Fêt 11
11
Bità fòktì banhi gha ye yi tì gàna a Sìsaliyà
1Ghɨt a tuma Jisòs nì ghɨt a bimena ale ndùku mô a yi lak yi Jùdiyà yu na tumu ti boŋ yu gha Fùyènì. 2À mô te Bità kwoka a Jèlusalèm, ghɨt a bimena Jûs hì ngane wûn, 3jîsà na, wù chehì gbê chyâ lye tumu sù ndâ yə ghê ghɨna, teka ghɨ fati ghɨna. 4Bità fôktì kwok nâ gha à jɨ̀m ghe ghɨ ndùku mô ma ghɨ ti gân.
5Wù jis na, “Mu ndùku mô a yi tèk yi Jobà jə̂mà bâh a chika à shyə̀ ale fwu a mu yi kə̀k te ghɨ fwo a jem, mô te bâh à sùnjwo chika, ghɨ chwohe bênà nì ghɨna a nyə̂, ma ghɨ ti ghaŋhi soŋa tɨna à kìk, ghɨ chwohi tom a mu ngwùŋ.” 6Mu shihi tòkà kî, yen nyamsu ndasu nì su ngunsu nì mwə̀ mù ŋàŋlemù nì nyɨ̀mû, 7fî yu Yènfù jîsà ha mu na ‘Bità lòti ywiti mwə̀ munâ ma wò kut.’ 8Biyani mu jis na, ‘Mu wi hi mòm a Bâba beka shyə ale tà timi lyi jə a mu yi jwô sak yahi yi laki bime wi.’ 9Yènfù fî jis kə na ‘Mu ki lem na shyə yule kpenalò hi yə̂, kə wò jìs na sak yahi yi laki bamalò.’ 10Wù jis ni hi tàn a ghan à tât, ghɨ kaha kwok nì mwə̀ mù tɨ̂n a nyə̂ nâ mù jɨ̀m. 11À hì mô kə wu yu mefû, ghɨta ben à tât a ndâ afa mu ndùku chyə atɨ̂n ma ghɨ tum ghɨna a Sìsaliyà na ghɨna bê yen mu. 12Yohnà Yulena jis ha mu na, kə wò wunhi hi yèn ghàn à ghɨna. Ghɨt a bimena ghɨ̂n tufa a mu lye a Jobà ben nì ghɨna, ghàh à ghɨna yen amok a Sìsaliyà yen lye a wùt lè ndâ ghɨ toŋte na Kònilùs. 13Wù fôktì ha ghàh te wù ye yena anjèl à Fùyèn yi mô a wun a ndâ. Anjèl à Fùyèn àtɨ̂n jis ha wun na ‘Tum wùt ma wù yen a Jobà ma wù yê toŋa wùt afû yet yi wuni mô Samùn Bità. 14Wù nè bê fòktèlò gha ha wò ma ghɨ bonhi wò nì ghɨt gha ghɨ sah yi ndâ nâbi nì ghɨt gha ghɨ fetana.’ 15Kə wu yu te mu yìme hi jìs ha ghɨna Yohnà Yulena ben ha ghɨna kəbi te ghɨ tì bèna ha ghàhnà a yìmi. 16Mu kaha kwâktì gha ye Bâba tì jîsà na, ‘Jon ndùku fo mòlû ha ghɨta nì mòlû mù jwò, biyani Yènfù mô hi nè fo mòlû ha ghàn nì Yohnà Yulena.’ 17Mu ki yen hamok na, “Yènfù ti fo Yohnà Yulena ha tumu kəbi te fu tì fo ha ghàhnà a wu tuk afa ghàhnà tì bime ha Bâba Jisòs Klistù, ma mu nê hi mô nâ nde hi tàmtè gha ye Yènfù kəta hi nì agha.”
18À hì mô te ghɨt a Jûs ghɨ bimena ywo kwoka nì gha ye Bità jìsa, ghɨna tê fè jìs gha yile kum wûn, hì kokhe Yènfù jîsà na, “Ghàhnà ti yên na Yènfù ti boŋ fo lumu ha tumu na ghɨna kahi təm a ghɨna a ghɨna gha be ma ghɨna khɨti chyəna ghe ghɨ bè mê wi.”
Nôn à ghɨt a bimena a Antiyòk
19Ghɨt a bimena ghe ghɨ tì teta kum ngə̂k yê yì ndùku mô te ghɨ ywe Sìtifèn ti gbî yen tan a yi lak yi Fònisiyà nì lak yi Sàybulòs nì tèk yi chik yile ghɨ toŋte na Antiyòk. Ghɨna hì fôktè yênà nì tum yì jùŋ kə ha ghɨt a Jûs. 20Biyani ghɨt a bimena ghɨ le fwu ben a Sàybulòs nì tèk yì Sìlên yen kəbi a Antiyòk hì fôktè yênà tum yì jùŋ ha tumu kum Bâba Jisòs. 21Yènfù gâmtì ghɨna nâ haŋaŋ, ghɨt a dona bimî samhi ha Bâba.
22Ghɨt a bimena ghê ghɨ ndùku mô a Jèlusalèm, yu kum gha mi yîn, tum Bànabâs na wù yen a Antiyòk. 23Wù yen afû, yen te Yènfù chwùtè təm a jûŋà ha ghɨna, wù hì saŋlê nâ haŋaŋ, chyati ghɨna na kə ghɨna bè de hi jùmtè Yènfù nì təm a ghɨna à jɨ̀m. 24Bànabâs we ghɨ tì chinhe afû ndùku mô kə nâ wùt wù jùŋ, fate kəta yi bimî ma wù ti lûn nì Yohnà Yulena. Ghɨta bime Yènfù kum wûn dô kə ni.
25Bànabâs fî lô yen a yi tèk yi Tasùs hi khɨŋa Sôl. 26À hì mô te wù khɨŋa yena wûn, wù lyi yen nì wun a Antiyòk, ghê wûn chyə kwok afû a lɨ̀m à fublànà, yike ghɨt a bimena afû ghɨ dô kə ni. Ghɨ tì yìmi hi tè toŋte jùmtìbàmsù Klistù su na Klistènsù a Antiyòk.
27À hì mô kəbi a mu tuk afû, fòktì sulesu lo a Jèlusalèm chwo a Antiyòk, 28yìlè mô a ghɨna fùtɨ̂n yet yi wuni mô Àgabùs. Yohnà Yulena tihe wûn, wu lôtè time atɨ̂n à chìnti fôktè te jìŋ yì kanana nè kwo kə lak tù jɨ̀m. Jìŋ mi yina bè bênà a mô Kɨ̀lodiyàs fə̀n wù chìk. 29Jùmtìbàmsu Bâba se su ndùku mô afû ki lem na nâbi nde kəta hi chinhe yi gâmtì ha ghɨt a bimena a Jùdiyà. 30Ghɨna yûŋtì mwə̀ mù tɨ̂n tum Bànabâs ghê Sôl na ghɨna lyê yê fo ha chəhsu afû.
© Wycliffe Bible Translators, Inc.