प्रेरित.कामी 22
22
तुन्दरा होड़ दुबाःड़े पौलुस आला भासन
1“ए बोकोकु हेतरअ बाबाकु नहाअः दो अपन पछ रे एतान कंहड़ीः दिंग के आयुमेपे।” 2हुंकू नोःआँ आयुम केते ची पौलुस हुंकू के इब्रानी भाखा रे कंहड़ीः दाय आउर गी सिड़िग्याः नाकु, तब हुनी बेताअः दिकुआय।
3 #
प्रे.कामी 5:34–39
ईङ जाहुदी हेके, ईङ आला जनम दो किलकिया रेनअः तरसुस सहर रे हुयाव थिना, बकिर ईङ आला असुल-हरा निआँ सहर रे हुयाव थिना। गमलिएल आला पाँव दुबाःड़े दुड़ूः केते, ईङ के आबु आलकु मुसा आला कनहुन रेनअः ठीक रिती रे सिखाव लिङाकु, ईङ परमेसर आला जुरजुट रे ताही निनिंग जे लकान तिसिंग आपे एदान पेआ। 4#प्रे.कामी 8:3; 26:9–11नोःआँ होरा रे चलाअ कु आउराईत हेरेलकु के ईङ तोल-तोल जेहेल आदेर लिकुईंङ, आउर नोःआँ जगुत सताव लिकुईंङ ची हुंकू के गोएःग होः गोएःग ची लिकुईंङ। 5नोःआँ बात रेनअः महापुरोहित तेकर जामा बड़े पंचाईत गोवाह एदान कुआ। हिंकु तरअः ईङ चिठी ईदी केते दमिस्क रिनकु बोकोकु दुबाःड़े सेनोः किनिङ, जेकर से ची होनाःड़े रिनकु होड़कु के होः जिरोसलेम रे तोल आगु कुईंग तेकर डांड़ एमा कुईंग।
अपन मन रूरुवाड़ रआ बबखनाव
(प्रेरित.कामी 9:1–19; 26:12–18)
6जब ईङ डिंडोअ-डिंडोअ दमिस्क हेनाःड सोदोर निनिंग दो, नोकान नेना ची दुपहरा लकान सिरमा तरअः अचाका जोर से मरसल ईङ आला चौगिरदा चमकाव नेना। 7तेकर ईङ ओत रे नुर निङ तेकर ए साऊल, ए साऊल आम ईङ के एता लःअय सताईङाम मेन केते मियांड सबद आयुम नेना। 8परभु आम ओके हेके? मेन केते ईङ बेता लियीङ, ईङ नासरत रिनी ईसु हेके, जेके आम सताईङाम मेन केते कंहड़ी रूवाड़ लःअय। 9ईङ आलकु गाती मरसल के दो नेल लअकु, बकिर ईङ लोः बाते केनाय हुनी आला सबद के काकु आयुम लआ। 10तब परभु ईङ एतानीईङ मेन केते कंहड़ी लाईङ, बिरिःड मे आउर दमिस्क सहर रे सेनमे, आमके जे ककामी एदनाअ होना जामा के हिनाःड़े उदूः केमेआकु। 11होना मरसल रअः लवकाव चलते ईङ नेनेल काईङ दाड़ी केना, हिना लःअय ईङ आलकु गाती, तीः तिंग के सःब केते, ईङ के दमिस्क डुरीयाव ईदी लिङाकु।
12“होनाःड़े हनानियस नुमू रिनी ईङ लोः भेंटोः हीःग नेनाय, जे कनहुन रे चलाअ वाला भक्त ताही नेनाय, होनाःड़े ताहिनोआकु बासिंदा जामा जाहुदीकु रे बढ़ियाँ नामी होड़ ताही नेनाय। 13हुनी ईङ दुबाःड़े हीःग नेनाय तेकर ईङ हेनाःड रे तिंगु केते बेता लिङाय, ‘ए बोको साऊल, फिन से नेलेमे’ आउर हेने घड़ी ईङ आला मेःड खोलाव ना, तेकर ईङ हुनी के नेल लियीङ। 14तब हुनी, ‘आबु आलकु पुरखाकु आली परमेसर आम के निआँ लःअय ठहराव तदमेआय, ची आम हुनी आला मरजी के पापाड़ी लःअय आउर हुनी धरमी होड़ के नेनेल लःअय आउर हुनी आला आहा तरअः बात के आ-आयुम लःअय चुनाव लेमेआय मेन केते बेता लियाय। 15एता लःअय ची आम के परमेसर पखा तरअः जामा मनवाकु मड़ांग रे, होना जामा बात रेनअः गोवाह एमोअ एदनाअ जेके आम नेल तदाम आउर आयुम तदाम। 16नहाअः दो एतान लःअय दिरिः दाम? बिरिःड केते बतिस्मा ईदी मे, आउर हुनी आला नुमू रे गोहराव केते अपन पाप तरअः छुटकानी नामेमे।’
एटाअ जाईतकु रे पापरचार
17“जिरोसलेम रूवाड़ केते, ईङ मुसिङ बड़े बिनती ओड़ाअ रे बिनती किनिङ दो ईङ दर्सन नेल लाईङ। 18ईङ परभु के नेल लियीङ तेकर नोकान हुनी ईङ के बेताईङ-केनाय। उसरायमे आम जिरोसलेम तरअः तुरते सेनोः जुनोःमे एता लःअय ची हुंकू ईङ रअः बारे रे आम आला गोवाही के इरकु मनआ। 19ईङ हुनी के कंहड़ी रूवाड़ोः लियीङ, परभु नुकू पाड़ीआकु ची ईङ आम तेङ रे जे बिसवासे-आकु, हुंकू होड़कु के जे जेहेल लःअय आउर कोकोड़ाराव लःअय जामा बिनती ओड़ाअ रे सेन थिनिङ। 20#प्रे.कामी 7:58तेकर जब आम आली गोवाह स्तेफनुस के गोजी केनाकु, हिमीन रे ईङ होः होनाःड़े तिंगु थिनिङ तेकर नोःआँ बात रे सहमत ताही निनिंग, आउर जे बेरा हुनी के गोजी केनाकु, हुंकू आला गेन्दरअ के ईङ ओगराय केनिङ। 21नोःआँ रे परभु ईङ के, ‘सेनोः जुनोः मे, एता लःअय ची ईङ आम के एटाअ-एटाअ जाईतकु दुबाःड़े लंका-लंका कुलगोःड मिईङ,’ बेता लिङाय।”
22नोःआँ जगुत पौलुस आला बात के आयुम लअकु, तेकर जोर से गुल लअकु नोकान होड़ के दुनिया तरअः नास गुल ताईपे, नुई जिवीःडोः लाईक कनियाँ 23जब हुंकू गुले-केनाकु, तेकर अपन गेन्दरअ के उड़ूंग-उड़ूंग गिड़ी केनाकु, तेकर सिरमा रे धुड़ी के ओटांङे-केनाकु, 24हिमीन रे पलटनकु आली सरदार “नुई के छावनी रे इदीपे तेकर कोर्ड़ाव केते जचाँई पे, जेकर से हुंकू होड़कु एतान चलते हुनी बिरुध रे नोकान गुल दाकु सेके पाड़ी कु मेन केते बेता लिकुआय।” 25जब हुंकू पौलुस के कोकोर्ड़ाव लःअय हुनी के तोली केनाकु, दो पौलुस हिनाःड़े तिंगु उनी सुबेदार के बेता लियाय, आम मियांड रोमी रिनी होड़ के कनहुन रआ मोताबिक जेकर रे बेगार दोस नामते कोकोर्ड़ाव उचित एदनाआ एतान?
26सुबेदार नोःआँ आयुम केते पलटनकु आली सरदार दुबाःड़े खभाईर एमोअ सेन केते बेता लियाय, “आम एतान दाम? नुई दो रोमी रिनी होड़ हेके।”
27तब पलटनकु आली सरदार पौलुस दुबाःड़े हीःग केते कुली लियाय, “ईङ के उदूः गेमे आम रोमी रिनी होड़ हेके एतान?”
पौलुस “हाँ ईङ हेके,” कंहड़ी लःअय।
28नोःआँ आयुम केते पलटनकु आली सरदार “ईङ के रोमी बनाअः लःअय ढेर ढिबुवा एमा केते भेटाव ताना” कंहड़ी लःअय।
“ईङ दो जनम तरअः गी रोमी हेके” मेन केते पौलुस कंहड़ी लःअय।
29हिना लःअय जे होड़ पौलुस के कुली-गथा वाला ताही नेनाकु, हुंकू तुरते हुनी दुबाःड़े तरअः ओचोअ नाकु तेकर पलटनकु आली सरदार होः नोःआँ पाड़ी केते ची, नुई रोमी रिनी होड़ हेके सेके ईङ हुनी के तोल ची तदकुईङ सोंचाव केते बोरोअ नाय।
बड़े पंचाईत रअः मड़ांग रे पौलुस
30दोसरा हिला हुनी ठीक-ठीक पापाड़ी रअः इकछा रे, ची जाहुदीकु हुनी तेङ रे एतान लःअय दोस लगायाकु, हुनी आला हाथकड़ी राड़ा लअकु, तेकर महापुरोहित तेकर जामे बड़े पंचाईत के जवारोअ लःअय हुकूम एमा लिकुआय, तेकर पौलुस के लतार ईदी केते, हुंकू मड़ांग रे तिंगु किदयाय।
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
प्रेरित.कामी 22: ASR
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ತಾಳೆಮಾಡಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2023 NLCI CC BY-NC-ND 4.0