MATIUS 2
2
Tong kelunan éh tuai jin tana' saa' usit maten dau
1La'ah tong leboo' Bétléhém éh tong tana' Yudea, sinah Meriam nganak Yésus sioo' Herodis raja' réh. La'ah kelunan éh malai na'at kekat kenyalung, tuai réh jin tana' éh saa' usit maten dau ke' réh tai leboo' Yérusalem. 2Irah neteng, Semah anak maréng éh raja' kelunan Yahudi? Pu'un kenyalung Néh ta'an mé' hun mé' tong tana' éh saa' usit maten dau, inah ke' mé' tuai juk seva' éh, ha' réh.
3Hun raja' Herodis menéng ha' réh kenat, tusah kenin néh, kenat péh kenin kekat irah tong leboo' Yérusalem nah kepéh. 4Boh Herodis tebai kekat pengeja'au imam tong sebayang Yahudi, ngan irah guru éh nebaraa' tong sohoo' lem Surat Musa, ke' néh neteng réh. Ka' ha' néh, Hun kelunan éh Raja' pohoo' Yahudi pu'un tuai, semah jalan lohoo' néh da', ha' néh.
5Ha' réh mipa éh, Tong leboo' Bétléhém tong tana' Yudea. Uban pu'un jah nabi Tuhan sahau, éh bara' lem surat néh, ka' ha' néh,
6 #
Mat. 5:1
O leboo' Bétléhém tong tana' Yudea,
bé' ka'au' si'ik jin kekat leboo' éh ja'au tong Yudea,
uban pu'un jah pengeja'au éh juk musit jin ka'au' kepéh,
éh juk majak kelunan éh anah ké', inah éh pohoo' Israel, ha' néh.
7Boh Herodis tebai irah éh tuai jin tana' saa' usit maten dau nah, ke' néh selim neteng réh hun mah tatek réh na'at kenyalung nah. 8La'o inah iah nyohoo' réh tai Bétléhém, ka' ha' néh ngan réh, Tai keh pitah Anak inah mu'un-mu'un. Hun keh temeu' tong néh da', tuai keh bara' éh ngan ké' uban akeu' péh keloo' tai seva' éh kepéh, ha' néh.
9La'o réh menéng ha' Herodis nah, lakau lah réh, inah réh na'at kenyalung éh ta'an réh lepah nah, lakau saa' tenah réh, pah avéé' néh avéé' bau lamin jalan Anak maréng nah, sinah éh mokoo' lah. 10Jian kenin réh, murung mu'un réh na'at kenyalung nah. 11La'ah masek réh tong lamin jalan Anak si'ik nah, sinah réh na'at éh ngan tinen Néh Meriam. Irah ngejekuu' lep réh ke' réh seva' Anak inah, boh réh muaa' kekat Pengena' réh ngan Néh, kekat pengena' réh ngan Néh, inah éh mas, kemenyan ngan mur éh barei' ingau rai.
12La'ah dalem nyupin réh Allah meta' réh bé' buhaa' dai réh moléé' tai Herodis kepéh. Uban kenat irah moléé' tai tana' réh Kivu Jalan éh Jah.
Yusup réh teleu' kelap tai tana' Mesir
13La'o irah inah lakau nah, meliket Tuhan poléng tong Yusup dalem nyupin néh. Ka' ha' meliket nah ngan Yusup, To'ot ke', alaa' Anak si'ik inah ngan tinen néh, kelap keteleu' tai tana' Mesir, mokoo' sitai avéé' ké' pu'un bara' ngan ko' kepéh, uban Herodis pitah Anak si'ik inah ke' néh juk mematai éh, ha' néh.
14To'ot Yusup alaa' Anak si'ik inah ngan tinen néh, sioo' merem inah lakau réh teleu' tai tana' Mesir. 15#Hos. 11:1 Sinah réh teleu' mokoo' avéé' Herodis nah matai.
Pu'un éh kenat dokoo' néh pesukup ha' Tuhan éh benara' néh ngan irah nabi néh sahau, ka' ha' néh, Pu'un ku' tebai Anak Ké' piso jin tana' Mesir, ha' néh.
Tong réh mematai kuraa'-kuraa' anak si'ik
16Hun Herodis jam irah éh tuai jin tana' saa' usit maten dau nah ngelavo' éh lepah moléé' kivu jalan éh jah, merek mu'un-mu'un éh. Boh éh nyohoo' kelunan tai mematai kekat anak lakei' éh duah ta'un urip ngan éh si'ik jin inah péh, éh pu'un tong leboo' Bétléhém ngan éh tutuh tana' inah, éh pekua' tatek éh teneteng néh ngan irah éh tuai na'at kenyalung nah.
17Inah jalan éh pesukup ha' éh benara' Yéremia ngan kelunan sahau, ka' ha' néh,
18 #
Yes. 3:15
Pu'un ha' kangaa' tong leboo' Rama,
ha' kangaa' réh besau mu'un.
Pu'un Rahél mangaa' pelasam anak néh,
uban kekat anak néh lepah matai,
bé' pu'un séé' omok papung éh, ha' néh.
Tong Yusup réh teleu' moléé' jin tana' Mesir
19Hun Herodis lepah matai, meliket Tuhan poléng kepéh tong Yusup lem nyupin néh La'o néh tong tana' Mesir, 20ka' ha' meliket nah, To'ot ke', alaa' Anak si'ik inah ngan tinen Néh, moléé' keteleu' tai tana' pohoo' Yahudi kepéh uban kelunan éh juk mematai Anak si'ik iteu' rai, lepah matai tenéh, ha' néh. 21La'ah to'ot Yusup ke' néh alaa' Anak si'ik inah ngan tinen néh, ke' réh teleu' moléé' tai tana' pohoo' Yahudi kepéh.
22Tovoo' Yusup menéng rengah Arkelaus raja' kepéh tong tana' Yudea ngeliwah tamen néh Herodis nah, medai éh tai sinah. Uban néh kenat pu'un éh jam jin jah nyupin néh kepéh éh nyohoo' éh tai tana' Galilia. 23#Mrk. 1:24, Luk. 2:39, Yoh. 1:45 Sinah éh mokoo' tong leboo' Nasaret. Iah pu'un tai kenat ke' néh pesukup ha' éh benara' irah nabi ngan kelunan sahau, ka' ha' réh, Irah juk mateng Yésus kelunan jin Nasaret, ha' réh.
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia