LUKE 7
7
Jesu'ne Rome Raallui Machaei Upawaei Shok Khatya Kna Raikyer
(Mt 8.5-13)
1 #
Jn 4.46-53. Jesu'ne thimi rapnung tlou nammaya shunthutpikur hillouri, Ane Caperna-um yultlaira wachangkur. 2Heirouri bi heirou Romia raallui macha khatdei chaylampu khatne aiyei beimak kringni yukbi khou shok khatne hikurkhi kyane nawurbi louklei. 3Heirou Raallui pu heiwane Jesuei ngamrou mayekbi, heirou ane Jesu'ya aiyei shokpaei kna heiya raiyernanungei Jehudiaei uparap thaya heimalhetbine Aya wa'ungyerkur. 4Heirouri yane Jesuei leinara wa'tlungbi shunchabi, “Neiyei trungpiya beimak kanrelne ngaakbi leileime. 5#Pao 10.2. Ane kaiyei thimi rapya beimakne malungshipi, heirou kaiyei Pukhrumna Cheem khatkhi ane sabaangpikhou,” toubi kyun. 6Heisi tounarouri Jesu'ne yale kalhonbi pulne wakur. Heirou Jesu'ne aiyei cheemra wakarnakur heirouri, ane loushun, “Upawa, Neitam toulahmaklo, Nangne keiyei cheemra polhakri kallonamakme. 7Kouweiyo toulanungri, keihaknekhi wabine Neiya chrungknane murilyakhi kallonamaknei ngamrou keine keiyei upa rapya Neiyei leinara heihilkurme. Nangri wamakhi leiyasu, heinung tlimri Nangne chay tlouyatom sherthungpilak, heisi toulanungri keiyei shokpaei kna heiri rairoume. 8Keikhi Raallui upa kounakei daakrei klei thimi khat, heirou keiyei daakrakhi raallui kounak chungne leilei. Keine ya napung khatnung ‘Heira chawalo’ toubi chay pilanungri, ane louchakur. Heitoubi keine ya napung khatnung ‘Ara hungalo’ toubi chay pilanungri ane hunglei! Heitoubi keine keiyei shok khatya ‘Lhou heiwaya yukpanglak’ toulanungri ane loupangkur.” 9Heirou Jesu'ne aiyei tlouya mayeknarou beimakne ngakkur, heirouri Ane karhilne thimallobine thimi rapnung kyun, “Keine nanungei kanre-kandangne yunpilei, touri Keine napawa heiyei uklum kleinakri, Israel thimi rapbei hangra hukhatkhi karthangmakhui!” 10Heirou pao-ur thimi rapne Raallui upawaei cheemra yenkallengeinungri, aiyei shok heiwari kna raiwurbi louklei.
Jesu'ne Trulmeiwiyei Chanapawaya Kna Raiyerpi
11 #
Mk 5.21-24,35-43; Jn 11.1-44; 1 Kr 17.17-24; 2 Kr 4.32-37. Heihil tallengne Jesu'ne Aiyei ruishik raple, thimi chung raple kalhonne Nain toubi ung khukarthilra wakur. 12Ane khukarthil heiyei palthungra wa'tlungle tallengne thimikhi krui thimirap tha warorilkur. Heirou hikur thimi heiri trulmeiwiyei khatchatom klei chanapawa, heirou thimirap chungwane khukarthil heirouwei ale kalhonne wathukkur. 13#Lk 7.19; 10.1; 11.39; 12.42; 13.15; 17.5-6; 18.6; 22.61; 24.3. Heirou Upawane trulmeiwiya munarouri, napuiya heiwiya Aiyei ukningra beimakne kringpikur, heitounei ngamrou Ane napuiya heiwinung shun, “Chapmaka.” 14Heirouri Ane yaihangra polhakbine khi'lhung lhakna heengkung heiwaya palkur heirouri, heengkung heiwaya chung thimi rapne loumayungkur. Heitounarou Jesu'ne shun, “Keine shunlei, kanthouwalo kartlanga!” 15Heirouri hikur napawa heine loukanthoubi ka'omkur, heirou ane tloukhi yunyoukur, heitoubi Jesu'ne aiyei puiwinung silnakur. 16#Lk 7.39; 24.19; Mt 21.11; Jn 6.14. Heitounei ngamrou thimi rapne chiwurbi, heirou yane Dunpuya mathangkur. Heirou yane kyun, “Thimkhui tangkhat kaihangra hungthukkurame. Dunpune Aiyei thimi rapya kalpinanungei yogpikurame!” 17Asitoubi Jesuei ngamrou pao heiri ram heiyei bi kantangra karyoune mayekkurbi kartlinkur.
Yuiluppi John'ne Jesuei Leinara Aiyei Ruishik Rapya Heihilkur
(Mt 11.2-19)
18Heirou John'ne, aiyei ruishik rapne thukkur lhourap namyerwa heiya anungei yunpinarouri, ane ya napung-khniya unglouheikur. 19Heitoubi ane yaya Jesuei leinara, “John'ne hungthukeiroume toubi kyun heiri Nang ariyako, nimanung kane dei khatya loungakeirouko?” toubi ngaithiyernung heimalhetkur. 20Heirouri yane Jesuei leinara wa'tlungbine wakngai, “Yuiluppi John'ne kaya heimalhetkur awari, ‘Nangri ane napung khat hungthukeirou’ toubi kyun heiriyako, nimanung kane ‘napung khat hungeirou’ toubi loungakriserouko?” 21#Mt 4.23; Mk 3.10. Heiyei tlak heirouri Jesu'ne kna thimi rapya raiyerkur, heitoubi lhimpop thimi rapyakhi, heirou mitdeo thimi rapyakhi raiyerkur. 22#Isa 29.18-19; 35.5-6; 61.1; Lk 4.18-19. Heirou Ane John'yei heimalhetkur thimi rapnung loushun, “Nane kallengbi naiyei mukur heirou nai khnane mayekkur heirapya John'nung hungshunpilaka: mitdeo thimi rapkhi yaimit mumaneyura, hodeek thimi rapkhi karwaicha maneyura, heirou raichi paatbine mrim-knangei klei thimi rapkhi dammura, khnasit thimi rapkhi yaiyei khna waarwura, heirou hikur thimi rapkhi ringthutdura, heitoubi lhangai paolaa heiri kanring thimi rapnung shunthutpiwurla. 23Heini Keiyei ngamrou yai ukningra koukhatkhi khalcha'kna mak thimi rapri kounakei nungkngai hoirou!” 24Heirou John'yei ruishik rapne shaalkur hillouri, Jesu'ne Aiyei ngamrou thimi rapnung yunthutpiyoukur: “Nane ramhangra John'yei leinara wathukbi thiyeinungri, bi heirou nane kouya mupharou toubi ningchalei? Martheene heengna-rona rapya shafletchabi kansaicha heiwaya muphaleiko? 25Nimanung nane kouya mupharou tounei wathiphawo? Napawa khatne lhangaine kansambi klei heiwaya muphaleiko? Nimanung thimi rapne Krungbomra kansambi kleinaksi kansamkur thimi rapya muphaleiko? 26Keinungei yunpilak, nane kouya thirou tounei wathukko? Thimkhui khatya thirou tounei wathukkurko? Moi, heisi hoikhi kya, heiya nane aya duine tang Thimkhui khatya muphalarou. 27#Mal 3.1; Mk 1.2. Ngamri Khyingei Pu'tloura mayebi khouri John'ya kyun: ‘Dunpune atoubi shunkhoulei, Keine nai maibongra Keiyei Paocha thimi khat nanungei lam laatpinanungei yenyilleirou.’ 28Keine nanung tanghakne yunpilei,” toubi Jesu'ne yenyunthu, “Johnri ringbi klei thimi nam'rouwei tangdui thimi khat. Heiya Dunpuei Krungrammei mandidui heichane John'ya duine tang thimi.”
29 #
Mt 21.32; Lk 3.12. Heisi toubine thimi namyerwane Aiyei kyun tlou heiya mayekkur; heirou yale, khulrui markum thimi rapne Jesuei chimne yunthutkur Dunpuei tlou rapya mayekbi, heirou yane uklumne hil-chanthungkur, heisi tounei yaya John'ne yui luppikur. 30Heiya lhangai karsa thimi raple Tloulamei upa rapne Dunpuei kningya yanimaknei ngamrou John'ne yaya yui luppimakur. 31Jesu'ne kallengne yunthu, “Asinung kane angtu chaanyei thimi rapya koule marhilnaserouwo? Yari kounaksi thimirap maalleiyo? 32Yari keithil tlailamra ombine klei douwa rulnakme. Rulkhatne rulkhatnung heikyun, ‘Kane nanungei nu lounei phung-kheen heipibikhi, heirou nane lounuymaklei! Kane nanungei khilaa heishapibikhi, heirou nane louchapkhi toumaklei!’ 33#Lk 1.15. Yuiluppi John'ne hungbi, ane koukhatkhi chamaimakne ngeikhou, tulkhi mongkhoumak, heiya heirampharou nane aya ‘Hyingmak lhawaine thimme’ toubi yorchapikur! 34#Lk 5.29; 15.1-2. Thimiyei Chanapawane hungbi, heirou Ane cha'kmaile, kmongle toukhou, heirouri nane kyun, ‘Napawa heiya thilak! A heiri raoho-thukni chamailei heirou tulkhi maliplei, heirou mine kul chalyermak thimi raple, Ruithou thimi raple palui hoilei!’ 35Heisiya hoiyanungkhi Dunpuei Shingkheiri, Aya uklumbi loulhakur thimi namyerne heiwaya chimne mutpirou.”
Jesu'ne Lhangai Karsawa Simonyei Cheemra Wachang
36 #
Lk 11.37; 14.1. #Mt 26.6-13; Mk 14.3-9; Jn 12.1-8. Lhangai karsa napawa napung khatne Jesu'ya aicheemra cha'kmai marshikbi unglhakur, heirou Jesu'ne aiyei cheemra chamairou wanarouri, 37thilak, Khukarthil heirou borh napuiya khatpi louklei. Heirouri ane Jesuri lhangai karsawaei cheemra chamaibi leileime toubi mayeknarouri, ane lungou-phu khatra muiknam shirek lhakloubi wakur. 38Heitoubi ane Jesuei hilla wamayungbi chapni aiyei mityuine Jesuei hora myemdokpikur. Heisitoubi aiyei lurei shamni rutmathaibi, heirou ane machubpikur, heitoubi hora aiyei muiknam shirek heiya shungphangbi fnalpikur. 39#Lk 7.16; 24.19; Mt 21.11; Jn 6.14. Heisi tounarouri Lhangai karsa napawane lhou heiya mulhakur heirouri, ukningra aitam ningchakur, “Napawa Ari tanghakne Thimkhui khat hoiyanungri, Aya heithirkur napuiya heiwiri kounaksi napuiyawo touri Ane mubom thukrou; heirou kounakei chaanra ringbi kleiyo touri murou!” 40Heirou Jesu'ne kanthoubi aya shunkur, “Simon, Keine neinung kouweikhat yunpinung leilei.” Heirou Ane, “Moi Upawa, keinung beicha yunpilaklo,” toubi loumallangkur. 41Heirouri Jesu'ne atoubi yunpiyoukur, “Bongnung napawa napung-khni leikhou, yakhuntane laldun napawa napung khatrei tuy pukloukur, heirou ya napung khatne dunwaei tuy denari macha phanga pukloukur, heitoubi napung khatneri denari somnga pukloukur. 42#Mt 18.25. Heitoubi ya napung-khnirekni pukloukhei tuy heiri shing manemakura, heisi tounarouri tuypu heine yakhu'rekpaei tulkur tuybom heiwari kukpiwurla. Ya napung-khniyei tlakrouei hune tuypu heiwaya duine malungshirou?” 43#Lk 10.28. Heirou Simon'ne loumallangbi, “Keiyei khalnarari tuy chungne tulnarei kukpikur napawa heine duine malungshirou,” toubi loukyun. Heirouri Jesu'ne, “Neikyun heiri chimlei,” toubi loushun. 44Heirouri Jesu'ne napuiyawi lhangra kallekbi, heitoubi Simonya shun, “Nangne napuiya awiya mulako? Keine neiyei cheemra wachangbi, nangne arou Keiyei hoya chouthainanungei toubine yuiding thilyakhi shorpimaklei, heiya napuiya awine Keiyei hoya aiyei mityuine chaamthaiwurbi, heitoubi aiyei lurei shamne rutmathaipilei. 45Nangne Keiya louroyeinungri koukhi machupkhi toupimaklei, heiya aneri Keine neicheemra wachangle tallengne Keiho rapya loumachubpilei. 46Neicheemra wachangeinung nangne keiyei lura teinungei Olive shirekhi loupimaklei, heiya napuiyawi aneri Keiyei hora muiknam shirekya fnalpilei. 47Keine neinung tanghakpane yunpilei touri, arou napuiya heiwini aiyei tangei malungshi heiya mutpikur heiri aiyei borh namyerwa heiya kukpiwurlame toubi nane mulaklo. Heirou huhune aiyei malungshiya mandini mutpilanungri, aiyei borhkhi beirimcha kukpirou.” 48#Mt 9.2; Mk 2.5; Lk 5.20. Heirouri Jesu'ne napuiya heiwinung kyun, “Neiyei borh namyerwa heiri kukpiwurla.” 49Heirouri Aiyei pongra ombi klei thimi rapne yaitamne yunril youkur, “Napawa aya huwo? Ane miyei borhyakhi kukpiwurlei.” 50#Mt 9.22; Mk 5.34; Lk 8.48. Heiya Jesu'ne napuiya heinung kyun, “Neiyei uklumkur heine neiya kukpiwurla; heineri neiyei malungdamne shaallaka.”
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.