Zuwã 9
9
Zezusi hã, aibâ poto hawim haré itob'a hã te te ipesezé
1Tawamhã Zezusi hã morĩ ré, ma tô 'madâ, aibâ poto hawim haré itob'a hã. 2Tahawa isiré 're inomro mono norĩ hã ma tô ãma siwi sadanha, ãne:
— Rowahutu'wa, e 'wa hã ma tô tiwasédé hã 'manha, ã hã aibâ tob'a na ipoto da hã. E tô ã hã aibâ, e duré niwamhã imama norĩ.
3Tahawa Zezusi hã ma ãma sada'âbâ za'ra, ãne:
— Mare di. Aibâ hã tiwasédé te te 'manharĩ wab õ di, duré imama norĩ zama. 'Re ihâimana u'âsi mono hã tiwaihu'u pe te te ãma hâi'ré da, ma tô tob'a na podo. 4Rowa'a ré, wa za we ĩzatõrĩ'wa te romhuri hã wa te 're 'manharĩ za'ra. Mara we iwisizé hã romhuture di oto. Tawamhã ni'wa hã te te oto romhuri waihu'u õ di za. 5Ti'ai ãma 're ĩnhamra mono ré hã, wa hã dama rowa'a'wa, ti'ai ãma 're idahâimana za'ra mono norĩ ma hã.
6Ãne te te sina nharĩ parimhã, Zezusi hã ma tô tizadaipro time ti'ai u. Taha na ma tô ti'a hã warutu. Taha pari ma tô taha na aibâ hã tõmo u'ré. 7Ãne te tãma tinha:
— Mo oto aimorĩ, asitõmo upsõ da, Siloé na â ubumrozé isisi ãma.
(Siloé na â ubumro nhisi hã “Da te isatõrĩ” te wasu'u.)
Tahawa, aibâ hã tamomo ma tô mo. Ma tô sitõmo upsõ. Sitõmo upsõi wamhã, tõmo wẽ di oto. Taha pari te oto mo, 'ri tẽme. 8Isababa isõrõwa norĩ hã te te 're da'awari mono ré, te te siwi 're i'madâ'â mono hã ma tô ãne ãma sisadanharĩ za'ra:
— E ã hãi õ di aibâ hã, aré 're isãmra mono hã te te 're da'awari mono da.
9Tawamhã ni'wam norĩ hã ma tô nasi nharĩ za'ra, ãne:
— Tô õ hã.
Duré ni'wam norĩ hã ma tô ãne nasi nharĩ za'ra:
— Mare di. Taré isine hã.
Tane nherẽ, si'uihâ na sadawa za'réi ãna, ma tô nasi siwasu'u dama, ãne:
— Tô wa hã. Ĩtob'a di aré tô.
10Tahawa te siwi sadanha, ãne:
— E niha ma tô atõmo wẽ, tawamhã.
11Tawamhã te tãma siwasu'u za'ra, ãne:
— Aibâ hã Zezusi na isisi, ma tô tizadaipro na ti'a hã ĩzada wai'o. Ta hã ĩtõmo ãma ma tô ĩma ahi. Taha pari ma tô ĩma tinha, Siloé â ubumrozéb u ĩmorĩ da, ĩsitõmo upsõ da. Tamomo wa tô mo. Wa tô ĩsitõmo upsõ. Tahawa wa tô oto rob'madâ.
12Tawamhã ma tô duré sô sadanharĩ za'ra, ãne:
— E mahãta tawamhã, ta hã aibâ.
Ma ãma sada'âbâ za'ra, ãne:
— Me. Te waihu'u õ di.
Farizeu norĩ hã aibâ itob'a, Zezusi te te ipe, te te siwi isadanharĩzé
13Tawamhã farizeu norĩ u ma tô aibâ hã dasiwi saprõni ni, tob'a na aré 're isãmra mono hã. 14Sabadu bâtâ 're, Zezusi hã ma tô tizadaipro na ti'a hã wai'o, aibâ te te ãma tõmo u'réi wa, te te ãma ito pesezé hã. 15Tawamhã farizeu norĩ zama ma tô duré siwi sadanha, niha to pese zô. Ãne te tãma siwasu'u za'ra:
— Tizadaipro na ma tô ti'a hã ĩzada wai'o. Taha na ma ãma ĩtõmo u'ré. Taha pari wa tô ĩsitõmo upsõ. Tahawa, ãhã na hã wa oto rob'madâ.
16Tawamhã nima norĩ farizeu norĩ hã ma tô nharĩ za'ra, ãne:
— Ta hã aibâ hã 'Re ihâimana u'âsi mono hawib õ di, sabadu na roti zahi hã te te wazéb õ wa.
Tane nherẽ, nima norĩ hã ma tô duré ãne nharĩ za'ra:
— E niha te za ni'wa hã 're morĩ wasété nherẽ, bété 'manha, marĩ dama i'manharĩ waihu'u õ hã.
Ãne u'âbâ ma tô dasima aipo'o ni. 17Tahawa, farizeu norĩ hã te duré aibâ hã siwi sadanha, ãne:
— Te asiwasu'u, te te i'ato pese na hã. E niha õ hã aibâ ãma irosa'rada hã.
Aibâ ma duré sada'âbâ za'ra, ãne:
— Õ hã, 'Re ihâimana u'âsi mono zadawa 'mahârâ'wa.
18Tane nherẽ, Zudeu norĩ hã ãma simizaze za'ra õ di, tob'a na aré 're isãmra mono na hã duré ito pese zém na hã. Tahawa ma tô imama norĩ zô tihârâ za'ra. 19Tawamhã simasisi zahuré wamhã, ma tô ãne ãma sadanharĩ za'ra:
— Ã hã aibâ hã e ai'ra wa'wa. Te u iwasu'u wa'wa, tob'a na ipoto na hã. E niha te tawamhã oto rob'madâ.
20Tawamhã imama norĩ hã te ãne tãma wasu'u za'ra:
— Wama waihu'u pese di, wa'ra na hã, duré tob'a na ipoto na hã. 21Tane nherẽ, wa te waihu'u õ di, niha te te oto irob'madâ'â na hã duré ni'wa te te ito pese na hã. Ãma wahub za'ẽtẽ di. Tahawa, ma'ãpé asiwi sadanharĩ aba, 'râwi siwasu'u da.
22Zudeu norĩ ma roti'wa norĩ ma, pahi te, ma tô imama norĩ hã ãne nharĩ zahuré. E marĩ wa. Zudeu norĩ ma roti'wa norĩ hã te te sima rowairébé za'ra wa, ni'wa hã, Zezusi Danho'reptui'wa na te te wasu'u wamhã, za Zudeu norĩ te rowahutuzém hawi te te siwi iwazere na hã. 23Tahawa, ma tô ãne imama norĩ hã nharĩ zahuré: “Asiwi sadanharĩ aba. Ãma wahub za'ẽtẽ di.”
24Tawamhã maparane ãma farizeu norĩ hã ma tô sô tihârâ za'ra, aibâ tob'a na aré 're isãmra mono zô. Ãne te duré siwi sadanha:
— Ma'ãpé, tô sena wama asiwasu'u za'ra, 'Re ihâimana u'âsi mono nhisi na. Wama waihu'u pese za'ra di, Zezusi hã aibâ 're imorĩ wasédé.
25Tawamhã aibâ hã ma sada'âbâ za'ra, ãne:
— Ĩma waihu'u õ di, wasété na 're imorĩ na hã duré niwamhã e mare di. Ãhã si ĩma waihu'u pese di: Ĩtob'a di aré. Tane nherẽ, wa oto rob'madâ.
26Tawamhã apâ te duré siwi sadanha, ãne:
— E marĩ ma tô aima 'manha. E niha ma ato pese.
27Tawamhã aibâ hã te tãma nharĩ za'ra, ãne:
— Wa tô aima ĩsiwasu'u pari za'ra wa'wa. Tane nherẽ, asiwi ĩwapari aba õ di. E marĩ da, wa za duré aima ĩsiwasu'u zahu za'ra wa'wa. E a norĩ wa'aba zama saze za'ra wa'aba da bâ.
28Tawamhã te te siwi sadawa 'rui wa, ma tô ãne tãma nharĩ za'ra:
— Aiwétési te isirã zarina 're aimo. Wa norĩ hã Mozésihi zazei'wa. 29Wama waihu'u pese za'ra di, 'Re ihâimana u'âsi mono hã Mozésihi ma, te te 're irobzanhamri mono na hã. Tazahã, ã hã aibâ hã wama waihu'u za'ra õ di, e ma hawi te wei mo.
30Tawamhã aibâ hã ma duré sada'âbâ za'ra, ãne:
— E niha merẽ iwaihu'u õ! Nima hawi we imorĩ na hã aima waihu'u za'ra wa'aba õ nherẽ, ma tô ĩto pese, ta hã. 31Uburé wama waihu'u pese za'ra di, 'Re ihâimana u'âsi mono hã wasété na 're inomro mono te te 're i'awapari mono õ na hã. Tazahã, te te 're awapari, te te 're iwazéb za'ra mono norĩ hã, duré isimiroti te te 're i'madâ'â pese za'ra mono norĩ zama. 32Ropoto na'rata hawim haré, niwa ni'wa hã rowasu'u te te wapari õ di, ni'wa hã tob'a na poto nherẽ, da te ito pese na hã. 33Ã hã aibâ hã 'Re ihâimana u'âsi mono hawib õ 'wa'âhã, ãne hã te te aré 'manharĩ waihu'u õ di.
34Tawamhã farizeu norĩ hã ma tô tãma nharĩ za'ra, ãne:
— Aiwasété za'ẽtẽ ré, ma tô aipo. E niha te tane nherẽ asima iwẽ, wama asanho za'ra da hã.
Tahawa ma tô oto siwi waze, rowahutuzém hawimhã.
Dapẽ'ẽ 're datob'a na 're idanomro mono zém na, Zezusi hã te te inharĩzé
35Tawamhã Zezusi hã ma tô waihu'u, aibâ tob'a na aré 're isãmra mono hã rowahutuzém hawi farizeu norĩ te te siwi iwazere na hã. Tahawa ma tô sô rĩni. Te te sõpẽtẽ wamhã, ma tô ãne tãma tinha:
— E ma isaze, Ti'ai ãma Dasiré Ipodo hã.
36Tawamhã aibâ hã ma sada'â, ãne:
— Apito, e 'wa hã Ti'ai ãma Dasiré Ipodo. Ma'ãpé ĩma wasu'u na, te saze da.
37Tawamhã Zezusi hã te tãma siwasu'u, ãne:
— Ma tô i'madâ. Ta hã te aima robzanha.
38Tahawa te aibâ hã Zezusihi ma tinha, ãne:
— Apito, wa asaze.
Tawamhã hi'rãtitõ ma tô nhamra. Zezusihi ãma te tiwata.
39Taha pari, te Zezusi hã dama tinha, ãne:
— Dahâimanazéb zarina te da'ãma 're arowairébé mono da, wa tô we datẽme mo ti'ai u, itob'a norĩ hã 're to pese za'ra mono da, duré tõmo wẽ na 're ihâimana za'ra mono hã 're tob'a za'ra mono da.
40Tawamhã farizeu norĩ hã ãne te te wapari za'ra wa, ma tô ãne siwi sadanha:
— E tawamhã wa norĩ zama watob'a za'ra di.
41Tahawa te Zezusi hã tãma nharĩ za'ra, ãne:
— Atob'a za'ra wa'aba 'wa'âhã, ate za'ra wa'wa i'upa hã aré hâimana õ di. Tane nherẽ, te inharĩ za'ra wa'wa i'atõmo wẽ za'ra wa'aba na hã. Tahawa i'upa za'ra wa'aba zé hã te zahadu aima 're hâimana u'âsi za'ra wa'wa.
ទើបបានជ្រើសរើសហើយ៖
Zuwã 9: xavBP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Wycliffe Bible Translators, Inc.