Markus 11
11
Jesu dhel dhighin Urshalima naar waaw
(Mat 21:1-11; Luk 19:28-40; Yoh 12:12-19)
1Kaarooh Jesu kihh zheppkamm keeniy mwopp kuss kihh wull Urshalima, harr baa mwopp ji wull kuss kihh kwangyill Betfaji kihh kwangyill Betani w'u mwopp sh'i Bwumm Paatt. Bhi Jesus lop vel dhighin zheppkamm keeniy ni mwopp, 2satt mwopp le, “Wu dum takhann kwangyill w'u kihkyeen wu seh. Mihh wu kudyi ji dhel dhighin kwangyill ni, bhi wunn p'ee kad mwopp kukhul m'ee l'aa jaakiy w'u baah menguh khi cham l'ang dyikihh mou nhighin. Wu shang l'aa jaakiy ni lhitaah se. 3Mihh menguh nang pwoo wu le, ‘Wunn phi shang nyi a ranggyeh?’ Bhi wu satt nyi wu le, ‘A Gwoohyon kihh t'ang sh'in dhakk kihh nyi dhangg lang'lee bhi nyi p'ee shikhir shenn nyi lhi'baa ji wunn.’ ”
4Mwooh Jesu lop mwopp seh dum kad l'aa jaakiy kihh dharr pwoo tihleng-arr phi m'ee fokhol'pang. Kaarooh mwopp kaah shang nyi, 5bhi m'ee gurum w'u mwopp kihh dyarrang nhighin nang phi mwopp le, “Wunn phi sh'in a mihyeh seh? W'u a shang l'aa jaakiy w'u wunn shi'pwoo seh? 6Bhi mwopp pring gurum ni mwopp kaa dyinn Jesu satt mwopp seh , bhi gurum ni mwopp yet mwopp mwan. 7Kaarooh mwopp ji kihh l'aa jaakiy ni Jesu, yakhal mwopp shwat n'an bh'aar keeru bihr dyikihh, bhi Jesu k'aa tong dyikihh. 8Gurum dhess mwopp shwat n'an bh'aar keeru bihr lhidum kih arr, yakhal pakk mwopp challang y'im dhighin bhokk mwopp puk lhidum kih arr zag. 9Gurum w'u mwopp kihh tuud dum kihkyeen kihh mwooh kihh tuud ja kihbwoon, mwopp kihh shwat waaw mwopp le,
“Hosanna!”
“Naan le'wurett gwooh ji dhighin shumm khi Puup mu Naan!” #11:9 KoogNaan 118:25, 26
10“Naan le'wurett dhenglong khi puup mu Dauda w'u kihh ji!”
“Hosanna wa'khad sat tihngg kih dhengNaan!”#2Sam 7:11-14
11Kaarooh Jesu ji dhel dhighin Urshalima, bhi dum LuhNaan. Mwaan dyee bii w'u nhighin weett, dhangg pee'rooh kan'sihkhin baa sh'in, bhi baa'dum Betani mwopp dangshag kihh zheppkamm keeniy w'u Kaghapaad baa'vel seh mwopp.
Jesu tu'pangg kih tihng koon
(Mat 21:18,19)
12Kih dhi'dhaarr nyi kaarooh mwopp arr pwat Betani, bhi kussum laah Jesu. 13Kaarooh naah m'ee tihngg koon kihh yillim dharr kihh kom pann zhong-zhong, bhi taah dum tihh naah diy kooh kyed koon ni kihh zhepp oh. Kaarooh taah wull kug koon ni, bhi baah kad nyi kihh zhepp mou, a kom kyekk kihh yillim, p'ee baah gyet nyi a tarr nung khi koon mou. 14Bhi satt tihngg koon ni le, “Tapp menguh cham kad m'ee laa'koon dyi so sh'i shik mou.” Zheppkamm khinyi mwopp klihng bii w'u satt seh.
Jesu pwoorr mhi'glong kihfur LuhNaan lhipwat
(Mat 21:12-17; Luk 19:45-48; Yoh 2:13-22)
15Kaarooh Jesu ji wull Urshalima, bhi ji dhel kihfur LuhNaan, bhi pwoorr kapp v'ur mwooh mwopp kaah gl'ong nhighin kihfur LuhNaan ni lhipwat. Kok v'ur tebul khi mhi-pringshaghal mwopp, kihh v'ur tagham khi mhi'woor duu'duu mwopp kabhan seh kaah'zoo, 16yakhal d'aam gurum mwopp kok looh'woor ja dhel arr kihh nyi kihfur LuhNaan ni. 17Kaarooh nyi kaah sh'in kamm mwopp, bhi kihh satt mwopp le, “Dhok nyi a rih-ran le,
“ ‘Mwopp p'ee peet luh keena a luh dhangNaan p'ee zhepp gurum weett.’#11:17 Ish 56:7
“Weett kihhsheh bhi wu'wunn wu mekher kihh nyi dheeh a goghod lakham khi wad mwopp.”#11:17 Irm 7:11
18Prist wu'nan kihh Mhikamm-w'aar mwopp klihng bii w'u Jesu satt seh, bhi mwopp y'aa rengg arr w'u tihh mwopp t'u nyi diy, p'ee mwopp kihh kihkhir nyi, pee'rooh kamm khinyi kihh pihh aa'pwoo dw'uu gurum ni mwopp weett.
19Kaarooh pee wull kansihkhin bhi Jesu kihh zheppkamm keeniy mwopp pwat reen dhighin khishikhitt Urshalima ni.
Tihng koon w'u Jesu tu'pangg dyikihh seh f'ii.
(Mat 21:20-22)
20Kaarooh Jesu kihh zheppkamm keeniy mwopp y'aa arr mwaan byitt, bhi mwopp naah tihng koon w'u den shi seh f'ii, bhakk kug k'aa putt. 21Bitrus kakkder bii w'u den Jesu sh'in, bhi satt le, “Gukamm, ghi naah 'ng! Tihng koon w'u den ghi tu'pangg dyikihh shi shikhir f'ii 'y!”
22Bhi Jesu satt mwopp le, “Wu pihhzeenn Naan. 23Ih kihh satt a zeenn wunn, mihh menguh satt bwumm mhize le, ‘Yakhal, dum yi meng shik dhighin kur'am’ harr baah sakkrihkk dhighin phitukhup niy mou, kop kihhsheh bhi pihhzeenn le bii w'u ri satt seh p'ee sh'in, bhi Naan p'ee sh'in nyi gwoh ni. 24Pee'mhinyi, bhi ih kihh satt wunn, kapp bii w'u wu dhang dhighin dhangNaan, bhi wu pihhzeenn wu le baa wu lapp, bhi nyi p'ee dhen a mug'wuh. 25Dyi zag, mihh wu kihh dyarrang dhangNaan, dhangg wunn kihh mee'bii kaah menguh, bhi wu fwa gwoh ni, tihh Puup wu w'u kih dhengNaan fwa shigbis keewu diy wunn zag. 26P'ee mihh dheng'pee wu fwa mou, bhi baah Puup wu w'u kih dhengNaan p'ee fwa shigbis mug'wuh wunn mou.” #11:26 Pakk r'an ni mwopp kihh t'ang w'u 26 mou.
Mwopp sh'in t'al kaah dhakk khi Jesu
(Mat 21:23-27; Luk 20:1-8)
27Jesu kihh zheppkamm keeniy mwopp jawull dyi Urshalima, bhi kaarooh Jesu kaah mwaan dhighin kihfur LuhNaan, bhi Prist wu'nan mwopp, kihh Mhikamm-w'aar mwopp kihh mwoohnan mwopp, ja kihpee nyi diy. Bhi mwopp nang phi nyi le, 28“Ghi satt munn, gha phi sh'in bii mihhse mwopp a sh'i satt mhi wuyeh, a wuyeh pihh pee mhi sh'in mwopp gha?”
29Bhi Jesu lapp mwopp le, “Wu'an zag p'ee sh'in m'ee t'al wunn. Wu lapp t'al ni, bhi wu'an zag p'ee satt nyi wunn kooh a'n phi sh'in bii mihhse mwopp a sh'i satt mhi weeh oh. 30Baptisma khi Yohanna, gyet a Naan l'e nyi sh'in nyi aa'h, h'aa kooh gyet a zhepp gurum kyekk mwopp l'e nyi sh'in nyi ayeh?”
31Bhi mwopp dum bheett orr mhizeh phishag mwopp le, “Mihh mu lapp mu le ‘A Naan l'e nyi,’ bhi nyi p'ee nang nyi pwoo mu le, ‘Dheeh a mihyeh l'e bhi baah gyet wu pihhzeenn Yohanna ni mou?’ 32Mihh mu lapp mu le, ‘A zhepp gurum kyekk gyet mwopp l'e nyi sh'in nyi,’ bhi haiy-haiy.” Mwopp kihkhir gurum mwopp, p'ee gurum weett mwopp m'ang, baah m'ee satt kihhshe, le Yohanna a gu'wanggshiiy. 33Bhi mwopp lapp Jesu le, “Baah mu man gwooh gyet l'e Yohanna sh'in baptisma ni mou.” Bhi Jesu pring mwopp le, “Wu'an zag p'ee cham satt nyi wunn kooh a'n phi sh'in bii mihhse mwopp a sh'i satt mhi weeh mou.”
ទើបបានជ្រើសរើសហើយ៖
Markus 11: Chakfem
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2022 Luke Initiative for Scripture Translation