JOHN 1
1
Jüo thüma meve kevori
1Süculü jüo tazo, Jüo Jihova züta, mu Jüo sü Jihova zo. 2Shüdülü Jihova zü tazo. 3Mhametüko pütho thisü, mhathi kesüko püpo thikemo püridi. 4Pülü kerhü ba, mu kerhü süo thüma keveo zo. 5Keveo kezü vamve tayo, kezüno süo seyi mote. 6Thümapü Jihova pü ketsüsü, püza John. 7Thüma süo zhopola vori, Keveo zhopo kethila; size thüma metüko püyo melüyi ketola. 8Püno Keveo mo, vele Keveo zhopo sü ketola ketsü kesüo. 9Keve kethoo sü thüma metü vamve sü ketola vori. 10Pü cejüo thisü mu cejülü vori, mu cejüo püsemo. 11Pütho pücejülü vorizori, püzhüko püse mota. 12Vele püzü keyikhü metü pü süko khipü Jihova nuneko thiyi keve keku kha tsüsü, püza melü keyiko metü. 13Menu keyiko uzalü mozori, mori uthiupho medolü mozori, mori thüma medolü rimo vele Jihova medolü. 14Jüo po uthi meve vori, pü udolü hü, hako püngo, zapozale Poo nu püyo ngokemezhe mu kethopo chupü. 15John pü zhopo thi vori, se de poti, Hiohi püzo I poketao, Pü asa vori vele pü amhüjü tazo. 16Püyo kekhrü chupü upo ngokemezhe kengo sari ngoyi. 17Kekrelamori Moses thezho khapü utsü, vele ngokemezhe mu kejütho Jisu Khrista celü vori. 18Mipüri Jihova sü ngomo. Süosü Nuo pümelülü kebaozo. Püpü mi mese kesüo.
John jülo kepüo zhopo
19John zhopo kethi hiohi, thevoko mu Levimiko Jerusalem lü mi ketsüpü pü ketso, “No sopüa?” 20Pü ukoce potü süzo, pü mela mozo; vele phra sü, I Khrista mole. 21Uko pü ketso ti, Süsa no sopü? No Elijah me? Pü poti I Elija mole. No saju kepo mime? Pü uko fü kela de, I süri mole. 22Süsa uko püce poti, No sopü ta? Hako ketsü kesükoce jü püvo posü ketola. No sopüle zide poya? 23Pü po kesü, I füphrapü rayholü se ketao süle, Niepoo chode thi kemezi yite, side Isaiah popü meta tio. 24Uko ketsü kesüko sü Pharisee mikozo. 25Uko pü ketso de püce poti, Mhace no Khrista mo lize dipüla jülo khapü mi tsüya, Elijah ri mo mu Isaiah rimo mori saju kepomi rimo lize? 26John uko fü kela kesü, I jülü jülo khasüyo, vele mipü neko dolü tha neko pü semo. 27Pü süozo, pü asalü vori zü, pü amhüjü tazo; pü pheku kepharo ri I phrü shümo. 28Mha sükosü kethi Jordan khüco Bethany lü John jülo kha sü kebalü thisü.
Jihova Konuo
29Süsanha Jisu ta püce vori kezü ngo de John poti, Hihe, Jihova Konuo, Cejüo kephoma khi tata ketoo. 30Thüma hiohi I pü zhopo thi ketao süzo, Asaco vori kezüo amhüjü ketao, kekrelamori pü a mhüjü tazo tila. 31I pü semo, vele püpü Israel miko mesesü, süla I jülo khapü mitsü tayo. 32John zhopo kha kesü, I tülü Kemesa Rüpü kiri kezü mekhropü bi mu taki püyo ba yita. 33I pü semo, vele pü aketsüpü jülo kha mitsü, pü ace poti, No Kemesa Rüpü kiri kezü ngoto, de püyo ba yito, süosü Kemesa Rüpü lü jülo khapü mi tsüto. 34I süo ngo, süo zhopo khasüyo, hiohi Jihova Nuo zo.
Jisu saji kerathoko
35Süsanha John pü sajimi kena püzü tha kebace. 36Jisu chota keba peba, Pesüte, Jihova Konuo hi. 37Pü sajini mikena pü kepo sesü de Jisu sa meji ta. 38Jisu regüsü uni pe süri uni püsa meju kezü ngosü, de Jisu uni ketsoti, neni kedipü phuzü ze? Uni püce poti Rabbi (püco kemethao) No dipüce hü ba? 39Pü uni cepoti, Tavori pete. Uni tavo pü keba thethi pe de püzü bata sünhasü, süce keba mesü ketala. 40Uni mipü John kepo fü keseo sü Andrew, Simon Peter sazüo. 41Pü jürao Simon ngoyi de püce poti, hani Messiah sü ngo yite, püco khrista-Greekmi jülü kenhü keyi kedeo. 42Mu pü püjürao Simon züvo Jisu cesü. Jisu püpesü de poti, no Simon Jonah nu ncüpü Cephas püco ketsü thi tato.
Jisu Philip mu Nathanael ni cü keyi
43Süsanha Jisu ta Galilee lü ki keto lüta. Cholü Philip zü kesüyi de püce poti, Asa meji yite. 44Philip no Bethsaida lü kevorimi, Andrew mu Peter ni kehü nadelü. 45Philip no Nathanael ngoyi, de püce poti, Hako püngo yite Moses thezho lesilü mu saju kepoko thopü kemeta Jisu Nazareth mi, Joseph nu. 46Nathanael püce poti, Nazareth lü mhakeve hu voriyi veme? Philip püce po de Tavori pete. 47Jisu Nathanael püce vori kezü ngosü, de poti, Hihe, Israel mi kejo kedipü. 48Nathanael püce pode, kedi kethice no ase? Jisu püce poti, Philip nkecü mhüjü, no chüdü bo phelü kebace, I nngole. 49Nathanael püjü kelade poti, no Jihova Nu zole, Rabbi, no Israel mi Kedeo. 50Jisu püce pode, I chüdü bo phelü nngole si kesüla no melü teme? No süceri zhoku ti ngoto. 51Püce posa kesü, I nce potü süto, no tüyo khri kesü ngoto hisa, tüyo choyi miko Nuo yo kho mu ki ketha ngoto.
Chakhesang Chokri Naga New Testament © Bible Society of India, 2015. Used by permission. All rights reserved worldwide.