LUKE 21
21
Samepü presa khakesü po kemele kesü
1Pü, mhapesü, kenemiko mhakhapü presa kengu kebalü khasü keba ngosü. 2Mha kedi samepü sheri presa kena khakesü ringo, sülü 3Püpo kesü, kethopü I nekoce posüto, mhakedi samepü hio kekreko metü ceri kroku khasü te. 4Kekrelamori hiko mha kekro kebalü pü khasüba, Jihova mhangulü; vele theno hipü pü tsakhulü keba metü püvo khasüte.
Olive, cejütuyo kereshüco ju kepo
5Humi kereshüce ju kepo ba tice, ketsüko dithedü ri vezho mu mhakha kesüko sheri kepoba. 6Pü po kesü, neko ngo keba hiko metü, pütü pü vorito, ketsü hiko püri kepishu kemo, kelhu keva.
Metha keyiko ketso
7Uko pü ketso, kemethao dipü kethice mha süko thi vorita? Zasi dipü khasüta, mha süko thi vori ta ketoce?
Tsüdo kehü ju kepo
8Pü ukoce poti, neko menuyite, neko kedo va mo ketola, thüma kekro azalü vorito, uko poti, I Khrista zole (süle); pütü süo meno bate, süla neko süko sameji ta hite. 9Vele theri kethiko mu kebü keti seto, neko kere va hite; süko vori mera zo ketola, vele pütü thela thi holu. 10Süsa pü uko ce po kesü, shuye shuye kemetsu to, kedepü kede kekrepü zü kengomuto; 11Cece thethi kekretilü sü mezhoshu tato, tüsa therü mu kemekre; kempe kengo zasi kezho thipü tüyo süto. 12Vele süko kethi mhüjü uko be khapü neko yo sü to; neko methito, neko zü kereshücekolü voto, thejücekolü, kedeko mu kezhomiko mhüjülü voto; azalan. 13Neko po zhopopü thisü ketola. 14Süla n melü kerede yite, neko kedipü püpo to sheri lü medo hite. 15Kekrelamori I mhase mu kepota kha netsü süto, ne ngomuko ne meliva keho mori keprü yi keho. 16Ne sazüjürako, nekrüko, neshuyeko mu nekhretho miko neko tüsüto; mu neko humi dokhri ri va zoto. 17Mi metü neko ngo metsü tato, azalano. 18Vele neko pitha pripüri nepiyo shütaho. 19Neko sügü sühe keyilü nkhri n rarü khi bayi to, (nthinpho merhü yito).
Jerusalem mekava keto mejü po kesü
20Thipahe tavo Jerusalem whipü keyi neko ngoto, süce süo kemeka meno keba seyi te. 21Süce Judah lü kebako ta cejütuyo vota te, mu sülü keba kopo tapra tate; mu yilü ketako po sülü vohi tate. 22Kekrelamori tüsozho süko khüpo kethila mhasüko thopü kemetako thitso sü ketola. 23Vele natsimi kebako, no kebako, sütüce kemezhephi tato thethi sülü kehüko hesheherü lekhu sülü thümako yo vo ketala. 24Mu uko zecholü sa tato, mu uko tüzü shuye metülü thejü thivo tato, mu Gentilemiko Jerusalem kedüda vato, Jewmi kemoko pütü tsota kemothe.
Niepoo zapozale thi sala vori keto
25Naceyo zasiko thisüto, khriyori, mu thenükoyori, mu cejülü zimo tato shuye metülü, krokrü kemo, jükezho mu pü rephüko rü meho tato. 26Thüma melüko di tato mpe ketala, mha süko cejülü vori ketala, kekrelamori tülü kekuko kena süto. 27Thüma Nu kekupü tüyo zapozale thi vori kezü ngoto. 28Mhasüko thi vori kezüce neko pi pükhrü sü pete, kekrelamori neko rha keyio meno ba ketala.
Chüdübo pü kejüve kesü
29Pü jüve khipü ukocepo, chüdübo mu sübo metüko pede. 30Püse zhü kerethi prari ticoneko seyite, tülü menote. 31Süla mha hiko thi vori ketasa neko seyite Jihova kede kethi meno bate. 32I nekoce potüsüto, tsüdo kehüko di taho mha süko thitso kemothe. 33Tü mu cejü di tato vele ajüko di ta hozo.
Niepoo la vori ketola dojüpü bano kesü
34Fü mula bate, kehü zhorele po ne melü thi mesu vamo ketola, mezünyonyü, meyhu mezhe tiko po ne tüpü ba keredeyi mo bata mo ketola: zoma bü pübi cejülü kehü metüko yo vori zo ketola. 35Rhorhü pü bate pütü metülü kechothi metü mode. 36Mhakesu vori ketoko therüyi ketola Thüma Nuo mhüjülü thayi ketola. 37Tüsonha pü kereshücelü mimethaba, mu tüzülü ta olive cejütuyo vo süzi kechothi batayo. 38Thüma metüko tavo kereshücelü püfü reni bayo.
Chakhesang Chokri Naga New Testament © Bible Society of India, 2015. Used by permission. All rights reserved worldwide.