LUKE 1
1
Theophilus la tho küsü. 1Thüma kekro udolü mhathi müsemengo kesüko tho kesaso tutu sü keto thi phisü, 2Süculü püsa meji jüo choyiko umhüpü kengo zhopo kethiko belü khapü uko tsü süte. 3Mhape menu kevoce I sheri tho meve shu sü keto alü mpeyi te, vemirekri Theophilus. 4N po kethoo setüyi ketola mhathi kevoko hijü nce po kesübi.
John jülo kepüo kemenuju
5Judah kedo Herod tüce, Zacharea Thevo kezho thiba, Abijah thevo yelü kevorimi pücemi Elizabeth no Aaron yemi. 6Uni kenani Jihova mhüjülü matho mezi dehü, thezhoko mu ukrüzhoko lü mejo va kehomi, thi mu züno khakesü kolü. 7Vele uni nudimi, Elizabeth nudipü mu uni kenani pethi zho rata. 8Pü mesülü thevo mhatho thi Jihova mhüjülü kebace. 9Chethi khüle (heve hesu) kethilü ta kere shücelü mhathüpü Jihova reshü ti pü mesü ta. 10Hitülü, mhathüpü reshü thi kebace thüma metüko chozuco kech thiba. 11Süsa tüyo Niepoo choyimi pü pü mhüngo, thisüta kethü reshü khü uzaco. 12Zecharia süo ngokesüce pü kere de mpe shuta. 13Vele tüyo choyio püücepoti “mpe hite” n kecho se süte, Zecharia cemi Elizabeth thepumi pü hüyi to, no püza thopü John thi süte. 14No njükeve mu kenüngoyito, pü menu keyi thüma kekro unü to. 15Pü Niepoo mhüjülü zhophito, pü kemenu mhüjüri Kemesa Rüpü püzü tato. 16Pü Isreal thüma kekro thi redepü Niepoo uko Rüo ce süto. 17Elijah rüpüh mu pü keku pü de pü mhüjülü tavoto, mikrüne melü thi rüdepü ununeko yo süto, mathokemoko (jüzü kemoko) thi rede pü kemezi mhase lü sü vato, thüma kopo keredepü Niepoo la u kesüpü ba ketola. 18Zecharia tüyochoyio ce poti, kedipü bide I süo seyi veta? I pethite acemi sheri tütse kükrote. 19Tüyochoyio püfü kelasü, I Gabriel. I Jihova mhüjülü thayo, A ketsüpü nce posüno zisü, mu jüyikeve hio khi püvo n metsosü. 20Vele tsühi, no afü melü mo ketala, pütütülü süko thitso vori tato, no jü poyi ho batato; hiko thitsü vori kemothe. 21Sütüce thümako Zecharia füba, m kedipüla pü kereshücelü thothü mecho bata sheri. 22Pü taprari, pü ukoce jüpo yi mota, mu uko kelüce pü kehothimori kereshücelü zümho ngota metse, pübe chopü ukoce thakako mengo bata de jüpoyi mo bata. 23Pütü tsovori ta de ta pücelü vota. 24Hisalü pücemi Elizabeth nuneyi, tükhri püngu puce kre redü ba, 25Thenopü poti, Niepoo tho hio thisü pü aphimüzhie de a thüma dolü I zhoshü keta khipü düve.
Jisu menuyi keto saju kepo
26Tekhri shurü sa Jihova tüyochoyio Gabriel ketsüpü Galilee rüna lü Nazareth lüsü. 27Reliphosüpü pü Joseph zü kephokhava, pü David shuyemi. Reliphosüpü za Mary. 28Tüyochoyio puce pode, kelüsüho, Niepoo khrü kepüpü, Niepoo nzü bateho, 29Vele thenopü jü süko la pü vedi phita, side pü mha süko lüpü dipü la pü kelü tasheri. 30Tüyochoyio Mary ce poti, mpe hite, Mary, no Jihova nüpü thibate. 31N nobulü no nuneyito thepumipü. Püza thopü Jisu thite. 32Pü kezhomi thito, pü cüpü kerekrüthoo nu thito, Niepo Jihova ne shuye David kedeba la pü putsüto. 33Pü Jacob cekro kechothe kekhato, pü kedeba thüla kedithito. 34Mary tüyochoyio cepode, dipübi siziyi veta, I reli phosa püpü zotila? 35Tüyochoyio pode, Kemesa Rüpü n yo vorito, kerekrüthoo tho n mhozhuyito, sizide nuranu menuyiyito, pü mesato, side pü cüpü Jihova nu thito. 36Tsüdoce n celümi pü Elizabeth pü pethi züde nune pü bate, pü nune tekhri shurü bate, nudipü le ketao sü. 37Kekrelamori Jihova la mhapüri thiyi kesu bamo tila. 38Mary po kesü, I hiceba Niepo theküpü; n kepo biyite apono, süsa tüyochoyio pü khava tata.
Mary tavo Elizabeth pe
39Süsa Mary rekri tavo Judea rünalü cejütu yo kehüko cevo. 40Pü tavo Zecharia celü Elizabeth kelüsü. 41Elizabeth Mary pü kelü kesü fü se kesüce, pü nu püvalü kebao rehüta. Elizabeth Kemesa Rüpü püchuyita. 42Side füphra meto süta, thenomi dolü thejo kepütho nopü, n nobu sheri thejo püzo. 43A niepoo zu ace kevori hi kedipü bita? 44Kekrelamori no akelü kesü fü se kesüce anu avalü kebao pünüde rehü bate. 45Thenopü Niepoo puce kepo fü thitsüsü keto melü keyiümi thejo kepütho.
Mary Kechu tsale
46Mary poti, akhri amenyü Niepoo rho kerekrüsüte; 47Arüpü sheri Jihova akelakeyi-o la pünü bate. 48Kekrelamori pü I kethathi pü citapü khrü mekre sü ketala, kethozo tsüsahi (hisaco) nushunuye metü a cüpü thejo kepü zi tato. 49Kekrelamori kekuthoo ayo mha kezho thi sü ketala, kemesa sü püza. 50Pü phikemezhe sü somi pü mpe yo sheri sükoyo, süsü nushünuye metülü tato. 51Püboyo pü keku thaka thisüte, kemeko kemeha ketako umelü ukelülü süko hupü preve. 52Kekuko kedebalü pü meki süte, side renu ketako phu mesüve. 53Khü theri meri ketako mhakeve khapü düsüte, mu kenemiko po methu tate. 54Pü theküo Isreal khrühi sü, pü phikemezhe püsa lü sala keyilü. 55Pü ukrü utsüpumi koce reshu pü kemetao Abraham mu shuyeko kecho phra kesü. 56Mary side tüsozho khri sü püzü bade ta pücelü la vota.
John Kemenu
57Elizabeth nuzü tü vorita, side thepumi pü menuyi. 58Pü zanumiko, pü celümiko, Niepoo püphi mezhe kesü seyi, side uko püzü uko nüphi. 59Zho tütha nha uko nuo yi kerü la vori, side uko püza thopü Zacharia thisü tole rhüba, püpo zapü püza thito leno. 60Vele püzu poti, “mole, püzapü John sito.” 61No thenopü ce poti, ne celümi mipüri theza siziti di, 62Süsa uko püpoce thebepü thakade püza thopü sopü thinyü basheri. 63Pü lesi pü thosü ketocho, “püza John” uko metü ungo thita, 64Metha püta jüpo parita, pü meyi kekha dita, side pü jüpo vüta, Jihova Tshü (chu) 65Kempe süzanu metüyo vota, hiko ju kepo Judea cejütu rüna metülü vota. 66Süo kesekhü mhalü keta, nu hio kedipü bi süri toshi? Kekrelamori Niepoo be püzü tazo ketila.
Zacharia saju
67Süsa Zecharia Kemesa Rüpü püchu pü saju pota, 68Niepoo Isreal mi Rüo po thejo kepüo thite kekrelamori pü thümako phimüzhe mekre sü uko rhayi ketala. 69Pü kelakeyi keku shüpü ukola kha süte, pü cetao David cekrolü. 70Thajü saju kepo kemesako talü popü kemetabi; uko ngomuko 71Belü ukelasü toleno somi uko ngo metsü tayo sheri. 72Pü phikemezhe khasü tole, reshü pü ukrü utsüpumi c ekesübi, pü kemesa fükho püsalüyi. 73Pü reshüpü upotsa Abraham cekesü. 74Ungomumiko belü ukelayi keto khapü uketsü, side pü choyithi mu mpe keyi 75Kemesalü, mu kemezilü tüsonha pü mhüjüce utülü. 76Mu no, nu hio cüpü kerekrüthoo saju kepoo sizito, kekrelamori no Niepoo mhüjülü pücho kesü vo ketola. 77Kelakeyi mhase khapü püthümako tsü süto, uko kejo kemu va keyi. 78Jihova ngokemezhe kene, mesayo cephropü utsü kiri keti. 79Keve khapü kezülüketako vakesü, mu keso khrilü ta ketako, uphecho tüpü kezükeve lü kesü. 80Natsio mazhoi mu rüpülü kuyi, pü rayholü tade kenuco Isreal methi mhüngo thi vori.
Chakhesang Chokri Naga New Testament © Bible Society of India, 2015. Used by permission. All rights reserved worldwide.