LUKU 7

Sozanɔ gbɛ̃ zɔ̃kɔ̃ zĩkɛri werekɔ̃anaa

(Mat 8:5-13)

1Kũ Yesu yã birenɔ ò gbɛ̃nɔnɛ pínki à làka, akũ à gɛ̀ɛ Kapɛnamu. 2Romu sozanɔ gbɛ̃ zɔ̃kɔ̃ ke kú gwe, à zĩkɛri vĩ à yei manamana, akũ àtɛn gyã kɛ à kà gana. 3Kũ gbɛ̃ zɔ̃kɔ̃ɔ pì Yesu baaruu mà, à Yuda gbɛ̃ zɔ̃kɔ̃nɔ zĩ̀a ò wɛ́ kɛa à su à a zĩkɛrii pìi mì sí. 4Kũ ò kà Yesu kĩnaa, ò wɛ́ kɛ̀a gbãngbãn ò pì: Gbɛ̃ pìi kà ǹ kpái. 5À ye ó burii, àkũ mɛ́ à aduakɛkpɛ dɔ̀wɛrɛ. 6Akũ Yesu gɛ̀ɛ kũńwo. Kũ à kà kãni kũ a bɛo, akũ gbɛ̃ zɔ̃kɔ̃ɔ pì a gbɛ̃nnanɔ zĩ̀ ò yã dí onɛ: Dikiri, ǹsun wari dɔ n zĩdaaro, mádi ká kũ ǹ gɛ̃ ma bɛaro. 7A yã mɛ́ à tò ma dìtɛ kũ mádi ká mà su n kĩnaa ma zĩdaro. Ǹ yã o, ma zĩkɛri ni werekɔ̃a. 8Zaakũ makũ se ò iko vĩmamɛ, má iko vĩ sozanɔa. Madì o ń gbɛ̃ donɛ à gɛ́, akũ àdi gɛ́. Madì o a pãndenɛ à mɔ́, akũ àdi su. Madì o ma zĩkɛriinɛ à adikũ kɛ, àdi kɛ. 9Kũ Yesu yã pìi mà, à bò a sarɛ. Akũ à lìtɛ à pì gbɛ̃ kũ ò tɛ́ainɔnɛ: Matɛn oárɛ, mádi e gbɛ̃ke ma náani kɛ̀ lɛ bee Isarailanɔ tɛ́ro. 10Kũ zĩ̀rii pìnɔ ɛ̀ra ò sù, ò è zĩkɛrii pìi wèrekɔ̃a.

Gyaanɔ nɛ́ mɛ̀n do légelege vuna gan

11Abire gbɛra Yesu gɛ̀ɛ wɛ̃tɛ kũ òdi pi Naini gũn. A ìbanɔ kũ gbɛ̃ pãndenɔ gɛ̀ɛ kãao dasidasi. 12Kũ à kà kãni kũ wɛ̃tɛ pì bĩnilɛo, à è ò gɛ̀ sɛna òtɛn boo. Gyaanɔ nɛ́ mɛ̀n do légelegemɛ. Wɛ̃tɛpidenɔn kú kũ nɔgbɛ̃ pìio dasi. 13Kũ Dikiri a è, akũ à kɛ̀nɛ wɛ̃nda, à pìnɛ: Ǹsun ɔ́ɔ dɔro. 14Akũ à nà gɛ̀ɛ pìii, à ɔ nà a àkpatiia. Kũ gbɛ̃ kũ ò sɛnanɔ zɛ̀, akũ à pì: Kɛfɛnna, ma ònnɛ ǹ vu! 15Akũ gɛ̀ɛ pìi vùtɛ à nà yã'onaaa. Akũ Yesu a kpà a daa. 16Vĩna gbɛ̃nɔ kũ̀ ń pínki, ò Luda sáabu kpà ò pì: O annabi zɔ̃kɔ̃ɔ è ó tɛ́. Ò pì dɔ: Luda sù a gbɛ̃nɔ gwa. 17Akũ Yesu baaruu dà Yudea bùsula kũ bùsu kũ ò likainɔ pínki.

Yahaya Da'itɛkɛri zĩ̀rinɔ

(Mat 11:1-19)

18Yahaya ìbanɔ yã pìnɔ bàbanɛ pínki. Akũ Yahaya ń gbɛ̃nɔn planɔ sìsi, 19à ń zĩ Dikiria, ò a la, àkũmɛ gbɛ̃ kũ ani su ũ yá, ke ògɔ̃ wɛ́ dɔ gbɛ̃ pãndeimɛ? 20Kũ gbɛ̃ pìnɔ kà Yesu kĩnaa, ò pìnɛ: Yahaya Da'itɛkɛri mɛ́ à ó zĩ ò n la, mɔkɔ̃mmɛ gbɛ̃ kũ ani su ũ yá, ke ògɔ̃ wɛ́ dɔ gbɛ̃ pãndeimɛ? 21Zaa gwe gɔ̃̀nɔ Yesu gbɛ̃nɔ wèrekɔ̃a dasi kũ ń gyãnɔ kũ ń wãwãnɔ kũ ń tãnanɔ. À tò vĩ̀nanɔ gu è dasi dɔ. 22Akũ à pì Yahaya zĩ̀rinɔnɛ: À gɛ́ à yã kũ a è, akũsɔ̃ a mànɔ gbãnɛ. À onɛ vĩ̀nanɔ tɛn gu e, ɛrɛnɔ tɛn táa o, kusunɔ tɛn werekɔ̃a, sãtonɔ tɛn yã ma, gɛ̀nɔ tɛn vu, takasidenɔ tɛn baaru nna waazi ma. 23Arubarikaden gbɛ̃ kũ àdi fu ma yãaro ũ.

24Kũ Yahaya zĩ̀rinɔ tà, Yesu Yahaya yã ò parinɛ à pì: Bɔ́n a gɛ gwa gbárannan? Kàpa kũ ĩa tɛn yĩgãn yá? 25Bɔ́n a gɛ gwa sàa? Gbɛ̃ kũ à pɔ́kasa zãrɛ danan yá? Nnamari kũ òdi pɔ́kasa mana danɔ dìgɔ̃ kú kínabɛamɛ. 26Bɔ́n a gɛ gwa sàa? Annabiin yá? Lɛmɛ! Matɛn oárɛ à de annabila se. 27Zaakũ Yahayan ò a yã kɛ̃̀ Luda yãn ò pì:

Mani ma zĩ̀ri gbarɛ n ã

à zɛ́ kɛkɛnnɛ.

28Matɛn oárɛ, nɔgbɛ̃ nɛ́'inaa gũn gbɛ̃ke dí ká Yahaya ũro. Bee kũ abireo gbɛ̃ kũ à de gbɛ̃ kpɛde ũ kpata kũ à bò Luda kĩnaa gũn deala.

29Kũ gbɛ̃ sĩnda pínki a yã mà, ari kũ bɛ'ɔgɔsirinɔ sé, ò yã nna kpà Ludaa, zaakũ Yahaya ń da'itɛ kɛ̀. 30Farisinɔ kũ ludayãdannɛrinɔ sɔ̃, ò gì yã kũ Luda dìtɛ à kɛńnɛi, akũ odi we kũ Yahaya ń da'itɛ kɛ̀ro.

31Yesu pì: Bɔ́n mani gbãragbɛ̃nɔ kpákũsũoo? Bɔ́n ò bòkɔ̃aoo? 32Ò de lán nɛ́ kũ ò kú ɛtɛ gũn, òtɛn lɛ́ zukɔ̃inɔ bà òtɛn pi:

O úra pɛ̀árɛ, ádi ũ wãro.

O wɛ̃nda lɛ̀ɛ sìárɛ, ádi ɔ́ɔ dɔro.

33Zaakũ Yahaya Da'itɛkɛrii sù, adi burodi sóro, adi sèwɛ̃ miro, akũ a pì tãnademɛ. 34Bisãsiri Nɛ́ sù, àdi pɔ́ ble, àdi í mi, akũ a pì: Guturu wɛ̃miriimɛ, bɛ'ɔgɔsirinɔ kũ durunnakɛrinɔ gbɛ̃nnamɛ. 35Ama òdi ɔ̃ndɔ̃ dɔ̃ a yãkɛnaaamɛ.

Nísi gbĩ nna kuna Yesu gbáa

36Farisi ke Yesu sìsi à su à pɔ́ ble kãao. Yesu gɛ̀ɛ a bɛa, akũ àtɛn pɔ́ ble gɛngɛsɛkɛna. 37Nɔgbɛ̃ dàvãnide ke kú wɛ̃tɛ pìi gũn. Kũ à mà Yesu tɛn pɔ́ ble Farisi pì bɛa, akũ à gɛ̀ɛ gwe kũ kpáluba fítinnao kũ nísi gbĩ nnao kú a gũn. 38À zɛ̀ a kpɛ a gbá sarɛ, àtɛn ɔ́ɔ dɔ. A wɛ́tɛ̃ tɛn tɔ̃ a gɛ̀sɛkpɛa, akũ àtɛn wara kũ a mìkão, à lɛ́ pɛ̀pɛ a gbáa, akũ à nísi gbĩ nna pìi kùa. 39Kũ Farisi kũ à a sìsi pìi è lɛ, akũ à pì a swɛ̃̀ɛ gũn: Tó gbɛ̃ pì bi annabiimɛ, de à nɔgbɛ̃ kũ àtɛn ɔ naa dí taka dɔ̃̀, kũ dàvãnidemɛ. 40Akũ Yesu pì Farisi pìinɛ: Simɔ, má yãke vĩ mà onnɛ. Simɔ pì: Ǹ o, Dannɛri. 41Yesu pì: Ɔgɔdakɛri ke mɛ́ à kun, gbɛ̃nɔn planɔ a fĩna kũna, gbɛ̃ do andurufu ɔgɔ wàa pla kpɛ́ basɔɔro, gbɛ̃ do sɔ̃ ɔgɔ bupla akuri. 42Kũ ò pɔ́ke vĩ ò fĩna booro, akũ à tòńnɛ ń pla ń pínki. Ń tɛ́, dí mɛ́ anigɔ̃ yei de a dakelaa? 43Simɔ wèa à pì: Matɛn da gbɛ̃ kũ ò tònɛ kũ ɔgɔ zɔ̃kɔ̃ɔomɛ. Yesu pìnɛ: N we mana. 44Akũ Yesu arɛ dɔ̀ nɔgbɛ̃ pìia, à pì Simɔnɛ: N nɔgbɛ̃ pìi è yá? Kũ ma gɛ̃ n bɛa, ńdi í kpáma ma gbá pìpiro, akũ nɔgbɛ̃ pì ma gbá pìpi kũ a wɛ́tɛ̃o, à wàra kũ a mìkão. 45Ńdi lɛ́ pɛ́maro. Nɔgbɛ̃ pì sɔ̃, zaa gɔrɔ kũ ma gɛ̃ la, adi kámma bo kũ lɛ́pɛna ma gbáaaoro. 46Ńdi nísi má ma mìiaro. Nɔgbɛ̃ pì sɔ̃, à nísi gbĩnnade kù ma gbánɔa. 47Abire yã mɛ́ à tò matɛn onnɛ, à yemai manamana kũ a durunna zɔ̃kɔ̃ɔ kɛ̃̀a yãimɛ. Gbɛ̃ kũ ò a kɛ̃̀ kũ a fítio sɔ̃, yenyĩ fítinlen àdigɔ̃ vĩ. 48Akũ à pì nɔgbɛ̃ pìinɛ: N durunnanɔ kɛ̃̀nnɛ. 49Akũ gbɛ̃ kũ òtɛn pɔ́ ble lɛɛlɛnɔ òkɔ̃nɛ ò pì: Dín gbɛ̃ pì ũ, kũ àtɛn durunnanɔ kɛ̃ḿmaa? 50Akũ Yesu pì nɔgbɛ̃ pìinɛ: Ma náani kũ n kɛ̀ mɛ́ à n sura bà. Ǹ tá bɛ aafia.

ទើបបានជ្រើសរើសហើយ៖

LUKU 7: BB2005

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

Bisã Bible © SIM International, 2005.

ស្វែងយល់បន្ថែមទៀតអំពី Bisã Bible 2005