poa cohivneni muu, o'a os'o elʉa cuma na ongko no teta meamzi ci kuisi.> 5cu yuyafo 'o iesu, iceopngu tomo cʉcʉmʉ ci tafange, maceofʉ tomo tatposa ci yʉsʉ. mo mi'usnu to botngonʉ 'o pilato ho yainca: <aiti! 'e cou eni!>
6'o masasaisicoo ho i'o kengsacu to seiten ne ihe cu aiti 'o iesu, mo moozoyʉ: <spica to zuuzika si iesu! spica to zuuzika si iesu!>
mi'usni to pilato ho yainca: <'atemueno iachia hafa ho spica to zuuzika. o'a os'o elʉa na kuisi taini.>
7yainca to couyutaya: <panto hoolicumia, ieni to hoolicu nteta anana'o mcoi, maica mita iachi mainca zou oko to hamo.>
8isi talʉi to pilato ho ihe yainca, cu h'unano ma'sasmoyo. 9mo ivaho yʉmeʉmʉ to sootokufu 'o pilato, tuocosi 'o iesu: <mikos'a atuhcu i'mi no nenu?>
at'inghi o'aisi yut'inga to iesu. 10isi mi'usni to pilato ho yainca: <o'a teko yut'inga a'o? teko cohivi, mi'o yaa tonʉ no poesih'a suu, maezo yaa tonʉ no spica to zuuzika suu.>
11yainca to iesu: <'a isic'oeno faeni to hamo 'emo maica ci tonʉsu, ko'ko mikoeno yaa tonʉ ho yʉsvʉta a'o. ko'koeno, i'omo himhohioa ho tomakneni suu ci cou te asuhcu ecvʉhʉ na kuisisi.>
12talʉi to pilato 'e e'e eni, asuhca 'ucia poesih'a 'o iesu. at'inghi mo moozoyʉ 'o botngonʉ ho yainca: <hociko poesih'a, o'a nas'a nanghia to honte na suu! siya nate iachi bihonte, 'aeno siya na hangʉ to honte.>
13talʉi to pilato homo maica 'e e'ehe, cu e'eafi 'o iesu, yonto lahe yainca <tai'to'tohungva no fatu> (la yainca to e'e no hevulu kapata) ho apa'ta tuucocosi. 14'o hiesi ne mio zou hiesi no ae'ayocʉ meem'esa'o, a'usnu no cohiona, mo mi'usnu to botngonʉ 'o pilato ho yainca: <aiti! 'e hontemu.>
15micu moozoyʉ 'o botngonʉ: <opcoza! opcoza! spica to zuuzika!>
tuocosi to pilato: <temu skuna a'o ho spica ta zuuzika 'e hontemu?>
yut'inga to saisicoo: <'ai'oc'o kaisa 'o honte mia!>
16isicu faeni ta botngonʉ to pilato 'o iesu ho spica to zuuzika.
spica to zuuzika 'o iesu
(matai 27:32-44; maluko 15:21-32; luka 23:26-43)
ihe hafa emo'usnu maita'e 'o iesu. 17mo yuyafo 'o iesu, ngoevi 'o iachisi zuuzika, sʉc'ʉhʉ to <cʉehʉana> (yainca to e'e no hevulu ngolungo). 18yonto ic'o, ihe spica to zuuzika 'o iesu; panto ihe s'upa cimo yoso, macicihi to aavaisi, notaico 'o iesu. 19mo tmopsʉ to i'iya 'o pilato, poa spicneni to skoskopna to zuuzika. 'o tposʉ to i'iya: <counazalo iesu, honte ta couyutaya.> 20botngonʉ ci couyutaya 'omo teolʉ ta isi tposi ta i'iya. maica 'o isi yoni svopco to zuuzika to iesu o'amo covhi ta hosa; a'vinano 'e isi tposi ta i'iya mo boemi to tposno hevulu, lating, ho ngilisia tuyu no e'e ci tposʉ ho tposi. 21'o saisicoo to couyutaya mo mi'usnu to pilato ho yainca: <teav'a tposi ho yainca <<honte ta couyutaya>>, te tposi ho yainca <<'e cou eni mo iachi mainca zou honte ta couyutaya>>.>
22yut'inga to pilato: <'e os'o afu'a tposi, o'ana te taezuhi!>
23ataveisi ne ihecu spica to zuuzika to heetai 'o iesu, ihe yaa 'o yʉsʉ nosi aoskopa to iesu ho aspota, mocni 'omo macicihi. ihe yaeza yaa 'o yʉsʉ nosi as'oya; 'e yʉsʉ eni uk'aci ne'sasi, moc'o cono yʉteʉ ho oho teyai. 24ko'koeno, mo yu'tasvʉtʉ 'o heetai: <o'a teto eekieki, tetoc'o yu'siseita, aiti nate tmanu.> na eni aʉla emia 'o isi eyoca to seiso ci e'e:
ihe aangaeza 'o os'o aoskopa,
yaeza yupa yu'siseita 'o os'o as'oya.
'aihecueno a'ʉmta hioa ta heetai na eni.
25'omo bicmu'u to zuuzika to iesu, panto ino to iesu, 'o inosi coni, 'o maliya ci vcongʉ to kolopa, ho i'o maliya to motala. 26isi teolʉi to iesu 'o inosi ho i'o lasi songohia ci tesi mo yac'ʉ to cum'usi, isicu mi'usni 'o inosi ho yainca: <ino, aiti, 'e okosu!>
27ecnguhu, ivaha mi'usni 'o tesi ic'o ho yainca: <aiti, si inosu!> ahoi ne mio 'o tesi ic'o ohsicu e'usna to emoosi 'o ino to iesu ho aʉt'ʉca.
mcoi 'o iesu
(matai 27:45-56; maluko 15:33-41; luka 23:44-49)
28isi cohivi to iesu ho isicu acʉha peiseʉpngi 'e isi hi'hioa, te esmia 'o e'e to seiso, cu mainca: <mi'o mecu.>
29to ic'o panto mo conci hopi, isi songcʉngci to masʉecʉ ci emi; ihe yaa 'o kʉyʉpa ho tfʉi to masʉecʉ ci emi, futneni to esou ho zo'uneni to sumsu to iesu. 30ataveisi ne isi soetothoma to iesu, yainca: <tec'u!>
mo tma'keucu 'o fnguusi, cu entʉha to nsou.
seu'ca 'o h'ih'i
31zou hiesi no ae'ayocʉ ne mio, i'o tec'u esmi ci 'ansokunici zou meoino meesi ci hie; 'o masoso'ehti ta couyutaya ihe kuzoa hoci nongaco to zuuzika 'o feango tomo mcoi hote 'ansokunici, cu uhto pilato ho m'eya smuhnu no cou ho ebkoca 'o t'ango to isi spica to zuuzika, hocu hafa mongoi 'o feangohe. 32mo fiho no e'e 'o heetai, ebkoca 'o t'ango to isi cono spica cimo noavai to zuuzika to iesu. 33mo emocmu'u to iesu, aiti ho micu mcoi 'o iesu, o'ana ihe ebkoca 'o t'angosi. 34at'inghi, 'omo cihi ci heetai isi yomza to mengzu ho seu'ca 'o h'ih'isi, osni yaa moheafo ci hmuyu ho chumu. ( 35na eni ihe 'akasi to moso aʉlʉ huceoyo ta a'a'ausna ci cou; isi cohivi 'e 'akasisi mo mou'ʉmtʉ. akoeva no poa maezo tmaa'uzo na muu.) 36maica 'e hi'hioa eni te mia 'o e'e to seiso: <'o cʉehʉsi o'ates'a mako coni nate ebkoca.> 37panto mon'a h'unasi ci tposʉ to seiso: <tahe mie'oci 'o ohe iachia seu'ca to mengzu ci cou.>
soʉlʉlʉa 'o iesu
(matai 27:57-61; maluko 15:42-47; luka 23:50-56)
38ataveisi no sucaefi 'e hi'hioa eni, panto cihi ci cou'alimatai ci yosefu mo mi'usnu to pilato ho m'eya teomneni hocisi e'maine'ei 'o feango to iesu. ('e yosefu zou tesi to iesu, c'o i'mi no ngoheʉngeʉ to so'ehti to couyutaya, o'ala apa'to.) isi teomneni to pilato ho isi p'enza, cu hafa to yosefu 'o feango to iesu.
39ne auyusi i'o mosola biebimi to iesu nemo feʉngna ci nikotemu mo yuyuso 'o yosefu. mahafo to isi atvoha to konamusngau ci s'os'o, mo asonʉ 30 kilo. 40iepoepohʉ boemi to isi atvoha to s'os'o ci yʉteʉ ho to'silʉlʉa cfua 'o feango to iesu; na eni lahe aot'oca ci h'ofiha to couyutaya hola yamcoi. 41to ohe yoni spica to zuuzika 'o iesu mo yaa coni ci ezoyʉ, ta 'ayumonasi panto o'amocu ohola ahta titha cimo faeva ci heuf'a. 42maica ne mio zou aʉlʉ hiesi no ae'ayocʉ meesi to couyutaya, mo cum'u 'o heuf'a ic'o, ihecu soʉlʉlʉa to ic'o 'o iesu.
ទើបបានជ្រើសរើសហើយ៖
yohane 19: bsnfe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Society in Taiwan © 台灣聖經公會版權所有 2014