متى 6

1أوعكو تعملو أعمال الخيـر عشان يشوفوكو الناس، لأنو هيك بتخسروا مكافأة أبوكو السماوي. 2وإذا ساعدت حدا تفزعش الدنيا زي ما بعملو الموجهنين في الـمعابد والشوارع عشان الناس يمدحوهن. عنجد بقولكو هذول فش إلهن مكافأة تانيه. 3بس إنت لما بتعمل أعمال رحمه بلاش تعرف إيدك الشمال شو بتساوي إيدك اليمين. 4يعني خلي أعمال الرحمه بالسر. وأبوك اللي شايف كل إشي هو رح يكافأك.

5ولما بتحكو مع الله تكونوش زي الموجهنين اللي بحبو يوقفو يصلو بالـمعابد وبنص الشارع عشان يشوفوهن الناس. عنجد بقولكو فش إلهن مكافأة تانيه. 6بس إنت لـما بتحكي مع الله فوت عأوضتك وسكر الباب عليك وصلّي لأبوك في السر. أبوك إللي شايف كل إشي راح يكافأك. 7ولما بتصلو تكتـروش حكي فاضي زي الناس إللي بيفكرو إنو كتـر الحكي بخلي الصلاه مُستجابه. 8تعملوش زيهن لأنو أبوكو بيعرف حاجتكو قبل ما تطلبو منو. 9فهيك إنتو صلو: يا أبونا إللي في السما خلي إسمك يتعظم. 10وأُملك بملكوتك علينا وخلي إرادتك تتحقق عالأرض متل السما. 11أعطينا خبـز يكفينا اليوم. 12وسامحنا عغلطاتنا زي ما إحنا منسامح إللي قصّروا معنا. 13ومدخلناش في تجربه ونجينا من الشرير. 14وإذا بتسامحو الناس عغلطاتهن بسامحكو أبوكو السماوي. 15بس إذا بتسامحوش الناس مش رح يسامحكو أبوكو عغلطاتكو.

16وإذا بتصوموا تكشروش وتهملوش شكلكو عشان تبينو صايميـن. تعملوش زي الموجهنين. عنجد بقولكو إللي بعمل هيك راحت عليه وخسر مكافأتو. 17بس إنت إذا بتصوم غسّل وجك ولـمّع شعرك. 18عشان صومك يكون بالسر مش قدام الناس. أبوك إللي الناس مش شايفينو شايف كل إشـي. هو راح يكافأك قدام الكل.

19تجمعش الأشياء الغالية إللي في الدنيا لأنها راح تسوّس وتِخْرب ويُسرقوها الحراميه، 20أحسنلكو تجمعوا كنوز في السما لأنها مش راح تسوّس ولا تخرب ولا راح يسرقوها الحراميه 21لأنو قلبك راح يكون مع الكنـز اللي جمعتو.

22العين مثل الضو إللي بنوّر حياتك. فإذا عينك فيها خيـر بيفوت النور ع كل حياتك 23بس إذا كان في غباش في عينك بسبب الشر رح تخلي كل حياتك ظلام. وإذا كان النور إللي فيك شر فشو راح يكون كُبـر هالشر؟

24بقدرش الواحد يكون عبد لربيـن، لأنو راح يحب واحد أكتـر من التاني أو راح يكون أمين لواحد ويهمل التاني. بتقدروش تعبدوا الله والـمصاري. 25عشان هيك أنا بقولكو: تهكلوش هم حياتكو وأكلكو وشربكو ولبسكو. مش الحياه أهم من الأكل والجسم أهم من الأواعي؟ 26شوفو الطيور إللي بالسما لا بتـزرع ولا بتحصد ولا بتخزّن بس أبوكو السماوي بطعميها، طيب مش إنتو أهم منها بكتيـر؟ 27ومين لـما بيقلق راح يقدر يطوّل عمرو ولو ساعه وحده؟ 28وليش هكلانين هم الأواعي؟ راقبو كيف الورد البـري بيكبـر! لا بتعب ولا بخيّط أواعيه. 29بس خلينـي أقولكو إنو سليمان الحكيم في كل عظمتو ما كانش يلبس زي وردة برية وحدة. 30طيب إذا الله بلبِّس اواعي للورد البـري إللي بعيش اليوم وبنحرق بُكره بالنار، كيف بدوش يعطيكو إنتو أواعي؟ يا ضعاف الإيمان! 31ليش مهموميـن وبتقولو: شو نوكل؟ وشو نشرب؟ وشو نلبس؟ 32هيك حال الناس إللي بعرفوش الله. بس إنتو تأكدوا أنو أبوكو السماوي عارف حاجاتكو 33اطلبوا بالأول عدل الله ومملكتو وكل الأشياء التانية اللي بتحتاجوها هو راح يدبرها. 34فتهكلوش هم بُكره، مشاكل يوم واحد بتكفيكو وهم بُكره بستنى لبُكره.

ទើបបានជ្រើសរើសហើយ៖

متى 6: CGB

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល