LUKE 10
10
Mi hethüna pü mhüjülü ketsü kesü
1Mhahiko salü Niepoo thüma kekre hethüna ketsüsü, mikena na de pü mhüjülü ketsü pü nade metülü sü, pü voketo kolü. 2Pü ukocepoti, yirü keto bashüte, vele rüketomi tsarizo, süla yi Niepoo ce chosüte, püpo yi kerümi ketsüpü yirülü sü ketola. 3Tavote, I neko ketsü süzüho, teko ketsü pü sace dolü kesübi. 4Presabü, mori pheku, mori lesi sheri püta hite; cholalü mipüri reshütahi. 5Celü kehopülü lü sheri, theralü, thelü kemenü (kezüküve) po cehilü bayite side posüte. 6Mhace cesülü kezükeve ba lize thelü kemenü süo bayi toho, molize thelü kemenü süo n yo la vori tato. 7Ce sülü keti kekra khapü n ketsüko timu krayite, kekrelamori mha kethimi püzhokhro ngokeyi mesü, cepülü ba zote, kekrelü vo hite. 8Neko nade kehopülü lüzori mi mhakhapü neketsüko timu krayite. 9Kethimi thi kesürho süte, sülü, side ukoce Jihova kede vori ba keta posüte. 10Vele neko nadelü kelüce, mi neko züyi muta lize, rüna sülü tapra tate, ne pra kezüce hiziti posüte. 11Nyopha ne nadelü hako phe kopü ketako sheri kekhupü ne rüna metsu süzüho, Jihova kede nece vori. 12Vele I nekoce posüto, sünha rüna süo ju Sodom rüleno hüyi reyiku tato.
Jisu nadeko pü mesu keto
13Hesheherü chorazin, hesheherü Bethsaida, mhatho ungo keti thipü Tyre mu Sidon lüko sü lize nece thi kesüko biti, hi mhüjü uko thelü rede batato, de uko gakhrofü mu megünyo lü bata te vele. 14Vele jünyo keti ketonha Tyre mu Sidon ni rele neko relece reyiku tato. 15Capernaum no nthi kerekrüpü kho tüyotso keba thi siri n kelhupü mezalü sü vato. 16Somi nekofü reni sheri afü reniyi, somi neko thalice ta sheri a thalice tazo, süla a thalice ketami sü aketsü kesüo thalice tazo. 17Mi hethünako rethu (rechü) de ta sala vori, de poti, Niepoo therükesuko sheri nzalü hako khrote (füzüthite) 18Pü ukoce poti, Hihe, Satan tüyo metha kekrithi cejü kiri keta I ngo ho. 19Hihe, I keku pü nekotsüve, nhibü, sebako kedü vaketo, neko ngomuko pi keku mhapüri neko methiva keho. 20Mhasükola neko nüta hite, rüpüko kha neko khro sükevala; vele neko za thopü tüyo meta ketala neko rechü yite. 21Pütü sülü Jisu ri rechüto, pü rüpülü, de poti, “I n meza, Apo, tücejü Niepoo, mha hiko kesemi mu kemerhüko mhüjülü kevapü meta de halapü natsi theba thejüko meka sü, Apo, sizi ti n nü ketala.” 22Apo mha metü khapü atsü süte, mipüri Nuo sü semo, vele Pootho seba; mori mipüri poo semo, vele Nuo thozo, mu Nuo tho Poo sü thapü mika süyo. 23Pü regü metha keyiko ce vode uko ce poti, nemhüpü mha kengoko rüku thoko (thejo kepütho). 24Kekrelamori saju kepoko mu kedemi kekrosheri mha hiko ngosü nyüshu vorizo, vele ngo mote; neko keseko sesü nyüshuzo vele uko semote.
Thezho kesemipü Jisu ketsoti
25Thezhokesemipü süthayi de pü kedo ketola pü ketsoti, kemethao, kechothe kehü kalü thiyi ketola I kedipü thimoze suta? 26Pücepo kesü, thezho lesilü dipü thometa? No dipüle zide phriba? 27Püfü kelakesü, no n Niepoo n Rüo khrü mu rhoyite nmelü metü, nkeku metü, nkhrirarü, metü, n kelü metü; mu nsüzanumi sheri khrüpü ntho n kekhrü biyite. 28Püce pokesü, no potü süzo, hibi thiyi te, mu size no rhüyito. 29Vele pütho mezileti thinyü de Jisu cepoti, sopü asüzanumita?
Samaritanmi khapü kejüve kesü
30Jisu püfü kela kesü, thümapü Jerusalem lü ta Jericho cholü kizü, ri ta süketimi dolü lüta, püfüneko khiva, pü rezasü, de pü khava tata, pü vüpü phesa mezüva. 31Pütüsüce thevomipü cho sülü tavo, püngo zo vele pü chorhe tata. 32Levimipü ta sülüvo, püngosü thethi sülü cho kekrepülü ta vota, 33Vele Samaritanmipü revükhi pü kezülü vori, püngosü de püphi mezheta. 34Ta püce phe de pü rezakuko therü mu phasü, tirü mu hezo lapü süko khrüva, pü khapü pü khonu (gada) yo süyi, de pü züvo prolü süde pü theküsü. 35Süsanha pütata, pü presa (raka) kena pü (pü theküo tsüsü) cieniepo-o tsüsü, de püce poti, pü thekü menu bate, I tala kevori ce no mhakekre ketse kevako I shupü ntsü vato. 36Thüma misüko sopü mizhü süti ketako belü kemezhe ketao süzanuta? 37Pü pokesü, püphi mezhe kesüo zo, süsa Jisu püce poti, nori tavo sübiti thisüte.
Martha mu Mary ni zhorele kekreketi
38Uko tavo kezüce, püta rüna pülü lüta, thenomipü püza Martha siti püba, püzüvo pücelü süyi. 39Pü sazüpü za Mary, pü Jisu phe ceba de jüko reniba. 40Vele Martha choyi kethi renade merezoba, ta püce vori, de poti, Niepoo, asazüpü alebipo mhathoko la mere zoba tino n lüni mozome? Püpo tavori akhrühi süno posüte. 41Jisu püfü kelasü de püce poti, Martha, Martha, no mha kothi mere zoba, mhakekrolü. 42Vele khimokesu, mhacopü lebizo, Mary no mhakeve süo kedayiteho, mha süo pücelü khipü tata hote.
Chakhesang Chokri Naga New Testament © Bible Society of India, 2015. Used by permission. All rights reserved worldwide.