Matiw 27
27
Yahuda l'ang shin
(Mar 15:1; Luk 23:1-2; Yoh 18:28-32)
1Tarrbyitt, bhi prist wu'nan kihh mwoohnan khi Zhepp Isra'ila ni mwopp ji kang, bhi mwopp bheett m'ang phishag bi'eem le runn tih'tu Jesu fyaad. 2Bhi mwopp dyan nyi sh'i tengg, mwopp dum pihh Bilatus, w'u a govno.
3Kaarooh Yahuda g'u seett kihh Jesu ni naah kad mwopp shan a dyeell muutt nyi, bhi satt manmihh shin. A nyi seh bhi baa'dum pihh shaghal azurfa laar kunn shi prist wu'nan kihh mwoohnan mwopp, satt mwopp le, 4“Kai, ih sh'in shigbis, p'ee ih seett kihh gwooh baah sh'in m'ee wu'bis mou.”
Bhi mwopp pring nyi le, “Mihhseh nang kihh pwoo mu mihngg; nang a kihh pwoo gha.”
5Bhi Yahuda baah kihh shaghal ni chiit nhighin kihfur LuhNaan, bhi put mett, dum l'ang shin pitt-pitt.
6Prist wu'nan ni mwopp chakk shaghal ni, bhi mwopp satt le, “Baah nyi dihhreh kihh w'aar khi Naan tihh mu l'e shaghal mihhse luhshaghal mhi LuhNaan mou, p'ee nyi a shaghal teghem.” 7Bhi mwopp bheett le runn p'ee seett a m'ee bhokk w'u mwopp kihh peet Bhokk khi Gu-dyiktukhull kihh shaghal ni, tihh dheeh diy a p'ee wum mhizeb mwopp. 8A bii w'u l'e bhi mwopp kihh peet bhokk mhizeh ni Bhokk Teghem harr shishinn se. 9A kihhsheh bhi bii w'u Irmiya gu'wanggshiiy gyet satt gam, w'u satt le, “Mwopp kok shaghal azurfa laar kunn ni, w'u a shaghal w'u Zhepp Isra'ila mwopp shan p'ee seett nyi dyishig, 10bhi mwopp seett bhokk khi Gu-dyiktukhull dyishig, kaa Naan satt a'n seh.”#27:10
Mwopp looh Jesu dyeell kihkyeen Bilatus
(Mar 15:2-5; Luk 23:3-5; Yoh 18:33-38)
11A nyi seh, bhi Jesu dharr kihkyeen govno ni p'ee dyeell, bhi govno ni nang phi nyi le, “A gha a Miskakhamm khi Zhepp Yahuda aa'?”
Bhi Jesu lapp nyi le, “Ghi satt a nyi seh.”
12Dhangg kaarooh prist wu'nan kihh mwoohnan mwopp y'aa ji kihh v'ur pwoo dhess-dhess kaah Jesu, bhi baah pring mee'bii mou. 13Bhi Bilatus nang phi nyi le, “Kan ghi klihng pwoo w'u mwopp phi ja kihh nyi kaah gha seh maah?” 14Weett kihhsheh bhi baah Jesu pring mee'bii mou, kooh m'ee pwoo kihmeh dhighin pwoo w'u mwopp satt kaah niy seh mou, bhi bii ni aa'phi govno ni pwetd.
15Gyet govno ni kihh lokhot shang m'ee laa'shakhat w'u gurum mwopp kihh dh'om tihh shang runn sh'i Ku'khur Mettkaah. 16Sh'i mihhseh ni bhi gyet mwopp kihh m'ee laa'shakhat w'u a m'ee poor gurum wu'bis, w'u shumm nyi a Barabbas nhighin luh'shakhat. 17Kaarooh gurum mwopp pwat ja dhess, bhi Bilatus nang phi mwopp le, “Wu kihh t'ang tihh ih shang a meehrangg dhighin gurum mihhseh ni mwopp wunn: a Barabbas aa'h, h'aa kooh a Jesu w'u mwopp kihh peet Kristi seh ayeh?” 18P'ee Bilatus man le a zhikhirr kyekk l'e tihh mwopp ji kihh Jesu riy.
19Kaarooh Bilatus kihh tong khi taghamdyeell keeniy, bhi mat khinyi shenn l'op nyi le, “Ghi shwat sarr gha dhighin pwoo w'u kaah Gu-shigrett mhizeh faah, p'ee ih teer ih shwaazheell pwetd dhighin shu'khun kaah nyi!”
20Prist wu'nan kihh mwoohnan mwopp khi t'en zhwaarr dw'uu gurum ni mwopp tihh mwopp dhang phi govno ni le gw'ar shang a Barabbas runn, dheeh gw'ar t'u Jesu.
21Bhi govno ni nang phi gurum ni mwopp le, “Dhighin gurum wu'vel se, bhi wu kad a'n p'ee shang a meehrangg wunn luh'shakhat?”
Bhi mwopp lapp nyi le, “A Barabbas ee'h!”
22Govno ni nang phi mwopp le, “T'o, dheeh a'n p'ee sh'in a mihyeh Jesu wu mwopp kihh peet Kristi seh?”
Bhi mwopp lapp phishag weett le, “Ghi pihpwas nyi kih sheepmuutt fyaad!”
23Bhi Bilatus nang phi mwopp le, “Hah, a'n p'ee pwas nyi a p'ee mihyeh? Sh'in a m'ee wu'bis wu'ranggyeh?”
Weett kihhsheh bhi mwopp sihkhitt shatt waaw chapp-chapp mwopp le, “Ghi pihpwas nyi ee'h 'y!”
24Kaarooh Bilatus naah kad baah riy p'ee mak shiiy nyi gurum ni mwopp mou, bhi mang'am vwang sarr niy diy kihkyeen gurum ni mwopp weett, bhi satt le, “Sarr nah paad, baah teghem gwoh mhize kaah nah mou; nyi a kaah wuh!”
25Bhi gurum ni mwopp weett lapp phishag bi'eem le, “Yukk, yet tihh teghem nyi dheeh kaah muh kihh kaah zhepp muh mwopp zag!”
26A nyi seh bhi Bilatus shang Barabbas luh'shakhat p'ee gurum ni mwopp. Bwoonrooh Bilatus l'e tihh mwopp fwa gw'am diy Jesu, bhi pihh nyi mwopp tihh mwopp dum pwas kih sheepmuutt.
Mhi'lek mwopp nwang'zhung Jesu
(Mar 15:16-20; Yoh 19:2-3)
27A nyi seh bhi mhi'lek mhitapp govno ni mwopp dhel kihh Jesu kihfur luh'tong khi govno bhi mwopp perrep kapp mhinut mhi'lek w'u dhighin kampani mhi'lek ni mwopp, mwopp ja okhor Jesu gyerez. 28Mwopp shwat looh khinyi lhi'ba, bhi mwopp lop m'ee bh'aar w'u a shik glum'paatt nyi. 29Yakhal mwopp mwet ghir kaa gossoklong se mwopp byang kaah nyi. Mwopp m'ang kam tupp sarr nyi w'u dihsoh, bhi mwopp kihh sam lang kih fr'um ruh tekhem nyi mwopp kihh nwang'zhung nyi le, “Mu tog kihh gha 'y, Daah miskakhamm khi Zhepp Yahuda!” 30Mwopp kihh pwas zool shenn kih nyi, yakhal mwopp kihh lapp kam w'u sarr nyi seh mwopp kihh sram kaah nyi diy dyishig yit dhirrihkk. 31Bwoonrooh mwopp nwang'zhung nyi matt, bhi mwopp shang bh'aar w'u dyinn mwopp lop nyi seh lhi'baa, bhi mwopp waa rwan looh mhinyi dyi nyi. Bhi mwopp put kihh nyi p'ee dum pwas kih sheepmuutt.
Mwopp pwas Jesu kih sheepmuutt
(Mar 15:21-32; Luk 23:26-43; Yoh 19:17-27)
32Kaarooh mhi'lek ni mwopp kihh put kihh Jesu, bhi mwopp kang kihh m'ee Gu-Siiren w'u shumm nyi a Siman, bhi mwopp le'ching nyi tihh m'ang sheepmuutt khi Jesu ni diy. 33Kaarooh mwopp dum wull m'ee pee w'u mwopp kihh peet Golgota (shiiy khi Golgota ni a Kih Yesskaah), 34bhi mwopp pihh am'anab w'u roob kihh am'bhaann Jesu. Dhangg kaarooh Jesu cham, bhi shiih shwaa nyi. 35Bwoonrooh mwopp pwas nyi, bhi mwopp shap looh'lop khinyi shut sh'i wangg'mang. 36Bwoonrooh mwopp sh'in bii mihhseh, bhi mwopp ba kwangg nhighin, mwopp y'aa tapp nyi. 37Tihngg kaah nyi bhi mwopp l'ang r'an w'u satt wu'bis w'u mwopp le gw'ar sh'in seh. R'an nyi kihh satt le: A MIHHSE A JESU, MISKAKHAMM KHI ZHEPP YAHUDA MWOPP. 38Mwopp pwas m'ee watt mwopp vel kihshag kihh Jesu, wu'zeh sarrsoh, wu'zeh sarr'kul, kooh meehrangg kih sheepmuutt m'iin. 39V'ur gurum w'u mwopp kihh ja dhel arr nhighin mwopp m'ang Jesu fullup pwetd, mwopp kihh giht kaah ruh, 40mwopp kihh satt le, “Kongg e'h! Gha w'u ghi le gha p'ee mak rumm LuhNaan yakhal ghi shikhir ghi dyik dhighin t'eer kunn shi, dheeh ghi bham sak dhak e'h! Ghi sam kih sheepmuutt ni, kadmihh kan gha a L'aa khi Naan!”
41Prist wu'nan kihh Mhikamm-w'aar, kihhsheh kihh mwoohnan ni mwopp, mwopp nwang'zhung nyi a kihhsheh zag mwopp kihh satt le, 42“Bham mwoohzeh dhangg baah mak bham shin mou! Dhok a nyi shi a Miskakhamm khi Isra'ila 'y! Sih-sam kih sheepmuutt ee'h 'y, bhi munn p'ee pihhzeenn nyi. 43Dhok le wai riy a gu-pihhzeenn Naan e'h, dheeh Naan ni bham nyi dhak mwasseh 'y, kadmihh kan Naan nyi kihh dh'om nyi, p'ee kihh satt le wai riy a L'aa khi Naan.” 44Watt w'u mwopp pwas mwopp kihshag kihh nyi seh mwopp m'ang nyi fullup zag.
Muutt khi Jesu
(Mar 15:33-41; Luk 23:44-49; Yoh 19:28-30)
45Gonggpee wu'kaghapaad baa'vel mhi puus bhi pee taah'kwoo koohneeh dhighin yill ni, harr sam wull gonggpee wu'kunn. 46Kaarooh pee wull kaa gonggpee wu'kunn bhi Jesu eep dhekheh niy satt le, “Eloi, Eloi, lama sabak-tani?” Shiiy khinyi a, “Daah Naan keena, Daah Naan keena, ghi shikhir kihbwoon gha a'n a ranggyeh?”#27:46 KoogNaan 22:1
47Kaarooh pakk mwooh kihh dyarrang nhighin mwopp klihng kihhsheh, bhi mwopp satt le, “Hy'e! nyi phi kamm peet a Iliya 'y, wunn'!.”
48Abet bhi kihmeh dhighin mwopp yakhal chau-chau dum m'ang lizpuz bwakhat pwoo raz, bhi t'en dhighin am'anab w'u dhi-dwangg, dum tupp pwoo Jesu tihh shwaa.
49Kakhar gurum ni mwopp kihh satt le, “Yet nyi diy. Yet tihh mu naah kihpee Iliya kihh sam bham nyi diy.”
50Kaarooh Jesu eep dhekheh nyi dyi bhall-bhall, bhi yet riin niy k'aa dhel.
51Mwoorr pee mhizeh ni, bhi fwaat-pwooluh LuhNaan tee sag sam putt, shap vel. Yill tabbhal, harr pakk pangg mwopp pyan. 52Pakk kihshirr mwopp wangg, bhi pakk mwoohbhangg w'u baa gyet mwopp mwarrap mwopp waa yakhal kihh seen. 53Mwopp pwat dhighin kihshirr keeru, dhangg bwoonrooh Jesu yakhal kih peemuutt, bhi mwopp dhel dhighin khishikhitt wu'bhangg, w'u a Urshalima, mwopp dyingg shut gurum mwopp dhess.
54Kaarooh kaptin khi mhi'lek ni, kihh kakhar mhi'lek w'u mwopp tapp Jesu seh, mwopp naah tabhal'yill ni, kihh kapp bii w'u taah, bhi nhikhin'teghem chaat bwut mwopp, bhi mwopp kihh satt le, “Baah m'ee satt kihhshe, gwoh mhize ni a L'aa khi Naan kan!”
55Pakk shwarab mwopp dhess gyet nhighin, w'u mwopp dyarrang zhong-zhong mwopp kihh naah bii w'u kihh dum diy. Mwopp a shwarab w'u gyet mwopp tong Galili ka dang Jesu tihh mwopp kihh kwatshiin khinyi diy. 56Dhighin shwarab mhizeh ni mwopp bhi gyet Maryamu Magdalin, kihh Maryamu w'u a nhikhin khi Yakub mwopp kihh Yusufu, kihhsheh kihh nhikhin khi zhepp khi Zabedi mwopp zag nhighin.
Mwopp wum kumm Jesu
(Mar 15:42-47; Luk 23:50-56; Yoh 19:38-42)
57Kaarooh pee wull kansihkhin bhi m'ee gulong w'u a Gu-Arimatiya w'u shumm nyi a Yusufu ji. Yusufu nyi gyet yakhal dheeh gu'dumdang Jesu. 58Dum kihpee Bilatus diy bhi nang kumm Jesu phi nyi, bhi Bilatus dyangg mhidhakk keeniy mwopp le nw'aa pihh kumm Jesu ni gw'ar. 59Bhi Yusufu ni m'ang kumm Jesu mwet dhighin m'ee fwaat linen wu'bhangg. 60Bhi dum dhen kumm Jesu ni dhighin m'ee kihshirr wu'pwooh, w'u a kihshirr w'u gyet slak shi'bwut pangg p'ee shin, bhi byit gag m'ee elleng oghod pwoo kihshirr ni dyishig, bhi dhel. 61Maryamu Magdalin kihh naa'shumm rah Maryamu wu'zeh mwopp kihh kwangg koghob w'u naah kihshirr ni.
Mhi'lek mwopp tong tapp kihshirr Jesu
62Kih dhi'dhaarr ni, kihbwoon Puus Dhakkshik, bhi prist wu'nan mwopp kihh Farisiiy mwopp dum kad Bilatus. 63Mwopp satt nyi le, “Gwoohyon, mu kakkder rooh deh gu-zhwampee mhizeh kudyi kihh seen bhi kihh satt le, wai riy p'ee waa yakhal dyi bwoon t'eer kunn. 64Pee'mhinyi, bhi ghi gab'waar tihh mwopp tapp phi kihshirr ni diy nyakk, seeh kihbwoon t'eer kunn dhangg. Kihhsheh mou bhi zheppkamm khinyi mwopp p'ee ji m'ang kumm nyi watt mwopp dhel kihh nyi, dhangg mwopp dum y'aa satt nyi gurum mwopp le wai gw'ar waa yakhal kih peemuutt. A kihhsheh bhi dihkk w'u kihbwoon p'ee b'aa mett wu'shee.”
65A nyi seh bhi Bilatus satt mwopp le, “Wu kok mhi'lek mwopp dang shuk, dum wu l'e tihh mwopp tong tapp kihshirr ni diy nyakk, sh'i kapp bii w'u wu mak sh'in nyi.” 66Bhi mwopp dum angg phi kihshirr ni sh'i shud angg kihdab elleng ni, yakhal mwopp l'e mhi-tappee shi'pwoo.
ទើបបានជ្រើសរើសហើយ៖
Matiw 27: Chakfem
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2022 Luke Initiative for Scripture Translation