LUKE 15
15
Pharisee miko panyo keba
1Süsa mali miko mu kephomamiko püfü renitole vori. 2Pharisee miko mu thezhokeseko panyode poti, Thüma hio kephomako zü mhatiyole.
Diketa tekonu jüve
3Pü ukoce jüve hio pü posü. 4Neko mipü teko krapü keba dolü pü mediva lize hethecü thecü khapü nhalü mezüde tavo pü diketa-o phu kemo sopüba? 5Pü süo ngokeyice pü pübokayo süyi rechü tavorito. 6Pücelü voride pükhretho mu püzanu miko cü kenguyi de ukocepoti, azü nenüyite, kekrelamori a teko di ketao ngoyi ketala. 7Sübi tüyo sheri kephomamipü thelü rede keyila unüyo, mi hethecü thecü kemathoko thelü rede mori vetiko.
Presa medi keva jüve
8Mori thenopümipü presa keri bade pü mediva lize pü me metosü de celü chokemesasü presa süo phukemo so püba, ngoi kemothe? 9Thenopü süo ngoi ketasa püzümiko mu püzanuko cükenguyi de poti, azü nenüyite kekrelamori I presa medi kevao ngoyi ketala. 10Sübi I neko ceposüto, tüyo Jihova choyimiko kephoma mipü thelü rede keyila u nüyo.
Diketa nu jüve
11Püpoti, thümapü pünu thepumi kena ne, 12Natsio püpo cepoti, apo, amha azhü mesüko kha atsü vate; mu mhakezapü unitsü va. 13Tüsozho hu sa natsio pü mhako khiyi de ta chokemecu rünalü vota; sülü pümhako pü kesu kethilü ketse bata. 14Pü süko ketsetsi kevasa, rena sülü thekre vorita, pü mhamenyü ta. 15Pü tavo rüna sülü thümakocevo, mu mipü püpo thevo vi bata, yikolü. 16Pü merita mu thevo co sheri pü püvalü sünyü bata, mipü ri mhakha pütsü mota. 17Pü mhalü vorita, de pütho pü rethiti, apo choyi kethimi mizhokhripü ketako mi ditsupü ketikekra ukechu thitasü mu sükezü sheri siri I meripü satato züte.
Sala kevori
18I tasü de apo ce votato, mu püce posüto, apo I tüyo kehümiko mu n mhüjülüri phomate 19I n nune le pori shümote, apo no mi zhokhri pü keta thekümi pü thi tato. 20Pü tasü de ta püpo cevota, vele pü rapeco ketalü püpo püngosü de tavo püvo cho püyi de pü mebosü. 21Nuo püpo cepoti, Apo I tüyo kehümi mu nmhüjülüri phomate, mu I nnune thiyi shü mote.
Kenühü
22Vele püpo thekükoce poti, pü füne kevetho khipü vorite (Kedefüne) kha püpo bemene yite, bekha ri kha pübelüsüte, pheküri khapüpo püyite. 23Metho upho kevetho püvo dokhriyite, side uko mhati mhakra unü tolekhe. 24Kekrelamori anu hio satari rhüyite, medi vari ngo sala yi ketala. Uko süla unü bata. 25Hitüce pünu pethio yilü ta, de celü meno vorizüri tsale kethifü mu nasü keba sesü. 26Pü thekü mipü cüsü de dipü bibata sheri ketso. 27Pücepokesü, nsazüo tavoritele, mu npo thodo (or Tholi) upho keve dokhripü (Ukopoti) Kekrelamori pü sürho tade la vori keta la. 28Pünümota (pülü redata) mu pü ta celü lü muta; süla püpo ta prade püshu (pünüpo) de pürethi (püpo celü lüte side). 29Püpo ce pü poti, hihe, I tütse kekro n choyi thita, mori ncho vajo (n nümothi) vamo, no po kesüko mhapü ceri zümo ta mozo; siziri no tekone püri kha atsümo, apo azümiko zü anü ketola. 30Vele n nu hio n mha n zhüko khipü vo kethamiko (thethenuko) zü di ketseva, no metho upho keve dokhripü pütsüsü. 31Pü po pücepoti, Anu no kechotheazü tazo, amha azhü kebako metü nzhüzo. 32Neko unüti mesü, rechü ti mesü, nsazüo ditari ngoyite, satari rhüyi ketala.
Chakhesang Chokri Naga New Testament © Bible Society of India, 2015. Used by permission. All rights reserved worldwide.