Mateo 4
4
Maxuꞌ nchola's tokil' Jesús
(Mr. 1:12-13; Lc. 4:1-13)
1Zyasa Mbi Nayon mbeꞌ Jesús izyo nagan, sa tya tokilꞌ Maxuꞌ Jesús li Jesús jwanꞌ ncholaꞌs Maxuꞌ.
2Nde senꞌ ngolo mke Jesús yalse choꞌ wiz nde choꞌ yalꞌ, mzib mdyanꞌ Xaꞌ. 3Zyasa ngwa Maxuꞌ lo Jesús nde nchab Maxuꞌ:
—Tez nak la Xinꞌ Dios, mnibeꞌ sa yalal re ke reꞌ pan.
4Leꞌ Jesús mkab lo Maxuꞌ:
—Lo xkiꞌs Dios nchab: "Nanakta benꞌta pan ban men, noga reta diꞌs ndryoꞌ ro Dios ndaꞌ yalnaban lo men".
5Xisa mbe' Maxuꞌ Jesús Jerusalén yez nayon, nde mbeꞌ Maxuꞌ Jesús tenꞌ mas gap ndab yek yodoꞌ 6nde nchab Maxuꞌ lo Jesús:
—Tez Xinꞌ Dios nak la, gobi axta la ba, tak lo xkiꞌs Dios nchab:
"Dios nyebe' lo re anj chanꞌ Dios sa kenap xaꞌ la,
lo yaꞌ xaꞌ tyenkeꞌ xaꞌ lu,
sa na'chepta nia ke."
7Zyasa Jesús mkab lo Maxuꞌ:
—Noga nchab lo xkiꞌs Dios: Naꞌtokilꞌta la Xaꞌ Nyebeꞌ jwan' nak Dios la.
8Nde tedib gob mbeꞌ Maxuꞌ Jesús ti yek yiꞌ gap toz ndab, tya mbloꞌ Maxuꞌ reta yalnyebeꞌ nzo lo izyo nde re yalxna chanꞌ neꞌy lo Jesús, 9sa nchab Maxuꞌ:
—Reta jwanꞌ reꞌ tan loa, tez tyoxub la nde li naroa na.
10Zyasa Jesús nchab lo Maxuꞌ:
—Baxa wa Maxuꞌ, tak lo xkiꞌs Dios nchab: "Lo Dios la Xa' Nyebe' loa tyoxub la, nde benꞌta lo Xaꞌ lia sinꞌ."
11Zyasa mblaꞌ Maxuꞌ Jesús, nde mbye'd pla anj mblaꞌsto Jesús.
Jesús ndobte rsinꞌ Jesús
(Mr. 1:14-20; Lc. 4:14-15; 5:1-11; 6:17-19)
12Senꞌ mbin Jesús leꞌ Juan nge lizyiꞌb, mbere Jesús lo xyon Galilea. 13Per naꞌngyanꞌta Xaꞌ Nazaret, leꞌ Xaꞌ nda ngo yez Capernaum, jwanꞌ nax gax ro nittoꞌ, lo xyon Zabulón nde Neftalí. 14Tamod sa ngok jwanꞌ mkeꞌ xaꞌ mbrid xkiꞌs Dios pola, ndole Isaías:
15Izyon Zabulón nde izyon Neftalí,
ned nda thita ro nittoꞌ tedib lad ro yoꞌ Jordán,
xyon Galilea tenꞌ nzo re xaꞌ jwanꞌ nanakta xaꞌ judío.
16Re xaꞌ ya nzi lo yalꞌkow nde mbwiꞌ xaꞌ ti xni toz,
nde re xaꞌ jwanꞌ nzola ro yalguj, ti xni toz mtoxni lo xaꞌ.
17Xata zya ndobte Jesús, mdaꞌ Jesús xkiꞌs Dios lo men, nde nchab Xaꞌ:
—Blaꞌ goꞌ re jwanꞌ narax nak goꞌ nde bere goꞌ lo Dios, tak yalnyebeꞌ lo beꞌ ndo gaxla.
18Senꞌ nda Jesús tita ro nittoꞌ Galilea, tya mbwiꞌ Jesús chop xaꞌ rop wes; tib xaꞌ ndole Simón jwanꞌ ndolegaꞌ Pedr, nde tedib xaꞌ ndole Ndres. Nde nge gobi rop xaꞌ yex lo nittoꞌ, tak xaꞌ god mbel nak xaꞌ. 19Zyasa nchab Jesús lo xaꞌ:
—Deꞌ goꞌ btonke goꞌ xis na, sa lilal na goꞌ men god, sa li goꞌ gan men par Dios 20Nde rop xaꞌ ya, zyaga mblaꞌ xaꞌ yex xaꞌ nde mdonke xaꞌ xis Jesús.
21Zyasa Jesús mde ti tud, mbwiꞌ Xaꞌ ti chop xaꞌ rop wes: Jakobo kon Juan xinꞌ Zebedeo. Rop xaꞌ ya kon xud xaꞌ nzo lo bark nge keꞌbde xaꞌ yex xaꞌ. Nde Jesús mbrez rop wes xaꞌ, 22nde zyaga mblaꞌ rop xaꞌ bark nde mblaꞌ xaꞌ xud xaꞌ nde mdonke xaꞌ xis Jesús.
23Nde Jesús mkete dib Galilea, mkete loꞌ xaꞌ xkiꞌs Dios lo men lenꞌ yo tenꞌ ndyop xaꞌ Israel. Mkete taꞌ Xaꞌ re diꞌs wen chanꞌ yalnyebeꞌ chanꞌ Dios nde mtodanꞌ Xaꞌ men, lo re nak yis ndyak men nde reta nchow ndyak men. 24Tamod sa jwanꞌ toz mxyob xkiꞌs Jesús dib xyon Siria, nde mbyedno xaꞌ re men jwanꞌ ndyak xaꞌxaꞌ yis lo Jesús; re xaꞌ ne ndyak lo re yis, re xaꞌ ndob mbi, re xaꞌ nzo mbi narax lazonꞌ, re xaꞌ nkeꞌ mbiy yek naꞌ nde re xaꞌ nguj ninꞌ. Nde Jesús mtodanꞌ reta xaꞌ. 25Zyasa bro toz xaꞌ Galilea nde re siꞌ yez nale Decápolis, xaꞌ Jerusalen nde temas xaꞌ nzo lo xyon Judea nde re xaꞌ nzo tedib lad ro yoꞌ Jordán mdonke xis Jesús.
ទើបបានជ្រើសរើសហើយ៖
Mateo 4: zpt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Active: ©Wycliffe Bible Translators, Inc. All rights reserved.