Zuwã 6
6
Zezusi hã, da'ahâ uptabi hã te te ida'asaihurizé
Mateus 14.13-21; Marcus 6.30-44; Lucas 9.10-17
1Ronomro pari, Zezusi hã ma tô duré uba're na saprĩ, Galiléia isõ'u na, Tiberiadi na isõ'u nhisi amo hã. 2Tawamhã da'ahâ uptabi na ma tô isarina dasi'ré, marĩ dama i'manharĩ waihu'u'õ te te 're i'a'manharĩ mono zé hã, da te 're 'madâ'â za'ra mono wa, ihâzé ré norĩ hã te te 're i'apese mono zém na. 3Tahawa, ẽtẽ'rãihâ na ma tô sai'u, Zezusi hã. Tame ma tô nhamra. Isiré 're inomro mono norĩ zama, ma tô isiré asimro. 4Tawamhã romhutu di oto, Zudeu norĩ te, Pascoa na dato nhisi ihâimanazéb da hã.
5Tawamhã Zezusi, itẽme da te dasina irotété za'ra na simana wawi te te da'a'madâ'â wamhã, ma tô Filipihi ma tinha, ãne:
— E mame wa za dasa hã dama uipra za'ra ni, ã hã da'ahâ uptabi na idahâimana za'ra hã, dasaihuri da.
6Tãma waihu'u pese uptabi di, marĩ za te te i'manharĩzé hã. Tane nherẽ, ma tô ãne hã sadanha, niha hã Filipi te te ãma sada'âbâ zô.
7Tawamhã Filipi hã ma sada'â, ãne:
— 200 na rob'uiprazé isapotore hâimana nherẽ hã aré, ibâ na wa te aré uipra za'ra õ di, i'u'ẽtẽ wapu iwa'õno dahâiba mono bâ da te ihuri da hã.
8Tawamhã Ãdré, Simau Pedru sisãnawã hã isiré 're inomro mono norĩ siré hã, ma tô Zezusihi ma tinha, ãne:
9— 'Watébrémi hã te ãme dame tihâiba, imrotõ na i'u'ẽtẽ wapu cevada 'manharĩ ite hã, duré maparane pe'are ite hã. Tane nherẽ, e dawab da bâ, da'ahâ uptabi ma hã.
10Tawamhã Zezusi hã ma tô tãma nharĩ za'ra, ãne:
— Dama nharĩ za'ra wa'aba, ti'ai wa dasi'ubumroi mono da.
Tahawa ma tô uburé ti'ai wa asimro ni. Tame rob ãma hã, duiroire hã nomro za'ẽtẽ di. Tame duré aibâ norĩ dasiré ihâimana za'ra hã, 5 miu na ihâiba za'ratazé hã. 11Taha pari Zezusi hã ma tô waibu, i'u'ẽtẽ wapu hã. 'Re ihâimana u'âsi mono ãma te tiwata. Taha pari, ma tô te te dama sõmri. Tane pe'a ma hã ma tô duré rob'manha. Tawamhã uburé ma tô dasima iwẽ na tasaihuri ni. 12Da te 'mahâpãrĩ mono wamhã, Zezusi hã ma tô isiré 're inomro mono norĩ ma tinha, ãne:
— Isi'atarẽme hã ubumroi pese za'ra wa'aba, taré siwamnarĩ za'ra tõ da.
13Tahawa, ma tô ubumro za'ra, isi'atarẽme hã. 12 na si'õno hã ma tô ãma 'masisi za'ra, i'u'ẽtẽ wapu wẽ'ẽ na hã.
14Ãne hã marĩ dama i'manharĩ waihu'u'õ, Zezusi te te i'manharĩzé, da te 'madâ'â za'ra wamhã, ma tô ãne nharĩ za'ra ni:
— Tô ã hã, 'Re ihâimana u'âsi mono zadawa 'mahârâ'wa, ti'ai u we imorĩ da hã.
15Si'apito da, danhiptete na da te dasiwi pisutu da, Zezusi hã te te sina waihu'u wamhã, apâ ma tô sina siri siwaprosi, ẽtẽ'rãihâ u.
Zezusi hã, â nhisi baba imorĩzé
Mateus 14.22-33; Marcus 6.45-52
16Tawamhã robrazéb u, isiré 're inomro norĩ hã ma tô si'ra za'ra, âi bâ. 17Uba're wa, ma tô asisi, Cafarnau u sisa'rei mono da. Mara nherẽ oto, Zezusi hã zahadu itẽme wisi za'ra õ di, isi'ubumrozéb u hã. 18Tawamhã rowa'u hã ma tô rowapõ, wa'u'u nhiptete uptabi na. Tahawa ma tô oto ti'âsisasisi 'rãihâ. 19Tawamhã isiré 're inomro mono norĩ hã niwamhã imrotõ na duré niwamhã imropâ na ti'ai pibuzém#6.19 Ti'ai pibuzé hã, quilometru te wasu'u na te te siré sari za'ra parimhã, ma tô siwi 'madâ Zezusi hã, â nhisi baba itẽme imorĩ za'ra na 'râwi. Tahawa ma tô tipahi pese za'ra.
20Tane nherẽ, ma tô Zezusi hã 'mahârâ za'ra, ãne:
— Aipahi za'ra wa'aba tõ. Wa hã wa we atẽme ĩmorĩ 'wa.
21Tawamhã Zezusi itẽme imorĩ za'ra na te te siwi waihu'u wamhã, uba're u ma tô siwi 'mazé, to sina. Taha pari, ma tô aihutu â zada'ré ãma supara 'ré u, itẽme isisa'rei mono u.
Zezusihi zô idanhopré mono zé
22Awẽm na hã, bâtâ pusizé â zara niwĩ da'ahâ uptabi na idahâimana za'ra hã Zezusihi siré 're inomro mono norĩ za'u ma tô ãma rosa'rata waihu'u za'ra ni, tame uba're misi ĩsurure si inomro na hã. Ma tô duré waihu'u za'ra ni, Zezusi hã isiré 're inomro mono norĩ siré, uba're wa isébré õ na hã, duré ta norĩ hã hâiba pisutu Zezusihi zamai ãna isisa'rei mono na hã. 23Taha ré hã, 'ri wa'õno Tiberiadi hawi nima norĩ uba're hã ma tô sina rotété za'ra, da'ahâ uptabi na idahâimana za'ra hã i'u'ẽtẽ wapu, da te ihurizéb u, Wanhib'apito Zezusi hã 'Re ihâimana u'âsi mono ãma wata parimhã. 24Tawamhã Zezusi hã duré isiré 're inomro mono norĩ me, õme ihâimana za'ra õ na da te waihu'u za'ra wamhã, ma tô uba're wa asisi ni, Cafarnau u dasisa'rei mono da, sô darĩtĩ za'ra mono da.
Zezusi hã, dasai uptabi na isiwasu'uzé
25Tawamhã Zezusi hã â zara niwĩ, da te dasiwi sõpẽtẽ wamhã, ma tô dasiwi sadanharĩ ni, ãne:
— Rowahutu'wa, e niwa ma tô we ãwamhã aiwi.
26Tahawa Zezusi hã ma da'azada'â, ãne:
— Tô sena wa za aima waihu'u za'ra wa'wa, ãne: I'u'ẽtẽ wapu hã huri aba wẽ te, duré 'mahâpãrĩ aba mono wẽ te, te we ĩzô asõpré wa'aba mo. Mare di, marĩ dama i'manharĩ waihu'u'õ hã 'madâ'â za'ra wa'aba wẽ te hã. 27Dasa hã 're isiwamnarĩ su'u za'ra mono zô si, 're romhuri za'ra wa'aba mono tõ. Dasa, 're ihâimana u'âsi za'ra mono zô si, 're romhuri za'ra wa'aba mono, dahâimana isi'utõrĩ'õ ãma hã. Ta hã dasa hã Ti'ai ãma Dasiré Ipoto si, te za te te aima 're anhomri 'wa. E marĩ wa. 'Re ihâimana u'âsi mono Imama hã ma tô 'manha, te te iwẽsãmri na, da te iwaihu'u za'ra zéb da hã, isadawa para te te 're a'manharĩ mono da.
28Tawamhã ma tô asa siwi sadanha, ãne:
— E marĩ wa za 'manharĩ za'ra ni, 'Re ihâimana u'âsi mono nhimiromhuri, wa te ãma uwaimrami za'ra da wamhã, te te wama iwẽ za'ra hã.
29Tawamhã Zezusi hã ma tãma waihu'u za'ra, ãne:
— 'Re ihâimana u'âsi mono nhimiromhuri hã, ã hã tãma iwẽ, i'manharĩ za'ra wa'aba da hã: We te te isatõrĩ hã saze za'ra wa'aba da.
30Tahawa te duré tãma nharĩ za'ra, ãne:
— E marĩ te za tawamhã i'manha, dama i'manharĩ waihu'u'õ hã, wa te 'madâ'â za'ra wa, wa te ãma i'asaze za'ra zéb da hã. E marĩ te za tô i'manha. 31Wahi'rata norĩ hã mana na dasa nhisi hã ma tô te te huri, rop si 're irosa'wari mono ãma. Ãne Ibaihâ Iwazé pese na rob'ui'éré: “Hâiwa hawi ma tô ĩsa hã te te tãma sõmri za'ra, ãma isaihuri mono zéb da hã.”
32Tahawa, Zezusi hã ma tô tãma nharĩ za'ra, ãne:
— Tô sena wa za aima waihu'u za'ra wa'wa, ãne: Mozésihi õ di, dasa hâiwa hawimhã te te aima 're i'anhomri aba mono hã. Tazahã, Ĩmama si ma tõ te te aima 're anhomri 'wa, hâiwa hawi dasai uptabi hã. 33'Re ihâimana u'âsi mono hawimhã dasa hã, hâiwa hawi we imorĩ, dahâimanazé te te dama 're i'anhomri mono da hã, ti'ai ãma 're idahâimana za'ra mono norĩ ma hã.
34Tahawa ma tô tiwi waptẽrẽ za'ra, ãne:
— Wa wasima wẽ za'ra ni, tô õ hã dasai uptabi hã wama 're anhomri u'âsi mono da.
35Tawamhã Zezusi hã te oto tãma siwasu'u za'ra, ãne:
— Wa hã dasai uptabi, dahâimana u'âsi zém nhomri'wa. Ni'wa hã we ĩtẽme morĩ wamhã, mrab ãna te za oto 're mo. Duré ni'wa te te ĩzazei wamhã, 'rubu ãna te za oto 're mo. 36Tane nherẽ, wa tô nharĩ pa, asiwi ĩ'madâ'â aba nherẽ, ĩzaze za'ra wa'aba õ di. 37Ĩmama hã te te ĩma 're i'apisutu mono si, te za we ĩtẽme 're nomro. Tawamhã we ĩtẽme 're inomro mono norĩ hã te wẽ'õ waihu'u za'ra õ di za. 38E marĩ wa. Hâiwa hawi wa tô wei mo, we ĩzatõrĩ'wa te te sima 're iwẽ mono zé hã te 're a'manharĩ mono da. Mare di, te ĩsima iwẽzéb zarina, te 're i'ab'manharĩ mono da hã. 39We ĩzatõrĩ'wai ma iwẽ hã, ã hã: Te te ĩma ipisutu za'ra norĩ hã te 'manhimini tõ da, duré uburé te aihâiwa'utu da, rob'rãsutu ãma hã. 40E marĩ wa. Ĩmama ma iwẽ hã, I'ra titõmo na te te 're 'madâ'â za'ra mono wa, te te 're isaze za'ra mono norĩ ma, dahâimanazé isi'utõrĩ'õ hã tãma 're hâimana za'ra mono da. Tawamhã ta norĩ hã wa za ahâiwa'utu, rob'rãsutu ãma hã.
41Tahawa Zudeu norĩ hã ma tô Zezusi hã siwi mreme wẽ'õ, te te sina nharĩ wa, ãne: “Wa hã dasai uptabi, hâiwa hawi we ĩmorĩ.” 42Ãne te dasima nharĩ za'ra ni:
— Oro ã hã Zezusi, Zuzéhé 'ra za. Oro wama waihu'u pese za'ra za, imama hã duré ina zama. E niha te tane nherẽ, sina tinha, hâiwa hawi we imorĩ na.
43Tahawa, te Zezusi hã asa tãma nharĩ za'ra, ãne:
— Tô'ã. Tane hã asadawa 'rasi na ĩma inharĩ za'ra wa'wa hã sahâri za'ra wa'aba! 44Ni'wa hã we ĩtẽme morĩ waihu'u õ di, we ĩzatõrĩ'wa Ĩmama hâiwa ãma 're isãmra mono hã te te we ĩtẽme saprõni õ nherẽ. Tawamhã ta hã wa za hâiwa'utu, rob'rãsutu ãma hã. 45Ãne 'Re ihâimana u'âsi mono zadawa 'mahârâ'wa norĩ hã ma tô ãma rob'ui'éré za'ra: “'Re ihâimana u'âsi mono si te za uburé te te dama 're awaihu'u.” Uburé Imama mreme te te 're iwapari za'ra mono hã duré te te ãma 're iwaihu'u za'ra mono norĩ hã, ta norĩ hã te za we ĩtẽme 're nomro. 46Niwa, ni'wa Imama hã te te 'madâ'â õ di. Timama hawi we imorĩ si ma tô 'madâ. Taha si ma tô Timama hã 'madâ.
47— Tô sena wa za ãne hã aima waihu'u za'ra wa'wa: Ni'wa hã te te ĩzazei wamhã, dahâimanazé isi'utõrĩ'õ te za sina uwaimra. 48Wa hã dasai uptabi, dahâimana u'âsi zém nhomri'wa. 49Aihi'rata norĩ wa'wa hã, dasa ma tô te te huri mana na isisi hã, rop si 're irosa'wari mono ãma hã. Tane nherẽ, ma tô ta norĩ hã tidâ'â za'ra. 50Ãhãta te ãme tihâiba, hâiwa hawi dasai uptabi hã. Ta hã dasa, ni'wa te te 'rẽne wamhã, niwa idâ'â da hã, mare di. 51Wa hã dasai uptabi, dahâimana u'âsi zém nhomri'wa, hâiwa hawi we ĩmorĩ. Ã hã dasa na 're dasaihuri mono wamhã, dadâ'â ãna te za 're dahâimana u'âsi za'ra. Dasai uptabi hã ĩhâiba te wasu'u. Ta hã wa za uburé dazawi te, dazada tisõ, dahâimanazé isi'utõrĩ'õ hã da te 're sõpẽtẽ za'ra mono da.
52Ãne siwasu'u wa, te Zudeu norĩ hã 'râwi sima nharĩ za'ra, ãne:
— E niha te za ã hã aibâ hã tihâiba wama sõmri za'ra, ãma 're wasaihuri mono da hã.
53Tahawa te Zezusi hã duré tãma nharĩ za'ra, ãne:
— Tô sena wa aima waihu'u za'ra wa'wa, ãne: Ti'ai ãma Dasiré Ipoto hâiba na 're asaihuri aba mono õ wamhã, duré iwapru, 're âhuri aba mono õ wamhã, rowẽ u'âsi 're i'aihâimana za'ra wa'aba mono zé hã, aima 're hâimana za'ra wa'aba mono õ di za. 54Ni'wa hã ĩhâiba na 're sai u'âsi mono wamhã, duré ĩwapru te te 're hâsi u'âsi mono wamhã, dahâimanazé isi'utõrĩ'õ hã te za tãma 're hâimana. Tawamhã ta hã wa za hâiwa'utu, rob'rãsutu ãma hã. 55Ĩhâiba hã, ta hã dasai uptabi. Duré ĩwapru hã, ta hã â uptabi. 56Ni'wa hã ĩhâiba na 're sai u'âsi mono wamhã, duré ĩwapru te te 're hâsi u'âsi mono wamhã, te za ĩ'ãma 're hâimana u'âsi. Tawamhã taha siré wa za duré õne u'âsi 're ĩhâimana. 57Ĩmama, dahâimana u'âsi zém nhomri'wa we ĩzatõrĩ'wai u'âbâ, wa 're ĩhâimana. Tane duré, ni'wa hã ĩ'ãma 're sai u'âsi mono wamhã, te za ĩ'u'âbâ 're hâimana u'âsi. 58Ã hã dasai uptabi, hâiwa hawi we imorĩ. Aihi'rata norĩ wa'wa hã dasa ma tô te te huri, mana na isisi hã. Tane nherẽ, ma tô tidâ'â za'ra. Tazahã, ã hã dasai uptabi na ni'wa 're sai mono wamhã, te za 're hâimana u'âsi.
59Zezusi hã Cafarnau ãma Zudeu norĩ te rowahutuzéb ãma te te dama rowahutu ré, ma tô ãne na rowasu'u.
Zezusi hã, da'ahâ na da te dasiwi irẽmezé
60Tawamhã da'ahâ na Zezusihi siré 're idanomro mono hã, ãne hã da te wapari za'ra wamhã, ma tô ãne nharĩ za'ra ni:
— Isimiroti hã pire uptabi di, ãma idahâimana da hã. E 'wa hã te te 'wapé da bâ.
61Ãne hã isiré 're inomro mono hã te te sima inharĩ za'ra zé, Zezusi te te waihu'u wamhã, ma tô ãne tãma nharĩ za'ra:
— E te irowasu'uzém na hã ma asiwi ĩmreme wẽ'õ wa'wa. 62E niha te aré tiromhâiba, Ti'ai ãma Dasiré Ipodo hã 're isãmra mono zéb u, apâ hâiwa u morĩ ré, asiwi 'madâ'â aba wamhã. 63'Re ihâimana u'âsi mono Pẽ'ẽzani hã, ta hã dahâimana u'âsi zém nhomri'wa. Tazahã, ti'ai ãma 're idahâimana za'ra mono hã, ta hã da te 'manharĩ waihu'u õ di. Te aima irowasu'u za'ra wa'aba zé hã dapẽ'ẽzani isi'utõrĩ'õ na duré dahâimana u'âsi zém na. 64Tane nherẽ, ni'wam norĩ hã saze za'ra wa'aba õ di.
Ãne ma tô Zezusi hã tãma nharĩ za'ra, romhuri na te te isãna'rata hawim haré, te te waihu'u pese wa, ni'wam norĩ hã te te isaze za'ra õ na hã, duré za ni'wa hã te te dama ihâiba nhomri na hã.
65— Ãne wa, wa tô aima nharĩ za'ra wa'wa, ni'wa hã te te ĩzaze waihu'u õ di, Ĩmama hã te te pisutu õ nherẽ. — Ãne Zezusi hã ma tô ãma tãma uzusi za'ra.
66Ãne na Zezusi te te tãma nharĩ za'ra parimhã, da'ahâ na aré isiré 're idanomro mono hã ma tô oto dasiwi rẽme ni. Isiré oto 're danomro mono õ di. 67Tawamhã Zezusi hã ma tô sadanharĩ za'ra, 12 na isiré 're inomro mono norĩ hã, ãne:
— E a norĩ wa'aba zama, asima wẽ za'ra wa'aba õ di, asiwi ĩrẽme aba da hã.
68Tawamhã Simau Pedru ma tô sada'â, ãne:
— Wanhib'apito, e 'wa sarina, wa za ai'aba'ré ni. Aiwétési asimirowasu'u hã, dahâimanazé isi'utõrĩ'õ nhomri'wa na. 69Wa tô asaze za'ra ni, duré wama aiwaihu'u pese za'ra di, aiwazé pese na 're i'aihâimana mono na, 'Re ihâimana u'âsi mono we te te i'asatõrĩ na hã.
70Tawamhã Zezusi hã te asa tãma nharĩ za'ra, ãne:
— Wa hã wa tô aipisutu za'ra wa'wa, 12 na i'aihâiba za'ra wa'wa hã. Tane nherẽ, aiwazarib za'ra wa'aba hã, ni'wa misi hã wa'uburé.
71Ãne hã ma tô Zudasihi hâiba na tinha, Simau Iscariotihi 'ra na. E marĩ wa. Zudasi hã 12 na ihâiba za'ra norĩ siré 're morĩ nherẽ, za te te hâiba nhomri wa.
ទើបបានជ្រើសរើសហើយ៖
Zuwã 6: xavBP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Wycliffe Bible Translators, Inc.