ລູກາ 7
7
ພະເຢຊູເຈົ້າເວີຍສຣະນອຸ໊ຍລັບໃຊ້ນາຍທະຫານໂຣມ
(ມທ 8:5-13; ຢຮ 4:43-54)
1ເບີ໋ອຈເຈ໋ອ ພະເຢຊູຣຽນປັ່ງວຽກແງອ່ ຕ໊ອະແມ່ປະຊາຊົນແງອ່ ພະອົງເຣິອກໂຮ້ເມືອງກາເປນາອູມ. 2ວຸ່ນນາຍທະຫານໂຣມມວຍຣ່າກົ່ວຕ໊ອະເມືອງແງອ່ ວຸ່ນນອຸ໊ຍລັບໃຊ້ມວຍຣ່າ ທີ່ອືເຕີອບມອາດ ເຈຣີບຢຣໍ່ຢອຶ໋ ແລະ ເບິ໋ອຈຕອັ່ງເກດ. 3ເບິ໋ອຈນາຍທະຫານແນ່ອບິຈເຊີ່ງເລື້ອງ ພະເຢຊູເຈົ້າ ອື່ເລີຍມີ່ອແມ່ເກີ່ອງກຣະ ລ່າງຣ່າຕີ່ອແມ່ຢິວ ມີ່ອເຣິອກນົບບອ໊ະລ່າພະເຢຊູ ມີ່ອບຶ໋ອເວອີຍສຣະ ລັກສາ ນອຸ໊ຍລັບໃຊ້ ຕີ່ອອື່ແງ່ອ. 4ເບີ໋ອຈແມ່ເກີ່ອງ ກຣະ ບຶ໋ອຕອັ່ງພະເຢຊູເຈົ້າແງ່ອ ແມ່ລ່າພຣະອົງ ຕີ່ອຄວາມຕັ້ງໃຈ ເຈ໊ອເກຼີມນົບບ໊ອະພຣະອົງ ມີ່ອເຣິອກໂຕ່ຍແມ່ເລ໋ອລັກສານຸ໊ອຍລັບໃຊ້ນາຍທະຫານແງອ່ ເຕນແນອ່, “ນາຍທະຫານແນ່ອ ສົມຄວນບິຈລັບການເວອີີຍສຣະຕ໊ອະຢະ. 5ເພາະເຈຣີບເຕີອບປະເທດອິດສະຣາເອນຕີ່ອງ່າຍ ແລະ ນະເຈຣີບ ເບີ່ອມ ທຳມະສາລາ ເອີ່ມງ່າຍຕີ່ອນວ່າວ.”
6ຢັ່ງແອ່, ພະເຢຊູຄະເຣິອກໂຕ່ຍແມ່ ເບີ໋ອຈພະອົງເຣິອກຕອັ່ງບຶ໋ອຢຣ່າມ ຕີ່ອນາຍທະຫານແງ່ອ, ນາຍທະຫານບິຈມີ່ອ ເບີ່ອນຮື່ບຶ໋ອເຕນ ຕ໊ອະພຣະເຢຊູເຈົ້າ ຢັ່ງແນ່ອ, “ພະອົງເຈົ້າເລີ໋ ຍ໋ອງມີ່ອວຸ່ນການທົກຕ໊ອະຢະເມະ ເພາະອາວຸ່ນນອຸ໊ຍເອີ່ນສົມຄວນ ມີ່ອຢະເມະມຸດໂຮ້ຢຣ່າມອາ. 7ຢັ່ງແອ່ເມະ ອາປຣໍ໊ເຕີຈັກຮື່ ເອີ່ນສົມຄວນ ເມະເຣິອກຕອັ່ງຢະຕີ່ອຈັກຮື່ ຂໍມີ່ອນອັ່ນຢະເຕນມວຍມອ່າງສຳແງອ່ ແລະ ນອຸ໊ຍລັບໃຊ້ຕີ່ອ ອາຄະເມະນຽມ. 8ອາເຕນຢັ່ງແນ່ ຍ້ອນແນອ່, ອາຕອຸກນຸ໊ອຍທີ່ວຸ່ນສິດອໍານາດມ່ວຍເນອ່ຍ ນາຍອາສັ່ງອາຄະເຊິ່ງມອ່າງແມ່ ເພາະອາກົ່ວໃຕ້ອຳນາດຕີ່ອນາຍຮື່ ແລະ ອາຄະວຸ່ນທະຫານກົ່ວໃຕ້ອຳນາດ ການບັນຊາຕີ່ອອາ ນວ່າວ ອາມີ່ອນອຸ໊ຍແນ່ ‘ເຣິກໂຮ້ແອ່’ ເຈີຣບຄະເຣິກ ອາມອີ່ນຸ໊ອຍແນ່ ‘ບຶ໋ອໂຮ້ແນອ’ ເຈຣີບຄະບຶ໋ອ ແລະ ອາມີ່ອ ນອຸ໊ຍລັບໃຊ້ຕີ່ອຮື່ ‘ເບີ່ອມວຽກແນ່’ ເຈຣີບຄະເບີ່ອມ.”ອາຕອຸກຢ່ອານວຸ່ນນຸ໊ອຍທີ່ວຸ່ນອຳນາດ ເທິງສິດອຳນາດຕິ໋ ຢັ່ງແອ່ ນອັ່ນຢ່ອານເຍອັ້ຍມອ່າງຕ໊ອະແມຣ່ ຄະເມະວຸ່ນຢັງແອ່.
9ເບິ໋ອຈພະເຢຊູເຈົ້າບິຈເຊີ່ງຢັງແອ່ ຄະຕຸດເກຼີ່ມເຊິ່ອງ ເພາະນາຍທະຫານໂຣມແງ່ອ ພະອົງຮວ່ຽວປັກປຶດຮື່ເຣີ່ງ ເຕນຕ໊ອະປອ່າງປະຊາຊົນ ທີ່ເຣີອກໂຕ່ຍແງ່ອ ເຕນແນອ່, “ອາຣຽນຕ໊ອະແວ່ແນອ່ ນຸ໊ອຍຕ່າງຊາດແນອ່ ນ໊ອະວຸ່່ນຄວາມເຊື່ອໄວ້ວາງໃຈຕ໊ອະອາ ຮ່ອມນຸ໊ອຍຊາດອິດສະຣາເອນທີ່ອາເຄີຍເຕີ.” 10ຕໍ້ເບິອຈ ເບີ່ອນຕີ່ອນາຍທະ ຫານໂຣມແງອ່ ຄະຈີ້ໂຮ໊ຢຣ່າມຕີ່ອນ່າຍທະຫານແງອ່ ແມ່ເຕີນອຸ໊ຍລັບໃຊ້ຕີ່ອນາຍທະຫານແງອ່ ຊາມເບິອຈອື່ນຽມ.
ພະເຢຊູເຈົ້າເວີຍສຣະກວານກຼໍ່ເຢຍກົ່ວມອ່າຍມີ່ອ ເຣ່ຕ໊ອະເກດ
11ເຈ໊ອແອ່ນ່ວາວເອີ່ນຕອຸ່ຍ ເຕິ້ອມຈຣໍ໋ ພະເຢຊູບິຈເຣິອກໂຮ້ເມືອງມວຍ ຊື່ ນາອິນ ແຖວເຂດ ແຂວງຄາລີເລ ແລະ ແມ່ສາວົກ ປຣ໋ອກແມ່ປະຊາຊົນອູ່ຣ່າເຣິອກໂຕ່ຍພະອົງ. 12ຢຸ໊ອມ໊ອະທີ່ແມ່ບຶ໋ອແຕອ໋ະໆ ມັ່ງມອ່ອງເມືອງ ແມ່ຄະເຕີວຸ່ນນອຸ໊ຍຕ່ວງຊໍ໋ອນອຸ໊ຍເກດ ເຣິອກເກອິບໂຮ້ນອກເມືອງ ອື່ວຸ່ນກວານກຼໍ່ມວຍຣ່າ ຕີ່ອ ເຢຍກົ່ວມອ່າຍ ວຸ່ນນອຸ໊ຍຕ໊ອະເມືອງແນ່ອອູຣ່າ ເຣິອກໂຕ່ຍເຢ່ຍແງ່ອ. 13ເບິ໋ອຈພະເຢຊູເຕີເຢ່ຍແງອ່ ພະອົງເຈົ້າເລີຍວຸ່ນ ງຣື່ນເກຼີ່ມເວອີຍສຣະມອາດ ເຕນຕ໊ອະເຢ່ຍແງອ່ຢັງແນ່ອ,“ຍ໋ອງນະສາເຢື່ອມຢໍ໋”. 14ເຈ໊ອແອ່ ພະອົງບິຈມຸດທັບໆຫີບຊໍ໋ອ ແລະ ໂປ໊ຍຣັບຫີບຊໍ໊ອ ແລະ ແມ່ກໍ່ຼທີ່ຕ່ວງຫີບຊໍ໊ອຄະເມີ່ຮງ ເຢີ່ອງຕ໊ອະແບ່ ພະອົງເຕນແນ່ອ, “ແມ່ ນຶອກເລີ໋ ອາມີ່ອ ສາຕອຶກກົ່ວ.” 15ເຈ໊ອແອ່ ນອຸ໊ຍເກດແງ່ອຄະເຣ່ຕະເກດ ຣົ໊ວອື່ຕອຶກກົ່ວ ແລະ ເລີ່ມບວ໋າມອ່າງ. ພະເຢຊູເຈົ້າ ຄະເລີຍ ມອບ ແມ່ກຼໍ່ ແງ່ອເອີ່ມ ຕ໊ອະເມະອື່.
16ຕໍ້ປອ່າງນອຸ໊ຍເຕຣີ່ມຣ່າເຕີພະເຢຊູ ເບີ່ອມມີ່ອ ແມ່ກໍ່ຼເຣ່ຕະເກດ ຄວາມໂມຮະຄະກຸ່ມແມ່ເຕຣີ່ມຣ່າ ເຕຣີ່ມຣ່າຄະຫຼື່ງຕອ໊ະປັດເກຼີ່ມ, ເຕຣີ່ມຣ່າ ເຕ່ອ ເຄົາລົບ ພາເບີ່ອນຮື່ສັນລະເສີນ ເກຣີ່ຍຣຽນ ພະເຈົ້າ ແນອ່,“ ພະເຈົ້າຢະຕິ໋ ທີ່ເບີ່ອມວຽກແນອ່ ເຈ໊ອແອ່ແມ່ຄະສະແດງຄວາມເຄົາລົບພະເຢຊູເຈົ້າ. ແມ່ເຕນຕະເບີ່ອນຮື່ ແນອ່, ເບິອຈ ນອຸ໊ຍທໍານວຍ ຕິ໋ອມວຍຣ່າ ບິຈບຶ໋ອເປຼ໋າະຈັກຮື ເກື່ອງຕີອງ່າຍ ເບິ໋ອຈພະເຈົ້າ ບຶ໋ອເຢຈີບງ່າຍ ເທິງຊ່ອຍປຸ໋ອປະຊາຊົນຮືມີ່ອພົ້ນ.”
17ປະຊາຊົນເຣ່ວເເຂວງຢູດາຍ ເທິງນຸ໊ອຍທີ່ກົ່ງເຣ່ວເຂດທັບໆ ບິຈປຶ໋ອຣຽນຂ່າວເລື້ອງ ພະເຢຊູບິຈເບີ່ອມແງອ່.
ປ່າງນອຸ໊ຍທີ່ໂຢຮັນບັບຕິສະໂຕມີ່ອບຶ້ອຕອັ່ງພຣະເຢຊູເຈົ້າ
(ມທ 11:2-19)
18ຢຸ໊ອມ໊ອະໂຢຮັນບັບຕິສະໂຕ ກົ່ວໂຮ໊ຄຸກແມ່ສາວົກຕີ່ອ ໂຢຮັນ ບິຈຣຽນເລື້ອງເປ໋ອເນອ່ຍທີ່ພະເຢຊູເບີ່ອມມີ່ອໂຢຮັນເຢອ່ຍ ເຈ໊ອແອ່ ໂຢຮັນໂກຼ່ຈ໋ອກສິດ ບອ່ານຣ່າບື໋ອ. 19ໂຢຮັນໃຊ້ມີ່ອສາວົກເຣິອກຕອັ່ງ ພະເຢຊູ ເພື່ອລ່າແນ່ອ,“ຢ່ອານງຽດພະຄິດຢະຊ່ອຍມີ່ອໂຣັຍທີ່ພະເຈົ້າສັນຍາຣຽນເຕອ໋າະເມະບຶ໋ອແງອ່ ເລິ໋ອເອີ່ນ ເລິ໋ນະຢ່າເມະຈຳເປຼີ່ງ ພະຄິດຢະຊ່ອຍມີ່ອໂຣັຍ ນອຸ໊ຍນ໊ອະນວ່າວ ?”
20ເບີ໋ອຈແມ່ບື໋ອຕ໊ອະພະເຢຊູເຈົ້າ ແງ່ອ ແມ່ລ່າພະອົງ ແນອ່, “ໂຢຮັນບັບຕິສະໂຕ ມີ່ອ ຍ່າບື໋ອລ່າຢະຢັງແນ່, ‘ຢ່ອານງຽດພະຄິດຢະຊ່ອຍມີ່ອໂຣັຍທີ່ ບຶ້໋ອເຕີ້ອມນຶ້ງພະເຈົ້າ ເລິ໋ອເອີ່ນ ເລິ໋ນະຢ່າເມະຈຳເປຼີ່ງ ພະຄິດຢະຊ່ອຍມີ່ອໂຣັຍ ນອຸ໊ຍນ໊ອະນວ່າວ?’”
21ຕ໊ອະມວຍເວລາແງ່ອ ຢຸ໊ອມ໊ອະສາວົກໂຢຮັນນະກົ່ວຕ໊ອະແບ່ ພະເຢຊູບິຈ ເວອີຍສຣະລັກສາ ນອຸ໊ຍອູ່ຣ່າ ທີ່ໂຕອະຢີ້ອຢຣໍ່ ຕ໊ອະໂລຄາພະຍາດອູ່ເນອ່ຍ, ມີ່ອໂປ໊ຍໂຣ້ຍຕ໊ອະບຣ໊ະຣ່າຍ ແລະ ພະອົງໂຜດເວອີຍສຣະລັກສາ ນອຸ໊ຍມັດໂສດ ມີ່ອເລີ໋ເຮີເຕີນວ່າວ. 22ເຈ່ອແງ່ອ ພະອົງບິຈມໍ່ອນອຸ໊ຍທີ່ໂຢຮັນ ມີ່ອບຶ໋ອແງ່ອ ແນອ່, “ມີ່ອຢ່ອານຈີ້ວິ່ງຣຽນໂຢຮັນ ມຮໍ່ທີ່ແວ່ບິຈເຕີ ບິຈເຊິ່ງແງ່ອ ນອຸ໊ຍມັດໂສດ ເລີ໋ເຣີເຕີ ນອຸ໊ຍເປ້ຍລ່ອຍ ເລິເຣິອກ ນອຸ໊ຍທີ່ທົນທຸກ ຕີ່ອພະຍາດຂີ້ທູດຄະນ່ຽມບີ່ຣແມນ, ນອຸ໊ຍປິດຕຸ່ງ ຄະເລີເຊີ່ງ, ນອຸ໊ຍເບີອຈເກດ ຄະນະຕອຶກເຣ່ຕ໊ອະເກດວຸນຊີວິດ ແລະ ຂ່າວປະເສີດ ຄະຣຽນເອີ່ມຕ໊ອະນຸ໊ອຍທົກຍາກ ເທິງນຸ໊ອຍທີ່ໂງ່ຍມີ່ອພະເຈົ້າຊ່ອຍແມ່. 23ກ່ຼາມ໊ອະເອີ່ນເກຼັ໋ຍສະດຸດສົງໃສຕ໊ອະອາ ນອຸ໊ຍແງອ່ວຸ່ນນຸ໊ອຍທີ່ບິຈລັບພະພອນນຶ້ງພະເຈົ້າ.”
24ຕໍ້ນອຸ໊ຍລັບໃຊ້ ບອ່ານຣ່າ ຕີ່ອໂຢຮັນບັບຕິສະໂຕຈີ້ ພຣະເຢຊູຄະເລີ່ມຣຽນຕ໊ອະປະຊາຊົນ ເຖິງເລື້ອງຕີ່ອໂຢຮັນແນ່ອ, “ເບິ໋ອຈແວ່ບິຈເຣິອກໂຮ້ບ່ອນແບ໊ຣ ປຣັ່ງ ຣໍ໋ອກັນດານແງ່ອ ຢຸ໊ອມ໊ອະໂຢຮັນເບີ່ອມພິທີບັບຕິສະມາ ໂຢຮັນ ວຸ່ນນຸ໊ອຍແບບໃດ? ວຸ່ນນຸ໊ອຍອ່ອນແອ ມວຍເນ່ອຍເຕີ່ມປັດຈະຣວດ ເອນຕອຶກເຕັ໋ຍປອ່ວຍກອ່ຽວປູ່ກຶນ?. 25ຕ໊ອະເອີ່ນແວ່ເຣິອກເຣີ່ງ ເຕີ່ມປັດຈະຣວດເອນຈັກປອ່ວຍກອຽວປູ່ແງ່ອ ມ໊ອະແວ່ເຍອັ້ຍເຣີ່ງແງອ່? ເຣີ່ງແມ່ກໍ່ຼມວຍຣ່າ ນຮ໊າຍສັບວຽກຣຶບແມ່ນ ລາຄາແພງກຶນ? ມອາດໆເອີ່ນອິ໋ອຢັ່ງແອ່ ຢຸ໊ອແນ່ ມີ່ອເຢອ່ຍ ມວຍເນອ່ຍງ່າຍເຣີ່ມຣ່າ ຕອຸກວຸ່ນນຸ໊ອຍອູ່ຣາສັບຮັບ ລາຄາແພງ ບິຈໂຢລ ຄະກົ່ວໂຮ້ລາຊະວັງ ເອີ່ນອິ໋ອກົ່ວໂຮ້ປຣີ່.” 26“ຕ໊ອະອິ໋ອຢັ່ງແອ ມ໊ອະແວ່ເຣອິກເຣ່ີງແງອ່? ເຣິອກເຣີ່ງນອຸ໊ຍທຳນວຍກຶນ? ງຽດເມະອ່າຣຽນແວ່ແນ່ອ ໂຢຮັນທີ່ເບີ່ອມພິທີບັບຕິສະມາ ວຸ່ນນຸ໊ອຍທໍານວຍຕິ໋ອ ຕ໊ອະຈຸ່ມແມ່ ນອຸ໊ຍທໍານວຍນ໊ອະອູ່ຣ່າ ເທິງອາຣຽນຕ໊ອະແວ່ໂຢຮັນວຸ່ນນຸ໊ອຍທຳນວຍຕິ໋ຮ່ອມນຸ໊ອຍທຳນວຍ ນ໊ອະ.” 27ໂຢຮັນງຽດນອຸ໊ຍທຳນວຍ#7:27 ນອຸ໊ຍທຳນວຍ ມລກ 3:1ທີ່ ພະຄຳພີ ຂຽນເຕ໋ອາະ ເລື້ອງອື່ແນ່ອ,
“ເຣີ່ງເຮ້ ອາເມະໃຊ້ມີ່ອນອຸ໊ຍລັບໃຊ້ຕີ່ອອາ
ເຣິອກນວນຢ່ອານ
ເພື່ອເບີ່ອມຕຣ່ວງເຕ໋ອາະ ສຳລັບການບຶ້່ອຕີ່ອຢ່ອານ.”
28“ອາຣຽນແວ່ເຕຣີ່ມຣ່າຕ໊ອະນຸ໊ອຍທີ່ນະວຸ່ນຊີວິດ ຢັງແນ່ອ, ເອີ່ນວຸນ່ກຼ່າສຳຄັນຮ່ອມໂຢຮັນ ແຕ່ບັດແນ່ ນຸ໊ອຍທີ່ກົ່ວຕ໊ອະອານາຈັກສະຫວັນຕີ່ອພະເຈົ້າ ຄະວຸ່ນຕິ໋ອຮ່ອມໂຢຮັນ, ເຖິງເບີ່ອນເມະເຣີ່ອງແມ່ເອີ່ນສຳຄັນຄະນຽມ.”
29ປອ່າງນອຸ໊ຍອູ່ຣ່າ ປຣ໋ອກນອຸ໊ຍເກັບພາສີເອີ່ມລັດທະບານໂຣມບິຈເຊີ່ງເມຣື່ອຍມອ່າງກຶ໋ອປຣຽນຕີ່ອໂຢຮັນ ຄະຍອມລັບພະເຈົ້າຍຸດຕິທຳ ເພາະແມ່ຍ່ອມມີ່ອໂຢຮັນ ເບີ່ອມສິນບັບຕິສະມາແມ່ຕີ່ອ. 30ແຕ່ແມ່ຟາລີຊາຍ ແລະ ແມ່ທຳມະຈານ ຕີ່ອໂມເຊ ປະຕິເສດທີ່ເມະຍອມລັບຈຸດປະສົງຕອີ່ພະເຈົ້າທີວຸ່ນສຳລັບແມ່ແງ່ອ ຍ້ອນແມ່ເອີ່ນເມອີດລັບສິນບັບຕິສະມາຕ໊ອະໂຢຮັນ.
31ພະເຢຊູເຈົ້າຣຽນນວ່າວ ແນອ່,“ຕ໊ອະຢັງແອ່, ມ໊ອະອາເມະປຽບນອຸ໊ຍສະໄໝແນ່ອ ຕ໊ອະຢົ່ວແງອ່? ມ໊ອະແມ່ປຽບວຸ່ນມວຍເນ່ອຍແນ່ອ? ຄະປຽບວຸ່ນມ່ວຍເນອ່ຍນຸ໊ອຍທີ່ເອີ່ນຍອມລັບໂຢຮັນ ເທິງເອີ່ນຍອມລັບອາ. 32ຄະປຽບປໍ່ອມວຍເນ່ອຍແມ່ກວານທີ່ຢຸ໊ອກົ່ວຫຼິ່ນຕີ່ອຕະຫຼາດ ກຣົ່ວຕ໊ອະເບີ່ອນຮື່ແນ່, ‘ຍ່າເສບເພງມີ່ອຟ້ອນ ແວ່ພັດເອີ່ນຟ້ອນລຳ ຍ່າລອງເພງຕ໊ອະນຸ໊ອຍເກດ ແຕ່ແວ່ພັດເອີ່ນກຣົ່ວເຍື່ອມ.’ 33ວຸ່ນຢັງແອ່, ແວ່ເອີນຕຣໍ່ເກຼີມຕ໊ອະໂຢຮັນ ບັບຕິສະໂຕ ແລະ ຕ໊ອະອາເມຣື່ອ ໂຢຮັນບິຈບຶ໋ອ ເອີ່ນຈ່າ ແລະ ເອີ່ນເຍດ ຕອາກຕອວຍ ອະງຸ່ນ ແຕ່ແວ່ພັດເຕນແນ່ອ,‘ເຈຣີບວຸ່ນບຣ໊ະຣ່າຍມຸດ’ 34ຕໍ້ເບິອຈ ປລັກຕອາກ ຕໍ້ກວານມະນຸດບຶ໋ອ ວຸ່ນເທິງຈ່າ ເທິງເຍດ ແວ່ຊຳ້ພັດແຣະເຕນ,‘ເຮ້ນ່າເຣີ່ງ ນອຸ໊ຍແນ່ອ ອື່ວຸ່ນນອຸ໊ຍ ຈ່າຢຶ໊ອເກີນ ເມີດບອູ່ເຍດ ເທິງ ວຸ່ນ ເບີ່ອນຕ໊ອະ ນອຸ໊ຍເກັບພາສີ ແລະ ນອຸ໊ຍເອີ່ນກົ່ວຕ໊ອະສິນທຳເມຣື່ອ.’ 35ເຖິງແວ່ເມະເອີ່ນຍອມລັບອາຄະນຽມ, ແຕ່ສະຕິປັນຍາຕີ່ອ ພະເຈົ້າ ບິຈຕໍ່ຣເປຼ໋າະ ວຸ່ນຄວາມຈິງຕ໊ອະ ຊີວິດ ຕີ່ອນອຸ໊ຍເຕຣີ່ມຣ່າ ທີ່ຍອມລັບເຊື່ອ.”
ພະເຢຊູ ຕ໊ອະຢຣ່າມຊີໂມນນອຸ໊ຍຟາຣີຊາຍ
36ມວຍເງອ່ ວຸ່ນນອຸ໊ຍຟາລີຊາຍມວຍຣ່າ ຣຽນມີ່ອພະເຢຊູເຈົ້າເຣິອກຈ໋ອງຕ໊ອະຮື່, ພະອົງເຈົ້າບິຈມຸດໂຮ້ເນີຢຣ່າມອື່ແອ່ ແລະ ພະອົງ ກົ່ວກຸ່ຍຢຣໍ໊ຈັກຮື່. 37ເຣີ່ງເຮ້ ຕ໊ອະເມືອງແງອ່ ນະວຸ່ນ ແມ່ເຕຣ່ຍຊົ່ວນອຸ໊ຍບາບ ມວຍຣ່າ ອື່ເຄີຍເບີ່ອມຜິດສິນທຳ ເບີ່ອມບາບໜາ ອື່ບິຈເຊີ່ງ, ພະເຢຊູເຈົ້າບຶ໋ອຈ໋ອງ ຕ໊ອະຢຣ່າມ ຕີ່ອ ນອຸ໊ຍຟາລີຊາຍ ເຢ່ອຍຍແງ່ອ ເຣິອກເກິ່ນນ່ອຽງນວໍ່ບອອກ ວຸ່ນຕອາກຮະອ່ອມລາຄາແພງເຕັມນ່ຽງແງ່ອ ເຈ໊ອເຣິອກໂຮ້ຢຣ່າມ ຊີໂມນ. 38ອື່ບິຈມຸດໂຮ້ເນີຢຣ່າມ ແລະ ບຶ໋ອເຢີ່ອງປັກປຶດ ພະເຢຊູເຈົ້າ ທັບໆຢອີ່ງພະອົງ. ເຢ່ອຍແນ່ອ ກຣົ່ວເຢື່ອມ ຕອາກມັດເລຼື່ອຍຣຸ໊ ຕຣໍ່ຢອິ່ງ ພະອົງ ຈົນຢີ່ອງພະອົງຣາກ ເຈ໊ອແອ່ ເຈຣີບຈ໋ອກຊ໋ອກຮື່ ຈອວດ ຢອິ່ງພະເຢຊູ ເທິງອື່ມຸກ ຢອິ່ງພະເຢຊູ ແລະ ເຈຣື່ອຍຢອີ່ງ ພະອົງຕີ່ອ ຕອາກຮະອ່ອມ ແງ່ອ. 39ເບິ໋ອຈ ຊີໂມນ ນອຸ໊ຍຟາລີຊາຍ ຢໍ່ທີ່ມີ່ອພະອົງບຶ໋ອ ເຕີຢັງແອ່ ອື່ແອ່ຄະຄິຶດເຕື້ອເກຼີມຮື່, “ຕ໊ອະນອຸ໊ຍແນ່ອ ງຽດອື່ວຸ່ນ ນອຸ໊ຍທໍານວຍ ມອາດໆ ອື່ຄະເມະຕອຸກ ເເມ່ເຕຣ່ຍ ທີ່ໂປ໊ຍຣັບອື່ແງ່ອ, ມ໊ອະວຸ່ນນຸ໊ອຍຢັງແງ່ອ ອື່ຄະຕອຸກເຢ່ອຍແນ່ວຸ່ນນອຸ໊ຍບາບ ເທິງບາບໜາ.”
40ເຈ໊ອແອ່ ພະເຢຊູເຈົ້າ ຄະຣຽນຕ໊ອະ ຊີໂມນ ແນອ່,“ຊີໂມນເລີ໋ ອາວຸ່ນມວຍເນ່ອຍເມະຣຽນຕ໊ອະສາ.” ຊີໂມນ ມໍ່ອແນ່ອ,“ມີ່ອຣຽນໂລດ ອາຈານເລີ໋.” 41ເຈ໊ອແອ່ ພະເຢຊູເຈົ້າຣຽນເລື້ອງແນ່ ມີ່ອແມ່ເຢອ່ຍ,“ນະວຸ່ນ ແມ່ກຼໍ່ ບອ່ານຣ່າ ທີ່ນະວຸ່ນ ລຸ່ງປຣັກ ຕີ່ອ ກຼ່າລຸ່ງມວຍຣ່າ ນອຸ໊ຍມວຍຣ່າ ວຸນລຸ່ງປຣັກ ເຊີ່ອງກລຳ່ຫຼຽນ. 42ວ່າບອ່ານຣ່າເອີ່ນວຸ່ນປຣັກເມະຢອ່ວນລຸ່ງຕ໊ອະກຼ່າລຸ່ງ ຢັງແອ ກຼ່າປັຣກກາເລີຍຍົກລຸ່ງແງ່ອເອີ່ມວ່າ ບອ່ານ ຣ່າຕີ່ອ ເອີ່ນນະມີ່ອ ວ່າ ຢອວນວິ່ງ ຊີໂມນ ເຣນຕ໊ອະອາເຢ່ອຍ ວ່າບອ່ານ ຣ່າແນ່ອ ກຼ່າມ໊ອະເມະເຕີອບກຼ່າລຸງແງ່ອ ຮອມເບີ່ອນຮື່?”
43ຊີໂມນ ມໍ່ອແນອ່,“ອາຫຼິ່ງແນ່ອ ຄະງຽດນອຸ໊ຍທີ່ຈຣີບບິຈຍົກລຸ່ງເອີ່ມອູ່ຮ່ອມເບີ່ອນແງອ່ເມະ.”
ເຈ໊ອແອ່ ພະເຢຊູເຈົ້າມໍ່ອແນອ່,“ສາຄຶດແງ່ອຕໍ່ຣເມະ.” 44ເບິອຈພະເຢຊູ ຮວ່ຽວເຣີ່ງແມ່ເຕຣ່ຍແງ່ອ ເຈ໊ແອ່ ອື່ຣຽນຕ໊ອະ ຊີໂມນແນ່ອ,“ ສາເຕີສິ່ງທີ່ແມ່ເຕຣ່ຍແນ່ເບີ່ອມເລິ໋ເອີ່ນ? ອາບິຈມຸດກົ່ວໂຮ້ເນີຢຣ່າມສາ ແລະ ເອີ່ນວຸ່ນສາຈ໋ອກຕອາກຣ່າວຢອິ່ງເອີ່ມອາຕີ່ອ ແຕ່ເຢ່ອຍແນ່ອ ບິຈ ຣ່າວຢອິ່ງອາ ຕີ່ອຕອາກມັດຮື່ ແລະ ຈອວດຢອິ່ງອາຕີ່ອຊ໋ອກຮື່. 45ເອີ່ນວຸ່ນສາມຸກ ອາ ເພື່ອວຸ່ນການຕ້ອນລັບ, ແຕ່ແມ່ເຕຣ່ຍແນ່ອ ເຕີ້ອມມໍ່ຮ ອາມຸດໂຮ້ເນີຢຣ່າມສາແນ່ອ ນະເອີ່ນອື່ເມຮີ່ງມຸກຢອີ່ງອາ. 46ເອີ່ນວຸ່ນສາຈ໋ອກອາກຮະອ່ອມເຈຣື້ອຍຕວ໊າຍອາ ແຕ່ເຢ່ອຍແນ່ອ ບິຈຈ໋ອກຕອາກຮະອອມ ລາຄາແພງເຈຣື່ອຍຢອິ່ງອາ. 47ຢັ່ງແອ່ເມະ ອາຣຽນແວ່ເຕຣີ່ມຣ່າແນອ່, ເພາະເມະເຕຣ່ຍແນ່ອ ວຸ່ນຄວາມເຕອີບຕິ໋ມອາດ ເປຼ໋າະມີ່ອເຕີແນ່ອ ການບາບເປ໊ອເນ່ອຍຕີ່ອແມ່ເຕຣ່ຍເນ່ອ ເບິ໋ອຈໂຕ໋ຍບິຈລັບການປລຸ໋ປຼ່າວ, ແຕ່ກຼ່າບິຈລັບການປລຸ໋ປຼ່າວເກະໆ ນອຸ໊ຍແງ່ອຄະສະແດງຄວາມເຕີອບເກະໂຮ້.”
48ເຈ໋ອແອ່ ພະເຢຊູເຈົ້າບິຈຣຽນຕ໊ອະເມເຕຣ່ຍແງ່ອນວ່າວ ແນອ່,“ການບາບເປ໊ອເນ່ອຍຕີ່ອສາແງ່ອ ເບິ໋ອຈບິຈລັບການປລຸ໋ປຼ່າວໂປຣ໋ຍຢໍ້.” 49ເຈ໊ແອ່ ປອ່າງນອຸ໊ຍ ອູ່ຣ່າທີ່ຈ໋ອງ ເອຣ່ງ ຕ໊ອະພະອົງ ລ່າງນອຸ໊ຍຄະຄຶດຕ໊ອະງຣຶ່ນເກຼີ່ມຮື່ແນ່ອ.“ຢໍ່ແນ່ອມ໊ອະວຸ່ນນອຸ໊ຍແງ່ອ ແຣະມໍ່າ ອະໄພບາບ ເຊິ່ງວຸ່ນນອັ່ນພະເຈົ້າມວຍຣ່າທີ່ໂຕ່ອເບີ່ອມ?”
50ເຈ໊ອແອ່ ພະເຢຊູເຈົ້າເຕນຕ໊ອະແມ່ເຕຣ່ຍແງ່ອ, “ຄວາມເຊື່ອຕີ່ອສາບິຈຊອ່ຍຊີວິດສາໂປັຍຕ໊ອະບາບ ມີ່ອສາເຣິອກ ວຸ່ນຄວາມສຸກຮະເອອີ້ຍເກຼີ່ມຢໍ້ອ ແລະ ມີ່່ອພະເຈົ້າປະທານເອີ່ມສັນຕິສຸກສາຕີ່ອນວ່າວ.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ລູກາ 7: NEV
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Nyaheun (ຍ່າເຫີນ ) Bible by Beyond Translation is licensed under Creative Commons Attribution-ShareAlike 4.0 License.