Zuwã 19
19
1Tawamhã Pilatu hã ma tô ti'ru, Zezusi te te siwi 're pré'é mono da, abazei hâ nhorõ 'manharĩ na dapré'ézém na. 2Taha pari, dasi'wapéi 'manharĩ'wa norĩ hã ma tô danhoprezé sada 'ma'manharĩ za'ra, 'wabzéré na. Taha na ma tô ãma siwi sõpre. Ma tô duré siwi uza, da'uza ihâpa ihâpré na. 3Duré 'râwi nasi itẽme simasa wamhã, te ãne nasi tãma nharĩ za'ra, ãma wa'ẽ sina:
— Zudeu norĩ nhib'apito, rowẽ na aihâimana!
Te duré nasi siwi 'rãiwabzu, sisa'u. 4Tawamhã Pilatu hã ma tô duré apâ datẽme watobro, da'ahâ uptabi na idahâimana za'ra u hã. Ãne te dama tinha:
— Ĩwapari za'ra wa'aba! Ãhãta, wa asõ're sãrĩ za'ra wa'wa, waihu'u za'ra wa'aba da, marĩ i'upa hã te ãma isõpẽtẽ õ na, ãhã aibâ ãma hã.
5Tawamhã Zezusi hã rob u ma tô datẽme watobro, 'wabzéré na sõpre ré, da'uza ihâpa ihâpré na uza ré zama.
Tahawa, Pilatu hã ma tô dama 'mahâ, ãne:
— 'Madâ'â za'ra wa'aba! Ãhãta, aibâ hã!
6Tawamhã sasedoti ipire norĩ hã duré 'Re ihâimana u'âsi mono nhorõwa 'ri 'rãihâ 'madâ'â'wa norĩ zama, te te 'madâ'â za'ra wamhã, ma tô hârâ 'rãihâ na 'mahârâ za'ra, ãne:
— Wedepo'o nhonhi'rãmi na sasõmri! Wedepo'o nhonhi'rãmi na sasõmri!
Tane nherẽ, Pilatu hã ma tô ãne sada'âbâ za'ra:
— Ãma asiwi saprõni aba, asi'uihâ na asiwi sasõmri aba da, wedepo'o nhonhi'rãmi na. Tazahã, wa hã, marĩ i'upa hã te ãma sõpẽtẽ õ di, te ãma iroti da hã.
7Tawamhã Zudeu norĩ hã ma tô sadawa za'réi ãna tãma nharĩ za'ra, ãne:
— Wate za'ra roti zahi iré hã. Taha zarina, idâ'â da si, 'Re ihâimana u'âsi mono 'ra na siwasu'u wa.
8Tawamhã Pilatu ãne hã damreme te te wapari wamhã, ma tô oto tipahi pese. 9Tahawa, ma tô duré ãzé apâ, 'ri 'rãihâ u hã. Apâ ma tô duré Zezusi sadanha, ãne:
— E ma hawi te we bété aimo.
Tane nherẽ, Zezusi hã te te oto sada'âbâ õ di.
10Tahawa Pilatu hã ma tô ãne tãma tinha:
— E niha bâ, ĩma asiwasu'u õ di. E aima ĩwaihu'u õ di, ĩnhimiroti pire na hã, ni'wai ma, te irob'ru da hã morĩ da, niwamhã duré te dama i'ru na, ni'wa wedepo'o nhonhi'rãmi na da te dasiwi sasõmri da hã.
11Tawamhã Zezusi hã ma sada'â, ãne:
— 'Re ihâimana u'âsi mono, ĩ'ãma asimiroti pire hã te te aima sõmri õ 'wa'âhã, ĩ'ãma irotizé hã aré aima hâimana õ di. Tahawa aima ĩhâiba nhomri'wa hã, tiwasédé hã asipai u ma 'manha, sa'ẽtẽ uptabi na.
12Ãne hã te te tãma nharĩ parimhã, Pilatu hã ma tô aré sima wẽ, Zezusihi ma te te rob'ru da, morĩ da. Tane nherẽ, da'ahâ uptabi na idahâimana za'ra hã ma tô dasiwi 'mahârâ ni, ãne:
— Ãhã aibâ hã morĩ da, tãma rowairébé wamhã, tawamhã a hã apito Cézaha siwaihu'u õ di za. E marĩ wa. Ni'wa hã apito na 're siwasu'u mono wamhã, apito Cézaha nhitob'ru na te za 're hâimana.
13Pilatu hã ãne damreme te te sina wapari wamhã, Zezusi ma tô waze, rob u. Tawamhã ma tô nhamra da'ãma rowairébé'wa nhamrazém na, “Ẽtẽ hâpâ na Waptâ” na da te 're isisi za'ra mono ãma. (Ebreu norĩ mreme na, “Gabata” na isisi hã.) 14Tawamhã abzuma wa'wa sexta-feira na romhuri i'rãsutuzém na Pascoa na dato nhisi ihâimanazém na hã, Pilatu hã ma tô tinha Zudeu norĩ ma, ãne:
— Ãhãta asib'apito za'ra wa'wa!
15Tane nherẽ, ma tô dahârâ 'rãihâ na tahãsi ni, ãne:
— Wĩrĩ! Wĩrĩ! Wedepo'o nhonhi'rãmi na sasõmri!
Tahawa Pilatu hã ma sada'âbâ za'ra, ãne:
— E asib'apito za'ra wa'wa hã wa za ti'ru, wedepo'o nhonhi'rãmi na da te sasõmri da hã.
Tawamhã sasedoti ipire norĩ hã ma tô ãne Pilatuhu ma nharĩ za'ra:
— Ni'wa hã wanhib'apito hâimana õ di, apito Cézaha nhipai u hã.
16Tahawa, Pilatu hã ma tô oto ti'ru, dasi'wapéi 'manharĩ'wa norĩ hã Zezusi te te siwi sasõmri da, wedepo'o nhonhi'rãmi na.
Zezusi hã wedepo'o nhonhi'rãmi na da te dasiwi isasõmrizé
Mateus 27.32-44; Marcus 15.21-32; Lucas 23.26-43
17Tawamhã Zezusi hã si'uihâ na ma tô wedepo'o nhonhi'rãmi hã sisada ti'â, Da'rãihi na romnhisi u. (Ebreu norĩ mreme na, “Gougota” na romnhisi hã.)
18Tame ma tô siwi sasõ,#19.18 “sasõ” hã, Zezusi hã prégu na da te sib'rata tété pari, duré da te para tété pari, da te isasõmri na hã te wasu'u wedepo'o nhonhi'rãmi na. Isiré hã ma tô duré aibâ norĩ hã sasõmri zahuré ni, Zezusihi a're si'uiwa na. 19Tawamhã Pilatu hã ma tô ti'ru, wedepo'o hâpâ wa'õtõ na da te ãma rob'ui'éré da, ãne: “Ã hã Zezusi Nazaré ãma iprédu, Zudeu norĩ nhib'apito.” Taha pari ma tô ti'ru, i'rã nhisiwi da te dasiwi sasõmri da, wedepo'o nhonhi'rãmi na. 20Tawamhã Zudeu norĩ hã ahâ na ma tô sõré za'ra ãma rob'ui'éré hã, ro hã Zezusi da te isasõmrizé hã 'ri wa'õtõ 'rata wa. Ãma rob'ui'éré hã, Ebreu norĩ mreme na, duré latim na romanu na dawamri norĩ mreme na duré gregu norĩ mreme na zama. 21Tawamhã sasedoti ipire norĩ hã ma tô Pilatuhu ma nharĩ za'ra, ãne:
— Ãma rob'ui'éré tõ, ãne hã: “Ã hã Zudeu norĩ nhib'apito”. Ãne ãma rob'ui'éré: “Ã hã aibâ hã te 're siwasu'u, ãne: Wa hã Zudeu norĩ nhib'apito.”
22Tawamhã Pilatu hã ma sada'âbâ za'ra, ãne:
— Mare di. Te ãma irob'ui'érézém na hã, wa tô ãma rob'ui'éré pa.
23Tawamhã dasi'wapéi 'manharĩ'wa norĩ hã, Zezusi te te siwi sasõmri parimhã, i'uza hã ma tô te te siwi wa'õtõ. Maparane si'uiwa na iwa'õno hã, hâiba mono bâ ma tô misisi te te sima wa'õtõ. Tane nherẽ, da'uza ihâpa ihâpré hã hâibabarĩ õ di. Õne haré misi haré ihâ hã, hâimo hawi pi'reba. 24Tahawa ma tô ãne sima nharĩ za'ra:
— Wa te wasiwi hâiwazui õ di za, da'uza ihâpa hã. Ẽtẽre na wanhisi ui'éré hã wa za wasima me za'ra ni, ni'wa nhisi watobro wamhã, te te âri da.
Ãne hã ma tô tiromhâiba, Ibaihâ Iwazé pese na rob'ui'éré inomro hã te te sina uwaimrami da, ã hã:
“Ĩ'uza hã ma tô te te sima wa'õtõ. Duré ẽtẽre hã ma tô siwi time tinhisi za'ra ré hã, ni'wa nhisi hã watobro da, ĩ'uza hã ihâpa ihâpré hã te te âri da.”
Tahawa ãne zarina, ma tô dasi'wapéi 'manharĩ'wa norĩ hã 'manharĩ za'ra.
25Tawamhã wedepo'o nhonhi'rãmi 'ratamhã, te za Zezusihi na hã, duré ina wapté duré Maria Clopasihi mro hã, duré Maria Madalena. 26Zezusi hã tina te te 'madâ'â wamhã, duré isiré 're imorĩ te te 're isawi pese mono i'rata isam na te te 'madâ'â wamhã, ma tô ãne tina ma tinha:
— Tahata ai'ra hã.
27Taha pari te te 're isawi pese mono ma, ma tô duré tinha, ãne:
— Tahata ana.
Tawamhã isiré 're imorĩ te te 're isawi pese mono hã ma tô tina hã saprõ tinhorõwa u, ta hawim haré i'rata 're sãmra mono da.
Zezusi hã idâ'âzé
Mateus 27.45-56; Marcus 15.33-41; Lucas 23.44-49
28Tawamhã Zezusi hã ma tô oto waihu'u, uburé te te i'rãsutu wẽ na hã. Ibaihâ Iwazé pese na rob'ui'éré ãma inomro siro hã te te sina uwaimrami da, ma tô ãne tinha:
— 'Rubu di.
29Tamemhã piza'a 're nho'a hã te ipapara za, uva 'rãi wa'u isé prãi ré hã. Tawamhã dasi'wapéi 'manharĩ'wa norĩ hã ma tô isopo na wede nhisi waré hã siwi 'rã'ubu, piza upsõzém na. Ta hã uva 'rãi wa'u isé prã na ma tô siwi di'i, piza'a 're nho'a wa isam na. Ta hã ma tô Zezusihi ma siwi wẽ, isadawa u. 30Te te upsõmri parip si, ma tô ãne oto tinha:
— Uburé wa tô 'rãsutu.
Taha pari, ma tô 'rãiwaptãrã. Tawamhã si'uihâ na ma tô oto pẽ'ẽhai'utõ.
Dasi'wapéi 'manharĩ'wa hã, Zezusi te te i'a're zapu'uzé
31Tawamhã Zudeu norĩ ma roti'wa norĩ hã, Pilatuhu wi ma tô waptẽrẽ za'ra, te te 'ru za'ra da, wedepo'o nhonhi'rãmi na da te isasõmri za'ra hã da te hinhi'ẽ za'ra da, duré taha pari te te 'ru da, ihâiba hâ hã da te sizari za'ra da, wedepo'o nhonhi'rãmi hawimhã. Romhuri zahârizé sexta-feira wa, ma tô ãne hã tiwi waptẽrẽ za'ra, duré te te sima wẽ za'ra õ wa, awẽm na sabadu na ihâiba hâ hã simnhatã u'âsi tõ da, wedepo'o nhonhi'rãmi na. E marĩ wa. Tô taha sabadu hã iwazéb zahi pese na 're hâimana mono wa. 32Tawamhã dasi'wapéi 'manharĩ'wa norĩ hã ma tô sô ai'aba'ré. Aibâ imorĩ'rata na Zezusihi siré da te isasõmri hã ma tô siwi hi'ẽ. Taha parimhã, ma tô duré ihâiba amo hã siwi hi'ẽ. 33Tane nherẽ, Zezusihi zô si'ré za'ra wamhã, ma tô siwi 'madâ, idâ'â na hã. Tahawa te te siwi hi'ẽi õ di. 34Tane nherẽ, nimahã misi dasi'wapéi 'manharĩ'wa hã ma tô Zezusi a're zapu'u, si'uwazi 'rã'wa na. Tawamhã awa'awi pesere ma tô iwapru hã tiwi puru, duré â zama.
35Ãne na i'madâ'â'wa hã ma tô aima wasu'u za'ra wa'wa, a norĩ wa'aba zama saze za'ra wa'aba da. Te te irowasu'uzé hã tô sena. Duré tãma waihu'u pese di, tô sena te te irowasu'u na hã. 36Ãne hã ma tô tiromhâiba, te te sina uwaimrami da, Ibaihâ Iwazé pese na ãma rob'ui'éré inomro hã, ãne: “Ihi hã da te tiwi 'maiwẽ'ẽi õ di za.” 37Ãne duré Ibaihâ Iwazé pese na rob'ui'éré amo hã: “Si'uwazi 'rã'wa na i'a're zapu'uzé hã te za siwi 'madâ.”
Zezusi hã dâ'â pari, ab're 're, da te isẽrẽzé
Mateus 27.57-61; Marcus 15.42-47; Lucas 23.50-56
38Taha parimhã, Zuzé Arimatéia na 'ri nho'õmo nhisi hawimhã, ma tô Pilatuhu wi waptẽ, Zezusihi hâiba hã. (Zuzé hã Zezusihi zazei'wa. Tane nherẽ, pi'uriwi ma tô 're hâimana isazei'wa na hã, Zudeu norĩ pipa te.) Tawamhã Pilatu hã te te tãma rowairébé wa, ma tô si'ra, Zezusihi hâiba hã. 39Isiré hã Nicodemosi, Zezusihi u barana imorĩ. Ta hã ma tô sada ti'â, 35 kilu na ipire pibuzé hã wede nhinhihã zum ne hã, duré ré nhana'ré ne hã iwazarimhã. 40Tawamhã Zezusihi hâiba hã ma tô âri zahuré. Zazahâ ihâirã na ma tô ubu zahuré, wedewa'u zadaze na te te iwazari zahuré na. Ãne ma tô Zudeu norĩ hã te te sima 're 'manharĩ za'ra, te te si'ãma 're ti'a za'ra mono wamhã.
41Tawamhã Zezusi hã da te isasõmrizéb ãma te rob're hã 're hâimana. Rob're 're ihâimana mono ãma te tihâiba, da te dasiwi i'ab're té hã, ni'wa zahadu da te iwa isẽrẽ õ hã. 42Tawamhã tame ma tô Zezusihi hâiba hã sẽrẽ zahuré, ab're hã isa'ozéb 'rata hâimana wa, duré sabadu Zudeu norĩ te te 're iwazé pese za'ra mono hã sãna'rata wa, za oto.
ទើបបានជ្រើសរើសហើយ៖
Zuwã 19: xavBP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Wycliffe Bible Translators, Inc.