Matayo 2
2
Òndʉ̀aꞌba ɨngale ɨ̀ga ìtú nɨ pʉ̀rɨa vɨɨ ɨnɨ
1Ace Yesu nɨ òsijʉ Betelehemu àkú ìmgbélé Yudea nɨ vɨɨ alɨa baá, isú dèè opɨ drʉ Herode ɨ, òndʉ̀aꞌba omu drʉ naa vɨɨ cá Yerusalemua ɨngajʉ àkú ìmgbélé àloo ɨ̀ga ìtú nɨ pʉ̀rɨa vɨɨ alɨa 2díká ꞌba ndee zí kɨ́nɨ̀, “Mva òsile opɨ drʉ ꞌba Yahudi nɨ ꞌyowa vɨɨ ɨ̀rɨ ngòa yà? Àma ndrè ɨwɨ́lɨ́ ɨ̀rɨ awo ɨ̀cetaa drʉ vɨɨ nɨ pʉ̀rɨa vɨɨ dèè àma àkú ìmgbélé àma ꞌyowa ovʉle ɨ̀ga ìtú nɨ pʉ̀rɨa vɨɨ alɨa ra ànɨyɨ̀ àma ca ɨ̀rɨ ìnzi ꞌdò ɨ.”
3Opɨ Herode nɨ eꞌyo ꞌdɨ̀vɨɨ ɨrɨjʉ ꞌba, ca òrì yɨ̀ díká ꞌba drɨ́á Yerusalemu alɨa vɨɨ cá pàbaa òrì yɨ̀. 4Ɨ̀rɨ nɨ ꞌba ꞌwàrà orɨ ɨteꞌba vɨɨ ɨnɨ trarɨa díká ɨmbaꞌba àzítáá Orɨ awo vɨɨ ɨnɨ ɨmbaꞌba vɨɨ ɨnɨ be, zi ɨnɨ tia kɨ́nɨ̀, “Kristo ndee nɨ ngaa òsi ngʉ̀a yà?”
5ꞌBa ndee òmvɨ́ ɨ̀rɨ́ yɨ́ kɨ́nɨ̀, “Ɨ̀rɨ muu òsii àkú ìmgbélé Betelehemua àngʉ̀ Yudea nɨ vɨɨ alɨa. Àrɨ̀yɨ̀kʉ ́ꞌbarʉʉ eꞌyo ondrɨ́lé vɨɨ sɨ̀ vɨ́nɨ:
6‘Te àmɨ ꞌba ovʉle àkú Betelehemu drʉ vɨɨ alɨa àngʉ̀ Yuda awo vɨɨ alɨa vɨɨ ɨnɨ drʉ,
àmɨ ngaa ovʉ eꞌyo drìcezà nɨ yɨ̀ Yudea àva lele drʉ kʉ;
àrɨ̀yɨ̀kʉꞌbarʉʉ ꞌba drì ce vɨ́ɨvɨɨ nɨ nga pʉ̀ʉ àmɨ ɨsɨlɨa
mujʉ ꞌba ma awo Isirali nɨ vɨɨ ɨnɨ drì cejʉ ra.’#Mika 5:2”
7Acete Herode omve òndʉ̀aꞌba omu drʉ ɨngale ìtú nɨ pʉ̀rɨa le drʉ vɨɨ ɨnɨ cɨ́rɨ́cɨ̀rɨ̀ drʉ díká ònì ɨnɨ tia ɨwɨ́lɨ́ ꞌdɨ̀vɨɨ ɨ̀ꞌdanɨ òkòa àrɨngérè yà vɨɨ ra. 8Tèvɨ́nɨ pè ɨnɨ ti Betelehemua díká ꞌyo ɨnɨ yɨ́ kɨ́nɨ̀, “Àmɨ mú díká àmɨ ɨfɨ́ mva ꞌdɨ̀vɨɨ kara onʉ́ʉ́. Àmɨ tè ɨ̀rɨ isúu ꞌba, àmɨ jí oꞌdúkóa má yɨ́, ànɨyɨ̀ manɨ mujʉ pàbaa ɨ̀rɨ ìnzìjʉ ɨ̀ndɨ̀ benì.”
9ꞌBa ꞌdɨ̀vɨɨ ɨnɨ eꞌyo Opɨ nɨ ꞌyole vɨɨ ɨrɨjʉ ꞌba, kódrì mu ra, díká ɨwɨ́lɨ́ ndráánɨ́ ɨnɨ nɨ ndrèle ɨ̀ga ìtú nɨ pʉ̀rɨa vɨɨ rɨ mu ɨnɨ drìlia kpere ɨ̀rɨ nɨ ka sòrɨa oru kara mva ꞌdɨ̀vɨɨ nɨ ovʉjʉ vɨɨ drìa. 10ꞌBa ꞌdɨ̀vɨɨ ɨnɨ nɨ ɨwɨ́lɨ́ ꞌdɨ̀vɨɨ ndrèjʉ ꞌba, àyɨ̀kò ki ɨnɨ caa ꞌdɨ̀. 11Ɨnɨ nɨ fɨjʉ jó mva ndee nɨ ovʉjʉ vɨɨ alɨa ba, ne mva ndee ɨnɨ ayopi Mariamu be, sí ùlùúti nyaa díká ìnzí ɨ̀rɨ ra. Acete àyú ꞌyowa màgálà lonyɨ tà mbajʉ vɨɨ ɨnɨ ti díká fé àfa fèzà àjè be golidɨ̀ drʉ vɨɨ ɨ, àfa ɨvezà àjí be ndrʉ̀ʉ̀ kɨ̀le masaa doo lé vɨɨ ɨnɨ díká òdʉ àjí àrìàrì vɨɨ ɨ àfa fèzà drʉ mva ꞌdɨ̀vɨɨ yɨ́. 12Orɨ nɨ ꞌba vɨɨ ɨnɨ bílé lɨjʉ léti orobɨa yɨ̀ drìkàjʉ àva Herode bʉ kʉ ꞌba, ꞌba ndee mvɨ́ ꞌyowa àkúá léti mgbi yɨ̀.
Yesu òdékʉá be dùjʉ Ijipitia vɨɨ
13Òndʉ̀aꞌba vɨɨ ɨnɨ mvɨjʉ ꞌbaá, malaika Yehova awo vɨɨ ɨ̀ꞌdanɨ Yusufu yɨ́ léti orobɨ alɨa yɨ̀ kɨ́nɨ̀, “Mɨ ngaa, mɨ ꞌdu mva vɨɨ ɨnɨ ayopi be díká mi dù Ijipitia. Àmi ovʉ́ àle kpere manɨ murɨa ꞌyorɨa àmɨ ká drì àrɨ̀yɨ̀kʉ Herode ni koo lèe muu mva ꞌdɨ̀vɨɨ drùu ɨ̀rɨ kijʉ ra.” 14Ànɨ Yusufu ꞌdʉ mva ndee ɨnɨ ayopi be iní naa yɨ̀, dú Ijipitia, 15ovú àle kpere Herode nɨ drària. Eꞌyo ꞌdɨ̀vɨɨ ó ànɨ fèjʉ eꞌyo ndráánɨ́ Yehova nɨ azílé ́ꞌbarʉʉ eꞌyo ondrílé vɨɨ tia vɨɨ ɨ̀rɨ ca nɨ kara kòꞌbò benì kɨ́nɨ̀, “Ma omve mvamàa nɨ àngʉ̀ Ijipitia vɨɨ kʉjʉ nɨ̀.”#Hosia 11:1
Herode ni fèjʉ anzɨ nyɨ́rɨ́ òkijʉ vɨɨ
16Herode nɨ amajʉ kɨ́nɨ̀ òndʉ̀aꞌba ngaꞌba ɨ̀ga ìtú nɨ pʉ̀rɨa vɨɨ olé nɨ ba, ca òmbàyɨ̀, díká fè òkpo àsɨ̀kárɨ̀ ɨnɨ yɨ́ anzɨ nyɨ́rɨ́ àguanzɨ drʉ Betelehemua àloo ògògò nàa ɨlɨbe ìrì sijʉ ìlèè vɨɨ ɨnɨ òkijʉ drɨ́á, ꞌo eꞌyo ꞌdɨ̀vɨɨ eꞌyo ɨ̀rɨ nɨ ndráánɨ́ ònìle òndʉ̀aꞌba na ɨnɨ tia sawà òkò ɨwɨ́lɨ́ ꞌdànaa nɨ ɨꞌdajʉ vɨɨ butia yɨ̀. 17Ànɨyɨ̀ eꞌyo ꞌdɨ̀vɨɨ fè eꞌyo ndráánɨ́ Yeremia eꞌyo ondrílé vɨɨ nɨ sɨ̀le vɨɨ ca kòꞌbò kɨ́nɨ̀:
18“Oyi nga Ramaa,
oyi àwʉ nɨ díká màa ꞌbàzà nɨ.
Rakeli rɨ wʉ anzɨ nɨ awo vɨɨ ɨnɨ eꞌyo yɨ̀
díká gà así òmɨ̀zà sɨ̀
àrɨ̀yɨ̀kʉ ɨnɨ nɨ drɨ̀jàle ꞌba vɨɨ yɨ̀.”#Yeremia 31:15
Drìkàjʉ Yesu be Nazeretia vɨɨ
19Herode nɨ dràjʉ ꞌba vɨɨ butia, Malaika Yehova awo vɨɨ aloo ɨ̀ꞌdanɨ Yusufu yɨ́ Ijipitia léti orobɨa yɨ̀ 20díká kɨ́nɨ̀, “Mɨ nga, mɨ ꞌdʉ mva ꞌdɨ̀vɨɨ ɨnɨ ayopi be díká mɨ kàdrì ɨnɨ be àva àngʉ̀ Isirali nɨ vɨɨ alɨa àrɨ̀yɨ̀kʉ ꞌba ndráánɨ́ lèꞌba ɨrɨ kiꞌba vɨɨ ɨnɨ òdrá ace ꞌba.”
21Ànɨ Yusufu ꞌdʉ mva ndee ɨnɨ ayopi be díká ká drì àngʉ̀ Isirali nɨ vɨɨ alɨa ra. 22Te Yusufu tè ɨrɨ Herode mvápia Acilia ca opɨ drʉ atapi kara àngʉ̀ ɨ̀ga omvele Yudea drʉ vɨɨ alɨa, ca òrì yɨ̀ mujʉ ale, ko drì mu Galilia àrɨ̀yɨ̀kʉ ndráánɨ́ Orɨ nɨ ɨ̀rɨ bílé lɨjʉ orobɨ alɨa ra vɨɨ yɨ̀, 23díká mu rɨ àkú omvele Nazereti drʉ vɨɨ alɨa. Eꞌyo ꞌdɨ̀vɨɨ fèle eꞌyo ndráánɨ́ ꞌba eꞌyo ondrílé vɨɨ ɨnɨ ꞌyole kɨ́nɨ̀, “ꞌBa mu ɨrɨ omve Nazeretio nɨ vɨɨ ca kòꞌbò.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Matayo 2: MADI-URL
Highlight
ಹಂಚಿಕೊಳ್ಳಿ
ಕಾಪಿ
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved