LUKE 23
23
Jisu Pilate-e mhüjülü
1Kehulü thüma makro püzü Pilate-e ce vori. 2Uko pü mejota, uko poti, thüma hio u rünalü mhakebü tate, mha khapü Caesar khrü thi hino, mu pütho püpü Khrista kedeo zole; si tate. 3Mu Pilate-e pü ketsoti, No Jews miko kedeo me? Mu pü pokesü, no süo po süzo. 4Süsa Pilate-e poti, thevo kezhoko mu thümako ce, I thüma hio yo kejo ngoyimole, 5Vele uko khrü kuta de poti, pü thümako hüpü mhakebü, Jew miko kehü metülü Galilee lüvo hice ketso.
Jisu Herod mhüjülü kevo
6Pilate-e se keyice, pü Galilee lü kehümi me de ketso. 7Mu pü Herod khro keba se keyi la pü ketsüpü Herod ce sü. Sütüce Herod Jerusalem lü kezhothi kebala. 8Herod Jisu ngo kesüce pünü shuta, kekrelamori püju se bayo, mu pü mha ungo zasi thisü totho meri kebala. 9Pütü kecho pü ketsosü, vele Jisu mhapüri po mota. 10Thevokezhoko mu lesikeseko süce tha, uko pü mejo shu bazo. 11Herod sheri pü paheko zü pü krünyü mu pü zhoshu sü, fü kemere khapü bemenesü side pü ketsü sala Pilate-e ce süva. 12Sünha Herod mu Pilate-e ni kekhretho (kezüveyi) sümhüjü zowe uni kengomu tayo,
Jisu pü mesava keto jü khakesü
13Pilate-e, thevoko, krütako, mu thümako cüsü. 14De ukoce poti, neko thüma hio zü acevori pü mhapükerhü tale side, mu I pü ketso neko mhüjülü mu pü kejo mhapüri ngoyimo neko pü mejo kebako. 15Herod sheri mhapüri ngoyi mo de pü ketsüpü acesü; sübi pü sata keshü mhatho püri di. 16Süla I püvüsü de pü khasü vato, 17kekrelamori thenyelü mipü khasü keva mesü. 18Uko metü se meto de poti, thüma hio po ta tate, Barabbas khapü hako tsü vate. 19Thüma hio kedekecholü mhakebü de mi dokhri keva mipü, pü tüpü thajü thi meta; 20Pilate-e pü (Jisu) khasüva nyüde thümako jüpo sala. 21Vele uko se meto ba zota; “Pü khapü cross yo gu vate” 22Vasü lüri pü poti, pü kedipü kesu thiva, I püyo mhakesu püri ngoyi mo, püpo sata keshü, I pü vüva de pü khasü vato. 23Vele uko semeto shude püpü gu vate mu uko füphra khiyita. 24Süla Pilate-e püjü khakesü uko kecho thipü tsü süno pova. 25Pü uko cho keba thümao khapü uko tsüsü, mi kedokhri mu mhakebü ketao, thejücelü tüpü kemetao, mu Jisu khapü uko menyü kebabi pü uko belü süva.
Jisu pü cross yo kegu
26Uko pütüpü tavo kezüce Cyren mipü Simon pürünalü tavori züde pütüyi, de püpo cross pü Jisu sameji vo. 27Thüma kekro pü samejita, süko dolü thenoko ukhoro kekhu mu pükri krata. 28Jisu regüpra ukoce poti; Jerusalem püko alakra hite, vele netho nela mu nenuneko la krayite. 29Kekrelamori tüsozhoko vorizoto, sünha uko poketo, nudipüko, mu nune kemo nobuko, mu nokemo noko thejo kepütho. 30Süsa uko cejütuko ce pode, retu hayo tsü hava süte, side hahuyi tate. 31Kekrelamori sü rhü kebao yo thori uko mha hizi ti thisü lize, sü, kesao yo dipü bitatoshe? 32Keregomi kena tüzü vo püzü kesa dokhri va tole tavo. 33Uko tavo thethi pü “mipifüro” tsoyi, Jisu pü sülü guva; 34Süsa Jisu poti, Apo, uko kejo vapü uko tsüte, kekrelamori uko thi kethao sede thiba motila. Side uko pü füneko pü hevehesu (chethikhüle) thide kezayi. 35Thümako süce tha de peba, vele krütako pü zhoshu sü de poti, pü, mi kelayiyo, pütho pü kelayite mhace pü Messiah süze. Jihova pü keda keyi mipü lize. 36Thipaheko sheri pükrünyüta, meleku de kephrojü kha pü mekrasü. 37Uko poti, mhace no Jew miko kedeo lize ntho nkeleyite! 38Püpice tho kesü, “Hiohi, Jews miko kedeo” 39Keregomi pü püzü gupü kemetao pü kenga, de poti, “No Messiah mo me? Ntho n kelayite, mu hani sheri kelayite.” 40Vele kekreo pü lekhu de poti, No Therü-o mpe mome? No sheri pü bide n mejo keva mi thi bate? 41Avu mejo keva pütüzo, kekrelamori avu mhathola zhokhro ngo züzo, vele thüma hio kekriti thimo. 42Süsa pü poti, Jisu ava rekra süte, no n kedelü kelüce. 43Püfü kelakesü, I nce kethopo süto, tha no azü kereyi balü (tülü) lü tato.
Jisu Sa keta
44Sütüce bavüdo shurüta, kezüpü thethi metülü vota; keba thecü ta kemothe, thevace. 45Nace vesü mota, kereshücelü füha cekhro kena thita. 46Süsa Jisu semeto sü, poti Apo arüpü khapü nbelü süva züho; süo po kesüsa pü süshü ha thüla thita. 47Thüpahemi krapi kezhoo süko ngosü, Jihova chuta, de poti, thümahio mesa (kejodi) kethozo. 48Makro süce kengupü kebako mhathi ketako ngosü, uko khoro kehu de ta ucelü vota. 49Vele püzü kemekro ketako, thenoko risa de püsa meji vori Galilee lü, kemeculü thade mha hiko peba.
Jisu kekhrü
50Hi he, thüma kevepü, jütho mezi, püza Joseph kehulü piphri mipü (sanhendrin). 51Uko medo zü kerhü kemo. Pü Jews mi rüna Arimathea lü vori, pü Jihova kede fütayo. 52Thüma hio ta Pilate-e cevo Jisu mo cho. 53Side pü süo khipü kiri, süo khapü linen fülü kezhüyi, ketsüro mekü kemeta mhakhre, mipüri kha sülü sü kemo pülü mezüsü. 54Sünha Sabbath la kerede ti tüsozhota. 55Galilee lü kevori theno miko püsa mejita, pümopü mhakhrelü mezü keva ngo. 56Süsa uko tavo mharü kethenyüko mu tirü kesüyi, sala ucevo ketasalü.
Chakhesang Chokri Naga New Testament © Bible Society of India, 2015. Used by permission. All rights reserved worldwide.