ငဝ်ႈ 14
14
ဢႃႇပြမ်ႇၵႄႇသႄႇလေႃးတႃႉ
1ၶုၼ်ႁေႃၶမ်းဢမ်ႇရေႇၽႄးလႃႉ၊မိူင်းသိၼႃႇ၊ၶုၼ်ႁေႃၶမ်းဢႃႇရုတ်ႉ၊မိူင်းဢေႇလႃႉသႃႇ၊ၶုၼ်ႁေႃၶမ်းၶေးတေႃးရလေႃးမႃႉ၊မိူင်းဢေႇလမ်ႇ၊တင်းၶုၼ်ႁေႃၶမ်းတိတလႃႉ၊မိူင်းၵေႃးဢိမ်ႇ၊ၶဝ်သီႇပႃးၼႆႉ။- 2တိုၵ်းသိုၵ်းတေႃႇၵၼ်တင်းၶုၼ်ႁေႃၶမ်းႁႃႈပႃးဢၼ်ပဵၼ်ၶုၼ်ႁေႃၶမ်းပႄႇရႃႉ၊မိူင်းသေႃးတုမ်ႇ၊ၶုၼ်ႁေႃၶမ်းၽိရသႃႉ၊မိူင်းၵေႃးမေႃးရႃႉ၊ၶုၼ်ႁေႃၶမ်းသိၼပ်ႉ၊မိူင်းဢႃႇတမႃႇ၊ၶုၼ်ႁေႃၶမ်းသေႇမပႃး၊မိူင်းၸေႇပူဝ်းဢိမ်း၊တင်းၶုၼ်ႁေႃၶမ်း မိူင်းပေႇလႃႇ၊ၸိူဝ်းၼၼ်ႉဢေႃႈ။ မိူင်းပေႇလႃႇ၊ၼၼ်ႉမီးထႅင်ႈၸိုဝ်ႈၼိုင်ႈႁွင်ႉဝႃႈ၊မိူင်းၸေႃႇရႃႉ၊ဢေႃႈ။- 3ၶုၼ်ႁေႃၶမ်းႁႃႈပႃးၼႆႉၽွမ်ႉၵၼ်လႄႈၸုတုမ်ၵၼ်ၵႃႈတီႈထူင်ႉသိတ်ႉတိမ်ႇ၊ဢၼ်မိူဝ်ႈလဵဝ်ႁွင်ႉဝႃႈ၊ပၢင်ႇလၢႆႇတၢႆ၊#14:3 “ပၢင်ႇလၢႆႇတၢႆ” ၵျၢမ်းမူႇၶူႇသျိင်ႇႁွင်ႉဝႃႈ၊ “သေႃးတုမ်ႇ” ဢေႃႈ ၼၼ်ႉဢေႃႈ။- 4ၶဝ်ၶၢမ်ႇယူႇတႂ်ႈမိုဝ်းၶုၼ်ႁေႃၶမ်းၶေးတေႃးရလေႃးမႃႉ၊သိပ်းသွင်ပီတဵမ်တဵမ်သေယဝ်ႉ၊ၼႂ်းပီဢၼ်ထူၼ်ႈထိုင်သိပ်းသၢမ်ပီၼၼ်ႉၶဝ်လုၵ်ႉၽိုၼ်ႉဢေႃႈ။- 5ၼႂ်းပီဢၼ်ထူၼ်ႈထိုင်သိပ်းသီႇပီၼၼ်ႉၶုၼ်ႁေႃၶမ်းၶေးတေႃးရလေႃးမႃႉ၊ဢိၵ်ႇတင်းၶုၼ်ႁေႃၶမ်းဢၼ်ယူႇၽၢႆႇမၼ်းၸိူဝ်းၼၼ်ႉဢွၼ်ၵၼ်ၶီႇသိုၵ်းလႄႈတိုၵ်းတေႃးယႃႉၽဵဝ်ႈၵူၼ်းမဵဝ်းရေႇၽိမ်ႇ၊ဢၼ်မီးၵႃႈၼႂ်းဝဵင်းဢႃသတရုတ်ႉၵႃၼိမ်ႇ၊လႂ်၊ၵူၼ်းမဵဝ်းၸူးၸိမ်ႇ၊ၵႃႈၼႂ်းဝဵင်းႁႃႇမႃႉ၊လႂ်ၵူၼ်းမဵဝ်းဢေႇမိမ်ႇ၊ဢၼ်ယူႇၵႃႈၼႂ်းပၢင်ႇပဵင်းၵိရိယသိမ်း၊လႂ်၊- 6ဢိၵ်ႇတင်းၵူၼ်းမဵဝ်းႁေႃးရိ၊ဢၼ်ယူႇၼိူဝ်လွႆဢေႇတုမ်ႇ၊#14:6 “လွႆဢေႇတုမ်ႇ” ၵျၢမ်းမူႇၶူႇသျိင်ႇႁွင်ႉဝႃႈ၊ “လွႆၸိရႃႉ” ဢေႃႈ ၸိူဝ်းၼၼ်ႉပႅတ်ႈသေလႄႈလိုပ်ႈလမ်းၸွမ်းတေႃႇႁွတ်ႈထိုင်ဝဵင်းဢေးလပရၼ်ႇ၊ဢၼ်မီးၵႃႈႁိမ်းထိူၼ်ႇပုၼ်ႉၼၼ်ႉဢေႃႈ။- 7ၵမ်းၼၼ်ႉ၊ၶဝ်ၶိုၼ်းပွၵ်ႈမိူဝ်းၸူးတၢင်းဝဵင်းၵႃႇတေႇသႃႉ၊ဢၼ်ႁွင်ႉဝႃႈ၊ဝဵင်းဢိၼ်ႇမိသပတ်ႉ၊ပုၼ်ႉဢေႃႈ။ ၶဝ်တိုၵ်းတေႃးပႄႉၼႅင်ႇၵူၼ်းမဵဝ်းဢႃႇမလႅၵ်ႉ၊လႂ်၊ဢိၵ်ႇတင်းၵူၼ်းမဵဝ်းဢႃႇမေႃးရိ၊ဝဵင်းႁႃႇၸၸုၼ်ႇတႃႇမႃႇ၊လႂ်ၸိူဝ်းၼၼ်ႉတင်းသဵင်ႈတင်းလူင်ဢေႃႈ။
8ပိူဝ်ႈၼႆလႄႈၶုၼ်ႁေႃၶမ်းမိူင်းသေႃးတုမ်ႇ၊မိူင်းၵေႃးမေႃးရႃႉ၊မိူင်းဢႃႇတမႃႇ၊မိူင်းၸေႇပူဝ်းဢိမ်း၊တင်းၶုၼ်ႁေႃၶမ်းမိူင်းပေႇလႃႇ၊ၶဝ်ႁႃႈပႃးၶီႇသိုၵ်းၶိုၼ်ႈၸူးတီႈပၢင်ႇပဵင်းသိတ်ႉတိမ်ႇ၊သေလႄႈ၊- 9တိုၵ်းၵၼ်တင်းၶုၼ်ႁေႃၶမ်းသီႇပႃးဢၼ်ပဵၼ်ၶုၼ်ႁေႃၶမ်းမိူင်းသိၼႃႇ၊မိူင်းဢေႇလႃႉသႃႇ၊မိူင်းဢေႇလမ်ႇ၊တင်းၶုၼ်ႁေႃၶမ်းမိူင်းၵေႃးဢိမ်ႇ၊ၸိူဝ်းၼၼ်ႉဢေႃႈ။- 10ၵႃႈတီႈၼႂ်းပၢင်ႇပဵင်းထူင်ႉသိတ်ႉတိမ်ႇ၊ၼၼ်ႉမီးလုၵ်းမီးၶုမ်ၼမ်ၼႃႇဢၼ်တဵမ်ဝႆႉတင်းယၢင်ၵႆးတဝ်းမဵဝ်းၼိုင်ႈၼၼ်ႉဢေႃႈ။ မိူဝ်ႈဢၼ်ၶုၼ်ႁေႃၶမ်းမိူင်းသေႃးတုမ်ႇ၊တင်းၶုၼ်ႁေႃၶမ်းမိူင်းၵေႃးမေႃးရႃႉ၊ဢွၵ်ႇပၢႆႈၼႃႈသိုၵ်းၼၼ်ႉၶဝ်တူၵ်းၵႂႃႇၵႃႈၼႂ်းလုၵ်းၼႂ်းၶုမ်ၸိူဝ်းၼၼ်ႉဢေႃႈ။ ၶုၼ်ႁေႃၶမ်းဢၼ်ၵိုတ်းယူႇသၢမ်ပႃးၼၼ်ႉၸမ်ႉ၊ပၢႆႈလွတ်ႈၵႂႃႇထိုင်ၵႃႈၼိူဝ်လွႆဢေႃႈ။- 11ၶုၼ်ႁေႃၶမ်းသီႇပႃးဢၼ်ပႄႉၼႅင်ႇၼၼ်ႉဢွၼ်ၵၼ်သိမ်းဢဝ်ဢုၵ်ႉၸႃႇၶူဝ်းလဵင်းဢိၵ်ႇတင်းၶဝ်ႈၼမ်ႉတၢင်းၵိၼ်ၵူႈၸိူဝ်ႉၵူႈပိူင်ဢၼ်မီးၵႃႈတီႈဝဵင်းသေႃးတုမ်ႇ၊တင်းဝဵင်းၵေႃးမေႃးရႃႉ၊ဢေႃႈ။- 12လေႃးတႃႉ၊ဢၼ်ပဵၼ်လၢၼ်ၸၢႆးဢႃႇပြမ်ႇ၊ဢၼ်ယူႇၵႃႈတီႈဝဵင်းသေႃးတုမ်ႇ၊ၼၼ်ႉၵေႃႈၶဝ်တိၺွပ်းဢဝ်ၵႂႃႇပႃးၸဵမ်တင်းဢုၵ်ႉၸႃႇၵႃႈဢၼ်မၼ်းပိူင်ႇတင်းသဵင်ႈတင်းမူတ်းဢေႃႈ။
13ၵူၺ်းၵႃႈ၊ၵူၼ်းဢၼ်ပၢႆႈလွတ်ႈၵႂႃႇၼၼ်ႉၵေႃႉၼိုင်ႈၵႂႃႇမွၵ်ႇလၢတ်ႈလွင်ႈတၢင်းၸိူဝ်းၼၼ်ႉထိုင်တီႈဢႃႇပြမ်ႇ၊ၵူၼ်းမဵဝ်းႁေႇပြႄး၊ၵေႃႉဢၼ်ယူႇၵႃႈႁိမ်းပႃႇတူၼ်ႈမႆႉၼိမ်မမ်ႇရေႇ၊ၵူၼ်းမဵဝ်းဢႃႇမေႃးရိ၊ၼၼ်ႉဢေႃႈ။ မမ်ႇရေႇ၊တင်းပီႈဢၢႆႈမၼ်းဢေႇသၵေႃးလႃႉ၊တင်းဢႃႇၼေႇရႃႉ၊ၶဝ်သၢမ်ပီႈၼွင်ႉပဵၼ်ၵေႃႉသႄႈဢၼ်ၽွမ်ႉၵၼ်တင်းဢႃႇပြမ်ႇ၊ဢေႃႈ။- 14မိူဝ်ႈဢၼ်ဢႃႇပြမ်ႇ၊လႆႈငိၼ်းၶၢဝ်ႇလွင်ႈဢၼ်လၢၼ်ၸၢႆးမၼ်းလႆႈၶၢမ်ႇပိူၼ်ႈတိၺွပ်းဢဝ်ၵႂႃႇၼၼ်ႉၸိုင်၊မၼ်းႁွင်ႉဢဝ်ၵူၼ်းသိုၵ်းမၼ်းသၢမ်ပၢၵ်ႇပၢႆသိပ်းပႅတ်ႇၵေႃႉပဵၼ်ၶဝ်ၸိူဝ်းဢၼ်ၵိူတ်ႇလဵင်ႉမႃးၼႂ်းႁိူၼ်းၼႂ်းယေးမၼ်းလႄႈလႆႈၽိုၵ်းလႆႈသွၼ်ဝႆႉၼၼ်ႉလႄႈၶဝ်လိုပ်ႈလမ်းၸွမ်းၶုၼ်ႁေႃၶမ်းသီႇပႃးၼၼ်ႉၵႂႃႇတေႃႇထိုင်ႁွတ်ႈဝဵင်းတၢၼ်ႇ၊ပုၼ်ႉဢေႃႈ။- 15မၼ်းၽႄမႅင်ႇၵူၼ်းမၼ်းပဵၼ်လၢႆမူႇလၢႆၸုမ်းသေယဝ်ႉ၊ၶိင်ႇၵၢင်ၶိုၼ်းၸင်ႇတိုၵ်းတေႃးပႄႉၼႅင်ႇၶဝ်သေလႄႈလိုပ်ႈလမ်းၶဝ်ၵႂႃႇတေႃႇထိုင်ႁွတ်ႈဝဵင်းႁေႃၽႃႉ၊ၽၢႆႇႁွင်ႇဝဵင်းတမ်ႇမတ်ႉသၵတ်ႉ၊#14:15 “တမ်ႇမတ်ႉသၵတ်ႉ” ၵျၢမ်းမူႇၶူႇသျိင်ႇ ႁွင်ႉဝႃႈ၊ “ထမ်ႇမသႅတ်ႈ” ဢေႃႈ ပုၼ်ႉဢေႃႈ။- 16မၼ်းသမ်ႉၶိုၼ်းသိမ်းဢဝ်ဢုၵ်ႉၸႃႇၶူဝ်းလဵင်းဢၼ်ၶဝ်တိၺွပ်းဢဝ်ၵႂႃႇၸိူဝ်းၼၼ်ႉဢိၵ်ႇတင်းလၢၼ်ၸၢႆးမၼ်းလေႃးတႃႉ၊ၸႃႉၸဵမ်ဢုၵ်ႉၸႃႇၵႃႈဢၼ်မၼ်းပိူင်ႇတင်းသဵင်ႈတင်းလူင်ဢိၵ်ႇတင်းၽူႈယိင်းတင်းလၢႆတင်းၵူၼ်းတူၵ်းၵႅၼ်းတင်းလၢႆၸိူဝ်းၼၼ်ႉဢေႃႈ။
မေႇလၶိၸေႇတႅၵ်ႈပၼ်တၢင်းလီတီႈဢႃႇပြမ်ႇ
17မိူဝ်ႈဢၼ်ဢႃႇပြမ်ႇ၊ပႄႉၶုၼ်ႁေႃၶမ်းၶေးတေႃးရလေႃးမႃႉ၊တင်းၶုၼ်ႁေႃၶမ်းဢၼ်ယူႇၽၢႆႇမၼ်းၸိူဝ်းၼၼ်ႉသေလႄႈၶိုၼ်းပွၵ်ႈသေၵႃႈတီႈၼႃႈသိုၵ်းမႃးၼၼ်ႉၸိုင်၊ၶုၼ်ႁေႃၶမ်းသေႃးတုမ်ႇ၊ဢွၵ်ႇမႃးႁႂ်ႈလႆႈႁူပ်ႉႁူဝ်တၢင်းမၼ်းၵႃႈတီႈႁူၺ်ႈသႃႇဝေႇ၊ဢၼ်ႁွင်ႉဝႃႈ၊ႁူၺ်ႈၶုၼ်ႁေႃၶမ်း၊ၼၼ်ႉဢေႃႈ။- 18ၶုၼ်ႁေႃၶမ်းမေႇလၶိၸေႇတႅၵ်ႈ၊မိူင်းသႃႇလႅမ်ႇ၊ဢၼ်ပဵၼ်ယဵၸ်ႈပရေႃးႁဵၵ်ႈ#14:18 “ယဵၸ်ႈပရေႃးႁဵၵ်ႈ” - ပဵၼ်ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၼၼ်ႉၵေႃႈ၊ပႃးဢဝ်ၶဝ်ႈမုၼ်းတင်းၼမ်ႉမၢၵ်ႇၸပိတ်ႉမႃးတီႈဢႃႇပြမ်ႇ၊သေယဝ်ႉ။- 19ပၼ်တၢင်းလီတီႈမၼ်းလႄႈဝႃႈ၊ “ႁႂ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈလႄႈၽၢၼ်ႇသၢင်းႁဵတ်းပဵၼ်ၵၢင်ႁၢဝ်လိၼ်မိူင်းၼၼ်ႉပၼ်တၢင်းလီတီႈဢႃႇပြမ်ႇ၊သေၵမ်းလူၺ်ႈ။- 20ႁႂ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈလႄႈပၼ်ႁႂ်ႈမႂ်းပႄႉၼႅင်ႇရၢၼ်ႇသူႇတင်းလၢႆၼၼ်ႉလႆႈၶၢမ်ႇဢဝ်တၢင်းဢၼ်ယွင်ႈယေႃးသေၵမ်းလူၺ်ႈ၊” ဝႃႈၼင်ႇၼႆဢေႃႈ။ ဢႃႇပြမ်ႇ၊ၵေႃႈဢဝ်ၼႂ်းဢုၵ်ႉၸႃႇၵႃႈဢၼ်မၼ်းပိူင်ႇၼၼ်ႉသိပ်းပုၼ်ႈပုၼ်ႈၼိုင်ႈလူႇပၼ်တီႈၶုၼ်ႁေႃၶမ်းမေႇလၶိၸေႇတႅၵ်ႈ၊ဢေႃႈ။
21ၶုၼ်ႁေႃၶမ်းသေႃးတုမ်ႇ၊ၼၼ်ႉလၢတ်ႈတီႈဢႃႇပြမ်ႇ၊လႄႈဝႃႈ၊ “ဢုၵ်ႉၸႃႇၶူဝ်းလဵင်းတင်းလၢႆၸိူဝ်းၼၼ်ႉသိမ်းဢဝ်ပုၼ်ႈတူဝ်ၸဝ်ႈၵဝ်ႇတႃႉ။ ၵူၺ်းၵႃႈ၊ၵူၼ်းၵဝ်ၶႃႈၸိူဝ်းၼၼ်ႉႁဵတ်းၵျေးၸူးလႄႈပၼ်ၶိုၼ်းတီႈၵဝ်ၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။
22 ဢႃႇပြမ်ႇ၊ၶိုၼ်းလၢတ်ႈလႄႈဝႃႈ၊ “ၵဝ်ၶႃႈယူၵ်ႉမိုဝ်းၵႃႈတီႈၽၢႆႇၼႃႈထႃႇဝရႃႉၽြႃး၊ၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၸဝ်ႈၵၢင်ႁၢဝ်တင်းလိၼ်မိူင်းၼၼ်ႉလႄႈႁဵတ်းဢတိၵ်ႈထၢၼ်ႇၸမ်ႉ။- 23ဢုၵ်ႉၸႃႇၶူဝ်းလဵင်းဢၼ်ပဵၼ်ၶွင်ၶုၼ်လူင်ၼၼ်ႉၸႃႉၸဵမ်မႆသဵၼ်ႈၼိုင်ႈ၊သၢႆၶႅပ်းတိၼ်သဵၼ်ႈၼိုင်ႈၵေႃႈၵဝ်တၵ်းဢမ်ႇဢဝ်သေၸိူဝ်ႉသေမဵဝ်း။ ႁဵတ်းၼႆၸင်ႇတေလွတ်ႈတၢင်းဢၼ်ၶုၼ်လူင်တၵ်းလၢတ်ႈဝႃႈ၊ ‘ၵဝ်ပၼ်လႄႈဢႃႇပြမ်ႇ၊မၢၵ်ႈမီးဢေႃႈ၊’ ဝႃႈၼင်ႇၼႆၼၼ်ႉဢေႃႈ။- 24ၼွၵ်ႈသေမဵဝ်းဢၼ်ၵူၼ်းဢွၼ်ႇၵဝ်လႆႈဢဝ်ၵိၼ်ဢဝ်တိုဝ်းၼၼ်ႉၵဝ်တၵ်းဢမ်ႇဢဝ်သင်သေၸိူဝ်ႉသေမဵဝ်းပုၼ်ႈတူဝ်ၸဝ်ႈၵဝ်ႇ၊ၵူၺ်းၵႃႈ၊ႁႂ်ႈဢႃႇၼေႇရႃႉ၊ဢေႇသၵေႃးလႃႉ၊တင်းမမ်ႇရေႇ၊ၶဝ်ၸိူဝ်းဢၼ်ၽွမ်ႉၵဝ်ၼၼ်ႉဢဝ်ပုၼ်ႈတႃႇတူဝ်ၶဝ်တႃႉ၊” ဝႃႈၼင်ႇၼႆဢေႃႈ။
