Fêt 10

Bità fôktì tum yì jùŋ ha Kònilùs

1Wùt lè ndùku lâwû yi tèk yi chiki ye ghɨ ndùku toŋte na Sìsaliyà, yet yi wuni mô Kònilùs. Wù ndùku mô a tû a nòn à sù sojà ale ma ghɨ fwu ben yi lak yi Italì. 2Wù ndùku mô kə nâ wut wù jùŋ ngumle ha Yènfù nì ghɨt a wuna ghɨ sah yi nda nâ à jɨ̀m nì ghɨt a wuna ghɨ fetana. Kònilùs hì fo yi gâmtì ha fèfù, fe jə̂mà ha Yènfù kə nâ yu mù jɨ̀m. 3À hì mô wu tuk wule, a leŋ a mbɨŋlu sù tât a bɨn a bonena, anjèl à Fùyèn fwu a wun yi kə̀k ni te wun chyə jem, wù yen te yì lye bena toŋti wun na, “Kònilùs.” 4Wù ki yen nì anjèl à Fùyèn àtɨ̂n ke yênà ni fânà, buf na, “À mò ghə a Bâba?”

Anjèl à Bâba ye fîsì na, “Yènfù ti yu jə̂m ya, fî yen gâmtì ye wò fo ha ghɨt a fufana. 5Chinhi ghɨt ale chîn ma ghɨna yen a yi tèk yi Jobà ma toŋa wùt afû yet yi wuni mô Samùn Bità. 6Wù chyə ghê wùt wu tôknè nì gwusu nyâmsù, yet yi wuni mô Samùn wu chyə bakhe yênà yi bi jwô yì chìk.” 7Anjèl à Bâba àtɨ̂n jis mihì ha wun ni, lolò. Kònilùs toŋa ghɨt a wuna ghɨ fetana à bà, bakhi nì sojà yìlè yì mòk ye yi ndùku chînà wûn fânà Fùyèn, 8fôktì nâ gha à jɨ̀m ghe anjèl à Fùyèn ye jìsa ha wûn, ki tum a ghɨna na ghɨna yen a Jobà.

9Tuku yû ghɨna gbî hì bakhe yênà a yi tèk afû ma chwì ti bân tâ Bità kwok a tô ndâ hi jə̀m. 10Jìŋ hì yafa wûn wù hì khɨŋa a shyə hi yə̂, ghɨ baha kwûnè mwə̀ mù yə̂mù. Lîŋhà shyə̀ ale fwo a wun a yi kə̀k te à wun chyə a jem. 11Wù yen te nyə jìme, ghɨ hì chwohe bênà nì shyə a chyə te bâh à sùnjwo chika, ma ghɨ ti chuŋti bûlà tù kìk. 12À ndùku mô ni, nyamsu mô atɨ̂n nki tù jɨ̀m, kəbi nì mwə̀ mù ŋàŋlemù nì nyìmû. 13Yènfù toŋti wun jis na, “Bità lòti ywiti mwə̀ munâ ma wò kut.”

14Bità jis na, “Bâba mu wi hi mòm beka mu tà timi yə jə shyə ale lak yahi bamâ.”

15Yènfù jis na, “Kə wò nè toŋte na shyə ale yule wi ma mu ti lem na ghɨ yulelò.” 16Yènfù jis ni a ghan à tât ghɨ kaha lyi kokhi nì bâh à shyə̀ ale atɨna a nyə̂ kə yu mefû.

17Bità faŋ hì kante na, Yènfù khɨŋa hi yike nâ ghə yi gha afa yi fwo a yi kə̀k agha. Te wù ndùku baha kante, ghɨt ghe a Kònilùs tì tuma yâ, khɨŋ yen ndâ Samùn ben timi yi jwô mbàn, 18toŋa buf na, “Wùt lè chyə lò afân yet yi wuni mô Samùn Bità agha?”

19Bità ndùku baha kwâktè kə yi kwâktì na gha yê yi ye fwo a yi kə̀k yâ yê hì chwûtè na ghə agha, Yohnà Yulena jis ha wun na, “Bità yutî, ghɨta mò afân à tât khɨŋa hi yen a wò. 20Lòti chwô, ma ghàn à ghɨna lo, kə wò wunhi beka à tum mu ghɨna afân.” 21Kə wu yu Bità chwo yen jis ha ghɨna na, “À mò mu we ghàn khɨŋa. Ghàn ben hi nè ghə?”

22Ghɨt atɨna jis na, “Ghàh mò ma à tum Kònilùs a to sù sojà, wu mô kə nâ wut chyə chilichili fânà Fùyèn, nâ ghɨt a Jûs à jɨ̀m ngumle ha wun. Anjèl à Fùyèn yì Yulena ti jis ha wun na, wù toŋa wò ma wò ben a wun a ndâ ma wù fokti gha ha wò.” 23Bità yu ni, jis ha ghɨna na, ghɨna lyê ben ma ghê ghɨna chyə. Tuku yû, Bità lo ghê ghɨna bakhê nì ghɨt a bimena ale a Jobà, 24gbi ni yen lye a Sìsaliyà wu tuk wu kumtenu. À ndùku mô ni Kònilùs yute wûn ma wù ti lâkà ghɨt a wuna ghɨ sah yi nda nì sunsu wunsu, ghɨna bên. 25Te Bità ndùku lye yênà a bɨn afû, Kònilùs yen toŋti ha wûn ngumte a wun ashyə̂ hi kokhe wûn. 26Bità jis ha wun na, “Lòtì a nyə̂, mu boŋa mô kə wût.” 27Bità jis ha Kònilùs ni, lyi yen a ndâ yen ma ghɨta ti yûŋtì dô kə ni. 28Wù jis ha ghɨna na, “Ghàn khəlò nâ na saki ghɨt a Jûs bime wi na ghàh hi jikte tumu a ghɨna sù ndâ, bime wi na ghàh hi gbê nì tum wûn. Biyani chin mò ma Yènfù ti chwûtì ha mu na, mu kəta wi hi jìs na wùt lè yule kpene wi. 29À mò gha ye Kònilùs ye tuma toŋa mu, mu tê bufa jə̀ gha yile nâ hakoh biyani ben kə yi bên. Fôkti lê, a Kònilùs na wò mu ye tum toŋa ha ghə agha?”

30Kònilùs jis na, “À chya kə mu tuk mù kìk chin te mu ndùku jə̂mà a mu nda afân a leŋ a mbɨŋlu sù tât a bɨn a bonana, bûŋtì yen ma wùt ti timi a mu ashyə̂ ma wu ti mak njusu su fufa yi fûf fè njə̂ntè, 31wù jis ha mu na, ‘Kònilùs, Yènfù ti yu jə̂m ya, fî yen yi gâmtì ye wò fo ha ghɨt a fufana. 32Chinhi ghɨta a Jobà ma ghɨna yê toŋa wùt afû yet yi wuni mô Samùn Bità. Wu chyə a Samùn a ndâ a mô wut tôknè nì gwusu nyâmsù, chyə bakhe yi bi jwô yì chìk.’ 33Mu ki chinhe tum kə yu mefû, wò ti khɨti təm a jûŋà fî ben kə yi bên. Chin mô ghàhnà chîntè mô a Yènfù yì dèt, gbûtè hi ywo gha à jɨ̀m ghe Bâba jìsa na wò fokti ha ghàh.”

34Bità jis na, “Mu ti khɨli hamok na Yènfù lyè ghɨt à jɨ̀m kə yi ghəl. 35Wò ki fwu nâbi yìni laki hì ngumle wûn fê nê gha ghe fu khɨŋa ma fu nê hi kôŋà wò. 36Ghàn ti yu tum ye Yènfù che tuma ha Isalì a mô tum yì jùŋ ye yì bènà nì yutìnì tohne a Jisòs Klistù. Jisòs mu wunâ mò Bâba ha ghɨt à jɨ̀m. 37Ghàn khəlò gha kanana ghe ghɨ che chyàlà yi lak yi Isalì afân yì jɨ̀m, kə hi yìme a Galìlî kə wu tuk te Jon yike mihe na ghɨta kəta hi fye mòlû. 38Ghàn khə kəbi te Yènfù tì chwoka lema Jisòs wù Nasalì fo a Yohnà Yulena ha wûn nì jyaka, khə kəbi te wù ndùku gbê chyâ luk tù jɨ̀m nê gha jûŋà fê chwuka ghɨt ghe deblì ndùku fo ngə̂k ha ghɨna beka Yènfù ndùku mô ghê wûn. 39Ghàh tì yen nâ a gha à jɨ̀m ghe wù tì nê a Jèlusalèm nì a luk tu letu yi lak yi Judà. Ghɨ ywi wûn, banti wun a kàkfùtàfù. 40Biyani à hì mô yi bàm mu tuk mù tât, Yènfù lôhì wûn a yi kpû, wù chwûtì ngɨŋ à wûn ha ghɨta. 41Wù tà tì chwûtì jə̂ ngɨŋ à wûn ha ghɨt à jɨ̀m, wù tì chwùti ha ghàh ghe Yènfù tì chwoka lema na ghàh hi mô sù fòktì a gha mɨ ghɨ̂n. Ghàh à ghɨna tî yə̂ fî nyu lò te wù kaha lote a yi kpû. 42Wù fo te yi sâk na ghàh fokti tum yì jùŋ hi chwùtì hamok na wù mò kə nâ wùt we Yènfù chwoka lema na wù hi saka ghɨta ta nì ghɨ kputena. 43À mò kum nâ wun we fòktìsù chiksu sù jɨ̀m ndùku jîsà na à bimi nâbi nde ha wûn ma Yènfù lehèfo gha wuna ghɨ be kum Jisòs.”

Yohnà Yulena ben ha tumu

44Bità hì baha jîsà kə yi jîs, Yohnà Yulena ben nâbi ha nde we wù ndùku yute jîs yi wuni. 45Ghɨt a bimena Jûs ghe Bità tì bèna ghê ghɨna a Jobà amok hì mô nì kani te Yènfù fo Yohnà Yulena ha tumu, 46beka ghɨt a Jûs mɨ ghɨ̂n tì yû te tum mu wûn ndùku jîsà a jîs tu lak tu lôtù, kokhe Yènfù kum gha kanana ghe fu ne. Bità ki jîs na, 47“Ghɨt ghɨ̂n mò ma Yohnà Yulena ti ben ha ghɨna kəbi te ghɨ tì bèna ha ghàh. À mò hi fê tàmtè ghə ghɨna na kə ghɨna fyi mòlû?” 48Wù jis ni ki jîs na, ghɨ fo mòlû ha ghɨna a Jisòs Klistù yi yet. Ghɨna jis ha Bità na wù chyətè kwok ghê ghɨna a tuk mùlè.

선택된 구절:

Fêt 10: bmv

하이라이트

복사

모든 기기에 하이라이트를 저장하고 싶으신가요? 회원가입 혹은 로그인하세요

Ŋwàklù Fùyèn Kàn Mù Fê (Cameron) - 더 알아보기

Fêt 10

Fêt 10
- 인기 성경 구절

듣기 Fêt 10

성경:

Bum

번역본: Ŋwàklù Fùyèn Kàn Mù Fê (Cameron) - bmv

Fêt 10

Fêt 10

Fêt 10 - 인기 성경 구절

듣기 Fêt 10

성경:

Bum

번역본: Ŋwàklù Fùyèn Kàn Mù Fê (Cameron) - bmv

Fêt 10

Fêt 10
- 인기 성경 구절